ម៉ាថាយ 4

មារសាតាំងប៉ញ្ឆោតព្រះយេស៊ូវ

(ម៉ាកុស ជំពូក ១ ខ ១២ លូកា ជំពូក ៤ ខ ១ តក់ ១៣)

1ម្សាអិង ព្រះវិញ្ញាណនាំព្រះយេស៊ូវចៀអនមារសាតាំងប៉ញ្ឆោតតេកវាលពឺតក្ដាវរហាក់រហិញ 2កឹលោះរ៉ើព្រះយេស៊ូវអាត់ចាសែសិបត្ងៃ សែសិបត្រប៊ឺ ណាវព្យះដយច្នាប់មេនទេន 3កឹមេខាងប៉ញ្ឆោតចូវបៀតព្រះយេស៊ូវ សួរប៉ាយ៖ «បើម៉ៃកនព្រះពឺតមេន វ័ត្មាវដុលណិងផងអនកើតចៀនាំប៉ាំងចៀ» 4ម៉ងព្រះយេស៊ូវឆ្លើយប៉ាយ៖ «ឡឹងគម្ពីរ៍បឺនសួរប៉ាយ “កួយម៉ឹមេនត្មង់អាសារកឹចានាំប៉ាំងម្អិងអឺ កួយត្មង់អាសារកឹពាក្យតឹងម៉ាត់លោះចូវរ៉ើត្នោសព្រះពឺត”#ជំពូក ៤ ខ ៤ ពាក្យណិងកួឡឹងគម្ពីរ៍សញ្ញាតៀតេកជ្រមោះ ចោទិយកថា ជំពូក ៨ ខ ៣។» 5លោះរ៉ើអិង មារសាតាំងនាំព្រះយេស៊ូវចៀទីក្រុងយេរូសាឡឹម ទីក្រុងបរិសុទ្ធ កឹណាវអនព្រះយេស៊ូវត្យឹងឡឹងតម្បូលប៉ហៀរព្រះពឺត 6បឺនកឹណាវសួរព្រះយេស៊ូវប៉ាយ៖ «បើម៉ៃកនព្រះពឺតមេន លោតប៉ន្ទ្រុះសាកមីចៀ ច្បោះឡឹងគម្ពីរ៍បឺនសួរប៉ាយ “ព្រះពឺតអនទេវតាណាវចាំទ្រ័ម៉ៃ ម៉ឹអនអ្ចឺងម៉ៃតង្គិចរ៉ើត្មាវអឺ”#ជំពូក ៤ ខ ៦ ពាក្យណិងកួឡឹងគម្ពីរ៍សញ្ញាតៀតេកជ្រមោះ ទំនុកតម្កើង ជំពូក ៩១ ខ ១១ តក់ ១២។» 7ព្រះយេស៊ូវឆ្លើយប៉ាយ៖ «ឡឹងគម្ពីរ៍បឺនសួរប៉ាយ “ញ្ជ័ក់សាកចិត្តព្រះពឺតទ្រេងម័ង”#ជំពូក ៤ ខ ៧ ពាក្យណិងកួឡឹងគម្ពីរ៍សញ្ញាតៀតេកជ្រមោះ ចោទិយកថា ជំពូក ៦ ខ ១៦។» 8លោះរ៉ើអិង មារសាតាំងនាំព្រះយេស៊ូវសោះប្រូវមូយទីមេនទេន កឹណាវចម្បាយព្រះយេស៊ូវអនពើកនគរ៍តឹងម៉ាត់កួឡឹងក្តែកណិង រ៉ើចម្បាយអនពើកចន្ទ័រ័កៗតឹងម៉ាត់កួឡឹងនគរ៍អិងផងឡង់ 9មារសាតាំងសួរព្រះយេស៊ូវប៉ាយ៖ «បើម៉ៃថ្វាយង្គំកឺ កឺអនម៉ៃចន្ទ័ៗអិងផងតឹងម៉ាត់» 10ព្រះយេស៊ូវឆ្លើយប៉ាយ៖ «មារសាតាំងវ៉ឺយ លោះចៀ ច្បោះឡឹងគម្ពីរ៍បឺនសួរប៉ាយ “ម័ងក្រៃថ្វាយង្គំ រ៉ើក្រៃប៉ម្រើកឹព្រះពឺតទ្រេងម័ងអឺ”#ជំពូក ៤ ខ ១០ ពាក្យណិងកួឡឹងគម្ពីរ៍សញ្ញាតៀតេកជ្រមោះ ចោទិយកថា ជំពូក ៦ ខ ១៣។» 11លោះរ៉ើអិង មារសាតាំងចៀលោះរ៉ើព្រះយេស៊ូវ កឹទេវតាចូវប៉ម្រើព្រះយេស៊ូវ។

ព្រះយេស៊ូវក្យាកួយប៉នណាក់អនចូវវ័សិស្សណាវ

(ម៉ាកុស ជំពូក ១ ខ ១៤ តក់ ២០ លូកា ជំពូក ៥ ខ ១ តក់ ១១)

12ពេលព្រះយេស៊ូវសង់ប៉ាយ កួយកបយ៉ូហានដាក់គុក កឹណាវចៀក្រុងណាសារ៉ែតឡឹងខែតកាលីឡេចៀក្រោយ 13ម៉ងណាវម៉ឹបឺនកួឡឹងក្រុងណាសារ៉ែតអឺ ណាវចៀកួតេកក្រុងកាពើណិមម៉្រង ក្រុងអិងកួងះបឹងកាលីឡេ តេកបនចួសសាប់យូឡូន រ៉ើបនចួសណែបថាលីកួរ៉ើដើម 14ណាវវ័យ៉ាំងអិង អនក្រៃរ៉ើរើងលឹមបេកសួរកួយពាក្យចូវរ៉ើព្រះ ជ្រមោះអេសាយសួរដកប៉ាយ 15“បេកកួឡឹងបនចួសសាប់យូឡូន រ៉ើបេកកួឡឹងបនចួសណែបថាលីតូនក្រណាងះបឹងកាលីឡេ ខាងទឹសទន្លេយ័រដាន់ បេកកួឡឹងស្រុកកាលីឡេ ស្រុកហន់សាសន៍ផ្សិង 16បេកកួឡឹងបនត្រវេក ណាវពើកអ៊ូសមូយពឺតមេនទេន កឹអ៊ូសអិងប្រាងតក់បេកកួចាំកឹក្ចែតឡឹងបនអិង”#ជំពូក ៤ ខ ១៥ តក់ ១៦ ពាក្យណិងផងកួឡឹងគម្ពីរ៍សញ្ញាតៀតេកជ្រមោះ អេសាយ ជំពូក ៩ ខ ១ តក់ ២។ 17កឹតាំងរ៉ើអិងចូវ ព្រះយេស៊ូវប៉្រកាសសួរកួយប៉ាយ៖ «កែប៉្រែចិត្តចៀ ច្បោះទ្រេងថានសួបៀតចូវសោយរាជ្យហឺយ»។

18ពេលព្រះយេស៊ូវប៉កងះៗបឹងកាលីឡេ ណាវពើកបេកប៉ឺរកាបារណាក់កម្ពុងកឹបង់កាឡឹងបឹងអិង បេកអិងណាវសែមសាយរ៉ើឃ្នា សាយអៃជ្រមោះស៊ីម៉ូន ក្យាពេត្រុស សែមអៃជ្រមោះអនទ្រេ 19ព្រះយេស៊ូវសួរបេកអិងប៉ាយ៖ «ចូវ ចូវតូនកឺ កឺអនម័ងប៉ឺរកួយម៉្រង» 20កឹបេកបារណាក់អិងណាវច្ពស់សំឡាញ់តេកអិង ចៀតូនព្រះយេស៊ូវម្ពែច់ 21ពេលព្រះយេស៊ូវប៉កចៀព្នេក ណាវពើកកួយបារណាក់ទ័ន បេកបារណាក់អិងណាវសែមសាយរ៉ើឃ្នា ណាវកនចួសសេបេដេ ណាវកម្ពុងកឹជោសសំឡាញ់ឡឹងទូករ៉ើអូវណាវ សាយអៃជ្រមោះយ៉ាកុប សែមអៃជ្រមោះយ៉ូហាន កឹព្រះយេស៊ូវក្យាបេកបារណាក់អិងអនចូវតូនណាវដែល 22បេកបារណាក់អិងណាវច្ពស់ទូក ច្ពស់អូវ ចៀតូនព្រះយេស៊ូវម្ពែច់។

23ព្រះយេស៊ូវប៉កត្បាល់ម៉ើខែតកាលីឡេ កឹណាវពង្រេនកួយតូនសាលាប៉្រជុំ ណាវប៉្រកាសសួរកួយរ៉ើរើងព្រះចូវសោយរាជ្យ រ៉ើជោយបេកអ៊ីតឹងម៉ាត់អនអ ម៉ឹប៉ាយអ៊ីន្ទ័អឺ 24កឹព្រះយេស៊ូវល្បីតក់បេកខែតស៊ីរីតឹងម៉ាត់ កឹកួយណាវនាំបេកម៉ឹច្អបយ៉ាំងនីយ៉ាំងទោក់ បេកអ៊ីច្នាប់ បេកមារ់ប្រោមូត បេករអែងប៉្រកាច់ បេកក្ចែតតីក្ចែតអ្ចឺងចូវអនព្រះយេស៊ូវជោយ កឹព្រះយេស៊ូវជោយអនអតឹងម៉ាត់ឃ្នា 25កឹកើតកួយក្លឹងកកកុញចៀតូនព្រះយេស៊ូវ បេកនឺចចូវរ៉ើខែតកាលីឡេ បេកនឺចចូវរ៉ើខែតដេកាប៉ូល បេកនឺចចូវរ៉ើទីក្រុងយេរូសាឡឹម បេកនឺចចូវរ៉ើខែតយូដា បេកនឺចចូវរ៉ើខាងទឹសទន្លេយ័រដាន់។

المحددات الحالية:

ម៉ាថាយ 4: KNT

تمييز النص

نسخ