मत्ती 24
24
येसुचे पर्मेस्वर्की दीम् फुप्स्येकी बारेरी सुङ्बल
(मर्कुस् १३:१-१३; लुका २१:५-१९)
1येसु पर्मेस्वर्की दीम् ग्यम्से डोङ्ज्यीम् स्येटीबे बेलोरी थेङ्की डबमा खज्यीम् थेङ्त पर्मेस्वर्की दीम्की दीम्मा ङोन्बरी थेङ्ज खज्यी। 2तर थेङ्चे थेङ्यीमात, “एङ्यीमाचे चुमा जम्मनो म्रङ्ब अय्हीनो स्यीम्? ङ एङ्यीमात देमेन्नो पङ्ब, युङ्ब गीएनो गीकी जोरी टीस्ये अरे, जम्मनो फुप्स्ये मुब” बी सुङ्ज्यी।
3तोव लीप्चे येसु जैतुन् पङ्बे गङ्री स्य्हुटीबे बेलोरी थेङ्की डबमा खुसुक्ले थेङ्ज खज्यीम् ङ्योत्ज्यी, “लोप्पोन्, ङ्यीमात सुङ्जेतो, चु जम्मनो तम्मा खेम तस्ये मुब? ओसेम् थेङ् दोःज्यीम् ब्योन्युटीबलतेङ् चु जम्बुलीङ् नास् तयम्बल मुब पङ्बे चीनो ता तस्ये मुब?”
4येसुचे थेङ्यीमात जोहाप् न्हङ्ज्यी, “चोङ् लज्यीम् टीउ खल्चेएनो एङ्यीमात अलुखइ। 5तलेपङ्सम् य्हक्को म्हीमा ङइ मीन् कीन्ज्यीम् ‘ङ मुक्ती न्हङ्बे ख्रीस्ट् य्हीन्ब’ पङ्ज्यीम् खस्ये मुब, ओसेम् थेङ्यीमाचे य्हक्कोत लुस्ये मुब।
6“एङ्यीमाचे छेत्पलतेङ् छेत्पे नर्सुमा थ्येःस्ये मुब। तर एङ्यीमा हुजु बेलोरी थलोङो। हुजुमाम् तनोथोब, तर हुजु बेलोरीनो जम्बुलीङ् नास्मी अत। 7जाती जातीमा छेत्स्ये मुब, ओसेम् य्हुल् य्हुल्मा छेत्स्ये मुब, य्हक्को ग्लामारी अनीकलतेङ् सङ्गुल् य्हर्स्ये मुब। 8चुमाम् जम्मनो कोल न्हबे बेलोइ ल्हङ्दु खब र्हङ्बकीनो य्हीन्ब।
9“हुजु लीप्चे एङ्यीमात म्हीमाचे चुङ्ज्यीम् दुख पीन्बरी सोप्तीस्ये मुब, ओसेम् सेत्स्ये मुब। एङ्यीमात ङइ लीप्चे ब्रबलमा पङ्ज्यीम् जम्मनो जात्की म्हीमाचे अखोस्ये मुब।
10“हुजु बेलोरी य्हक्को र्हङ्बचे बीस्वास् स्य्हेङ्ब पीत्लास्ये मुब। ओसेम् गीःचे गीःत धोका पीन्ज्यीम् अखोस्ये मुब। 11ओसेम् भ्यु पङ्बे अगम्बक्तमा य्हक्को खज्यीम् य्हक्को म्हीमात लुस्ये मुब।
12“अज्यबे लक्मा य्हक्को तबल तज्यीम् य्हक्को म्हीमाचे गीःचे गीःत म्होइब पीत्लास्ये मुब। 13तर ज्युःसम्मनो बीस्वास्री कोङ्बलमाम् थर्स्ये मुब। 14ओसेम् स्वर्गइ य्हुल्की ज्यबे सम्तर् जम्बुलीङ्की जम्मनो ग्लामारी जम्म जातीमात गवाहीकी लागीरी स्येत्स्ये मुब, हुजु लीप्चे जम्बुलीङ् नास् तस्ये मुब।
लोङ्बे बेलो
(मर्कुस् १३:१४-२३; लुका २१:२०-२४)
15“दानीएल अगम्बक्तचे पर्मेस्वर्की दीम्की पबीत्र ग्लारी ‘नेइबे स्हेः#दानीएल ९:२७; ११:३१; १२:११ रप्पल तस्ये मुब’ पङ्बे तम् एङ्यीमाचे म्रङ्स्ये मुब। (खेत्पलमाचे चु तम् गोथोब।) 16हुजु लीप्चे यहुदीयारी मुबलमा गङ्मारी छ्योङ्य्हर्खइ। 17दीम्की दोरी मुबलमा स्हेःमा कीन्बरी दीम्न्हङ् अवङ्नले छ्योङ्य्हर्खइ। 18म्रङ्री मुबलमा गोइल कीन्बरी दोःज्यीम् अखनले छ्योङ्य्हर्खइ। 19हुजु बेलोरी फोरी कोल मुबलमातेङ् ङ्य्हे ख्वाबे अममात गत्ते दुख तस्ये मुब। 20एङ्यीमा खङ्बे लमा वुइ दुःब न्हबे दीन् खजुरीएनो छ्योङ्य्हर्अथोखइ बी प्रार्थना स्य्हेङो। 21तलेपङ्सम् हुजु दीन्री तस्येकी ङ्हच्छ्यङ् दुख जम्बुलीङ् ठुङ्ब य्हङ्से देरेसम्म तबल अरे, ओसेम् दोःज्यीम् खेमेएनो तस्ये अरे। 22हुजु दीन्मा पर्मेस्वर्चे स्याअजेत्पल य्हीन्सम् खलएनो थर्स्ये अरे, तर थेङ्चे दम्जेत्पलमाकी लागीरी हुजु दीन् स्याजेत्स्ये मुब।
23“हुजुलीप्चे एङ्यीमात खल्चे पङ्लेनो ‘च्याको, मुक्ती न्हङ्बे ख्रीस्ट् चुरी मुब!’, ‘क्युजुरी मुब!’ बी पङ्ज्यी पङ्सम् थेङ्यीमाकी तम्त बीस्वास् थस्य्हेङो। 24तलेपङ्सम् भ्युकी ख्रीस्ट्मातेङ् भ्युकी अगम्बक्तमा खस्ये मुब। थेङ्यीमाचे ङ्हच्छ्यङ्-ङ्हच्छ्यङ् चीनोमातेङ् अचम्मइ लक्मा ङोन्ज्यीम् पर्मेस्वर्चे दम्जेत्पलमातएनो खम्ब सम्म लुब म्हइस्ये मुब।
25“ज्यनले ङ्येनो, चु तम् ङचे एङ्यीमात ङोन्ग्यम्नो स्येत्पीन्बल मुब। 26होत्तज्यीम् खल्चे पङ्लेनो एङ्यीमात, ‘च्याको, थेङ् उजाड ग्लारी मुब’ बी पङ्लेनो एङ्यीमा हुजुरी थङ्यीउ। ओसेम्, ‘च्याको, थेङ् अम्रङ्बे ग्लारी मुब’ बी पङ्लेनो थेङ्यीमाकी तम्त बीस्वास् थस्य्हेङो। 27तलेपङ्सम् तीप्लीक् फ्लीक्पतेङ् मुरी स्यर् य्हङ्से न्हुब् सम्मनो य्हल् तब र्हङ्ले म्हीइ ज युबे दीन्रीएनो जम्म म्हीमाचे थेङ्त म्रङ्स्ये मुब। 28खन सीनु तब हुजुरी गीद्दमाएनो #२४:२८ गीद्दमाएनो गीद्दमाचे सीनुत खनचे पङ्लेनो म्रङ्ब र्हङ्ले म्हीइ युबे बेलोरीनो खल्चे बीबीनो म्रङ्स्ये मुब।र्हुब् तब।
म्हीइ ज युस्येकी दीन्
(मर्कुस् १३:२४-२७; लुका २१:२५-२८)
29“हुजु दुखइ दीन् बेब साच्चेनो दीनी म्हुन्दुङ् तस्ये मुब, ओसेम् लनीचे य्हल् पीन्स्ये अरे, सारमा मुचे तइस्ये मुब, ओसेम् मुरी मुबे सक्तीमा य्होङ्स्ये मुब।
30“हुजु लीप्चे म्हीइ जइ चीनो मुरी म्रङ्स्ये मुब, ओसेम् जम्बुलीङ्की जम्मनो म्हीमा क्रास्ये मुब। थेङ्यीमाचे म्हीइ जत मुक्पन्हङ् ङ्हच्छ्यङ् सक्तीतेङ् महीमारी युटीबल म्रङ्स्ये मुब। 31ओसेम् थेचे र्हङ्की स्वर्गदुत्मात तुरहीकी ङ्हच्छ्यङ् केत्तेङ् बक्च्य जम्बुलीङ्की जम्म ग्लामारीनो पीत्स्ये मुब। थेङ्यीमाचे पर्मेस्वर्चे दम्जेत्पलमात ग्ला गीःरी र्हुब लस्ये मुब।
नेभारइ दोङ्बो ग्यम्से लोप्जेत्पल
(मर्कुस् १३:२८-३१; लुका २१:२९-३३)
32“नेभाराइ दोङ्बो ग्यम्से तम् लोपो, दोङ्बोरी बुर्लो बुज्यीम् बामा डोङ्बतेङ् एङ्यीमाचे छप्प ल खयम्नेम् बी स्येःब। 33होलेनो चु जम्मनो तम्मा तबल म्रङ्बतेङ् म्हीइ ज युबे बेलो ज्यदङ् खज्यीन्बल मुब बी स्येःको। 34ङ एङ्यीमात देमेन्नो पङ्ब, चु जम्मनो तम्मा टोप अत गदे चु पुस्ता म्हस्ये अरे। 35मुतेङ् जम्बुलीङ् म्हज्यीम् य्हर्स्ये मुब, तर ङइ छीमा खेमेएनो म्हस्ये अरे।
चोङ् लज्यीम् टीउ
(मर्कुस् १३:३२-३७; लुका १७:२६-३०,३४-३६)
36“हुजु दीन्तेङ् बेलो खेम खस्ये बी खल्चेएनो स्येबल अरे। न्ह स्वर्गइ स्वर्गदुत्माचे स्येःब न्ह पर्मेस्वर्की जचे स्येःब। हुजुम् पर्मेस्वर् अपचेकीनो खेम्जेत्प। 37म्हीइ ज दोःज्यीम् युस्येकी बेलोरी नोआकी बेलोरी र्हङ् तस्ये मुब। 38तलेपङ्सम् ङ्हच्छ्यङ् भल् युब बीमम् ङोन्ग्यम् नोआ ङ्हच्छ्यङ् दोङ्गरी वङ्बे दीन् सम्मनो म्हीमा चटीबल, थुङ्टीबल ओसेम् भ्या स्य्हेङ्टीबल मुबल। 39ओसेम् ङ्हच्छ्यङ् भल् युज्यीम् थेङ्यीमात अनाबोर्गते थेङ्यीमाचे ता तटीब बी अस्ये। म्हीइ ज युबे बेलोरीएनो होलेनो तस्ये मुब। 40हुजु बेलोरी म्रङ्री लक् स्य्हेङ्टीबल ङ्य्ही न्हङ्री गीः बोर्स्ये मुब, ओसेम् गीम् हुजुरीनो ख्लेथेन्स्ये मुब। 41र्हन्द ब्राटीबे अमकोलामा ङ्य्ही न्हङ्री गीः बोर्स्ये मुब, ओसेम् गीःम् हुजुरीनो ख्लेथेन्स्ये मुब।
42“होत्तज्यीम् चोङ्ले टीउ, तलेपङ्सम् एङ्यीमाकी प्रभु खेमा ब्योन्युस्ये बी एङ्यीमाचे स्येबल अरे। 43तर चु तम् गोउ, दीम्की न्यबोचे म्हुनरी य्हो खजु बेलोरी खब बी स्येबल य्हीन्सम् थे अन्हुनले टीस्येल, ओसेम् य्होत दीम्न्हङ् वङ्अपुङ्स्ये मुबल। 44होत्तज्यीम् एङ्यीमाएनो चोङ्ले टीउ! म्हीइ ज एङ्यीमाचे अम्हेन्बे बेलोरी युस्ये मुब।
बीस्वासीलोतेङ् बुद्दी मुबे योक्पो
(लुका १२:४१-४८)
45“बीस्वासीलोतेङ् बुद्दी मुबे योक्पो खल य्हीन्ब? चुम् थेत थेइ न्याबोचे दीम्की ल्हो-ल्हो योक्पोमात ठीक् बेलोरी चब पीनो पङ्ज्यीम् जीम्मा पीन्ब। 46न्याबो दोज्यीम् दीम्री खबे बेलोरी होलेनो स्य्हेङ्टीबल यङ्बे योक्पो मोलम् यङ्बे योक्पो य्हीन्ब। 47ङ एङ्यीमात देमेन्नो पङ्ब, न्याबोचे हुजु योक्पोत थेइ जम्मनो स्हेःमाकी जीम्मा पीन्स्ये मुब। 48तर योक्पोचे अज्यबे सेम् थोज्यीम्, ‘ङइ न्याबो गेःनले खब’ बी म्हेन्ज्यी, 49ओसेम् र्हङ्तेङ् बक्च्य लक् स्य्हेङ्बे ल्हो-ल्हो योक्पोमात तोज्यीम् ज्यी थुङ्बलमातेङ् बक्च्य चब थुङ्ब लज्यी। 50हुजु लीप्चे न्याबो थेचे अम्हेन्बे दीन्तेङ् बेलोरी दोःखस्ये मुब। 51ओसेम् न्याबोचे थेत सजाय पीन्ज्यीम् कपटीमातेङ् बक्च्या ख्लापीत्स्ये मुब। हुजुरी थे स क्रीतीक्ज्यीम् क्रास्ये मुब।”
المحددات الحالية:
मत्ती 24: WTDG
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2024 (Active), Wycliffe Bible Translators, Inc. All rights reserved.
