लूका 23
23
येशू पिलातसौ म्याहासाङ
(मत्ती २७:१-२,११-१४; मर्कूस १५:१-५; यूहन्ना १८:२८-३८)
1सभाङ ङुच पट्ट न भर्मीको सोवार येशूकी पिलातस लेठाङ राका। 2होखुरीकै होसकोकी दोष लैडीचै डेया, “इचे ‘कैसरकी कर याखी मापर्ले’ र लाहाकी ‘ङा न मुक्ति याछ ख्रीष्ट राजा हो’ डेयार कानुङ देशुङ भर्मीकोलाक भड्कडीमन लेच कानै डुपा।”
3पिलातसै होखुरीकुङ कुरा सेयार येशूकी गीना, “ही नाको यहूदीकुङ राजा हो?” येशूये जवाफ याहा, “होसे च नाखोल्है न डेमन ले।” 4पिलातसै मुख्य पूजाहारीको र भीडकोलाक डेया, “ङै इसे भर्मीयाङ हीर दोष माडुपा।” 5तर होखुरीकै साप्फी च्याकार डेया, “इचे पट्ट यहूदिया र गालील लकीङ इसे ठाँउसम्म शिक्षा याहार भर्मीकोलाक भड्कडीमन ले।” 6तर पिलातसै इसे सेयार डेया, “इसे भर्मी गालीलुङ हो।”
येशू हेरोदौ म्याहासाङ
7येशू हेरोदौ मुलुकुङ भर्मी लेसा डेम थाहा डीन्हार पिलातसै होसकोकी हेरोद लेठाङ बीर्न्हका। होडीक बेला हेरोद मेल्हा र यरूशलेमाङ न लेया। 8येशूकी डाङार हेरोद माह्राङा। हीजैडेनाङ होचे येशूओ बारेयाङ सेमन्या र वास्टै दिन लकीङ होसकोकी ङोस्की मीमन जाट्नन्या। होसकै जाट्च अचम्मौ काम ङोस्की आशा जाट्नन्या। 9हेरोदै होसकोकी वास्टै कुराको गीना, तर येशूये होसकी हीर जवाफ माह्या। 10मुख्य पूजाहारीको र धर्मगुरुको सोवार होसकोकी एकोहोरो दोष लैडीकी ठाला। 11हेरोदै लहो सिपाहीकोखाटा खाटार होसकोकी गिल्ला जाट्चै बेइज्जत जाटा। होटै राजै बील्छ ल्याक्च न बढीन बील्हाकार पिलातस लेठाङ न ल्हेट्न का। 12होसनीक न हेरोद र पिलातस खाटा, हीजैडेनाङ अगाडि होखुरीक माखाट्नन्या।
येशूकी मृत्युदण्ड याछ
(मत्ती २७:१५-२६; मर्कूस १५:६-१५; यूहन्ना १८:३९–१९:१६)
13पिलातसै मुख्य पूजाहारीको, शासकको र भर्मीकोलाक भेला जाटा। 14होटै होचे होखुरीककी डेया, “नाखुरीकै भर्मीकोलाक भड्कडीच डेम इसकी ङौ म्याहासाङ राका। तर नाखुरीकुङ म्याहासाङ केरकार जाट्नाङ नाखुरीकै इसे मीटाक लैडीच अभियोगौ दोष ङै हीर माडुपा। 15हेरोदै र हीर दोष माडुपा र आसकोकी कान लेठाङ न ल्हेट्न का। ङोस्नी, आसकोये मृत्युदण्ड डुप्च हीर काम माजाट्नने। 16होटबाटै ङा आसकोकी कोर्रा ङाप्की लैडीयार डास्न याल्हे।” 17[छुटकारौ चाडौ समयाङ होखुरीकुङ लागि पिलातसै काट कैदीकी डास्न याखी पर्च चलन लेया।]#२३:१७ कोइ कोइ संस्करनौ बाइबलाङ इसे पद माले। 18होटै होखुरीक पट्टकै न च्याक्चै डेया, “इसकी साट्नी र कानुङ लागि बारब्बाकी डास्न यान्ही।” 19बारब्बा चहिँ सहराङ छान्च विद्रोह र भर्मी साट्च आरोपाङ झ्यालखानाङ पर्नन्या।
20येशूकी डास्न याछ मीमन जाटार पिलातसै फेरि होखुरीककी सम्झडीया। 21तर होखुरीक पट्टकै च्याक्चै डेया, “क्रूसाङ टङ्गडीनी, होसकी क्रूसाङ टङ्गडीनी।” 22होटै सोम खेपाङ पिलातसै होखुरीककी डेया, “हीजै, इसे भर्मीये ही अपराध जाट्नने र? ङै च इसकी मृत्युदण्ड याखी पर्च दोष हीर माडुपा। होटबाटै इसकी ङा कोर्रा लैडीयार डास्न याल्हे।” 23तर होखुरीकै झन् बाड्को स्वरै च्याक्चै डेया, “होसकी क्रूसाङ टङ्गडीकी न पर्ले।” इटजाट्न भर्मीकै च्याकार न जुवा। 24होटै पिलातसै होखुरीकै ङेछ पूरा जाट्न याछ फैसला सेटाका। 25होचे विद्रोह र भर्मी साट्च आरोपाङ झ्यालखानाङ पर्च भर्मीकी चहिँ डास्न याहा। होटै येशूकी होखुरीकुङ मीमन अनुसार जाट्की डेम जिम्मा याहा।
येशूकी क्रूसाङ टङ्गडीच
(मत्ती २७:३२-४४; मर्कूस १५:२१-३२; यूहन्ना १९:१७-२७)
26होखुरीकै येशूकी लार होटै नुङ्चै जाट्नाङ, लाङ्घा लकीङ राम्हन लेच कुरेनी डेच ठाँउङ सिमोन म्यार्मीनुङ भर्मीकी घोवा। होटै येशूओ क्रूस बुसाकार होसकुङ न्हुङ-न्हुङ ह्वाकी लैडीया। 27भर्मीकुङ बाड्को भीड होसकुङ न्हुङ-न्हुङ नुङा। होला मास्टोको र लेया। होखुरीक येशूओ लागि विलाप जाट्चै राप्मन लेया। 28होखुरीक पट्टी ल्हेसार येशूये डेया, “ए यरूशलेमौ मास्टो मीजाको, नाखुरीक ङौ लागि माराप्नी। तर नाखुरीक लहो लागि र मीजाकुङ लागि राप्नी। 29हीजैडेनाङ ङोस्नी, होसे दिन र राम्हन ले, होटै भर्मीकै डेले, ‘नाखुरीक बाँझीको, सेन र गर्भवती माछान्चको र दुध कास्की मापर्च मास्टो भर्मीको धन्यौ ले।’ 30होस बेला होखुरीकै पहाडकोलाक डेले, ‘कान मीटाक झाल्नी’ र डाँडाकोलाक ‘कानकी हुप्नी’ #होशे १०:८ 31हीजैडेनाङ होखुरीकै सीङौ म्यार्टुङ फीछ लेनाङ च याङ्च काम जाट्ले डेनाङ, झन् छोक्नाङ ही जाट्ले औला?”
32होखुरीकै नीस जना अपराधीकी र येशूखाटा काठोवाङ न साट्की आल्हा। 33होटै होखुरीक खप्परे डेठाङ टाह्रा। होला होखुरीकै येशूकी क्रूसाङ टङ्गडीयार होसे नीस जना अपराधीकी काटकी होसकुङ डोर पट्टी र अर्कोकी देब्रेपट्टी क्रूसाङ टङ्गडीया। 34होस बेला येशूये डेया, “ए बोइ, इखुरीककी क्षमा यान्ही हीजैडेनाङ इखुरीकै ही जाट्न न ले, होसे इखुरीककी हीर थाहा माले।” होटै होखुरीकै होसकुङ बढीन चिठ्ठा कार पुङा। 35भर्मीको टोङ्हार ङोस्न ङुमन्या। होटै अगुवाकै चहिँ होसकोकी खीस्डीचै डेया, “इचे अरुकी च जीवाटाका। इडीक इसे परमेश्वरै चुन्डीच मुक्ति याछ ख्रीष्ट हो डेनाङ इचे लाहाकी र जीवाटाक्ख्यो।”
36सिपाहीकै र राहार होसकोकी सिर्का याछै गिल्ला जाटार डेया, 37“इडीक नाङ यहूदीकुङ राजा हो डेनाङ लाहाकी जीवाटाको।” 38होटै होसकुङ मीटालु टकी “इसे यहूदीकुङ राजा हो” डेच दोष-पत्र रीकार टाँस्डीया। 39क्रूसाङ टङ्गडीच नीस अपराधीयाङ काटै चहिँ होसकोकी खीस्डीचै डेया, “ही नाको मुक्ति याछ ख्रीष्ट होइन? नाको लाहाकी र जीवाटाक्नी कानकी र जीवाटाक्नी।” 40तर होसकी अर्कोये च्याक्चै डेया, “नाङ र होसे न दण्ड भोग्डीम ङुनाङ र नाङ परमेश्वरखाटा माबीह्रीले? 41कानै च मासेछ काम जाट्च बाटै दण्ड डुप्नने। तर होसकै च हीर मासेछ काम माजाट्ने।” 42होटै होचे डेया, “ए येशू, नाको लहो राज्याङ रान्हाङ ङाकीर आर्मीट्नी है।” 43होसकै डेया, “साँच्ची न ङा नाकोकी डेले, छीनी न नाको ङाखाटा स्वर्गाङ छान्ने।”
येशू सीच
(मत्ती २७:४५-५६; मर्कूस १५:३३-४१; यूहन्ना १९:२८-३०)
44नाम्सीन बाह्र बजे छानन्या। होडीक बेला लकीङ सोम बजेसम्म देशभरि न छुम्हा। 45नाखानै ट्याङ्छ माह्या। होडीक न बेला परमेश्वरौ मन्दिरुङ पर्दा मीघ्याङ नीस भाग छानार च्याहा। 46होटै बाड्को स्वरै च्याकार येशूये डेया, “ए बोइ, ङा ङौ आत्मा नाकुङ मीहुटाङ याल्हे।” इडीक डेयार होसकै लहो प्राण डासा।#भजनसंग्रह ३१:५
47इसे पट्ट न घटना डाङार कप्तानै परमेश्वरौ प्रशंसा जाट्चै डेया, “साँच्ची न इसे भर्मी धर्मी लेया।” 48इसे घटना ङोस्की भेला छान्च पट्ट न भर्मीकै याङ्च डाङार, विलाप जाट्चै लाहा लहो छाति हीर्कडीचै इमाङ ल्हेसा। 49तर होसकुङ लहो चीन्डीच भर्मीको र गालील लकीङ होसकुङ न्हुङ-न्हुङ राछ मास्टोकै लोसीङ न टोङ्हार इसे पट्ट न घटनाको ङोस्न ङुवा।
येशूकी चिहानाङ डाच
(मत्ती २७:५७-६१; मर्कूस १५:४२-४७; यूहन्ना १९:३८-४२)
50योसेफ म्यार्मीन लेच काट जना असल र धार्मिक भर्मी लेया। होसे महासभौ सदस्य र लेया। 51तर होचे होखुरीकुङ सल्लाह र कामकी मामन्डीमन्या। होसे यहूदियुङ अरिमाथिया डेच सहरीङ राम्हन्या। होसे परमेश्वरौ राज्यकी लेन्न ङुमन्या। 52होचे पिलातस लेठाङ नुङार येशूओ लाश ङेहा। 53होचे क्रूसीङ होसकुङ लाशकी झाङ झालाकार मलमलौ नरम बढीनाङ बेह्रडीया। होटै बाड्को ल्हुङ्की खोप्डीयार खास्च चिहानाङ आल्हार डा। होसे चिहानाङ पहिला सुओर लाश माडामन्या। 54होसनीक म्हुङ बाट्चनीकौ तयारीयो दिन लेया र म्हुङ बाट्च दिन सुरु छान्की पामन्या। 55गालील लकीङ येशूखाटा राछ मास्टोको योसेफौ न्हुङ-न्हुङ नुङा र होसकुङ लासकी कुटजाट्न चिहानाङ डा होसे ङोसा। 56होटै होखुरीक इमाङ ल्हेसार लाशकी मोल्खी डेम बासना राछ मलम र अत्तर ठिक पार्या। तर पीउह्राक लेखो म्हुङ बाट्च दिन लेचबाटै होखुरीकै व्यवस्थौ आज्ञा अनुसार होसनीक म्हुङ बाटा।
المحددات الحالية:
लूका 23: EMGP
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Mother Tongue Translators Society and Wycliffe Bible Translators, Inc.
