ኻወርየታኒዙ ሰቭ 5
5
ፈወነ 5
ኻናንየስመ ሰቢረስ
1ኻናንየ ይሽተው ላው እጅር ሰቢረ ይሽትረይ ጝውነ ጅቅ ኣቕ ቺዝጝ ቅዩ። 2ጝውነም ኣርቕራጐስ ቅይሽ ችጝሸው ጊንዝቪስ ግቨርድ እዳዝ ግቨርድ ኻወርየታኒዝ ልኲል ፊስ እቝሩ። 3ቢጥሮስ ግን እንት ዩ፦ «ኻናንየ! መንፈስ ቅዱስት ኻጝስተ፣ ቅይሸው ጊንዝቪስም ግቨርድ እዳዝተ ማጥን ውርጘ ሲጣን ክእዘኒል ጥዉ! 4ቂዪጝቀ በውገ ክቕምቱ ዊኒየውመ? ቂረት ግረስ ኣቕሽ ጊንዝቭድ በገዘ ክቕምቱ ኣየውቀ? እደስለ ውር ቃጥ እነየው ዊገ ኻስቭሩ? ነን ኻጝስረውድ እደረትጚ እጅርም ኣየው» ዩ። 5ኻናንየም እኒንት ወሸጘ በውዝ ሊቭ ጝግል ክሩ፤ እኒንት ወሸቍድም እጝቅቅ ኽየው ጐውትዝ ስርሽ። 6ውርጋጥም ጕጝ እርሸድ ጊንዝጝ ፊስጝ ዲቭ።
7ሻቘ ሰት ኣጠ ዲቈት ግረ ጝውነ ኣቐው ዊገድቅ ኣርቒጝቀ ተትር ጥውች። 8ቢጥሮስም፦ «እስቲ ድቋ! ክታቺዝጝድየንት ቅይርነውድ እንቝጥጘዝመ?» የው ዋቕሩ፤ ጚይም፦ «የይ እንዛዝ የጝ» ይች። 9ጘጝም፦ «ኣደረት መንፈስድ ኻጝስትርነ ኣወይርን ቲስመምርኑ? እንወ ክጕርየት ዲቭጝ ዋጥረቍ እቅድ ሚረይል ችጝጝኵ፤ ክትም ፊስጝ ዲቭጥቍ» ዩ። 10ጚይም በውዝ ጝልኲል ሊቭር ክርች፤ ውርጋጥድም ጥውጛንድ ክትር ዊንች፤ ጛይም ፊስጝ ጝርጕርየት ጋቢል ዲቭ። 11ምመናንድም ኣጝነ እኒን ዊገድ ወሸቍ እቅድቅ ኽየው ጐውትዝ ስርሽ።
ኻወርየታኒዝ ናኒዝ ንቕፀቍ ታምራን ፃቭሽትጘጘ
12ኻወርየታኒዝ ናኒዝም ንቕፀቍ ዲንቅሰቍ ታምራን ፃቭሽትጛ ዊን፤ ምመናንም እጝቅቅ ላው ኣቕጝ «ሰለሙንት ሚረ» የነይ ዋጥርጥረነየንትል ኣኽቭሽጛ ዊን። 13ጛዝለ ላጥ እቂስ ጛጅቅ ዲቭልቅሽጠ ዲፍረው ኣውማው እጅርም ዊኒየው፤ ኣነጚ ኽዝቭድቅ ጛት ኪብርዛ ዊኑ። 14ንቕፀቍ እቍንዝመ ግልቍዝም ኣደረት ኣምንጛ ግሪ ጨቨቅ ጛግል ቈሺትጛ ዊን። 15እንዝ ማጥን ቢጥሮስ ጝዝ ዲቋንድ ጝፃመድ እኳ ላው ላዊል ሊቭጠ ማጥን ይጝ ፅውዝጅንጥድዛት ኣረትዝመ ወሰከዝ መውርጛ ቢዘይል እቝርጛ ዊን። 16ቈሽም እየሩሳልየምት ጅልወይዝቍ ኻትምጢስ ፅውዝጅንጥዝመ ርኵሳን መንፈሳኒዝ ተሰቃይሸቍድዛትቅ ነሰጛ ንቕፀው ኽዝቭ ኣኽቭሻ ዊኑ፤ ተረቍድም እጝቅቅ ቓድጛ ዊን።
ኻወርየታኒል ስድትዝመ ሚከረዝ ተረጘ
17ካኽነጣነ ኻልቀይዝመ ጝጅቅ ዊነቍ ሰዱቃኒዝ ዊግንድ ግን ጭቕጘ ቀኒጛንስቅ ፃለትነይዝ ጕ። 18ኻወርየታንድዛትም ፃይጝ ኽዝቪዙ ወኽኒ ጝኒል ጐይስ። 19እደረት መላክ ግን ኻሪዝ ወኽኒ ጝኒዙ ቢለድ ብዝ፦ 20«ፊጥን መቅደስ ጝኒዙ ኣደቫቫይል ችብትርን እኒን ርዅየዙ ቃልድየንት ኽዝቪዝ ድቍጥን» ዩ። 21ኻወርየታንድም መላክድ ኣዘጘ ቅሸነይዝ ጕጝ ፊርጝ መቅደሲዝ ኣደቫቫይል ችብርጝ ኽዝቪዝ ክንሰነው ኪርም። ካኽነጣነ ኻልቀይዝመ ጝጅቅ ዊነቊዝ ግን ተርጝ ኣይዅዳኒዙ ሸጐዊዝመ እስራየልት ሽመቅሊዝዛት እጝቅትቅ ላው ፃቭጝ ኣኽቭ፤ ኻወርየታንድዛትም ነስጥጘ ማጥን ወኽኒ ጝኒዝጐ እቅ እፃቕ።
22እፃሸቍድም ወኽኒ ጝኒል ፊር፤ ኻወርየታንድዛት ግን ችጚየቍም፤ ዋጥርጝ ፊርጝም እንት ይጝ ድቍ፦ 23«ወኽኒ ጝንድ ኪው የው ቘልፍሸጘ፣ ዘቨኝጥድም ሚረይል ችብርጘጘ ችጝኑን፤ ብዝን ጥውናንድ ግን ኣቒል ላው እጅርም ችጚነቅ» ይ። 24መቅደሲዝቍ ዊተድሪዝ ኣዘተይዝመ ካኽነጣነ ኻልቀይዝም እኒን ዊገድ ወሽጛንድ፦ «እን ዊገድ ወረጘ የጝ!» ይጛ ግራ ጥውጛንስቅ ጛቍዝ ዊግተነውድቅ ብ። 25እንዝ ግረ ላው እጅር ተር፦ «እንወ ወኽኒ ጝንል ድውርነቍ እቅድዛይ መቅደስ ጝኒዙ ኣደቫቫይል ችብርጝ ኽዝቭድ ክንስጘኵ» የው ድቁ። 26ዊተድሪዝ ኣዘተድም ዊተድር ፃይ ፊር ፃይጝ ነስ፤ ኣነጚ ኽዝቭድ ቕርጘዝ ድድባየጘ ጐውትጛንስቅ ኻይልዝ ኣዪጝቀ ኻጝስጛ መለዝ የጝ ነስጘውድ።
27ኻወርየታንድዛትም ነስጝ ሸጐዊዝ ማኽሊል ችብስ፤ ካኽነጣነ ኻልቀድም እንት የው ዋቕሩ፦ 28«ሊጘት እየሱስት ሽዝ ክንሳይርነጘ ጣጝቅቅሲነቃ? ክትን ግን ክታክንድጚዝ እየሩሳልየም ኻትመድየንትቅ ችጝዝርኑ፤ ይናት እድ እጅሪዝ ብርቍ ፃቭትርነ በንርነኵ» ዩ።#ማቲ. 27፡25። 29ቢጥሮስስመ ላጥ ኻወርየታኒዝም እንት ይ፦ «እጅርዝ ኣዚተነዊስ እደረስ ኣዚትነ ጥውሸኵ! 30ክትን ቃነል ሲቅልድርን ቍውርነው እየሱስት ይናኣቅልዝ ኣምላክ እደረ ክርጘይስ ጕሱ። 31እደረ እኒን እየሱስት እስራየላኒዝ ንስኻዝመ ኽጥያቲስ ይቅር ይሽተነውዝ ይውጠ ማጥን እጝቅት ንየቱ ቓዘተም ፃቭ ኪብርዝ ጝለዊል ጐይስኩ። 32ይንም እን ዊገይዝ ሚዝረጫን የጝ። ቈሽም እደረ ጝጭስ ኣዚተቍዝ ይወው መንፈስ ቅዱስ ሚዝር የጝ» ይ።
33ጛይም እኒንት ወሽጛንድ ጭቕጘ ቈጣሽ፤ ቍውጥጘም በን። 34ዊገድ ግን ኽዝቪዝቅ ኪብረው ላው ገማልያል የነው ወሪትት ኽግ ክንሰተ ኣቐው ፈሪሳነው እጅር ጕ ሸጐዊዝ ማኽሊል ችብር ኻወርየታንድዛት ቢዘይል ፊስጝ ዊቱ ዊንዝጥጘ ማጥን ኣዙ። 35ሸጐዊዝም እንት የው ዊግቱ፦ «እፈ እስራየልት እቅ ክታትርነ! እንዛይ እቂል ሚንትርነ ፃቭትርነ ኻስቨነዊስ በውገ ክታቕምስ ጣጝቅቅጭጥን። 36እንዝ ሚቅ ቲወዳስ የነው እጅር፦ ‹ያን ኽየር ኣጨ› የው ጕ ዊኑ፤ ሲዘ ላ ኣጥጘ እቅም ጝት ዲግፍጝ ቲክንጝ ዊን፤ ዊገድ ግን ጘጝም ክሩ፤ ጝት ቲክነቍድም ቢትንሽ፤ ዊገድም ዊኒየጘ ኣቕ እዳቑ። 37እንዝ ግረ ቈሽ ኽዝቭ እጊታንት ኰሪዝ ይዅዳ የነው ገሊለቱ እጅር ጕ ንቕፀቍ እቅ ቲክንዝ ሺፍቱ፤ ኣነጚ ጘጝም ድዙ፤ ጝት ቲክንጝ ዊነቍድም ቢትንሽ። 38እንዝ ማጥን ነንም ያን ክታት ዊግጠውድ፣ እንዛይ እቅድዛት በጥን ዳቕትርነ፤ ጛይ ሰራሽጘውድ እቀ ኻሰቭ ኣቕሽ ድዝጡ። 39እደረት ኻሰቭ ኣቕሽ ግን ወሰገቨ እደረ ጅቅ ጐርትርነ ኣሽጚ ጛት ድስትርነ ቸላይርነቅም» ዩ።
40ጛይም እኒን ምኽርድ ለምር፤ ኻወርየታንድዛትም ጭጝስጝ ጊርፍዝ፤ ሊጘትም እየሱስት ሽዝ ዊግታይጘጘ ጣጝቅቅስጝ በርጝ እክስጝ በርስ። 41ኻወርየታንድም እየሱስት ሽዝ ውርድየት ለምረነውዝ ኣቭቃጛንስቅ ዲስ ይጛ ሸጐዊስ ፍጝ ፊር። 42ግሪ ጨቨቅም መቅደስ ጝኒስም ኣነ ኪውዝ ኪውቅ እየሱስ ጘጝ ክርስቶስ ኣቐጘ ሲቭከነውዝመ ክንሰነውዝ በርየቍም ዊን።
المحددات الحالية:
ኻወርየታኒዙ ሰቭ 5: ኽምጣኣኪ
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
