ኻወርየታኒዙ ሰቭ 4
4
ፈወነ 4
ቢጥሮስስመ ይዃንስስ ኣይዅዳነ ሸጐዊል ኣልትጘጘ
1ቢጥሮስስመ ይዃንስስ ኽዝቪዝ ዊግትጛ ሲጝቀ ካኽነጣኒዝመ#4፡1 ላው ላው ትርጕማን፦ «ካኽነጣነ ኻልቅጢዝመ» ይጘኵ። መቅደሲዝ ዘቨኝጢዝ ኻልቀይዝ፣ ሰዱቃንም ኣቕጝ ድጝግትዝ ጝታጐ ተር። 2ጛይም ኻወርየታንድዛይ ኽዝቪዝ እየሱስ ክርጘይስ ጐጘዝመ ጝቍዝም ክርጘይስ ጐነ ፅበጘ ክንስጙዝ ኻልክሽ። 3እንዝ ማጥን ቢጥሮስስመ ይዃንስስ ፃይ፤ ሰትድም ኵን ዊናንስቅ ቅሽጢስቅ ወኽኒ ጝኒል ጭስ። 4ኣነጚ ቢጥሮስታይ ዊግትጘው ቃልድ ወሸው ኽዝቪስ፣ ንቕፀቍ እቅ ኣምን፤ ኣምነቍ እቂስም ግልቍዙ እግዘድ ኣኰ ሽኺዝጐ ንየስ ዩ።
5ጛምርሲዝም ኣይዅዳነ ኻልቅጢዝመ ሽመቅሊዝ፣ ወሪትት ኽግ ክንሰጢዝም ኣቕጝ እየሩሳልየም ኣኽቭሽ። 6ኣኽቭሸቊዝ ማኽሊስም ካኽነጣነ ኻልቀ ኻነስመ ቀያፈስ፣ ይዃንስመ እስክንድረውስስ፣ ካኽነጣነ ኻልቀይዝ ዚምዳንድቅ ዊን። 7ጛይም ሊጘ ኻወርየታንድዛት ጝታማኽሊል ችብስጝ፦ «እኒንት ፃቭርነውድ ውርት ኻይልዝመ ኣውት ሽዝ የጝ?» ይጝ ዋቕር።
8ኣይንድም ቢጥሮስ መንፈስ ቅዱስዝ እቻቕ እንት የው ዊሱ፦ «እፈ ኽዝቭዝ ኻልቅጥዝመ ሽመቅልዝ ክታትርነ! 9ነን እኒን ለውሻሽ እጅሪዝ ኣቐው ቀሰው ዊገይዝቍመ ኣወይ ቓድጠ ቸለጘዝ ይን ዋቕርሽነውዝየ፣ 10ክትን ሲቅልድርነው፣ እደረ ግን ክርጘይስ ጒሰው ናዝሪትቱ እየሱስ ክርስቶስት ሽዝ ቓድ ክታበዊል ችብረጘ ክትንም ኣነ እስራየልት ኽዝቭድቅ ኣርቕነ። 11ክትን ግምብኝጥ ነቅርን ማልድርነው፣ እደረ ግን ማይዘንዝ ኣውር ፃቨው ቕርጘድ ጘጝ የጝ።#መዝ. 118፡22። 12ቓደነው ላየዝ ኣውማውዝቅ ችጝሻውም፤ ይን ቓድነ ማጥን እደረ እጅርዝ ይወው እን ሽⶔዝለ፣ ላየ ሽ ሲመይት ሳይስ እጀውም።»
13እቅድም ቢጥሮስስመ ይዃንስስ እነሽጝ ድፍርትዝ ዊግትጛንድ ወሽጛንድ፣ መፃፍ ክንዲየቍ መኻይማን ዊንጘጘ ኣርቕጛንስቅ ዲንቅሽ፤ እየሱስ ጅቅም ዊንጘጘ ኣርቕ። 14እድ ቓደው እጅርድም ጝግል ጛጅቅ ችብር ቓልጛንስቅ ዊግተነውድቅ ብ። 15እንዝ ማጥን ቢጥሮስስመ ይዃንስስ ሸጐዊስ ቢዘ ፊስጝ እነይጛ ማኽርኽርሽ፦ 16«ነስየ እንዛይ እቅድዛት ውር ፃቭናን ቺዝጡ? እየሩሳልየም ፅበዊዝቅ እን እቂዝ ናኒዝ ፃቭሽተው ታምርድ ኣርቕሽትኩ፤ ኣቓንስቅም እኒንት ጭቭስን ኣዳዘነው ችልሻውም። 17ኣቕሽም እን ዊገድ ነስየ ኽዝቪልቅ ፈራቓ ፊራየጘ እን እቅድም ሊጘት ኣውማውስቅ እን ሽዝ ዊግታይጘጘ ጣጝቅቅስነ» ይ። 18ጛትም ጭጝጝ ሊጘት እየሱስት ሽዝ ኣውማስቅ ዊግታይጘጘ፣ ክንሳይጘጘም ኣዝ። 19ቢጥሮስስመ ይዃንስስታይ ግን ዊስጝ፦ «እደረስ ኣዚተነው በርን ክታጭስ ኣዚትነ እደረት በዊል ጥውሽጡመ? እስቲ ክታቕም ፊርድጥን! 20ይንስ ቓልነዊዝመ ወሽነዊዝ ዊግተነውዝ እግርገም ያይነቅ» ይ። 21ጛይም ቢጥሮስስመ ይዃንስስታት ቐፃቐነው ምላሰን ብጛንስቅ ጐውስውስጝ በርጝ በርስ፤ ምላሰንድም ኽዝቭድ ኣቐው ዊገይዝቍዝ እደረት ሚዝየንዛ ዊናንስቅ የጝ። 22እድ ቓደው እጅሪዝ እድሚድ ኣርቨ ምቲዝ ንየ ኣቕ ዊኑ።
ምመናን ሚከረይዝቍዝ ፃልይጘው ፀለውት
23ቢጥሮስስመ ይዃንስስም እኪርጘት ግረ ጝታፃምጢል ዋጥርጝ ካኽነጣነ ኻልቅጢዝመ ሽመቅሊዝ ዊግትጘውድየንትቅ ድቍ። 24ጛይም እኒንት ወሽጛንድ ላው ኣቕጝ ጝታድመድ ኣጕስ ሽጝ እደረ ትጐ እንት ይጛ ፃልይ፦ «ሲመይስመ ዝቨስ፣ ባኽራኒዝመ ጝታኣቒል ፅበቍድቅ ፋጥርደር ልውል ኣደረወ!#ዘፀ. 20፡11፤ ንኽ. 9፡6፤ መዝ. 146፡6። 25ክኣገልጋይ ኣቐው ይናኣይር ዳዊትት ምቸይዝ መንፈስ ቅዱስዝ እንት ይር ዊግትርኵሩ፦
‹ኣኽዛቫንድ ውር ቃጥ የጝ ኣጕርምርምጘውድ?
ኽዝቭድስ ውር ቃጥ የጝ ጊነዝ ቃጥረውድ?
26ዝቨት ንጕሳንድ ሲልፍሽ፤
ቅመትድም ላው ኣቕጝ ኣኽቭሽ፤
እደረትል ቈሽም ጝመሲኺል ፃለትነይዝ ጕ።›#መዝ. 2፡1-2።
27«እርግጥም ኺረውድስስመ በንጥየንቱ ቢላጠውስስ፣ ኣኽዛቫንድም እስራየልት ኽዝቪጅቅ ላው ኣቕጝ እኝቸን ኻትመየትል ኣኽቭሽጝ ክት ቀቫረው ክዅር ቅዱስ እየሱስትል ፃለትነይዝ ጕ።#ማቲ. 27፡1-2፤ ማር. 15፡1፤ ሉቃ. 23፡1፤ 7፡11፤ ይዃ. 18፡28-29። 28ጛይ እኒንትቅ ፃቭጘውድም ክቕም በገዘ ክኻይልዝመ ክፈቃድዝ ኽፅም ዊስንድር ዊንደውድየን ፋፅምሽጠ ማጥን የጝ። 29ኣደረወ! ነንም ጛይ ጐውስውስጘውድየንት ቓል! ይን ክኣገልጋያንድ ክቃልድ ፍፅም ድፍርትዝ ዊግትነ ማጥን ፃቭ። 30ክዅር ቅዱስ እየሱስት ሽዝም ቓዘነውዝመ ዲንቅሰቍ ታምራንዝ ፃቭተ ማጥን ክናንድ ዘርጋቕ» ይ። 31እነይጝ ፃልይጘት ግረ ጛይ ኣኽቭሽጝ ዊንጘው ጝንድ ናውፅውሽቱ፤ እጝቅቅም መንፈስ ቅዱስዝ እቻቝ፤ እደረት ቃልድየንትም ድፍረትዝ ዊግት።
በውጥ ምመናንድ ዊንጘው ኽቭርዙ ፅብጘድ
32ምመናንድም ላው እዘንዝመ ላው ኻሰቭዝ ቲስመመነውዝ ፅብጛ ዊን፤ ጝታፃይጘው ጊንዝቭድቅ ላብጠቱ ዊኑጚ ጛጊስ፦ «እኒን ይው የጝ» የው ላው እጅርም ዊኒየው።#ኻወ. 2፡44-45። 33ኻወርየታንድም ኣደረ እየሱስት ክርጘይስ ጐነድ ኽየው ኻይልዝ ሚዝርድጛ ዊን፤ ጝታእጝቅልቅም ኽየው እደረት ፃገ ዊኑ። 34ቺዝጝ፣ ዊንም ጝን ፃየቍድቅ ቅይጛ ጊንዝቭድ ነስጛ ዊንጛንስቅ ጝታማኽሊል ቺግርሸውም ዊኒየው። 35ጊንዝቭድም ነስጛ ኻወርየታኒዝ ልኲል እቝርጛ ዊን፤ ጛይም እጝቅዝቅ ጝበነዘዊዝጘ ኣድልጛ ዊን። 36ላው ቈብረውስቱ ዮሴፍ ይሽተው ለዊት ዊግነ እጅር ዊኑ፤ ጝትም ኻወርየታንድ፦ ‹በርናቫስ› ይጝ ሽ ፊስ፤ ዲበሰዝ ዅር የነት የጝ። 37ጘጝ እጅርድም ጝዝቨድ ቂ ጊንዝቭድ ኻወርየታኒዝ ይዉ።
المحددات الحالية:
ኻወርየታኒዙ ሰቭ 4: ኽምጣኣኪ
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
