isizwur 4
4
qayn d‑habil
1ign adam d‑tmġart‑ns ḥuwa, tffuġ ar‑trbbu, taru yan‑warraw tini: «hati izuyd dari bnadm s‑lbaraka n‑sidi rbbi.» tg‑as ism qayn. 2taru ilmma gʷmas habil. ig habil amksa n‑uwlli, ig qayn amkraz n‑wakal. 3izri ma‑izrin s‑d‑yiwi qayn kra zġ‑ṣṣabt n‑wakal isrs‑t‑in i‑sidi rbbi, 4yawi‑d habil yan‑ufh̬ddi zġ‑tuwrut‑ns, iġrṣ‑as isrs‑n tadunt‑ns i‑sidi rbbi. irḍu rbbi f‑habil ula maylli‑as‑d‑ifka, 5walaynni ur‑irḍi f‑qayn ula f‑twafka‑ns. qayn ṭiyr‑as bahra, yass ignzi‑ns. 6yini‑as sidi rbbi: «mah̬ aylliġ‑ak‑ṭiyr ġmkad tasst ignzi‑nk? 7iġ‑a‑tskart afulki is‑ur‑ra‑fllak‑rḍuġ? walaynni iġ‑urd afulki a‑tskart, han lh̬ʷšant tmdi‑ak ġ‑imi n‑tgmmi, ar‑ttiri a‑k‑tnru, yili fllak kiyi a‑stti‑tnrut.» 8yini qayn i‑gʷmas habil: «a‑nffuġ s‑lh̬la.» lliġ llan ġ‑lh̬la yakʷi‑n qayn f‑gʷmas habil inġ‑t. 9yini sidi rbbi ġakudan i‑qayn: «manza gʷmak habil?» irar‑as: «ur‑ssinġ, is‑giġ angabal f‑gʷma?» 10yini‑as sidi rbbi: «ma‑iga ġayd tskrt? han idammn n‑gʷmak ar‑d‑flla‑ssmummuyn zġ‑wakal. 11hati ġilad h̬ziġ‑k f‑wakal lli‑iswan idammn n‑gʷmak f‑ufus‑nk. 12iġ‑ti‑tkrzt ur‑rad‑ak‑yakka ṣṣabt. amzwag a‑ra‑tgt ar‑bdda‑ttlulliyt ġ‑ddunit.» 13yini qayn i‑sidi rbbi: «lɛqubit‑ad tẓẓay flla bahra. mamnk a‑rad‑as‑ṣbrġ? 14teṭṭayt‑iyi ġassad zġ‑tmazirt, tssngarat‑iyi dik, tgt‑iyi d‑umzwag ar‑bdda‑tlulliyġ ġ‑ddunit. wanna‑yyi‑yufan ra‑yyi‑inġ.» 15yini‑as sidi rbbi: «uhu, wanna inġan qayn ra‑ih̬llṣ atig‑ns s‑ssa n‑twal.» ig rbbi ġakudan yat‑tmatart i‑qayn a‑ur‑t‑inġ wanna‑t‑imnaggarn. 16ġmkan a‑s‑ingara qayn d‑sidi rbbi, iddu izdġ ġ‑tmazirt n‑nud, taggug f‑ɛadan ġ‑tsga n‑usġlay n‑tafukt.
17ign qayn d‑tmġart‑ns, tffuġ ar‑trbbu, taru ḥanuk. inkr qayn ar‑ibnnu yat‑tmdint ġ‑uwssan‑an, ig‑as ism n‑yus ḥanuk. 18yaru ḥanuk yus ɛirad. yaru ɛirad mḥuyal. yaru mḥuyal matušayil. yaru matušayil lamak. 19itahl lamak snat‑tmġarin. iga ism n‑yat ɛadah, ig ism n‑ṭayyaḍ ṣillah. 20taru‑as ɛadah yus yabal, ig nttan babatsn n‑willi zdġnin ġ‑ih̬iyyamn gn ikssabn. 21ig ism n‑gʷmas yubal, ig nttan babatsn n‑kullu willi kkatnin rribab ula taɛwwadt. 22taru ula ṣillah i‑lamak yus tubal‑qayn, ig nttan amzil ar‑iskar kullu ma‑igan aruku n‑wannas d‑uwzzal. ulltmas n‑tubal‑qayn tga naɛmah. 23yini lamak i‑snat‑tmġarin‑ns: «wa ɛadah d‑ṣillah, sfldamt i‑wawal‑inu. wa timġarin n‑lamak, awyamt‑stt ġ‑ma‑rad‑iniġ. ha‑yyi nġiġ argaz lli‑yyi‑issyagasn ula aɛyyal lli‑yyi‑yutn. 24iġ‑iga‑watig n‑qayn ssa n‑twal, han atig n‑lamak iga ssa n‑id‑mraw d‑ssa (77) n‑twal i‑wanna‑yyi‑iskrn gar.»
25ign daġ adam d‑tmġart‑ns, taru yan‑warraw tini: «ifka‑yyi‑d rbbi arraw yaḍni a‑yamẓ taġamt n‑habil lli‑inġa qayn.» tg‑as ism šit. 26yaru ilmma šit yan‑warraw ig‑as ism anuš. ġ‑uwssan‑an a‑ġ‑bdan mddn ar‑aqran i‑ism n‑rbbi da‑bdda‑illan.
المحددات الحالية:
isizwur 4: SHILOT20
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Selected Old Testament in Tashelhayt (Latin script) © United Bible Societies, 2020.
Robert Bernard Dann.
