Mapookyony 8
8
Mmbwa Niini Yamanda
1Iruva kakumbwa Noe ando amwi neefyo fitiri muu fyoose. Na fyuumbe fyoose efyo fyekee nawe efo safininy, Iruva kavivita uraato uwe ya uruka na mura ukaanngwa. 2Ngyusoka tikamanda na matirisha a iruveu nang'u, mmbwa ya iruveeu ikamanda. 3Mura ukasimbika ulaniny, ando mikonu iyana na makumi araanu mura ukaanngwa. 4Nkonu wa ikumi na mfungare wa mwiiri wa mfungare, safina ilya ikatemirwa ifumbuny lya Ararati. 5Mura ukaengera yaanngwa fika mwiri wa ikumi. Mwiri yeto wa ikumi, nkonu wa mbee ngyuroro ta mafumbu tikalollywa.
6Numa ya mikonu makumi aana, Noe karrwa itirisha lya safina. 7Kasomuta ikukuru, nalyo llyewuya-fo, lyikarumbuka efo neefo, kutani mura woomya urukeny. 8Numa kaekeya mbeta naambo nalole kwakooya mura wammaangwa ulaniny. 9Lyo mbeta ilya nnyilelollya ando eevarya-fo, ikawuiya Noe efo safininy mashika elyi mura weewalyi-walyi ulaniny koose, nawe kaorrwa woko kaitira kayaata-se kulya safininy.
10Kairisha se mikonu mfungare; kasomuta-se mbeta ilya lya kavii. 11Mbeta ilya ikambuiya nkwaany iirye iru lya nri wa nsenefu kaniny kya vayo, naasa Noe kamanya sheelyi mura mmbo wammangwa ulaniny. 12Kairisha-se mikonu mfungare, kailekeiya-se nayo ilambuye lyigyi.
13Naasa kikavaany nkonu wa mbee wa mwiiri wa mbee nkonu Noe alefita myaaka mayana arindaru na umwi, mura ukaumya ulaniny. Noe kauta-u kifiniko kya safina, nawe kalollya sumbai yammaa yuuma. 14Na mwiiri wa kavii, nkonu wa makumi avii na mfungare, sumbai yemmuuma.
15Iruva kavia Noe, 16“Somuka efo safininy, yewe na nka wafo, na vana vafo na vaka va vana vafo. 17Kusomute-fo wo kindo kitiri muu kikee neewe kitiri mwiili, ndeye na mafisi, na wo kindo kirufukaa si fiishwe ulaniny fyengere ifwarika na ifumbuka.” 18Naasa Noe kasomuka-fo, we na nka wakwe na vana vakwe na vaka vawo. 19Wo ifisi na kikufurwaa si, wo ndeye, na ekyo kyoose kyirrwaa urukeny kya wo ngata, fikasomuka kulya safininy.
Noe Aniingya Kiraso
20Noe katana kitara kyeerasya Nndumi Iruva kauta wo ifisi isha, na wo ndeye shisha, kafyuuta five kiraso kyerumatwa na muro yoo kitareny kyerasya. 21Nrungo ulya wa kiraso ukasennya Nndumi Iruva. Nndumi Iruva kaamba efo nriminy, “Nshikidengaa-se uruka kimaruma kya nndu wa vandu fo, mashika makusaro akwe mmbo akee maravi uka ukoo lwakwe; nta nshisherumataa-se ekyo kyoose kikee na muu shaasa shiletana-fo. 22Kyeeri ulana luiyo, fyeeri fya ivaaya, na iilula, kyeeri kya mbeo na kyeeri kya nrike, kio na nsanyin, mfishemandaa-fo.”
المحددات الحالية:
Mapookyony 8: MAS2
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
The Holy Bible in Kimashami © Bible Society of Tanzania, 2016.
