Matyo 2
2
Ndzaŋə ándó Ngaŋə́zéʼə pɔ́ pə́ Sáŋ ə́ nə Ńgɛn nə́ á mə́ Ghóʼkə nə́ Yeso
1Pə́ nə ḿbîə Yeso lə́ á Bɛtəlɛɛmə á mə́m aláʼə Judya əghâ páʼ Ɛlɔdə a nə ḿbə́ nə́ əfo. Əghâ wɨ́d wə̂, ngaŋə́zéʼə pɔ́ pə́ sáŋ ə́ fɛ́lə á ndú əsáʼmə́nu ńgyǐəə á Jɛlusalɛm, 2ḿbítə ńgə́, “Mɔ́ wə̂ páʼ pə́ pí nə́ a pə́ əfo Pəjusə lə́ a əfo? Pəg pěʼ ńdzə́ənə á mɔ́ sáŋ əyǐə á fɛ́lə á əsáʼmə́numə, pəg pɛn ńgyǐəə lə́ á mə́ ghóʼkə nə́ yə́.”
3Ndzaŋ əfo Ɛlɔdə a nə ńdzóʼ nə́ anu jɨ́d zɨ lə́, á jwaʼə̂ yə́ ḿbá nə́ ngaŋ Jɛlusalɛm tsɔʼə ətsəmə. 4A tíʼ ə́fóŋ pətə́kɔʼ pə́ ngaŋə́pêsê pópə ngaŋə́zéʼkə pənoŋkə tsɔʼə ətsəm ḿbítə ághɔ́b ńgə́, “Pə́ chîə á mə́ pî nə́ Nchwádkə lə́ ə́fó?” 5Pó kwěe ńgə́, “Á Bɛtəlɛɛmə á mə́m Judya ńdzoŋ ndzaŋ ntûsê a nə ŋ́ŋwaʼlə̂ nə́,” ńgə́; 6“Gho Bɛtəlɛɛmə á mə́mə aláʼə Juda, gho kě lə́ chigə mɔ́ kə́nyaŋə́ á mə́m pəfo pə́ Juda pô ńté ńgə́ nətû nə́ yǐ fɛ́lə á mə́m pəənə́, páʼə a yǐ nə ə́sáʼ pəənə mə pɔ́ pə́ Islɛlə.” 7Ɛlɔdə a tíʼ ə́fóŋ ngaŋə́zéʼə pɔ́ pə́ sáŋ zə̂ tsɔʼə á ndzəmə ndzəmə ḿbítə ághɔ́b nə́ chigə ndɛd páʼ mɔ́ sáŋ wə̂ á kə fɛ́d nə́. 8Ndzaŋ pó fiʼtə̂ nə́ lə́, a tíʼ ńtúmə ághóobə́ á Bɛtəlɛɛm ńgə́ pó ghɛn ńdɔg ndɛd ńnáŋə mɔ́ yi wə́, ńdzə́ənə yí pó tú nkəənə á mbô yí ńjî ńgə́ a kə́ ńgɛnə̂ ají ńgóʼkə yə́.
9Ndzaŋ pó nə ńdzóʼ nə́ atséebə əfo lə́, ńtíʼ ńgɛn nə́ mbi nə́ nənyi əghoobə́. Mɔ́ sáŋ pó nə ńjɨ́ nə́ á fɛ́lə əsáʼmə́nu lə́, á chîə á mbi pó tə ńgyǐ ńgɛn ńtə́əmə aliʼ mɔ́ yi wə̂ a chî nə́ ə́wə́. 10Ndzaŋ pó nə ńjɨ́ nə́ mɔ́ sáŋ wə̂ lə́, ńkɔŋtə̂ lɛ tətətə. 11Pó tə́ ńkwúnə á ndɛ̂ ńdzə́ənə mɔ́ yi wɨ́ pó mǎ əyǐ Mɛɛlə, ńtíʼ ńkwə́ʼtə a ndəsê ńgóʼkə yə́, ŋ́ŋáʼ əpa əpɔ́b ə́fógə gôlə nə́ flaŋkisɛnə ḿbɨ ḿbə́ nə́ mɛ̂lə ə́fɛ̂ nə́ yə́. 12Pó yǐ ńtə́ ńdê Əsê a yǐəə á mbi pó á njɨ ńkwantə̂ ághɔ́b ńgə́ kɔ pó pɨ ḿbəənə̂ á mbô Ɛlɔdə. Pó tíʼ ńdaŋ ndú yi ndaʼ ńkwə̂ aláʼ pó.
Ndzaŋ pə́ nə ńdɔg nə́ Yeso ńkə ńgɛnə̂ Ijibə
13Ndzaŋ pó nə ńgɛn nə́ lə́ ntseŋndɛ̂ Mmaʼmbîə a yǐəə á mbi Jɔsɛfə á ndzəəmə ə́sóŋ nə́ yí ńgə́, “Lɔgə̂ mɔ́ wə̂ pó mǎ əyǐ ńkə ńgɛn nə́ pó á Ijibə ńchî ə́wɨ́ tə maŋ láʼ ə́fiʼtə̂ gho ńgə́ gho fɛ́lə, ńté ńgə́ Ɛlɔdə a tə́ ńchwaalə̂ mɔ́ wə̂ á mə́ jwítə nə́.” 14Jɔsɛfə a tíʼ ńdǒ á əsê ńdɔgə̂ mɔ́ wə̂ pó mǎ əyǐ ńgɛnə̂ á Ijibə á nətúʼə, 15ńkə́ ńtíʼə ńchîə ə́wɨ́ tə Ɛlɔdə a láʼ ńkwûə. Pə́ nə ńgɛlə̂ zɨ́d zɨ lə́ á mə́ chɨ́mkə nə́ anu páʼ Əsê a nə ńgɛd nə́ ńgə́ ntú əjǐ ə́ sóŋ ńgə́, “Maŋ fóŋə móonə mə ńgə́ a fɛ́lə á Ijibə.”
Pə́ Jwítə Kə́yé Ŋwunə á Bɛtəlɛɛmə
16Əghâ Ɛlɔdə a nə ńjî nə́ ńgə́ ngaŋə́zéʼə pɔ́ pə́ sáŋ pə́ fɨgə̂ yí lə́ fɨg nə́, ndě əyí ə́ záŋ lɛ tətətə, a tíʼ ə́sóŋ ńgə́ pə jwítə kə́yé pɔ́ pə́ mbyâŋnə tsɔʼə pətsəmə páʼ pə́ chî nə́ á Bɛtəlɛɛm pópə məpad mí tsɔʼə mətsəm ńchúʼ nə́ ngoʼ pɛ̌ ńtsóokə, ńdzoŋ ndɛd ngaŋə́zéʼə anu ńté pɔ́ pə́ sáŋ pə́ kə fiʼtə̂ nə́ yí ńgə́ mɔ́ sáŋ wə̂ á nə ə́fɛ́d lə̂. 17Ńdaŋ ə́lɨ́d anu pə́ nə ə́sóŋ nə́ ńdaŋə̂ á mbô ntûsê Jelemaya á nə ńdɔgə̂ aliʼə́.
18Pə́ tə́ ńdzóʼ ngye yitsə̌ á Lama,
Pə́ kyéŋə ńdzoŋə̂ ə́fɨnə̂,
Lachɛɛlə a kyéŋə ńté pɔ́ pîə
ńkǐ ńgə́ kɔ pə́ legtə̂ yə́,
ńté ńgə́ pó kě pɛ́d pô.
Pə́ lǒo Ijib ḿbɨ Ḿbəənə̂ á Nazalɛlə
19Əghâ ándó Ɛlɔdə a nə ńkwû nə́, ntseŋndɛ̂ Mmaʼmbîə a yǐəə á mbi Jɔsɛfə á Ijibə á ndzəəmə 20ə́sóŋ ńgə́, “Lǒo á əsê ńdɔgə̂ mɔ́ wə̂ pó mǎ əyǐ ḿbɨ ḿbəənə̂ á Islɛlə ńté ńgə́ pɨ páʼ pə́ nə̈ ńdɔ nə́ á mə́ jwítə nə́ mɔ́ wɨ́d wə̂ pó kwúkə.”
21Jɔsɛfə a tíʼ ńdǒo á əsê ńdɔgə̂ mɔ́ wə̂ pó mǎ əyǐ ḿbəənə̂ á Islɛlə.
22Ndzaŋ a nə ńdzóʼ nə́ ńgə́ Alchelusə a jî ndɛ̂ tǎ əyǐ Ɛlɔd páʼə a nə ḿbə́ nə́ əfo Judya lə́, Jɔsɛfə a pɔ́gə á mə́ ghɛn nə́ ə́wɨ́ ńté ńgə́ pə́ nə ńkwantə̂ yí lə́ á ndzəəmə, a tíʼ ńgɛn nə́ əlá láʼ Galili yitsə̌. 23Əghâ a nə ńgɛn nə́ ə́wɨ́ lə́, ńchîə aláʼ yitsə̌ pə́ fóŋ nə́ nə́ Nazalɛlə. Zɨ́d zəənə́ á nə nɨd lə́ anu páʼ məntúmə́sê mə́ nə ə́sóŋ nə́ ńgə́, “Pə́ yö fóŋə yí lə́ ńgə́ mɔ́ Nazalɛlə.”
المحددات الحالية:
Matyo 2: azo
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
