Matthew 9
9
Jesus Uya Ittokkassak Kàyik Ipittà
(Mark 2.1-12; Luke 5.17-26)
1Jesus wenukuppù màlà kanau yak, molopai iwennappoppù tuna kawà tùpatassek yak. 2Molo kàyik yamùk uya iitokkassak kàyik nepùppù màlà, aittoupe itekkwek po. Jesus uya eke pe ailon tetok tok uya wechi yeneppù màlà, molopai iitokkassak kàyik pàk, “Emeluntàtakà, Umu! Amakuyi pàk usentupansak man,” teppù. 3Màlàyau Law pàk enupannan tonpa yamùk uya tùkklottau' nokon, “Pùsàlà kàyik nùselupayan Katù winàkàik!” teppù. 4Jesus uya tok usenumenkatok ittuppù màlà molopai, “Yà'là peichi iwechi pàk àli pe eusenumenka kon màlà?” tukaik tok yekamappoppù ya. 5“Sa'man pe ma'le ken na', ‘Amakuyi pàk usentupansak man,’ te nai, wapùla ka', ‘E'wuluukakà molopai asakà,’ te làkku lù? 6“ Kàyik Mumu wechi iwemakuimansak pàk usentuppantok yapàikketù yesappe non po ittu kon pa ‘E'wuluukakà, eyekkwek yanùnkà molopai emeikkà!’ te uya sàlà ittokkassak pàk” teppù Jesus uya. 7Kàyik we'wuluukappù màlà molopai iwemeikuppù. 8Yensak tùuya'nokon yau, kappon yamùk wettalipappù màlà, molopai Katù yapulàppù tok uya kappon yamùk yemyak sàlà yekkwa apàikkek tùlù ya pàk.
Jesus uya Matthew Kà'ma
(Mark 2.13-17; Luke 5.27-32)
9Jesus uya màlà pata nàmàppù, molopai tùutà yau pùlayatta pili'nài Matthew itesek yeneppù ya, tùwe'wotokomatok patassek yau iwechi. “Uya'là àikkà,” teppù ya ipàk. Màlàyau Matthew we'wuluukappù molopai ya'là iitàppù.
10Jesus uta'lettà itùwùk tau tùse, tukkan kon pùlayatta pili'nàinan molopai àli ku'nài nan uyàpùppù, Jesus molopai ya'lon kon pokonpe tok uta'lettàppù. 11Pharisee yamùk tonpa yamùk uya sàlà yeneppù màlà, molopai Jesus ya'lon kon yekamappoppù tok uya, “Ya'là peichi iwechi pàk eyenupanài'nokon uta'lettà màlà pùlayatta pili'nài nan molopai àli ku'nài nan pokonpe?” tukaik. 12Jesus uya tok yetappù màlà molopai tok yeikuppù ya, “Kappon yamùk pàli'yawon kon mùkyamlo ipittànài iche tùwessan pen, tùse mùkyamlo e'neppe tùwessan neken. 13Itàtàk kon uchi molopai sàlà Katù Maimu nekama pàk esenupatàk kon, ‘Usentuppantok ichelok Iulà kamo tùlù tùpottàsen pe ichelok pen.’ {Hosea 6.6} Masapùla wakù ton tùnamasan kappon yamùk kà'mase uyàssak pen sàlà, tùse àli ku'nàinan làkku kà'maik uyàssak,” tukaik.
Tùuta'lettàik Pùla We'nàtok
(Mark 2.18-22; Luke 5.33-39)
14Màlàyau John Enpataukanài ya'lon kon uyàpùppù Jesus piyak, molopai tok uya yekamappoppù, “Yà'là pe ken iwechi pàk ina molopai Pharisee yamùk tùuta'lettàik pùla tùwessan echipalà tùse aya'lon kon tùuta'lettàik pùla tùwessan pen kulu?” tukaik. 15Jesus uya yeikuppù, “Tùwemali'masan nùkà'massan uta'lettàtok wechi ken na' pokoi pe ema'non tayappù woton wechi molo tùpyau'nokon tùse pe mekamayataù? Kane! Tùse pata weyu uyàpù màlà tok winàpai tùwemali'masen kàyik mokkatok yattai, molopai nen uchi tok wechi màlà tùuta'lettàik pùla.
16“Ànù'là mùkkàlà pon poippà pachi'manài emennak kuyalikku pùkkù lùppù ke pen. Masapùla màlà yekkwa ke ipachi'masak màlà pon poippà poi tùwekalakasen molopai eke peiwa yeutattànài. 17Wapùla ànù'là uya emennak tinchisen yemaika yapulàsak lùppù wai kamo pippà yapai ikonekasak yak pen màlà. Ikussak ya yau, wai we'mo màlà molopai nen uchi emennak tinchisen wekkwamù, molopai wai umatta. Tùse làkku emennak tinchisen temaikasen emennak wai yak, molopai asakklàma wakù pe màlà yamùk wechi màlà.”
Nossan Jesus Pon Yapà'nàippù
(Mark 5.21-43; Luke 8.40-56)
18Sàlà te Jesus uya tok pàk tùse, Jew yamùk wepilittok itak yesak uyàpùppù màlà Jesus piyak, tese'mu yok iwenappù itemlotopo molopai ipàk, “Uyenchi nelippàssan, tùse àikkà eyemyatù inonkatanikà ipona molopai nulà iwena màlà,” teppù ya. 19Màlàpàk Jesus we'wuluukappù, ya'là iitàppù molopai ya'lon kon utàppù ya'là.
20Màlà yattai nossan àsà pe tùumùnta pàk iwessak 12 pe kilichimochi, uyàpùppù màlà Jesus mùpoi winà molopai ipon yepi yappàtùppù ya. 21Tùyiwalà, “Ipon neken nà yappàssak uya yau uchipittà,” teppù ya. 22Jesus welattàppù molopai yeneppù ya, molopai ipàk, “Emeluntàtakà, uyenchi! Ailon tetok auya uya eyipittàsak man,” teppù ya ipàk. Asse'ne màlà yattai nossan uchipittàppù màlà.
23Jesus wewonsak itepulu yùwùk tak yau. Wai tàulùnpannan yeneppù ya màlà, molopai tùusewankono'masan wentaimepàtù. 24“Epakkatàk kon! Ulichan welichak pen màlà, tùse iwe'nùnsak neken!” teppù ya. Tùse tok wàkklàppù Jesus pàk. 25Kappon yamùk wepakka tùpo, iwewomùppù molopai ulichan yemyatù pàk yachippù ya, molopai iwe'wuluukappù. 26Sàlà yekalùnpappù màlà tamù'nawàlà màlà pata yawàlà.
Jesus Uya Asa'lon Kon Enpùnon Kàyik Yamùk Ipittà
27Jesus uya màlà pata nàmàppù màlà, molopai iità tùse asa'lon kon enpùnon kàyik yamùk uya iwenaimappù, “Ina pàk esentuppakà David Mumu!” tukaik tok wentaimeppù. 28Molopai Jesus utàsak tapùi tak yau, asa'lon kon enpùnon uyàpùppù ipyak, molopai tok yekamappoppù ya, “Ikupù uya yeselùkek na' iwechi pàk ailon mùkayatàu?” tukaik. “Ewaik, ina yepulu,” tukaik tok uya yeikuppù. 29Màlàyau Jesus uya tok yenu yappàtùppù molopai tok pàk, “Tàwàichi nekkupùi ailon teppù auya'nokon kasa!” teppù. 30Molopai tok yenu utakkokappù màlà. Jesus uya meluntà pe, “Ànù'là pàk sàlà kùsekamatàu!” teppù. 31Tùse tok utàppù molopai Jesus nùkupùppù lùppù yekamappù tok uya tamù'nawàlà màlà pata yawàlà.
Jesus Uya Tùuselupasen Pen Kàyik Ipittàppù
32Tok utà tùse tùulon kon kappon yamùk uya kàyik nepùppù màlà Jesus piyak. Tùuselupasen pen, masapùla àli akkwalù wechi yau pàk. 33Àli akkwalù yenpakkasak ya pe, kàyik uselupappù nen uchi màlà. Tamù'nawolon kon usenumenkasak wechippù. “Sàlà yekkwa là yensak nokon pùla man Israel yau,” teppù tok uya. 34Tùse Pharisee yamùk uya, “Àli akkwalù yamùk yepulu uya màlà ilepa meluntà ke tok yenpakkatoppe ya,” teppù.
Jesus Usentuppa Kappon Yamùk Pàk
35Màlà yattai Jesus utàppù màlà tamù'nawàlà eke pata molopai echikili ton pata yamùk kaklanpa pe. Kappon yamùk yenupappù ya tok wepilittok itak tau, Wakù Itekale itepulu pe we'nàtok yekale yekamappù ya tok pàk, molopai kappon yamùk ipittàppù ya, yà'là yekkwa là palan molopai tok ye'netù yapai. 36Ilinà kappon yamùk yene tùuya yau, Jesus usentuppappù tok pàk, masapùla tok utaimelunpasak molopai ipùikattànài pùla tok wechi pàk, kalinilu yamùk itesak pùnon kasa. 37Màlàpàk ta'lon kon pàk, “Eke pe kulu tùpilichen man, tùse tukke pùla ipili'nàinan man. 38Tùpilichen yesak ipawanattàtàk kon tukkeiwa ipili'nàinan yeunottoppe ya,” teppù.
المحددات الحالية:
Matthew 9: PNTR
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Patamuna New Testament Revised © United Bible Societies, 1973, 2019.
