Matthew 5
5
Jesus Uya Itekale Yekamatok Wùk Po
1Jesus uya tukkan kon kappon yamùk yeneppù màlà molopai wùk pona iwenukuppù. Molo iweleutappù. Inenupa ton wepilipùppù màlà iwoi. 2Molopai tok yenupa pàk iwepyattàppù.
Ailon Utauchinpantok
(Luke 6.20-23)
3“Tùutauchinpasan mùkyamlo italumayippù pe tùwechi kon tewan kon yau ittunnan. Tok yepulu pe Katù wechi màlà!
4“Tùutauchinpasan mùkyamlo tùusewankono'masan. Katù uya tok yewan ipittà màlà!
5“Tùutauchinpasan mùkyamlo àssà'mùnon. Non màlà tok ponalok woton!
6“Tùutauchinpasan mùkyamlo iwalai ànkupai kulu tùuseka'nonkasan. Katù uya tok yewan ya'lettà màlà!
7“Tùutauchinpasan mùkyamlo tùusentuppasan tùulon kon pàk. Katù usentuppa màlà tok pàk!
8“Tùutauchinpasan mùkyamlo esukenan itewan ton. Katù yene tok uya màlà!
9“Tùutauchinpasan mùkyamlo echitonpa pe we'nàtok ku'nàinan. Katù uya tùmunkà pe tok yesatù màlà.
10“Tùutauchinpasan mùkyamlo talumattàntok yawàlà tùutàsan, Katù wettok iche kupù tok uya pàkànsau. Tok yepulu pe Katù wechi màlà.
11“Tùutauchinpasan amyamlo, kappon yamùk uya àmottùnpa kon yau, atalumattà kon yau molopai yà'là kasa là akaseipa kon yau, masapùla uya'lon kon pe ewechi kon pàk. 12Molùk ettàk, atauchinpatàk kon kulu, masapùla eke epeppù kupù man àponalok kon pe epùn po. Sàlà kasa màlà kappon yamùk uya Katù Maimu yenpoikannan talumattàppù awapiya'nokon tùwemassan,” teppù ya.
Pan Molopai Akkwa
(Mark 9.50; Luke 14.34-35)
13“Pan kasaichi ewechi kon màlà kappon yamùk ponaloppe. Pan wenasak ine'neppe pùla yau, ine'neppe tu'ma imatok pùla iwechi màlà. Tapulàsen pe pùla iwenasak màlà, màlàpàk yenu'ma màlà. Molopai kappon yamùk usalà ipolo.
14“Wolù weyu pe ewechi kon màlà kappon yamùk tamù'nawolon kon ponaloppe. Pata yamùsak kawon wùk po màlà yonamù yentaino. 15Ànù'là pùla iwechi màlà lanppu pottànài pùsau yokoik yonantoppe tùuya. Tùse yapon pona làkku inonkanài mùkkàlà, tamù'nawàlà tapùi tawon kon weyuttàtoppe ya. 16Màlà kasa làmaichi tàwà eweyu kon nùlenpamùi kappon yamùk yemloto po, wakù ton ànkupù kon yentoppe tok uya molopai àkàipùnù kon epùn pon yapulàtoppe tok uya,” tukaik.
Jesus Uya Law Pàk Enupantok
17“Law molopai Katù Maimu yenpoikannan uya enupantok yenu'mase uyàssappe kùsekamatàu. Yenu'mase uyàssak pen sàlà, tùse yenuka'nùse. 18Ailon kulu sàlà, kak molopai non utama ponalà màlà malalon nùkkwà là Law yawon yenu'ma pen tamù'nawolon wenukapù ponalà. 19Màlàpàk uchi, ànù'là malalon nà Law yawolon pen, molopai tùulon kon yenupanài tok uya màlà lùppù kuttoppe, yesatù màlà tamù'nawolon kon ma'le itepulu pe we'nàtok epùn po yau. Tùse ànù'là law yawolon, molopai tùulon kon yenupanài imaimu yawàlà tok wettoppe, yesatù eke pe màlà itepulu pe we'nàtok epùn po yau. 20Tekamayaik àpàkù'nokon Pharisee yamùk molopai Law pàk enupannan yentai ikasa lùiwa pùla ewechi kon yau, itepulu pe we'nàtok epùn po yak ewewomù kon pen màlà,” teppù Jesus uya.
Jesus Uya We'naikantok Pàk Enupantok
21“Yetappù auya'nokon màlà kappon yamùk pàk pena, ‘Ànù'là kù'wàtàu, ànù'là tùtonpa wànài nepù màlà talumattànài yemloto pona,’ tawon,” teppù Jesus uya. 22“Tùse sàlà pe tekamayaik àpàkù'nokon, ànù'là iwe'naikasak tùtonpa pàk nepù màlà talumattànài yemloto pona. Ànù'là tùtonpa yesa'nài ‘wakù pen àmàlà!’ tukaik nepù màlà Jew yamùk yepulu ton yemloto pona. Molopai ànù'là tùtonpa yesa'nài pakko tukaik wechi màlà tùutàsen yeppe apok patassek yak. 23Màlàpàk uchi lepantok auya'nokon tùlù pàk ewekkupù kon Katù lepatok patassek yau, tùse àtonpa wechi yà'làlà yesappe ewinàkàik ittu auya'nokon yau, 24lepantok auya'nokon mùnàntàik molo Katù lepatok patassek yau. Wapiya mùtàtàik echitonpa pe we'nàtok konekase àtonpa kon pokonpe, molopai nen uchi mennappotàik lepantok auya'nokon tùse Katù yemyak,” teppù nàlà Jesus uya.
25“Eyeyaton uya ayalà kon àkottùmatok yak yau, asse'ne ikonekatàk kon ipokonpe asantau ewechi kon kùlottau. Wa ewechi kon pùla iwechi yau yattai pùla àtùlù kon ya màlà ittunài yemyak, mùkkàlà uya àtùlù kon màlà achinài yemyak, molopai patikichi tak àtùlù kon ya màlà,” teppù ya. 26“Ailon kulu sàlà, molo ewechi kon màlà tamù'nawolon ene'ma kon ye'ma auya'nokon ponalà,” teppù Jesus uya.
Wemali'mantok Yeselu
27“Yetappù auya'nokon, ‘Ànoppù pen pokonpe kechii,’ tawon. 28Tùse sàlà pe tekamayaik àpàkù'nokon. Ànù'là nossan yennài molopai iche tùwessen tùponaloppe, wemakuimakassak màlà ipokonpe tewan yau. 29Màlàpàk kamik pen winon eyenu uya àkupù kon àli kupù kon pa yau, imokkatàk molopai yenu'matàk! Wakù peiwa iwechi màlà eyesak kon pùkkù yenu'ma auya'nokon, tamù'nawàlà eyesak kon yenu'ma apok patassek yak yentai lùiwa. 30Kamik pen eyemyatù kon uya àkupù kon àli kupù kon pa yau, yattàtàk molopai yenu'matàk! Wakù peiwa iwechi màlà eyesak kon pùkkù yenu'ma auya'nokon, tamù'nawàlà eyesak kon yenu'ma tùusà'nùnsen pen apok patassek yak yentai lùiwa,” teppù Jesus uya.
Iwemali'masak kon We'nonkatok pàk Enupantok
(Matthew 19.9; Mark 10.11-12; Luke 16.18)
31“ ‘Ànù'là tùnoppù nonkanài uya màlà inonkatok kaletayi tùlù itemyak,” tesak nàlà man. {DEU 24.1} 32Tùse sàlà pe tekamayaik àpàkù'nokon, ànù'là tùnoppù nonkatak tùse ailon pe pùla neken tùwinàkàik iwessak yau. Àli pe nen uchi iwettoppe ikupù ya màlà iwemali'ma tu'ma yau, molopai ipokonpe tùwemali'masen wemakuima nàlà nen uchi màlà,” teppù Jesus uya.
33“Yetappù nàlà auya'nokon man kappon yamùk pàk pena, ‘Ikupù uya màlà,’ tesak auya'nokon yau, mùkuttàik euselupappù kùchimyakanmatàu. Molopai, ‘Ikupù uya màlà,’ tesak auya'nokon Katù pàk yau, mùkuttàik,” teppù ya nàlà. 34-35“Tùse tekamayaik àpàkù'nokon, Ikupù uya kulu màlà kùkatàu. Epùn, wapùla non, wapùla Jerusalem yesek kùkkà'matàu. Masapùla epùn màlà Katù yapon molopai non màlà itta yapon molopai Jerusalem màlà Eke kin patassek. 36Wapùla ikupù uya màlà kùkatàu appai kon tùkà'mase, masapùla tewin nùkkwà là appai kon pùpok matok auya'nokon aimu'ne wapùla ikklùn pe pùla iwechi màlà. 37Tùse neken ‘Ewaik’ wapùla ‘Kane,’ mùkatàik. Yà'là tu'ma là euselupatok kon màlà Ene Makui winàpai iyàssak,” teppù Jesus uya.
Use'mantok pàk Enupantok
(Luke 6.29-30)
38“Yetappù auya'nokon man, ‘En yepeppe en molopai à yepeppe à,’ tesak. {EXo 21.24} 39Tùse sàlà pe tekamayaik àpàkù'nokon. Kese'matàu mùkkàlà àli ku'nàippù ewinàkàik pàk. Ànù'là uya kamik pen winà eyenpata yai àwànà kon yau tàwà kamik winà nàlà àwànàik. 40Molopai ànù'là wechi àkottùmapai yau àpon kon yepoino mokkatoppe tùuya yau, tàwà nàlà iwapu yalài tùponaloppe. 41Molopai ànù'là uya eyeka'nonka kon tapluli yalà kon pa mei yau, yatàk kon mei lùiwa kulu. 42Ànù'là uya yà'làlà yennasak àpàkù'nokon yau, mùtùtàik itemyak. Molopai ànù'là wechi yà'làlà anapai yapulàtoppe tùuya yau, tàwà nalài,” teppù ya nàlà.
Eyaton Pùnùnmatok
(Luke 6.27-28, 32-36)
43“Yetasak auya'nokon man, ‘Ayakontalù kon i'nùnmatàk kon molopai eyeyaton kon yeya'nomatàk kon,’ tesak ya. 44Tùse tekamayaik àpàkù'nokon, eyeyaton kon i'nùnmatàk kon, molopai atalumattànnan pona màpùlematàik. 45Sàlà kussak auya'nokon yau, àkàipùnù kon epùn pon munkà pe ewena kon màlà. Masapùla tùponalok wei ku'nài mùkkàlà iilenpantoppe, àli ton molopai wakù ton weyu pe ekkaichalà, molopai konok yeuno'nài wakù ku'nài nan ponaloppe molopai àli ku'nài nan ponaloppe. 46À'nùnman nan pùnùnma auya'nokon yau, yà'là ken eyepeppù yepolo auya'nokon? Pùlayatta pili'nàinan nà mùkyamlo iku'nàinan màlà kasa! 47Molopai ewechi yakon non pàk neken wakù pe na'messan te auya'nokon yau, tùkussen pen kussak na' auya'nokon màlà? Ailon Katù ittunnan pen là nen mùkyamlo iku'nàinan màlà kasa! 48Màlàpàk wakù peichi ettàk kon, àkàipùnù kon epùn yau nai'nùk wechi wakù pe kasa.” teppù Jesus uya tok pàk.
المحددات الحالية:
Matthew 5: PNTR
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Patamuna New Testament Revised © United Bible Societies, 1973, 2019.
