मरकुस 5

बुरी आत्मा सैंघै भौरुऐदै मांहणु बै ठीक केरना

1यीशु होर तेइरै च़ेले गलीली समुन्द्रा रै पूर्व देशा न किश्ती न पुजै, तेसा ज़ैगा रै नेड़ गिरासेनियां लोका रौहा ती। 2तौखै एक मांहणु ती, ज़ुणिबै बुरी आत्मा फ़ैसी ती। 3सौ कब्रा न रौहा ती होर तेइबै कोई भी शाँगल़ीयै लाइया नी ती बोनी सकदा, 4किबैकि तेइबै बार-बार शाँगीयै लाइया बोना ती होर सौ तिन्हां बै च़ोड़ा ती। तेइबै कोई वशा न नी ती केरी सकदा। 5सौ लगातार रात ध्याड़ कब्रा न होर ढौगा न चिलाँदा रौहा ती होर आपणै आपु बै पात्थरै लाइया घायल केरा ती।

6ज़ैण्ढै यीशु होर तेइरै च़ेले किश्ती न बाहरै निकतै, सौ यीशु बै हेरिया दूरा न दौड़ू होर तेइबै प्रणाम केरू। 7होर ज़ोरा सैंघै चिलाइया बोलू, “ओ यीशु नासरी परमप्रधान परमेश्वरै रै बेटै, मेरा तौ सैंघै कि कोम? हांऊँ तौभै परमेश्वरै री कसम देआ सा कि मुँभै कष्ट मत देंदा।” 8किबैकि यीशुऐ तेइबै बोलू ती, “हो बुरी आत्मा, ऐई मांहणु न निकल़िया एज़।”

9यीशुऐ तेईन पुछ़ू, “तेरा नाँ कि सा?”

तेइयै बोलू, “मेरा नाँ सेना सा; किबैकि आसै बोहू सी।” 10होर तेइयै यीशु हागै अर्ज़ा केरी कि, “आसाबै ऐई ज़ैगा न बाहरै मत भेज़दा।”

11तौखै ढौगा पैंधै सूँगरा रा एक बड़ा छ़ुण्ड च़ौरदा लागा ती। 12होर बुरी आत्मै अर्ज़ केरिया तेइबै बोलू, “आसाबै तिन्हां सूँगरा रै बिच़ा न भेज़ कि आसै तिन्हां आँध्रै ज़ालै।” 13तैबै यीशुऐ तिन्हां बै हुक्म केरू होर बुरी आत्मा निकल़िया तिन्हां सूँगरा बै फसी। तेई छ़ुण्डा न लगभग दूई हज़ार सूँगर ती होर ते झपटिया समुन्द्रा न पौड़िया मूँऐ।

14तिन्हां बै च़ारनू आल़ै भैगिया नगर होर ग्राँ न दैसू होर ज़ो किछ़ हुआ ती लोका तुंई हेरदै आऐ। 15यीशु हागै एज़िया तिन्हैं बुरी आत्मा फैसूदा सौ मांहणु झिकड़ै लाइया होशी न बेठादा हेरू। ऐ हेरिया ते लोका डौरै। 16ज़ुणी लोकै ऐ घटना हेरी ती तिन्हैं बुरी आत्मा आल़ै मांहणु रै बारै न होर तिन्हां सूँगरै रै बारै न तिन्हां बै दसू। 17तैबै लोका यीशु हागै अर्ज़ा केरदै लागै, “आसरै इलाकै न फ़ेटै ज़ा।”

18ज़ैबै सौ किश्ती न च़ढ़दा लागा, ता ज़ुणिबै पैहलै बुरी आत्मा फ़ैसी ती सौ यीशु हागै विनती केरदा लागा कि मुँभै आपु सैंघै ऐणै दै। 19पर यीशुऐ तेइबै नाँह केरू होर बोलू, “आपणै घौरा ज़ाइआ आपणै लोका बै दैस कि तौ पैंधै दया केरिया प्रभुऐ तेरी तैंईंयैं कैण्ढै बड़ै कोम केरै सी।” 20सौ दिकापुलिसा न ज़ाइआ एसा गैला रा प्रचार केरदा लागा कि यीशुऐ मेरी तैंईंयैं कैण्ढै बड़ै कोम केरै होर सैभै लोका हैरान हुऐ ती।

याईर री मुईन्दी शोहरी होर एक बीमार बेटड़ी

21ज़ैबै यीशु भी किश्ती न गलील समुन्द्रा रै बौढ़ा बै नौठा ता लोकै री एक बड़ी भीड़ तेई हागै कठा हुई। होर सौ समुन्द्रा रै बौढ़ा न ती। 22याईर नाँ रा एक आराधनालय रा अगुवा आऊ होर तेइबै हेरिया तेइरी ज़ोंघा पैंधै पौऊ, 23होर ऐ बोलिया अर्ज़ा केरी कि, “मेरी होछ़ी बेटी मौरनू आल़ी सा; तू मेरै घौरा एज़िया तेसा पैंधै हौथ रख कि सौ ठीक होईया ज़िन्दी रौहली।” 24तैबै यीशु होर च़ेले याईरै सैंघै नौठै;

होर लोकै री बड़ी भीड़ तेई पिछ़ै च़ली होर भीड़ै री बजहा न यीशु बै धक्का मुकी लागा ती। 25भीड़ा न एक ऐण्ढी बेटड़ी ती ज़ुणिबै बारा बौर्षा न लोहू बैंहणै री बीमारी ती। 26होर तेसै बोहू वैदा न बड़ा दु:ख च़कू होर ज़ो किछ़ तेसा हागै ती खर्च़ केरनै न बाद भी तेसा बै कोई फायदा नी हुआ, पर होर भी ज़ादा बीमार हुई ती। 27सौ बेटड़ी यीशु रै बारै न शुणिया तेई पिछ़ै आई होर तेइरै झिकड़ै छ़ुँगै। 28किबैकि सौ बोला ती कि, “अगर हांऊँ यीशु रै झिकड़ै पालै बै छ़ुँगली ता मूँ ठीक होंणा।” 29होर एकदम तेसरा लोहू बैहणा बन्द हुआ होर तेसै ऐ महसूस केरू कि हांऊँ तेसा बीमारी न ठीक हुई सा।

30यीशुऐ तुरन्त ज़ाणू कि मूँ न शक्ति निकती सा होर भीड़ा न पिछ़ै फिरिया पुछ़ू, “मेरै झिकड़ै कुणिऐ छ़ुँगै?”

31तेइरै च़ेले तेइबै बोलू, “तू हेरा सा कि भीड़ तौ पैंधै पौड़दी लागी सा होर तू बोला सा कि, हांऊँ कुणिऐ छ़ुँगू?”

32तैबै यीशुऐ हेरनै री तैंईंयैं, ज़ुणियै सौ छ़ुँगू ती च़ोहू पासै हेरू। 33तैबै सौ बेटड़ी ऐ जाणिया कि तेसा सैंघै कि हुआ सा, डौरदी होर कोमदैआ आई होर तेइरी ज़ोंघा पैंधै पौड़िया आपणा सारा हाल शुणाऊ। 34यीशुऐ तेसा बेटड़ी बै बोलू, “ओ बेटी तेरै बशाहै तू ठीक हुई; शान्ति सैंघै ज़ा होर आपणी एसा बीमारी न बच़िया रौह।”

35यीशु ज़ैबै बोलदा लागा ती कि, आराधनालय रै प्रधाना रै घौरा न एज़िया लोकै बोलू, “तेरी बेटी ता मूँई, ऐबै गुरू बै किबै दु:ख देआ सा?”

36ज़ो गैल ते लोका केरदै लागै ती यीशुऐ सौ नशुणी केरिया, आराधनालय रै प्रधाना बै बोलू, “डौरदा मत सिर्फ़ बशाह रख।”

37होर यीशुऐ सिर्फ़ पतरस, याकूब होर याकूबा रा होछ़ा भाई यूहन्ना आपु सैंघै नेऐ होर कोई नी ऐणै धिनै। 38आराधनालय रै प्रधाना रै घौरा न पुजिआ तेइयै लोका बड़ै भारी रोंदै होर राड़ी मारदै हेरै। 39तैबै यीशुऐ भीतरै ज़ाइआ तिन्हां बै बोलू, “तुसै किबै राड़ी मारदै लागै सी होर रोआ सी, ऐ शोहरी मूँईदी नी ऑथि बल्कि सोंदी लागी सा।” 40ते सैभै यीशु रा मज़ाक उड़ांदै लागै।

तेइयै ते सारै बाहरै खोलै, होर शोहरी रै आमा बापू होर आपणै त्राई च़ेले सैंघै भीतरै नौठा। 41होर शोहरी रा हौथ ढौकिया तेसा बै बोलू, “तलीता कूमी!” ज़ौसरा मतलब होआ सा, “ओ शोहरी हांऊँ तौभै बोला सा, उठ।” 42होर सौ शोहरी एकदम उठिया औंढदी लागी, किबैकि सौ बारा बौर्षै री ती। तैबै सैभ लोका ऐ हेरिया बड़ै हैरान हुऐ। 43यीशुऐ तिन्हां बै चेताऊणी देइया बोलू, “ऐ गैल कौसियै नी लोड़ी ज़ाणी होर एसा बै किछ़ खाँणै बै दैआ।”

المحددات الحالية:

मरकुस 5: KFX-NT

تمييز النص

نسخ