MATIUS 8
8
I Yesus nupakaul᷊engu singkatau ko pia sakie e pisi ko makatataku
(Mrk. 1:40-45; Luk. 5:12-16)
1I Yesus nurumusung bou wul᷊ure dang napene taumata ko nutumuhu si Sie. 2Su tempo e'e nusumongo singkatau ko pia saki e pisi ko makatataku.#8:2: pia saki e pisi ko makatataku: tumuhu atorang u agama Yahudi, saki i'i makakoa masasaki e'e tawe wotonge manumba Mawu Ruata su tampa pukakal᷊iomanengang. I sie nusuba su saruangi Yesus, dingang nangul᷊i, “Tuang, boko i Tuang mo, i Tuang pupakaul᷊e ko si sia i.”
3I Yesus nuhinggo tau e'e dingang u nangul᷊i, “Ia mo, kaul᷊e te!” Singka tempo e'e sakie dingang nailang. 4#Im. 14:1-32Bou e'e I Yesus nangul᷊i si sie, “Tinaungete! Kumbahang muwuke si sai-sai. Kateho dako te tamai sarang koa i imam, dang pundo si sie pungul᷊i i kau seng tinga-tingari naul᷊e. Bou e'e pangonggo ko sasumbangu kere niparentangi Musa makoa kere tatia su taumata i kau seng tinga-tingari naul᷊e.”
I Yesus nupakaul᷊engu paparentangu singkatau parawirangu Roma
(Luk. 7:1-10)
5Su tempo ngi Yesus nusumu su Kapernaum, pia singkatau parawirangu Roma nusumongo nusombangi Sie, dingang nundo tul᷊ung si Sie. 6“Tuang,” angkungu parawira e'e, “Paparentangku masaki su wal᷊e. I sie l᷊oka-l᷊oka su l᷊al᷊okang ko kesohi ko mansingsara kahingang.”
7I Yesus nangul᷊i, “Hindo Ia matamai mupakaul᷊engi sie.”
8“Tawahal᷊uasi Tuang,” nisimbahu parawira e'e, “Ia tahinonge manarima i Tuang su wal᷊eku. I Tuang piange puparenta. Paparentangku e'e seng maul᷊e. 9Watu u ia mang mambeng tumuhu parentangu tumbonang. Dang su al᷊ungku l᷊ai pia manga parajuriti ko mambeng tumuhu parentaku. Boko ia muparenta singkatau parajuriti, ‘Daleng!’ i sie tamai rumal᷊eng. Ia mangul᷊i si sire kowal᷊inge, ‘Mai si i!’ i sire mamai; dang boko ia mamarenta paparentangku, ‘Koako i'i!’ e'e mang koatenge.”
10Suapangi Yesus nakaringihi apang ko niul᷊iu parawira e'e, i sie naherang. Bou e'e i Sie nangul᷊i su taumata ko katuhue si Sie. “Bal᷊inge gampang taumata i'i. Su tal᷊oarau tau Israel Ia mborong ta nakahombang pangangimang ko kiri i kal᷊aboe! 11#Luk. 13:29Tingari! Maul᷊i taumata sarung sumongo bou simbukangu raki dingang bou wahe tadeau mural᷊uasi dingang i Abraham, Ishak, dingang i Yakub su kararatuangu Mawu Ruata. 12#Mat. 22:13, 25:30; Luk. 13:28Arawe manga taumata ko hinonge makoa umat u Mawu Ruata, i sire sarung i rume su l᷊ikure sarang l᷊al᷊ungu kararundung. Pai se'e sarung mumpal᷊ehe mutatahangu singsara.” 13Bou e'e I Yesus nangul᷊i su parawira e'e, “Kapul᷊e te, apang ko niakingu e'e sarung mariadi.”
Dang singkatempo e'e l᷊ai paparentange e'e naul᷊e.
I Yesus nupakaul᷊engu taumata maul᷊i
(Mrk. 1:29-34; Luk. 4:38-41)
14I Yesus nakoa sarang wal᷊engi Petrus. Su e'e i Sie nakawua si emponge Petrus kowawine l᷊oka-l᷊oka kal᷊ahange. 15I Yesus nuhinggo l᷊imange, l᷊ahange e'e dingang nailang. I sie nuwangung dingang nutal᷊ung si Yesus.
16Seng kawawul᷊aenge, taumata nahungsongo sarang koa I Yesus numbawa taumata maul᷊i ko nikasukangu roh ko dal᷊ai. Dingangu didato singkamohong, I Yesus nanguseri roh ko dal᷊ai e'e dingang nupakaul᷊engu taumata ko masaki. 17#Yes. 53:4Kaul᷊ie nikoa I Yesus, dang dingang u e'e nariadi apang ko niul᷊i'i Nabi Yesaya, “I Sie seng nananggung singsarangi kite dingang u nupakaul᷊engu saki i kite.”
Manga taumata ko mo makoa tumatuhu I Yesus
(Luk. 9:57-62)
18Pia taumata napene nuhumung si Yesus. Su tempo ngi Yesus nakawua si sire, i Sie nundoi manga tumatuhu-E pul᷊iu rano. 19Bou e'e pia singkatau meteru agama nusumongo si Sie dingang nangul᷊i, “Tuang, ia mo tumuhu si Tuang maning sarang apa!”
20I Yesus nusumimbahi, “Serigala pia l᷊iange, dang burung pia sal᷊ehe, arawe Ahusu Taumata takoae tampa katikilange.”
21Bou e'e l᷊ai singkatau tumatuhu-E kowal᷊inge nangul᷊i, “Tuang, kere wotonge ia mapul᷊e horo mul᷊uwing i papaku.”
22Kateho I Yesus nusumimbahi, “Tuhute si Sia, balate kere tau ko nate nae pul᷊uwing taumata ko seng nate sisane.”
I Yesus nupakal᷊enehu anging mauha
(Mrk. 4:35-41; Luk. 8:22-25)
23I Yesus nusumake su sakaeng dang manga tumatuhu-E nutumuhu si Sie. 24Singkawawua su rano e'e nitiukangu anging ko mauha-uha hakiu sakaengi sire nibungkusu l᷊ua. Su tempo e'e I Yesus katikie. 25Kute manga tumatuhu-E tamai nusumandighi namuko si Sie. Angkungi sire, “Tuang! L᷊ul᷊ung ko! I kite seng masilaka!”
26I Yesus nangul᷊i, “Apa maka taku si kumu? Kadio-dio we pangangimangi kumu si Sia!” Bou e'e I Yesus nurumarisi nuheang anging dingang u l᷊ua su rano e'e. Bou e'e rano mangkate ko mal᷊ene-l᷊enehi.
27Manga tumatuhu-E kaul᷊ie naherang. I sire nangul᷊i, “Taumata ko kira i'i, sarang anging dingang u l᷊ua nutumuhu parenta-Nge!”
I Yesus nupakaul᷊engu duangkatau ko nikasukangu roh ko dal᷊ai
(Mrk. 5:1-20; Luk. 8:26-39)
28I Yesus nahumpa su simbukangu rano su tana Gadara. Pai se'e pia duang katau nikasukangu roh ko dalai, nusumongo si Sie. I sire rua kaul᷊ie wahani, hakiu takoae taumata ko wahani sumahe su se'e. 29I sire rua nusumuwang bou l᷊ohangu kubul᷊i dang nukumiha. “Ahusu u Mawu Ruata, sarung pakuraneng-U i kami? Apa i kau seng mo mamahang si kami maning mborong bal᷊inge temponge?”
30Ta marau bou e'e, pia wawi maul᷊i kapundea kangi sire. 31Roh ko dal᷊ai e'e nundo si Yesus, “Boko i Kau muparenta si kami pasuwang, parentaite i kami pasu su manga wawi tamai e'e.”
32“Dakoe!” angkungi Yesus. Roh ko dal᷊ai e'e nusumuwang bou tau darua e'e, bou e'e nusumu su manga wawi. Dang manga wawi e'e nasue nutumal᷊ang nutumumpa su towae sarang l᷊al᷊ungu rano, bou e'e nal᷊umisi.
33Apang mundadiaga wawi e'e nasue timal᷊ang sarang soa, bou e'e nuwuke apang ko nariadi, dingang u l᷊ai hal᷊i i sire rua ko nikasukangu roh ko dal᷊ai. 34Taumata kaul᷊ie su soa e'e natamai mundea si Yesus. Suapang nakawua si Yesus, i sire nundo singapang botonge tadeau i Sie panintangu tampa i sire.
المحددات الحالية:
MATIUS 8: LAISXN
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
2014 Indonesian Bible Society (Lembaga Alkitab Indonesia)
