TOWUNÖT 7
7
1Kïlenchï ECHOTYON Noa, “Lïtö meli nko pikökwo löwïr, ompöwölo kasïwan lö nyi onkït ompö ngwïny kïmïkul nyo ighöy nyo tenate. 2Ipö tyonkïn cho le mut nko odeny cho kyomöy nyo le kïrkït nko nyo sakate. Ipenyi tïkwïl tyonkïn odeny odeny cho melö kyomöy. 3Ainam törit mut nko odeny, kïrkït nko korketö. Ighenyi lenyoni tömewonyeghö tyonkïn cho kikigh ngwïnyinï. 4Ompöwölo köngötï osiswö cho le mut nko odeny ntökwitï ato oropönchinan ngwïny osis tömönut angwan, pöghet nko nangat, tökewur tïkwïn cho söpsot cho mi ngwïny cho kyaghan.” 5Kwigh Noa kïgh anka tïkwïl lenyini kimwochï ECHOTYON.
6Kitïng Noa könyis 600 atoni kilum puseryonta ngwïny. 7#Mat 24:38-39; Luk 17:27. Kïwö nyinte kïlït meli nko korkenyi nko werkachi nko korukwa tökïchïwïtyeghö puseryontonay. 8Kichïwït nyinte nko tyonkïn lapay cho kyomöy nko tïkwïl cho kimelö kyomöy nko törit nko tyonkïn kïsyach cho echön nko cho mïnkech, odeny odeny. Kïrkït nko nyo sakate 9kïlïtöy chane melinay kïle nyini kimwochï Tororöt nyinte. 10Nyini kewonyö osiswö cho le mut nko odeny, kwitï puseryontonay.
11 #
2Pt 3:6. Otini kitïta Noa könyis 600, asisto 17 nyo pö araweto odeny, kïyotisyö asisoni konyi pöghon cho kimi ngwïny, kutulï pögh ompö owesyö akïyotisyö kukoti pögh cho mi yïm. 12Kïropan akïropan ompö osis tömönut angwan pöghet nko nangat. 13Kïlït Noa melinay nko korkenyi nko werkachi, Syem nko Am nko Yapet nko korukwa asisoni kitor kïropan. 14Kipa chane nko tyonkïn löwïr, kyak nko cho pö wudïn, cho echön nko cho mïnkech nko tarit anka tïkwïl. 15Kïrkït nko nyo sakate nyo pö kïgh anka tïkwïl nyo satate: kïpa kïlïtöy melinay nko Noa, 16lenyini kimwa Tororöt. Atolapay kïkar ECHOTYON kukat.
17Kulum puseryonta ngwïny osis tömönut angwan. Otini kitösisyö pögh, kïsyol meli parak. 18Kïkany kïtösisyö pögh tya ompö ngwïny kïwesteghö meli paraku pögh. 19Kïtösisyö pögh akïtösisyö ompö owesyö nyoman ntökulum kutïngkot cho kikoghöch tya cho kimi ngwïny. 20Kïtösisyö pöghechay ntökulum kutïngkot akïtas miten mut nko odeny parak. 21Kïmeghö tïkwïn tïkwïl cho sötote cho kimi ngwïny: törit nko kyak nko tïpö wudïn nko walaka tïkwïl cho chuto kegh mu ngwïny nko pich löwïr. 22Kïma kïgh anka tïkwïl nyo tïng kimïny ompö ngwïny. 23Kuwur ECHOTYON tïkwïn tïkwïl cho söpsot cho mi ngwïny: pich nko tyonkïn löwïr nko törit tïkwïl. Kikiwany tïkwïn löwïr kïpoto Noa onkït nko chini kimi nko nyinte meli ori. 24Kïtïpï pöghechay ngwïny osis 150.
Kewonyö puseryonta
المحددات الحالية:
TOWUNÖT 7: PIPÏLIA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©Bible Society of Kenya, 2019
