MATIUS 2
2
Mo luwaso sa-nen wonaru mbenarugwi nap lobok yiga wene
2:1-12
1Nagawan Erores worasola tarem-e Yurea nggweyak pem-o Mbetleyem iri me-nen Yesus ndet yij-o. Nderak worala-ge, mo luwaso sa-nen wonaru mbenarugwi nab-e Yerusalem wok yogolat-nen 2kin wok onpogolar-e: ”Yawuri nap nagawan ngget ndet yid na-ge ngge me worasu-o? Mo luwaso sa-nen at wonaru nam yosola kaigerik-nen at erembel wanuwokluk lobok yige-o” luk yiga-o. 3Nde, Nagawan Erores-nen wene iri na kuluruk yarig-e, wendet yij-o. Wendet yosoloma, it Yerusalem woragwi nap oboksa-nen na wendet yiga-o. 4At-nen-e tepam omborak nagawan nagawan min Yawuri nap imiri mbarak pidnak wene enaru nap min ndok worak unpuruk-nen kin wok onposolar-e: ”Mesias na-ge ngge me-nen ndet ubuwa-o luk yidnak kali-o?” kin wok inpij-o. 5Nde, it-nen yogolar-e: ”O Mbetleyem Yurea nggweyak pem-nen ndaguwa-o.” Nde, Mbal Pem Nagawan ene lomboksa yoso nap-nen mbarosolar-e:
6”Kat Yewura nggweyak pem woraso Mbetleyem wa-e. Yewura nap nagawan ennggendumu-ge kar-e marig-e lag-o. Kat karem-nen nam yosolar-e, an nilirak Isarael nap ndemil unpuruk nosolat, togwat unpurak nap mbi nam ma-o” luk mbaridj-o.
7Iri luk, Erores na-ge wonaru mbenarugwi nap na mbik mbok wene mbo unpuruk-nen kwara kin wok onposolar-e: ”Wonaru iri-ge ngge tarem-nen nam yosola kaigeb-o?” luk yak indij-o. 8Iri rak purug-e, Mbetleyem wirik onposolar-e: wene yu yak indij-o: ”Mburugupndig-e, la iri kwara lombot puruk, kagolug-e, an na erembel wil mbereyek-nen yak niril lobok yer-o” luk yak indij-o. 9Nagawan iri-nen yidnak wene kuluruk yigarig-e, mbiriga-o. Mburukmu, tu ndumu-nen yik kaiganggal-e, mo luwaso sa-nen karuk lobok yiga wonaru na-ge kaiga-o. Nde, wonaru na-nen lit unpuruk mberarik, la na worasu sa iri na me ndong yij-o. 10Wonaru na karuk yigarig-e, it na enalin enalen kwarat yiga-o. 11O ma iri nggwiganggal-e, la marik na ija Maria imin worasoma, kaiga-o. Karug-e, la iri na eram tud luk, at erembel waniga-o. Iri rak purug-e, it insilobulo yarak woraso unsum munen-e emas posid min kemenyan emben worak amburu min mut emben worak amburu min kenangga we irit wok tiga-o.
12Nde, nabi bem-nen Mbal Pem Nagawan-nen it yak ondosolar-e: ”Kunuwok lem Erores eram mbururak pug-o” luk yak ondosoloma-ge, tula nin nggwe enma mbiriga-o.
Kwiye Mesira mbiriga wene
2:13-15
13It na mborogolikma-ge, nabi bem Nagawan Indo-nen idnak aid nap na Yusup eram nam luk-nen yak tosolar-e: ”Erores na-nen-e la marik iri na wereyekluk ogore yuwa me, men luk yugundik, kela marik min ija min wok unpuruk, Mesira uwi mburugundik wolmer-o. Worakmu, an-nen tuguruk yak korosola-nen lobok yurag-o” luk yak tij-o. 14Yak tosoloma-ge, Yusup na men luk la na ija min inmin lug-e, kubu iri na-t kwiye Mesira mbirigarig-e, 15iri me worakmu, Erores na wat yij-o.
Iri kwat yid iri-ge Nagawan Indo-nen at ene lomboksa yoso nap emndam tak posolar-e: ”Mesira worasoma, an Nambara-ge wene mbo bigi-o” yid iri na ndak tak posolat-nen kwat yij-o.
Li marik indidnak wene
2:16-18
16Erores-nen lombot pidnggal-e, wonaru mbenarugwi nap-nen at amberam laidnak alama-ge, at isilepma kwarat luk-nen yosolar-e: ”Li marik Mbetleyem woragwi min inggi inggi woragwi min ndesa mburuk dua tahun ala na, dua tahun urugwe nggwe woraidnak ala na, oboksa undurag-o” luk wene wosa wirik pij-o. Iri yid iri-ge wonaru mbenarugwi nap-nen at yak tidnak ndak ndak ndet yidnak ala-nen iri yij-o.
17Mbal Pem Nagawan ene lomboksa yoso nap Yeremia-nen yu yid iri na ndak tak posolat-nen kwat yij-o. At-nen yosolar-e:
18”O Arama iri me-nen Arakel ene yosolar-e,
indi puru min yip yosolat, ene nggwa yosolat, kuliga-o.
Arakel ilirak na wat yikma, unpud-nen yip tosola,
indi yangunurag-e meya-o” luk yij-o.
Mesira-nen unuwok lem lobok yiga wene
2:19-23
19Erores na wat yosoloma-ge, Nagawan Indo-nen idnak aid nap mbi nabi nggwe Yusup eram nam luk-nen yak tosolar-e: 20”La na wuruwokluk yiga nab-e wat yidnak me, men luk yugundik, la iri ija min wok unpuruk, Isarael uwi mbiri-o” luk yak tij-o. 21Yak tosoloma-ge, Yusup na men luk, la na ija min wok unpuruk, Isarael uwi tuguruk lobok yiga-o.
22Alat nde, at-nen kulidnggal-e, Arekelaus na-nen at eid Erores na ondolmasa Yurea nagawan men agaij-o luk yogola kulurug-e, Yusup-nen-e iri me mbururak kwiye yij-o. Iri ala-ge, nabi nggwe-nen at nggomo worosolar-e: ”Iri me wolmomtak pug-o” luk yak togola karuk, Nggalilea uwi mberarik, 23o unu Nasaret iri me woragaij-o. Iri me woragaid iri-ge Mbal Pem Nagawan ene lomboksa yugwi nap-nen yogolat, ”At iri-ge Nasaret nab-o luk yuwa-o” luk yiga na ndak tak posolat-nen woragaij-o.
المحددات الحالية:
MATIUS 2: inondx
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
@LAI 1992, 1994
