Jɛ́nɛ́sì 3
3
Nyɔǔn-dyùɛ̀ ɓuɖu-ɓuɖu
1Ɓó tia ɓaɖaa, sɛ kɔ̃̀ ma sɛ́ɖɛ́ mìɔ, ké ɔ zi ma xwáɖá-xwíɖíi-nìmìì séín ɓɛ́ Bounɓo Gèɖèpɔ́ɔ̀ mɛ ma kà kɛɛ dyí. Wé ɖòɛ̀ ɓaɖaa, sɛɔ̀ diè ma màaɔ̀ dyi, ké ɔ ɖá, “Gèɖèpɔ́ɔ̀ ɖá ɓě mɛ ɓɔ́ cu ɓě nìà ɓáá-ɖɛ̀-gbǎà múɛɛ ɖò ɖiɛ fɔɔ cáe?”
2Ké màaɔ̀ jǔ ma sɛɔ̀ gɔ̃̌, ké ɔ ɖá, “Gèɖèpɔ́ɔ̀ ɖá à ɓɛ́ìn cu ɓě nìà ɓáá-ɖɛ̀-gbǎà múɛɛ ɓo ɖiɛ, 3kɛɛ cu nìà ɖé ɓáá-ɖɛ̀-gbǎà hwòɖǒǔn wɛ̃ɛ, ɔ ɖá à mɛ ɓɔ́ɔ ɓo ɖiɛ, mɔɔ à mɛ ɓɔ́ɔ dyi tìnìɛ̀n fɔɔ cá, à ní kɔ̃̀ ɖà mɛ́.”
4Púɛɛ, sɛɔ̀ cɛ̃ɛ ma màaɔ̀ gbo, ké ɔ ɖá, “Ɓě se mɛ́ɛ mu fɔɔ cá. 5Gèɖèpɔ́ɔ̀ dyuòɛ̀ dyí kà wé kɔ̃̀ ɓaɖa ɓɛ́ ɓě muɛ ɖiìn nyɛɛ, ɓěɛ̀ dyéɖé mu kaàùn, ké ɓě mu nììn kà ɔ nìà kɛ, sepóɛɖé ɓě mu ɖɛín-ɖɛ̀ kè ɖɛ gbà zaìn gboi dyí dyuòùn.”
6Ti ɓɛ́ màaɔ̀ dyéɛ ma kà cuɔ̀ nɔ̀mɔ̀ìn ma dyéɖéín dyíin, kè kà ɔ nɔ̀mɔ̀ ma dyíin ɓó ɖi jè, kè kà ɔ ɓɛ́ìn nyuɛ ɓɛ́ nyɔ ké hwòɖǒ fɔ̀nɔ̀ɛɛ, púɛɛ, ɔ kpã́ ma cuɔ̀ ɓo ɖò, ké ɔ ɖiɛ ma. Ké ɔ nyí ma ɔ dyú-ɓǎɔ̀ ɖò, ké ɔ mɔ̀ùn ɖiɛ ma ɖekè. 7Púɛɛ, wa sɔ̃́ɔ̀ dyéɖé kaà ma, ké wa dyéɛ ma kà wa fɔ̀nɔ̀ ma gbɔ kɛ. Ɔ jèɛɛ, wa gmaìn ma féè-mì dyí, ké wa gbǎìn ma wa mìɔùn.
8Ɓó hwìo pɛ̀ɛ kɛɛ, gàaɔ̀ kè ɔ gmààɔ̀ wɔ̃́ ma Bounɓo Gèɖèpɔ́ɔ̀ ɓo-jĩ̌, ti ɔ nì ma ɖé ɓáá-ɖɛ̀-gbǎɔ̀ mú dyi nàǔn wɛ̃, ké wa vǐè ma ɔ dyí ɖé cu ɓě nì ma ɖé ɓáá-ɖɛ̀-gbǎɔ̀ múɛɛ hwìɛ̀. 9Kɛɛ Bounɓo Gèɖèpɔ́ɔ̀ ɖá ma gàaɔ̀, ké ɔ ɖá, “Áɖɔ̀ùn,#3:9 Áɖɔ̀ùn-nyɛ̀nɛ̀ɔ̀ xwíníín mɔ̀ gàa. dɛ̌ m̀ nì kɛ́?”
10Ké Áɖɔ̀ùn ɖá, “Ḿ wɔ̃́ɔ́ má nì ɓo-jĩ̌ nɔ̄ ɓáá-ɖɛ̀-gbǎà mú, ké ḿ fɛ̃̀ìn, sepóɛɖé ḿ fɔ̀nɔ̀ gbɔ jè, ké ḿ vǐè.”
11Ké Bounɓoɔ̀ ɖá, “Nyɛ́ cɛ̃ɛ m̀ gbo kà m̀ fɔ̀nɔ̀ gbɔ kɛ́? M̀ ɖǎ cu kɔ̃̀ jè ḿ cɛ̃ ma kà m̀ gbo, ké ḿ ɖá m̀ mɛ ɓɔ́ ma ɖiɛ kɛɛ ɖò ɖiì?”
12Púɛɛ, Áɖɔ̀ùn ɖá, “Màa ɓɛ́ m̀ nyí ma kà ḿ wɛ̃ɛ, ɔ mɔ̀ nyɔ nyí ḿ cuɔ̀ ɖò, ké ḿ ɖià kɛ̀.”
13Hwɛ̀ ké Bounɓo Gèɖèpɔ́ɔ̀ cɛ̃ɛ ma màaɔ̀ gbo, ké ɔ ɖá, “Ɖɛ́ mɔ̀ ɖɛ m̀ nyuà kɛɛ xwíníín nyɛ́?”
Púɛɛ, màaɔ̀ ɖá, “Sɛɔ̀ cá ḿ, ké ḿ ɖià kɛ̀.”
14Hwɛ̀ ké Bounɓo Gèɖèpɔ́ɔ̀ cɛ̃ɛ ma sɛɔ̀ gbo, ké ɔ ɖá, “M̀ ɖǎ ɖɛ nìà kɛ nyu jèɛɛ, hwòɛ̌-wùɖù nì m̀ kɔ̃ ɖé nyúà-ɖɛ̀ kè xwáɖá-xwíɖíi-nìmìì séín hwìɛ̀. Nì muá nì xwíɖí-kùɔ̀ kɔ̃ nàìn, ké nì muá ɓóɖóɔ̀ púu-púu ɖiìn ɖé nì fɛ̀ɛ̀-wè séín mú ɖekè. 15Ɓó kɔ̃in ɖeɛɛ, ní muá nyɛ́ín-nyɛ́ín ɓó m̀ kè màaɔ̀ pṹa poùn, ɔ kè ɓó nì xwíníín-dyù kè ɔ nììn xwíníín-dyù pṹa. Nì mu ɔ ɓò-kéɖéɔ̀ mú bunuìn, kɛɛ ɔ mu nììn dúɔ̀ dyi wàìn.”
16Hwɛ̀ ké ɔ cɛ̃ɛ ma màaɔ̀ gbo, ké ɔ ɖá, “Ní muɛ nyuùn ɓɛ́ nì xwíɖí ké puà mìɔ ɖé nì dyú-wóɖóìn-wóɖóìn mú. Ɖé xwíɖí-puà-puà mú, ɖéɛ̀ nì mu dyú wóɖóìn. Ɓó kɔ̃in ɖeɛɛ, nì mu nì dyú-ɓǎɔ̀ wuɖuí kɔ̃̀ɔ̀ mɔ́ùn, kɛɛ ɔ mu m̀ wuɖuí kɔ̃̀ùn.”
17Hwɛ̀ ké ɔ cɛ̃ɛ ma gàaɔ̀ gbo, ké ɔ ɖá, “Sepóɛɖé m̀ ɖǎ nì gmààɔ̀ wuɖuɔ̀ ɖùǔ gbo tò, ké m̀ ɖǎ cu kɔ̃̀ jè ḿ cɛ̃ ma m̀ gbo, ké ḿ ɖá m̀ mɛ ɓɔ́ ma ɖiɛ kɛɛ ɖi jèɛɛ, hwòɛ̌-wùɖù nì ɓóɖóɔ̀ kɔ̃ ɓó nì jè. Dyììn ɖé nì kũ̀à ku wɔ̃ nyu-nyu múɛɛ, ɖéɛ̀ nì muáa ɖii-ɖɛ̀ mú dyéìn ɖé nì fɛ̀ɛ̀-wè séín mú. 18Wí-cù kè pìǐ ɓě muá ɓóɖóɔ̀ kɔ̃ mɛìn, ɓɛ́ wa ké m̀ fũ̀à-fṹá nyùìn, ké nì muá ɖii-vàǎ ɖé xwáɖá xwíɖíi zàùn, hwɛ̀ ɓɛ́ m̀ kéá ɖɛ ɖi. 19Ké dyììn ɖé zu-nya-nya múɛɛ, ɖéɛ̀ nì mu nì ɖii-ɖɛ̀ dyéìn tee, ɓɛ́ m̀ ké ɖé ɓóɖóɔ̀ mú ɖe mu hwɛ̀, sepóɛɖé ɖé ɓóɖóɔ̀ púu-púuɔ̀ múɛɛ, ɖéɛ̀ ḿ zà ma m̀. Sepóɛɖé m̀ mɔ̀ ɓóɖó jèɛɛ, m̀ ɓéɖé m̀ ké ɖé ɓóɖóɔ̀ mú ɖe mu wɛ̃́ɛ́.”
20Púɛɛ, Áɖɔ̀ùn jǔìn ma ɔ gmààɔ̀ nyɛ́nɛ́. Ɔ ɖáìn ma ɔ Íì kɔ̃̀ xwíníín mɔ̀à fɛ̀ɛ̀ kɛ, sepóɛɖé ɔ mɔ̀ nyɔ mu ma nyɔ séín mu fɛ̀ɛ̀ ɓéɖéìn nyɛɛ ɖe jǔùn. 21Hwɛ̀ ké Bounɓo Gèɖèpɔ́ɔ̀ nyu ma nimii-kùɖùù ɖɔ mú ɓó Áɖɔ̀ùn kè ɔ gmààɔ̀ bìì, ké ɔ poɛ ma wa mú.
22Sɔ̀ìn ɓóɛ gboɛɛ, ɔ cɛ̃ɛ ma, ké ɔ ɖá, “Nyɔǔn-dyù ɖǎ nì kà à nìà kɛ, sepóɛɖé wa ɖǎ ɖɛín-ɖɛ̀ kè ɖɛ gbà zaìn gboi dyí dyuò. Ɓó kàǔn wɛ̃ɛ, à mɛ ɓɔ́ wa dyi táà, wa ní kɔ̃̀ ɖà fɛ̀ɛ̀-cùɔ̀ ɓo ɖò kpã́, ɓɛ́ wa ní kɔ̃̀ɔ̀ ɖà ɖi ɖekè, nìí, wa ní kɔ̃̀ ɖà cĩ́ kánáá pū.” 23Ɔ jèɛɛ, ɔ kúmú ma wa Ídɛ̃̀ìn-ɓàǎ-ɖɛ̀-gbǎɔ̀ múin, ɓɛ́ wa ké ma ɓóɖó kɔ̃̀ mú ɓɛ́ ɔ zà ma kà wa kɛɛ kũ̀à gbo nyu. 24Ti ɓɛ́ ɔ ɖǎ ma wa kúmúɛɛ, ɔ po ma cɛ́ɖɔ̀#3:24 Cɛ́ɖɔ̀ mɔ̀ fɔ̀ɔ̀-ɖɛ̀ ɓě sɔ̀ìn ɖé Gèɖèpɔ́ɔ̀ gbo ɓɛ́ wa mɔ̀ ɖɛ-dyí-gmɔ̀-nyɔ̀ ɓěɛ. ɓě kè gàsíà ɓɛ́ ɔ ɓéɖé nyɛ-mìɔ̀ kɛɛ ɖé Ídɛ̃̀ìn-ɓàǎ-ɖɛ̀-gbǎɔ̀ dyóɖó-xwáɖáún-wóɖóìn-naínɔ̀, ké gàsíàɔ̀ nì ma dyi vũàǔn ɖé wáká séín kɔ̃. Ɔ po ma wa ɖé, ɓɛ́ wa ké ma hwìè muà ɖé fɛ̀ɛ̀-cùɔ̀ gboɛɛ dyí gmɔ̀.
المحددات الحالية:
Jɛ́nɛ́sì 3: ƁB02
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bassa Bible © Bible Society Liberia, 2002.
