Jɛ́nɛ́sì 2
2
1Kǎà dyɔɔ̀ kè ɓóɖó-kpàɔ̀ ɔ kè ɖɛ séín nì ɖé wa múɛɛ nyu ma hwɛ̀ɛ̀. 2Ɔ kéá ma wéɔ̀ mɛ̀nɛ̌ìn-sɔ̃́ nììnɔ̀ jǔɛɛ, Gèɖèpɔ́ɔ̀ ɖǎ ma ɔ kũ̀à séín ɓě ɔ nyu ma kà kɛɛ hwɔ. Púɛɛ, ɔ fɔ̀ ma ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖa. 3Ké ɔ po ma wéɔ̀ mɛ̀nɛ̌ìn-sɔ̃́ nììnɔ̀ mana kɔ̃. Ɔ po ma wéɔ̀ wáká, ké ɔ nyuɛ ma ɔ fɔ̀-wè mú, sepóɛɖé ɔ mɔ̀ wé kɔ̃̀ ɓaɖa ɓɛ́ ɔ fɔ̀ ma, ti ɓɛ́ ɔ ɖǎ ma ɔ kũ̀à séín ɓěɔ̀ nyuɛ hwɔɛ.
Kà Gèɖèpɔ́ɔ̀ nyu ma gàa kĩ́ín-kĩ́ín kè màa kĩ́ín-kĩ́ín mɛɛ kɛ
4Ɖɛ ɓá dyɔɔ̀ kè ɓóɖó-kpàɔ̀ dyí, ti ɓɛ́ Gèɖèpɔ́ɔ̀ mɛ ma wa kɛɛ, ɔ kɛà kɛ̀. Ti ɓɛ́ Bounɓo Gèɖèpɔ́ɔ̀ mɛ ma kà dyɔɔ̀ kè ɓóɖó-kpàɔ̀ kɛɛ, 5xwáɖá ɖò séè ma ɓóɖó-kpàɔ̀ kɔ̃ nì ke, ké pìǐ ɖò séè ma mɛ ke, sepóɛɖé ɔ séèɛ̀ ma nyu ɓɛ́ ní ɖò ké ma ɓóɖó-kpàɔ̀ kɔ̃ ɖaɓa ke, ké nyɔ ɖò séè ma nì ɓɛ́ ɔ ké ma ɓóɖóɔ̀ jè gbo gmɔ̀ ke, 6kɛɛ ní sɔ̀ ma ɓóɖóún, ké ɔ tèìn ma ɓóɖó-kpàɔ̀ dà séín.
7Hwɛ̀ ké Bounɓo Gèɖèpɔ́ɔ̀ mɛ ma gàa sɔ̀ìn ɖé ɓóɖóɔ̀ púu-púuɔ̀ mú. Ké ɔ fɔ̀ìn ma fɛ̀ɛ̀ fɔ̀-fɔ̀ ɖé ɔ máná-ɓìɔ̀ mú, ké gàaɔ̀ dè ma cĩ́ɛ gbɔ. 8Ké Bounɓo Gèɖèpɔ́ɔ̀ ɓá ma ɓáá-ɖɛ̀-gbǎ ɖò ɖé Ídɛ̃̀ìn-pà hwɔ ɖé dyóɖó-xwáɖáún-wóɖóìn-naínɔ̀ dyíɛɛ kɔ̃, ké ɔ po ma ɖé gàa ɓɛ́ ɔ ɖǎ ma kà mɛ kɛ. 9Ké ɔ nyuɛ ké cu kã̀ìn séín mɛ ma sɔ̀ìn ɖé ɓóɖóɔ̀ mú. Wa mɔ̀ cu ɓě ɓɛ́ wa nɔ̀mɔ̀ìn ma dyéɖéín dyíin, ké wa nɔ̀mɔ̀ dyíin ɓó ɖi jèɛ. Cu-gɔ̃̀ sɔ̃́ ɖò nì ma ɖé ɓáá-ɖɛ̀-gbǎɔ̀ hwòɖǒǔn. Dyúáɖò mɔ̀ fɛ̀ɛ̀-cù, ké dyúáɖò mɔ̀ cu ɓɛ́ ɔ ɓɛ́ìn nyuɛ ɓɛ́ nyɔ ké ɖɛín-ɖɛ̀ kè ɖɛ gbà zaìn gboi dyí dyuòɛ. 10Ní vɛ̀nɛ̀ ɖò zĩ̀ìn ma ɖé Ídɛ̃̀ìn-ɓàǎ-ɖɛ̀-gbǎɔ̀ mú, ké ɔ nyí ma ɓáá-ɖɛ̀ ɓěɔ̀ ní. Ɖé xwía kɛɛ, níɔ̀ ge ma mú, ké ɔ ɓéɖé ma ɖɔ́ hĩinyɛ. 11Ɔ ɖɔ́ kĩ́ín-kĩ́ínɔ̀ nyɛ́nɛ́ mɔ̀ ma Písɔ̀ùn. Ɔ mɔ̀ ní ɓɛ́ ɔ bĩìn ma Hàvíɖà-ɓòɖò gàná kɔ̃̀ mú ɓɛ́ góò nì ma kɛɛ dyiɛ. 12Góò nì ma ɖé ɓóɖóa kɔ̃ɛɛ nɔ̀mɔ̀ ma dyíin. Guò-cɛ̃̀ ɓɛ́ ɔ mɔ̀ nyɔ́ún-nɔ̀mɔ̀-ɖɛ̀ kɛ kè ɔ́nɛ̀-sɔ̀ɔ̌ ɓě nì ma ɖé ɖekè.#2:12 Guò-cɛ̃̀ kè ɔ́nɛ̀-sɔ̀ɔ̌ mɔ̀ bã-nyɔ̀ɔ̀ dyéé-ɖɛ̀ ɓě. 13Níɔ̀ ɖɔ́ sɔ̃́ nììnɔ̀ nyɛ́nɛ́ mɔ̀ ma Gíhɔ̃̀. Ɔ bĩìn ma Kúsì-ɓòɖò gànáɔ̀ dyi. 14Ɔ ɖɔ́ tã nììnɔ̀ nyɛ́nɛ́ mɔ̀ ma Táígàɖà. Ɔ zĩ̀ìn ɖé Àsíwíɖíà-ɓòɖòɔ̀ wáká hwɔà ɖé dyóɖó-xwáɖáún-wóɖóìn-naínɔ̀ dyíɛɛ mú. Ɔ ɖɔ́ hĩinyɛ nììnɔ̀ nyɛ́nɛ́ mɔ̀ ma Dyùféɖétì.
15Ti ɓɛ́ Bounɓo Gèɖèpɔ́ɔ̀ ɖǎ ma gàaɔ̀ ɖé Ídɛ̃̀ìn-ɓàǎ-ɖɛ̀-gbǎɔ̀ mú po, ɓɛ́ ɔ kéɛ ma xwa nɔ̀mɔ̀ìn, ɓɛ́ ɔ kéɛ ma gbo gmɔ̀ɛɛ, 16ɔ cɛ̃ɛ ma gàaɔ̀ gbo, ké ɔ ɖá, “M̀ ɓɛ́ìn cu séín nì ɓáá-ɖɛ̀-gbǎɔ̀ múɛɛ jĩ̀ kà nì mɔ́ kɛɛ ɖiɛ, 17kɛɛ cu ɓɛ́ ɔ ɓɛ́ìn nyuɛ ɓɛ́ nyɔ ké ɖɛín-ɖɛ̀ kè ɖɛ gbà zaìn gboi dyí dyuòɛɛ, mɔ̀ǔn ɖá m̀ kéɛ ɖi, sepóɛɖé wé kɔ̃̀ ɓaɖa nì muɛ ɖò ɖiìn nyɛɛ, nì mu mɛ́ìn jǎà.”
18Hwɛ̀ ké Bounɓo Gèɖèpɔ́ɔ̀ cɛ̃ɛ ma, ké ɔ ɖá, “Ɔ se dyíin nɔ̀mɔ̀ ɓɛ́ gàaɔ̀ ɖòùn ké nì. Ɔ jèɛɛ, ní mu gbo-kpá-nyɔ̀ ɖò ɓɛ́ ɔ kèɔ̀ kè wɛ̃ìn dyíɛɛ nyuùn ɓó ɔ bìì.” 19Kĩ́ín-kĩ́ín nyɛɛ, Bounɓo Gèɖèpɔ́ɔ̀ ɖǎ ma nimii séín kè naà séín ɓě ɓɛ́ ɔ ɖǎ ma kà mɛ sɔ̀ìn ɖé ɓóɖóɔ̀ múɛɛ gàaɔ̀ gbo dyà, ɓɛ́ ɔ ké ma wa nyɛ́nɛ́ jǔìn, ké nyɛ́nɛ́ ɓɛ́ gàaɔ̀ jǔìn ma fɔ̀ɔ̀-ɖɛ̀ ɖò-ɖòɛɛ mɔ̀ ma ɔ nììn nyɛ́nɛ́. 20Kǎà gàaɔ̀ nyu ma nyúà-ɖɛ̀ ɓěɔ̀ kè naà ɓěɔ̀ ɔ kè xwáɖá-xwíɖíi-nìmìì séín ɓěɔ̀ nyɛ́nɛ́ jǔɛ̀n. Kɛɛ gbo-kpá-nyɔ̀ ɖò ɓɛ́ ɔ kèɔ̀ kè wɛ̃ìn dyíɛɛ se ma nì ɓó ɔ bìì. 21Ɔ jèɛɛ, Bounɓo Gèɖèpɔ́ɔ̀ nyuɛ ma ɓɛ́ gàaɔ̀ ké ma nyíɔ vɛ̀nɛ̀ ɖò mú kpá. Ti ɓɛ́ gàaɔ̀ nì ma nyíɔún wɛ̃ɛ, ɔ zà ma ɓó ɔ wáá-sè-kpàɔ̀ ɖò, ké ɔ kã ma fɔ́ɔ̀ dyí ɖe. 22Ké ɔ nyu ma wáá-sè-kpà ɓɛ́ ɔ zà ma kà gàaɔ̀ wáún wɛ̃ɛ màa mú, ké ɔ dyà ma ɔ gàaɔ̀ gbo.
23Hwɛ̀ ké gàaɔ̀ ɖá,
“Ɛ̃̀hɛ̃́ɛ̀, kpá nìà kɛ mɔ̀ ní kpá ɓěɔ̀ ɖò,
ké fɔ́ nìà kɛ mɔ̀ ní fɔ́ɔ̀ ɖò.
Ɔ nyɛ́nɛ́ mu màa jǔùn,
sepóɛɖé ɔ sɔ̀ ɖé gàa mú.”
24Ɓó ɖɛa jèɛɛ, gàaɔ̀ mu ɔ ɖe kè ɔ ɓǎ dyi táàùn, ɓɛ́ ɔ kè ɔ gmààɔ̀ ké xwaún kpáìn, ɓɛ́ wa ké nyɔ dyúáɖò jǔ.
25Ɓó tia ɓaɖaa, gàaɔ̀ kè ɔ gmààɔ̀ fɔ̀nɔ̀ ma gbɔ, kɛɛ dɛ̃ se ma wa nyu.
المحددات الحالية:
Jɛ́nɛ́sì 2: ƁB02
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bassa Bible © Bible Society Liberia, 2002.
