Génesis 9
9
Dios Noénö, Noé itji̧mu̧nö ösödanö edö pjaatina jawa
1Ja̧danö, Diosma Noénöbi, i̧tji̧munöbi, dösölö̧jinö edö pjatatakwo̧sa, jö̧ba̧lö webijetö:
—Nöinö yebawö kwuju̧kwaduwo böjȩ ba̧kwemeachibanö kwöba̧jekwachaduwakobetjö̧— jö̧ba̧lijetö—. 2Okobe deinö tebonö ju̧kwadöbi, mö köba̧lö ju̧kwadöbi, nijinö töbawadöbi, ojwe okwanö ju̧kwadöbi ökwödönö edö yetjabikwedö. Ökwödönöma jobadö tjuluwedö baibanö 'da̧batö chujunawö̧ja. 3Ja̧danö, babema baikwö weta: Okobe deinö böjȩnö 'yaba̧ladö tebonö ju̧kwadönöbi, mejenö ju̧kwadönöbi, mö köba̧lö ju̧kwadönöbi, nijinö töbawadönöbi, ojwenö ju̧kwadönöbi kukwaduwobö jo̧be, kukwaduwakwawö̧ batjibanö. Ajayinöma kwakwawama tebonö ji̧da chiyijatö. Jo̧kwaijayonö babema böjȩnö 'yaba̧ladönöbi chiya, kukwaduwakwawö̧, jö̧ba̧lö— jö̧ba̧lijetö Diosma—. 4Jo̧kwaijayonö kwabö loköbaja̧duwawö̧nöma tjökwösobukwöma kukwaduwoko. Tjökwösobuma 'yaba̧lö tjö̧jajobuobetjö̧ kwaköbaja̧duwawö̧ tjökwösobu ebawajawö̧nöda kukwaduwo— webijetö Diosma.
5Ina jö̧ba̧lijetö:
—Yötawaduwakwö: Tebonö jo̧ jojonö kwabö loitjö̧ma jo̧banöma balekwa mikwa kwabö loköbaduwonö. Ja̧danö, jojonöbi jejenö, bakwo̧ jelo̧ jojonö kwabö lobo̧nöma. Bakwo̧ jelo̧ jojonö kwabö loitjö̧ma jo̧banö balekwa mikwa kwabö loköbaduwonö, jelo̧ jojonö kwabö lobo̧nöma. 6Yötawaduwakwö. Jojodönö chotidinawö̧ma ötjödadanö tjichejekwobetjö̧ bakwo̧ jelo̧ jojonö kwabö loitjö̧ma jo̧banö kwabö lotjakwo̧— jö̧ba̧lijetö Diosma Noénöma.
7Ina jö̧ba̧lijetö:
—Ja̧danö Noé, ökwödönö weta. Nöinö yebawö kwuju̧kwaduwo böjȩ ba̧kwemeachibanö kwöba̧jekwachaduwakobetjö̧— jö̧ba̧lö webijetö Diosma Noénö, Noé i̧tji̧munö.
Dios Noénö, Noé i̧tji̧munö iteda iwene yöbawö ujunina jawa
8Ikenama Diosma Noénö, Noé i̧tji̧munö jö̧ba̧lijetö:
9—¡A̧ja̧kwaduwitjö! Babema ötjö chiwene ökwödönö yöbawö chujuna. Ja̧danö, ökwödönöbi, ökwödötjö tupadanö jojodönöbi biya̧ pjatatakwa̧ chiwenema yöbawö chujuna. 10Ja̧danö, biya̧ yöbawö junö chiwenema okobe deinö ökwödökwö 'yaba̧ladönöbi yöbawö chujuna. Mö köba̧lö ju̧kwadönö, a̧ji̧kwakwawedönö, tebonö kwebachadönö okobe deinö isowitjö labekwinadönöma biya̧ ötjö chiwene yöbawö chujuna 11baikwö: Böjȩnö 'yaba̧ladönöma la'akatjöda yemidanöma söbeböbi lȩtebökakwo̧sa jwai balawa okwatinö weböma. Ja̧danö, jwai balawama la'akatjöda yemidanöma okwatibökakobe okobe jwiinö böjȩnöma— jö̧ba̧lijetö Diosma.
12-13Ina jö̧ba̧lijetö:
—Noé, ökwödönö chiwene yöbawö chujuni̧ chi̧sebi̧ma biya̧: Mayonö chönajabe mölejȩnö ö̧lobö. Jo̧ba mayoma i̧sekwobe ökwödönö yöbawö chujuni̧ chiwenema ökwödönöbi, ja̧danö, okobe deinö böjȩnö 'yaba̧ladönöbi. Ja̧danö, jo̧ba mayonö edinö kwomukwataduwakobe ötjö chiwene, La'akatjöda yemidanöma jwai balawa okwatinö webö söbebö lotökakobe jojodönöma, jö̧ba̧lö, yöbawö junö chiwenema— jö̧ba̧lijetö—. 14Ja̧danö, ojwiyo'wo wetena mayoma ö̧lakobe mölejȩnö. 15Jo̧banö edö ötjöbi chomukwatakwo̧sa yöbawö junö chiwenema ökwödönöma, okobe deinö 'yaba̧ladönöbi. Ja̧ ökwödönö yöbawö chujuni̧ chiwenema baikwö ji̧: Yemidanö jwai balawa okwatibanöma baledökakobe jojodönö söbebö loböma— jö̧ba̧lijetö Diosma.
16Ina jö̧ba̧lijetö:
—Jao Noé. Mayoma mölejȩnö ojwiyo'wokwö ö̧lena edö chomukwatakwo̧sa ötjö yöbawö junö chiwenema ökwödönö, okobe deinö böjȩnö 'yaba̧lajadönö. Ja̧ ökwödönö yöbawö chujuni̧ chiwenema ba̧kwȩlö̧jatebö ja̧kobe, 'dö̧ibajökönö. 17Ja̧danö, jojodöma jo̧ba mayonö edö tjomukwatakwedö ökwödönö yöbawö chujuni̧ chiwenema— jö̧ba̧lijetö Diosma Noénö.
Noé itji̧ abe'do 'dukwachökwenö edina jawa
18Ja̧danö, Noé i̧tji̧mu isowitjö labebinadöma bidö: Sem, Cam, Jafet. Camma Canaán abe'do. 19Jobadö Noé i̧tji̧mu wa̧medukwama okobe deinö böjȩ ba̧kwemeachibanö ju̧kwadö abönö ji̧nadö.
20Ja̧danö, Noéma batjo junö otidiabijetö. Jo̧bama uba batjo junö otidijetö, ajayinö uba batjoma. 21Ja̧danö, ju'wi möle öbatjonö wa̧ji̧tjö̧ ubasobu, o̧'do̧bu owijetö. Owajabetjö 'dukwachijetö Noénöma. 'Dukwachökwema eju okwa, i̧sa̧do debatö otidineju okwa bo̧ma, kamisi yo̧bekwibö jwibo̧ li̧jetö. 22Ja̧danö, Noé itji̧ Camma, Canaán abe'do, eju tebachö abe'do kamisi jwibo̧ ö̧lobekwö edijetö. Edajo̧ labebijetö öpöedönö yöbawö, apetube ja̧dönö. Labebajo̧ma öpöedö Semnö, Jafetnö yöbawijetö tjabe'do 'dukwachökwe a̧do̧ jwibö ö̧lobema. 23Jejenö yöawiawö̧ Sem, Jafet sawana'wo nöa'wo sedatibö, tjo̧ma'a o̧pekwö e'ewö tebachibö muchebijadötö tjabe'donöma edökönö. Tjöba jalachibökönö tjabe'do ö̧lobekwöma edijöködötö jobadöma, tjabe'do kamisi jwibo̧ ö̧lobe sulabenö tjedibapji jö̧ba̧lö.
Noé ö'dö̧ Canaántjö tupadanö jojodönö lȩekwa yöawina jawa
24Ikenama, Noéma 'dukwachi̧ böjachajena wilubö waisachibijetö itji̧ bajaliya luwo̧, Cam sulabenö edaja̧ öpöedönö yöawaja̧ma. 25Jo̧kwaiökwe labijetö Noéma. Jo̧kwaobetjö̧ baikwö lȩekwa baledakwa̧ yöbawijetö:
—Cam itji̧ Canaántjö tupadanö jojodöma lȩebakwawö̧, usulasedö batjibanö. Tjömöledö tjömöayedöda batjibanö otidö tjö̧jakwedö. Yelösöda, tjömöledö tjö̧mayedötjö nijakwönönö tjömöayedö batjibanö otidö tjö̧jakwedö Canaántjö tupadanö jojodöma—
jejenö jö̧ba̧lijetö Noéma, Cam itji̧ Canaántjö tupadanö jojodönö lȩekwa yöba̧lö.
26-27Ina yöba̧lijetö:
—Diosma iteda ömöayo̧ Semnö dösölö̧jinö edö pjaatakwo̧obetjö̧, jo̧ba Isabenö Jo̧nö, Sem ösödökwe Diosnö dösödaduwo, otiwanö pjabato̧ jö̧ba̧lö.
Ja̧danö Sem öjawo̧ Jafetnöbi dösölö̧jinö edö pjaatakwo̧ Diosma, Jafettjö tupadanö jojodöma tjöba̧jȩkwachobö, jelobe jelobebi tjö̧jakwedö batjibanö. Ja̧danö, Dios dösölö̧jinö edö pjaatawö̧, Jafettjö tupadanö jojodönöma Semtjö tupadanö jojodökwö otiwanö wene jwiinö pjabatakwawinö tjö̧jakwedö.
Jokwaijayonö jejenö tjö̧jökakwedö Canaántjö tupadanö jojodöma. Jobadöma Semtjö tupadanö jojodö tjömöayedöbi, Jafettjö tupadanö jojodö tjömöayedöbi tjö̧jakwedö jobadö wetji̧da otidö—
jejenö yöba̧lijetö Noéma.
28Ja̧danö, Noéma jwai balawa okwatina jemi tupakwö trescientos cincuenta a̧yo ji̧jetö. 29Okobe jwiinö novecientos cincuenta a̧yo bo̧ wobijetö Noéma.
المحددات الحالية:
Génesis 9: WPC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2021, All Rights Reserved
