Génesis 6
6
Jojodö sulabeda omukwatö tjö̧jina jawa
1Ja̧danö, jojodöma böjȩ ba̧kwemeachibanö ba̧jekwachijadötö, tjemunö ba̧jekwadönö 'yatjebobetjö̧. Ömadönöbi ya̧dönöbi 'yabebijadötö. 2Ja̧danö, ja̧ mölema baikwö baledijetö: Mölejȩnö ju̧kwadö ángelesdötjö sulabedö ángelesdöma böjȩnö ju̧kwadö ya̧dönö tjedemi, jwiinö otiwadö jö̧ba̧lö, tji̧lȩkwa̧munö tjemotö jö̧ba̧lö ösödijadötö. Jejenö tjösödobetjö̧ jobadö sulabedö ángelesdöma böjȩnö ju̧kwadö ya̧dönö emijadötö, jobadötjö bakwo̧nökwena tjösödokokwena.
3Ikenama Isabenö Jo̧ma jö̧ba̧lijetö:
—Bidö jojodönö ötjö Cho̧'wo̧ Luwo̧ma ba̧kwȩlö̧jatebö itea'da̧lokobe woba jojodödatjobetjö̧. Tjo̧wi̧, babema lekwe tjö̧joböma wetökakobe, sule cientoveinte a̧yo jenanö tjö̧jobö wetocha— jö̧ba̧lijetö Isabenö Jo̧ma.
4Ja̧danö, ja̧ mölema ju'wedöbi ju̧kwijadötö böjȩnö, jwiinö möbadöma. Jobadöma ju̧kwijadötö ángelesdö böjȩnö ya̧dönö tjemakwa̧ abönöbi, tjemena baikwöbi.
Ja̧danö, ángelesdö tjeminawö̧ ya̧döma metu'wo babibajadö tjemunö emijadötö. Jobadö tjeminawö̧ tjemuma, damö batjibajena jwiinö juluwadö ju̧kwijadötö. Okobe deinö böjȩnö jojodöma jobadö tjujuluwi̧ma yöba̧lakwawijadötö, jwiinö juluwadö, jö̧ba̧lö.
Jojodö sulabenö omukwatö tjö̧jiökwe Isabenö Jo̧ Dios, Chotidinawö̧nö söbebö lotakwo̧sa, jö̧ba̧lö, yöawina jawa
5Jojodöma jwiinö sulabeda ja̧bö ju̧kwijadötö böjȩnö, ba̧kwelöjatebö. Tjomajadenö tjomukwati̧ma sulabeda omukwatijadötö, okobe jwiinö. Isabenö Jo̧ma jobadö jwiinö sulabenö ja̧bö tjuju̧kwobe edijetö. 6Edinö omukwatijetö, tajawedö chotidinawö̧jö, la'akatjöda chotidinökötjö̧bö, jö̧ba̧lö. Jwiinö o̧'wo tjo̧bekwibö omukwatijetö, chotidinawö̧ma sulabedö babibinadöwe, jö̧ba̧lö.
7Jejenö o̧'wo̧ tjo̧bekwö omukwatö:
—Böjȩtjö söbebö lotakwo̧sa ötjö chotidinawö̧nö, jojodönöma. Isabenö sulabeda omukwatö tjö̧jitjö̧ jwiinö cho̧'wo̧ tjo̧bekwo̧sa, sulabedöwe, la'akatjöda chotidinökötjö̧bö, jö̧ba̧lö. Ja̧danö, a̧ji̧kwakwawedönöbi, nijinö töbawadönöbi, mö köba̧lö ju̧kwadönöbi sobebö lotakwo̧sa, okobe deinö— jö̧ba̧lijetö Isabenö Jo̧ Diosma.
8Jejenö jö̧a̧lijayonö bakwo̧, Noé mikwo̧nö ösödö lȩlö̧jinö edijetö Isabenö Jo̧ Diosma.
Noé ö̧jina jawa
9-10Biya̧ yöawi̧ma Noé ö̧jina jawa. Noéma i̧tji̧munö ömadönö wa̧medukwanö 'yabebijetö, Sem, Cam, Jafet mikwadönö. Ja̧danö, Noéma otiwanö omukwatö ji̧jetö. Ja̧ möle ju̧kwadötjö Noéda otiwanö omukwatö, Dios wei̧ a̧ja̧kwö ji̧jetö. Ja̧danö, Noéma Dioskwö jwaikwöda 'yi̧abijetö.
11Jo̧kwaijayonö ju'wedö jojodö böjȩnö ju̧kwadöma Noé Dios wei̧ a̧ja̧kwö ö̧ji̧danö ju̧kwijöködötö. Jobadöma sulabenö omukwatadöda batjibanö ju̧kwijadötö, ju'wedökwö ju'wedökwö inia tjötjinö ja̧bö, ölakwabikwawö. Diosma jobadönö edö, sulabenö ja̧bö jinadöda babibinadö, jö̧ba̧lö, edijetö. 12Jadanö, böjȩkwö edö, isabenö böjȩnö ju̧kwadöma sulabedöda babibinadö, jö̧ba̧lö, edijetö, okobe deinö sulabeda ja̧bö tjuju̧kwobetjö̧.
Dios Noénö ö̧jibinö pjabatö weina jawa
13Ja̧danö, Diosma Noénö jö̧ba̧lijetö:
—Noé, jojodöma sulabenö omukwatö tjö̧jobetjö̧ böjȩ ba̧kwemeachibanö inia tjötjinö ja̧bö, ölakwabikwawö tjuju̧kwobe. Jejenö tjö̧jitjö̧ baikwö omukwatö chujunajabe: Böjȩnö ju̧kwadönö söbebö lotakwo̧sa, okobe deinö jojodönöbi, a̧ji̧kwakwawedönöbi, tebonö ju̧kwadönöbi, mö köba̧lö ju̧kwadönöbi, okobe deinö böjȩnö ju̧kwadönö— jö̧ba̧lijetö—. 14Jo̧kwaobetjö̧ Noé baikwö wetakwö: Isowi kwotido, isowi otikwaowibiyatjö. Jowi isowi okwama ȩki̧ju̧ ju̧kwinö kwotido. Ja̧danö, isowi okwakwöchobenöbi o̧pekwöchobenöbi tö'awi̧tjö dadö kwotido, ojwiyo teachapji jö̧ba̧lö— webijetö—. 15Ja̧danö, isowima baikwö ba̧ja̧dö kwotido: Wayobekwöma ciento treinta y cinco metros jenanö, jakwölakwöma veintidós metros y medio jenanö, möakwöma trece metros y medio jenanö kwotido. 16Ja̧danö okobe jwiinö 'dö̧pjö̧kanöma kwotidoko. Mötjö medio metro nijakwö öwawinö kwotido. Ja̧danö, apjudebi junö kwotido, isowi ometupanö. Ja̧danö, jowi isowi möakwöma wa̧pötakwanö jenanö möeju baibanö kwotido— webijetö Diosma Noénöma.
17Ja̧danö, jö̧ba̧lijetö Diosma:
—Noé, a̧ja̧kwi. Ötjöma jwai balawa okwatibanö wetakwo̧sa böjȩ bakwemeachibanö. Jejenö okobe deinö tjo̧'wo̧nö emadönöma söbebö lotakwo̧sa. Noé, okobe deinö böjȩnö ju̧kwadöma o̧bibö debö tji̧'yakobe— jö̧ba̧lijetö—.
18Jo̧kwaijayonö Noé, ötjö chiwene yöbawö chujunocha ökwönö, baikwö chiwenema: Noé, ökwö, kwömöledöbi, jwai balawa okwatibena woköbaduwökakobe. Ökwöma isowi okwa tekachakwo̧ja. Ja̧danö, kwi̧tji̧mu, kwilekwo, kwo̧jo̧li̧mu ökwökwö isowi okwa tetjachakwedö. Jejenöobetjö̧ woköbaduwökakwedöja— jö̧ba̧lijetö Diosma Noénöma.
19-20Ja̧danö, Diosma Noénö webijetö:
—Noé, ju'wedönöbi tekato isowi okwa. Tebonö kwebachadötjöbi, mejenö kwebachadötjöbi, nijinö töbawadötjöbi, mö köba̧lö ju̧kwadötjöbi, ba̧kwo̧nökwena tekato tjilekwokwenada. Ja̧danö, idödada bakwo̧nökwena tjilekwokwenada isowi okwa tetjachakwedö ökwökwö 'yaba̧ladö tjö̧jibakobetjö̧. 21Ja̧danö, kwakwawa okobe jwiinö isowi okwa tebatö kwoko̧ko̧do, jobadö tjukwakwa̧bi ökwödö kwukwaduwakwa̧bi— webijetö Diosma Noénöma.
22Ja̧danö, Noéma okobe jwiinö Dios weaja̧danö a̧ja̧kwijetö, ja'yubebi ji̧bökönö.
المحددات الحالية:
Génesis 6: WPC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2021, All Rights Reserved
