Génesis 44
44
Jose ömöayo̧nö weina jawa, chu̧kwa deja'do̧ Benjamín utu̧da'wo a'onö ani, jö̧ba̧lö
1Jemi ikenama José webijetö eju okwa otido̧ ömöayo̧nö:
—Bidö tju̧kwa kwakwawa tje'ewakwa̧ma tjutu̧da'wijunö okobe jwiinö su̧'bȩnö anabiji. Ja̧danö, tjutu̧da'wiju a'onö tju̧kwa baladakwena kwano. 2Ja̧danö, ötjö chitea dȩja̧'do̧bi platatjö otikwa'do̧ma, bajaliya luwo̧, Benjamín mikwo̧ utu̧da'wo a'onö kwano, jo̧ba kwakwawa imidaja̧kwö— weökwe José weaja̧danö a̧ja̧kwijetö ömöayo̧ma.
3Ja̧danö, dewachena José ömöayo̧ma webijetö José ömöledönöma, tjo̧wi̧ babema da̧ja̧duwi, jö̧ba̧lö bu̧lu̧dökwö. 4-5Ja̧danö, ȩwa̧ja̧dö ödöokobe tjȩwa̧jena Joséma webijetö ömöayo̧nö:
—A̧la̧ibi, jobadö tjö̧kömanö lubi. Ichibö baikwö yöka̧lodönö: ¿Tajawedö sulabenö kwönaukwajaduwada? Chuluwo̧ma ökwödönö otiwanö pjaatijayonö jo̧ba iteatjö sulabenö kwönaukwajaduwobe. Kwönaukwajaduwa'do̧ma chuluwo̧ ba̧kwȩlöjatebö owaia'do̧. Ja'do̧ma chuluwo̧ ju'winö baledakwa̧ öwaisobö alewa'do̧. Ja'do̧ naukwö jwiinö sulabenö ja̧köbaja̧duwobe— jejenö jö̧ba̧lö ömöayo̧nö webijetö Joséma, öpöedönö badekwajö yöa̧lobö. 6Ikenama José ömöayo̧ma José öpöedö tjuju̧kwena ichibö jö̧ba̧lijetö José weaja̧danö.
7Jejenö jö̧a̧lawö̧ atadijadötö José öpöedöma:
—¡Tajijö! Duluwo̧ ¿tajawedö jejenö yöka̧la? Jejenö dönaukwobö omukwatinöködösa. 8A̧ja̧kwi, ajayinö ichö döbadekwajina balada, dutu̧da'wiju a'onö baladama, Canaán nijitjö tjedatotö jö̧ba̧lö ichejebö diyatö ökwönö. La'akatjöda dönaukwökötö platabi, orobi kwuluwo̧ ejutjöma. 9Ja̧danö, ökwödötjö bakwo̧ kwuluwo̧ u̧kwa dȩja̧'do̧ juna̧lo̧nö kwöbadekwajitjö̧ma jo̧banö kwabö lotjobö weköbo köbonö. Ikenama, ökwödöbi ökwö kwömöayedö baibanö dö̧jakwedösa—jö̧ba̧lijadötö José öpöedöma José ömöayo̧nöma.
10Jejenö jö̧tja̧lökwe:
—Jau kwatjö̧ma, yöka̧laduwidanö. Jo̧kwaijayonö owawa'do̧ juna̧lo̧nö chöbadekwajitjö̧ma ötjö chömöayo̧ baibanö ö̧jakwo̧. Ökwödö ju'wedöma ȩwa̧jö kwuju̧kwibaduwakwedöja—jö̧ba̧lijetö José ömöayo̧ma.
11Ikenama bakwo̧nökwena juluwanö tjutu̧da'wijukwena kabebö lödijadötö nijinö. Lödajadö, bakwo̧nökwena ejatijadötö tjutu̧da'wijukwena. 12José ömöayo̧ma isakwijetö abönö pöe utu̧da'wotjö bajaliya luwo̧ utu̧da'wonönö kabatö. Ja̧danö, isakwemi bajaliya luwo̧ Benjamín utu̧da'wo okwatjö badekwajijetö owawa'do̧ma. 13Jejenö öbadekwaiawö̧ tjo̧'wo̧ tjo̧ baibawö̧ tjökamijido̧ kȩ'ekwijadötö José öpöedöma. Ikenama bakwo̧nökwena, tjutu̧da'wiju kabebö bu̧lu̧dö tjoma'anö wa̧nö tjebachajijadötö José ö̧jobekwö. 14Ichibajadö, Judáma öpöedökwö Jose ejube 'yi̧jadötö. Joséma ina, eju okwa ji̧jetö. Öpöedöma ichibö Josénö edö tjöba nijakwö bȩbachibijadötö José öba a'otjö.
15Ja̧danö, Josȩma jö̧ba̧lijetö jobadönö:
— ¿Tajawedö kwönaukwajaduwada ötjö chu̧kwa dȩja̧'do̧ma? ¿Wajwiköbaduwi̧ji̧? Ötjöma la'aka luwo̧sa, ja̧danö baledakwa̧ waiso̧sa— jö̧ba̧lijetö.
16Jejenö jö̧a̧lökwe atadijetö Judáma:
—Chuluwo̧ ¿Dakwö yöda̧lakwajö? Isabenö sulabenö ja̧böködösa, jö̧ba̧lö, yöda̧lökena. Diosma ökwödönö lȩebobe damötjö sulabenö ja̧dinama. Tjo̧wi̧, babeda okobe deinö ökwö kwömöayedöda dö̧jakwedösa, ökwödöbi, dö̧ja̧wo̧bi, utu̧da'wonö owawa'do̧ juna̧lo̧ma— jö̧ba̧lijetö Judáma.
17Jo̧kwaijayonö Joséma jö̧ba̧lijetö:
—¡Tajijö! Jejenö wetökö. Sule ötjö chu̧kwa owawa'do̧ juna̧lajo̧da, jo̧bada ötjö chömöayo̧ baibanö ö̧jakwo̧. Ökwödö ju'wedöma otiwanö da̧ja̧duwi kwabe'doduwi ejukwö— webijetö Joséma.
Juda Josénö aeba̧lina jawa, ötjönöda weköbo kwömöayo̧ batibanö chö̧jobö, jö̧ba̧lö
18Ikenama Judáma José ö̧jobekwö 'ya̧wibö yöbawijetö:
—Chuluwo̧ ötjöma ökwö kwömöayo̧sa. Ja'yubeda yöta̧lobö jö̧ta̧la. Labökönuwitjö. Ökwöma Egipto niji inesö la'aka luwo̧ jo̧ja. Ötjönö webo̧ja ökwöma. 19Ja̧danö chuluwo̧ ajayinöma abebö kwa̧ja̧kwijatö ökwödönö, Kwujuna̧laduwi̧ji̧ kwabe'doduwinö kwöjawo̧duwinö, jö̧ba̧lö. 20Jejenö abebö kwa̧ja̧kwitjö̧ datadijatö, Jau dujuna̧lobe dabe'donöbi jo̧ba itji̧ bajalia luwo̧nöbi, ina möayo̧nö dabe'do pöe 'yaebinökwe. Ja̧danö jo̧ba öpöekwö jobadö sule dujutajada bakwuju jitji̧mu̧ma. Jo̧kwaijayonö jo̧ba öpöema woinobe. Woinobetjö̧ jobuju ji̧tji̧mutjö jo̧bada 'yaba̧lo̧ma. Ja̧danö, dabe'doma jwiinö ile niebökwe jo̧banöma, jö̧ba̧lö. Chuluwo̧ jejenö datadijatö ökwönöma, dömöledönö abebö kwa̧ja̧kwitjö̧— jejenö Judáma yöbawijetö Josénöma.
Ina yöbawijetö:
21—Chuluwo̧, ökwöma akeba̧lijatö ökwödö kwömöayedönöma, Kwöja̧wo̧duwinö kwichejebaduwo chedonö, jö̧ba̧lö. 22Jo̧kwaijayonö datadijatö, Jo̧ba möayo̧ma abe'donö le'dediböma ichökena, dabe'do debö i̧'yapji jö̧ba̧lö, datadijatö. 23Jo̧kwaijayonö ökwöma yöka̧lijatö ökwödö kwömöayedönöma, Kwöjawo̧duwinö öbibö kwichejebaduwökötjö̧ma chöba a'o kwöjamataduwokobe yemidanöma, jö̧ba̧lö— yöbawijetö Judáma Josénöma.
Ina yöbawijetö:
24—Chuluwo̧, ikenama dabe'do ö̧jobekwö ȩwa̧jadö yödawijatö ökwö weköbaja̧ma. 25Ikenama lekwe möle baledajena dabe'doma weijatö ökwödönö yemidanö baikwö dichobö, ja'yubeda kwakwawa emö. 26Jejenö weitjö̧ yö̧da̧lijatö dabe'donö, yemidanöma di̧'yökena, jö̧ba̧lö. Döjawo̧ bajaliya luwo̧ ökwödökwö ichitjö̧da di̧'yena. Egipto niji la'aka luwo̧ma öba a'o döjamatobö teatökena ökwödönöma, döjawo̧nö öbibö di̧'yökötjö̧ma, jö̧ba̧lö yöda̧lijatö dabe'donöma.
27Jejenö yöda̧lökwe baikwö jö̧ba̧lijetö: Chitji̧mu̧, kwöwaisaduwa ötjö chilekwo Raquelma sule du̧ju̧tajanöda ji̧tji̧munöma 'yajebinobe. 28Abönö pöema ötjö chö̧jelöma deobe. Isabenö tebo luwo̧ pjeikwena yö̧yö̧bö̧ lobö ukwinena, wajwita. Jemi tupakwöma yemidanöma chedinokobe jo̧banöma. 29Ja̧danö, babebi bite chitji̧nö bajaliya luwo̧nö ötjönö 'dökebaduwobö jö̧ka̧laduwa. 'Dökebaduwitjö̧ma, jo̧banöbi sulabe baledena. Chi̧tji̧mu, jejenö baleditjö̧ma jwiinö cho̧'wo̧ tjo̧tekwena. Isabenö ötjöma jwiinö pöesa. Chitji̧ Benjamínnö kwe'ewena sulabe baleditjö̧ma ökwödöda jawa. Ja̧danö jejenö baleditjö̧ma cho̧'wo tjo̧bekwinö debö chi̧'yakwo̧sa. Jejenö yöa̧lijatö dabe'doma— yöbawijetö Judáma Josénöma.
30-31Jemi tupakwö yöbawijetö:
—Jo̧kwaobetjö̧ chuluwo̧ yemidanö dȩwa̧jena dabe'do ö̧jobekwö, jo̧ba ile niebökwe i̧tji̧ma deiökwe ö'wö baibakobe. Dabe'doma itji̧ bajaliya luwo̧, ile niebökwenö omukwatö te'ada̧löda jo̧. Jejenö dö̧ja̧wo̧nö junibö, öbibökönö dȩwa̧jiökwe o̧'wo̧ tjo̧bekwö ö'wö baibakobe dabe'doma, ökwödöda jawa— jö̧ba̧lijetö. 32Ja̧danö, ötjö kwömöayo̧ma jö̧ta̧lijatö chabe'donöma, Ötjöda chöjawo̧nö te'ada̧lo̧ baibanö chö̧jakwo̧sa. Yemidanö kwö̧jobekwö tjetatajökötjö̧ma ötjöda jawa, jö̧ta̧lijatö. 33Jo̧kwaobetjö̧ webitjö chuluwo̧, chöjawo̧ma kwömöayo̧bö̧kö̧, ötjönöda balekwo̧nö ökwökwö chö̧jibo kwömöayo̧ baibanö. Chöjawo̧nöma weköbo ȩwa̧jobö öpöedökwö dabe'do ö̧jobekwö. 34Chuluwo̧ ¿dakwö chȩwa̧jobö? Chöjawo̧ma ötjökwö ȩwa̧jökötjö̧ma chabe'do ö̧jobekwöma chȩwa̧jökena. Chabe'do jwiinö o̧'wo̧ tjo̧ekwi̧ma chedobö jö̧ta̧lökö— Judáma yöbawijetö Josénöma.
المحددات الحالية:
Génesis 44: WPC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2021, All Rights Reserved
