Mwa 11
11
Mwako Mũtũlu wa Mbaveli
1Ĩvinda ya tene andũ onthe ĩũlũ wa nthĩ maĩ na kĩthyomo kĩmwe na matũmĩaa ndeto sya mũthemba o ũmwe. 2Yĩla maendee kwanganga ngalĩko ya wumĩlonĩ wa syũa, nĩmavikie ũiĩnĩ ũla wĩ nthĩ ya Sinali na matũa vo. 3Nĩvo ĩndĩ maneenanisye na masya atĩĩ, “Ũkai tũmbe mavali na tũimavĩvya mavye nesa!” Kwoou nĩmeethĩiwe na mavali vandũ va mavia na lami vandũ va ndaka. 4Nĩmaneenanisye masya atĩĩ, “Ũkai yu twĩyakĩe ndũa yĩna mwako mũtũlu ũvikĩte matunĩ, na kwĩmanthĩa nguma tũikese kũnyaĩĩkĩa kĩla vandũ ĩũlũ wa nthĩ.”
5Nĩvo ĩndĩ Mwĩai Ngai watheeie oke kwona ndũa na mwako ũsu andũ asu maakaa. 6Mwĩai Ngai nĩwaisye atĩĩ, “Ethĩwa mo ta andũ ma ũko ũmwe na me na kĩthyomo kĩmwe nĩmambĩĩa kwĩka ũu, yu vai ũndũ o na wĩva ũla makavanga kwĩka ũkamaema. 7Ũkai tũthee yu tũkathokoany'e kĩthyomo kyoo nĩ kana maikaeleanwe ĩngĩ.” 8Kwoou Mwĩai Ngai nĩwamanyaĩĩkĩisye kĩla vandũ ĩũlũ wa nthĩ na maeka kwaka mwako ũsu. 9Ndũa ĩsu nĩyeetiwe Mbaveli nũndũ vau nĩvo Mwĩai Ngai wathokoanĩsye ithyomo sya andũ onthe, na amanyaĩĩkya kĩla vandũ ĩũlũ wa nthĩ.
Nzyawa Sya Semu
(1Mav 1.24-27)
10Ii nĩsyo nzyawa sya Semu. Myaka ĩlĩ ĩtina wa ĩla mbua ya kĩw'ũ kingĩ, yĩla Semu waĩ na ũkũũ wa myaka ĩana nĩwasyaie kavĩsĩ keetawa Alivakasandi. 11Ĩtina wa kũsyaa Alivakasandi, Semu nĩwekalile thayũ myaka maana atano, na asyaa syana ingĩ.
12Yĩla Alivakasandi waĩ na ũkũũ wa myaka mĩongo ĩtatũ na ĩtano, nĩwasyaie kavĩsĩ keetawa Siela. 13Ĩtina wa kũsyaa Siela, Alivakasandi nĩwekalile thayũ myaka maana ana na ĩtatũ na asyaa syana ingĩ.
14Yĩla Siela waĩ na ũkũũ wa myaka mĩongo ĩtatũ nĩwasyaie kavĩsĩ keetawa Eveli. 15Ĩtina wa kũsyaa Eveli, Siela nĩwekalile thayũ myaka maana ana na ĩtatũ na asyaa syana ingĩ.
16Yĩla Eveli waĩ na ũkũũ wa myaka mĩongo ĩtatũ na ĩna, nĩwasyaie kavĩsĩ keetawa Veleki. 17Ĩtina wa kũsyaa Veleki, Eveli nĩwekalile thayũ myaka maana ana na mĩongo ĩtatũ na asyaa syana ingĩ.
18Yĩla Veleki waĩ na ũkũũ wa myaka mĩongo ĩtatũ nĩwasyaie kavĩsĩ keetawa Leũ. 19Ĩtina wa kũsyaa Leũ, Veleki nĩwekalile thayũ myaka maana elĩ na kenda, na asyaa syana ingĩ.
20Yĩla Leũ waĩ na ũkũũ wa myaka mĩongo ĩtatũ na ĩlĩ nĩwasyaie kavĩsĩ keetawa Selũki. 21Ĩtina wa kũsyaa Selũki, Leũ nĩwekalile thayũ myaka maana elĩ na mũonza na asyaa syana ingĩ.
22Yĩla Selũki waĩ na ũkũũ wa myaka mĩongo ĩtatũ, nĩwasyaie kavĩsĩ keetawa Naoli. 23Ĩtina wa kũsyaa Naoli, Selũki nĩwekalile thayũ myaka maana elĩ na asyaa syana ingĩ.
24Yĩla Naoli waĩ na ũkũũ wa myaka mĩongo ĩlĩ na kenda, nĩwasyaie kavĩsĩ keetawa Tela. 25Ĩtina wa kũsyaa Tela, Naoli nĩwekalile thayũ myaka ĩana na ĩkũmi na kenda, na asyaa syana ingĩ.
26Ĩtina wa Tela kwĩthĩwa na ũkũũ wa myaka mĩongo mũonza, nĩwasyaie Avalamu, Naoli, na Aalani.
Nzyawa sya Tela
27Ii nĩsyo nzyawa sya Tela, ĩthe wa Avalamu, Naoli, na Alani. Aalani nĩwe waĩ ĩthe wa Loto. 28Alani nĩwakw'ĩĩie vandũ vetawa Ulu nthĩ ya Mbavilonĩ vala wasyaĩwe. Akwie Tela ĩthe wake atanamba kũkw'a. 29Avalamu na Naoli nĩmatwaanie; mũka wa Avalamu eetawa Salai, nake mũka wa Naoli eetawa Milika. Alani nĩwe waĩ ĩthe wa Milika na Ĩsika. 30Salai aĩ ngũngũ na kwoou ndaĩ mwana.
31Tela nĩwoosie mwana wake Avalamu, mwĩsũkũũe Loto ũla waĩ mwana wa Aalani, na mũka-a-mwana Salai, mũka wa Avalamu. Nĩwaumie ndũa ya Ulu ĩla yĩ Mbavilonĩ e namo mathi nthĩ ya Kanaani. Nĩmaendie mavika Aalani na matũa vo. 32Tela akw'ĩĩe vau Aalani e na ũkũũ wa myaka maana elĩ na ĩtano.
المحددات الحالية:
Mwa 11: KAMBA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
BIBLE SOCIETY OF KENYA © 2011
