मत्ती 10

यीसू रे बारा चुणिरे चेले

(मरकु. 3:13-19; लूक. 6:12-16)

1तेबे यीसूए आपणे बारा चेले आपु वाले सादे, होर तिन्हा जो दुस्टात्मा काढणे रा हक दितेया, ताकि स्यों दुस्टात्मा जो काढे होर हर किस्मा री ब्मारिया होर कमजोरिया जो ठीक करहे। 2होर यीसू रे बारा चुणिरे चेले रे नांऊँ एह्ड़े ऐं, पैहला समौन, जेस जो पतरस भी बोल्हा ऐं, होर तेसरा भाई अन्द्रियास; जब्दी रा मह्ठा याकूब, होर तेसरा भाई यहून्ना; 3फिलिप्पुस होर बरतुल्मै थोमा होर चुंगी लैणे वाल़ा मत्ती, हलफईसा रा मह्ठा याकूब होर तद्दै। 4समौन कनानी, जेहड़ा जेलोतेस दला#10:4 ये एक कट्टर राजनीतिक दला रा नाऊँ था जेह्ड़े रोम देसा रे बरखलाफ काम करहे थे, जेसरा से सदस्य हुआ करहा था रा था, होर यहूदा इस्करयोति, जिन्हें जे से पकड़वाई भी दितेया।

बारा चेलेया जो सेऊआ रे कठे भेजणा

(मरकु. 6:7-13; लूक. 9:1-6; 10:4-12)

5जेबे यीसूए आपणे बारा चेले खुसी री खबर सूनाणे रे कठे लग-लग जगहा भेजे, तिन्हें तिन्हा जो ये बिधिया दिती, “एह्ड़ी जगहा देख्या जांदे जेथी गैर-यहूदी लोक रैंहयां ऐं, होर एह्ड़े गांऊँआं मन्झ देख्या जांदे जेथी सामरिया ईलाके रे लोक रैंहयां ऐं।#10:5 यिर्म. 50:6 6बल्कि इस्राएल देसा रे लोका वाले जा क्यूंकि स्यों तिन्हा भेडा साहीं ऐं जो पुहाला ले लग हुई गईरी। 7होर जांदे-जांदे एह्ड़ा प्रचार करा कि स्वर्गा रा राज नेडे आई गईरा। 8रोगिया जो ठीक करा; मरिरे या जो जिउंदा करा, कोढ़िया जो सुद्ध करा, दुस्टात्मा काढा। तुस्सा जो मुफ्त मिलिरा, तुस्से भी मुफ्त देआ। 9आपणे बटुऐ मन्झ सोना, चांदी, होर ताम्बा देख्या रखदे। 10पैंडे रे कठे झोला देख्या रखदे, ना दो कुरते, ना बूट ना डंडा, क्यूंकि मजदूरा जो आपणा खाणा मिलणा चहिए।

11जेस केसी गांऊँआं मन्झ तुस्से जान्घे ता पता करा कि तेथी कुण इज्जतदार माह्णुंआं? ता तेसरे ई घरा मन्झ रहुआ, जेबे तक कि तुस्से तेस गांऊँआं जो छाडी नी देंघे। 12होर घरा अंदर जांदे हुए तेस जो आसीस देआ। 13अगर तेस घरा रे लोक परमेसरा री आसीसा पाणे रे लायक हुन्घे ता तुस्सा री आसीसा रे कठे कितिरी प्रार्थना तेस घरा पर बणी रैंहणीं, पर अगर स्यों एस लायक नी हो ता तुस्सा री कितिरी प्रार्थना री वजहा ले तुस्सा जो आसीस मिलणी। 14होर जो कोई तुस्सा जो नी मन्हें होर तुस्सा री गल्ला नी सुणें, ता तेस घरा या तेस गांऊँआं ले निकल्दे हुए आपणे पैरा री धूल झाड़ी देआ। 15हांऊँ तुस्सा किन्हें सच्च बोल्हा कि, न्याय रे ध्याड़े तेस गांऊँआं रे लोका री हालत सदोम होर गमोरा#10:15 ये तिन्हा दो सैहरा रे नाऊँ ये जेथी तेथी रे रैहणे वाले लोका जो तिन्हारे पापा री सजा देणे रे कठे प्रभुए स्यों खत्म करी दितिरे थे रे सैहरा री हालत ले ज्यादा खराब हूणीं।”

आऊणें वाल़ा संकट

(मरकु. 13:9-13; लूक. 21:12-17)

16“हांऊँ तुस्सा जो भेडा साहीं एह्ड़े लोका वाले भेज्या करहा जो भेड़िये साहीं खतरनाक ऐं, इधी कठे कीड़े साहीं बुद्धिमान होर कबूतरा साहीं भोले बणा। 17पर तिन्हा लोका ले चतन्न रैहया, क्यूंकि तिन्हा तुस्से कच्हरी मन्झ लई जाणे, होर आपणी यहूदी सभा मन्झ तुस्सा जो कोड़े मारणे। 18क्यूंकि तुस्से मेरे चेले हूंणे री वजहा ले मेरी गुआही देणे रे कठे हाकमा होर राजे होर अन्यजाति लोका रे साम्हणें पेस हूंणां पऊणा। 19जेबे स्यों तुस्सा जो पकड़वाये ता ये फिकर मत करदे कि, आस्सा क्या होर क्या बोलणा; क्यूंकि जो कुछ तुस्सा जो बोलणा हुन्घा, से परमेसरा तुस्सा जो तेस ई टैम दसी दितेया जाणा। 20क्यूंकि बोलणे वाल़े तुस्से नी ऐं पर तुस्सा रे बापू री आत्मा तुस्सा मन्झ हुई किन्हें बोल्हा ई।”

21“भाईया-बैहणीया आपणे भाई बैहण, होर कई माऊ-बापू आपणे बाल बच्चे धोखे किन्हें मुकाई देणे, होर बाल बच्चेया भी आपणे माऊ-बापू धोखे किन्हें मुकाई देणे। 22होर तुस्से मेरे पर विस्वास रख्हा इधी कठे सभी लोका तुस्सा किन्हें बैर करणा; पर जो मरणे रे टैमा तक मेरे पर विस्वास करघा, तेसरा ई उद्धार हूंणां। 23जेबे स्यों तुस्सा जो एक गांऊँआं मन्झ स्ताए, ता दूजे गांऊँआं जो भगी जाया। हांऊँ तुस्सा किन्हें सच्च बोल्हा, तुस्सा इस्राएल देसा रे सारे गांऊँआं मन्झ घूमणा पूरा नी करी पाणा कि मां माह्णुं रे मह्ठे आई जाणा।

24चेला आपणे गुरु ले बडा नी हुन्दा, होर ना गुलाम आपणे माल्का ले। 25चेले रा गुरु रे, होर गुलामा रे माल्का रे बराबर हूंणां ई बौह्त आ। जेबे इन्हें घरा रे माल्का जो सैतान बोल्या ता तेसरे घरवाल्या जो केस-केस नांऊँआं ले बोलणा?”

केस ले डरणा चहिए?

(लूक. 12:2-7)

26“इधी कठे तिन्हा लोका ले मत डरदे जो तुस्सा रे खिलाफ बुरा करहा ऐं। क्यूंकि हर एक चीज़ जेह्ड़ी ढख्ही री, से खोली दिती जाणी; होर जो कुछ लुख्ही रा, ता सब लोका से जाणी लेणा। 27जेसरा मतलब ये आ जो हांऊँ तुस्सा किन्हें नह्यारे मन्झ बोल्हा, तुस्से एता जो बिना डरे सभिरे साम्हणें बोली सके; होर जो गल्ला तुस्सा किन्हें चुपके-चुपके बोलिरी, तेता जो घरा री छता प्रयाह्ले ले प्रचार करा। 28जो सरीरा जो मारहा ऐं, पर आत्मा जो नी मारी सक्दे, तिन्हा ले मत डरदे, पर परमेसरा ले ई डरा; जो आत्मा होर सरीर दुंहीं जो नरका मन्झ नास करी सक्हा। 29क्या दो छोटी चिड़िया इतनी सस्ती नी की एक पैसे मन्झ बिक्की जाई? फेरी भी जेबे स्यों जमीना पर पई जाई ता तुस्सा रे बापू जो एता रे बारे मन्झ पता लगी जाहाँ। 30पर तुस्सा रे मूंडा रे सारे बाल भी गिणीरे। 31इधी कठे, डरा नी; तुस्से बौह्त चिड़िया ले बढ़ी किन्हें ऐं।”

यीसू जो मनणा या नी मनणा

(लूक. 12:8,9)

32“इधी कठे जो कोई माह्णुं रे साम्हणें मुंजो मन्नी लैन्घा से मां भी आपणे स्वर्गीय बापू रे साम्हणें मन्नी लैणा। 33पर जो कोई माह्णुं रे साम्हणें मुंजो नी मन्नघा, ता मां भी आपणे स्वर्गीय बापू रे साम्हणें से नी मनणा।”

यीसू रे आऊंणा रा नतीजा

(लूक. 12:51-53; 14:26-27)

34“ये नी समझा कि हांऊँ धरती रे लोका रे बीचा मन्झ मेल मलाप करान्दा आईरा; हांऊँ मेल मलाप कराणे रे कठे नी! पर लोका जो एक दूजे रे बीचा बरखलाप करणे रे कठे आईरा। 35हांऊँ ता आईरा कि, माह्णुं जो तेसरे बापूआ ले, होर मह्ठी जो तेस्सा री माऊआ ले, होर न्हुसा जो तेस्सा री सासा ले बरखलाप करी दूं। 36माह्णुं रे दुस्मण तेसरे आपणे घरा रे ई लोक हूंणे।

37जो आपणे माऊ-बापू जो मेरे ले ज्यादा प्यारा करहा से मेरे लायक नी आ, होर जो मह्ठे या मह्ठीया जो मेरे ले ज्यादा प्यारा करहा, से मेरा चेला बणने रे लायक नी हाया। 38होर जो आपणा क्रूस लई किन्हें मेरे पीछे नी चलदा, से मेरा चेला बणने रे लायक नी हाया। 39जो कोई आपणी जान बचाणा चाहां, तेस अनंतकाला री जिन्दगी खोई देणी, पर जो कोई मेरे वजहा ले आपणी जान गुआई देह्न्गा, तेस हमेसा री जिन्दगी पाणी।”

इनाम

(मरकु. 9:41)

40“जो तुस्सा जो अपनाहां, से मुंजो अपनाहां; होर जो मुंजो अपनाहां, से मेरे भेजणे वाल़े परमेसरा जो अपनाहां। 41जो नबिया जो नबी जाणी किन्हें मन्नी लेया, तेस जो नबिया जो मिलणे वाल़ा इनाम मिलणा; होर जो धर्मी जाणी किन्हें धर्मी जो मन्नी लेया, तेस धर्मीयो जो मिलणे वाल़ा इनाम मिलणा। 42जो कोई इन्हा छोटेया मन्झा ले एकी जो मेरा चेला जाणी किन्हें सिर्फ एक ग्लास ठंडा पाणी प्याये, हांऊँ तुस्सा किन्हें सच्च बोल्हा कि, परमेसरा तिन्हा जो पक्का इनाम देणा।”

المحددات الحالية:

मत्ती 10: MJLNT

تمييز النص

نسخ