UMOZHIGO 8

Meni mu Hwɛŋ

1Ama Agwatana keri shi eye Noa, ti isundɛ ehilo, keeni iyimabiga ye elele nɛ namɛ nu bwa nụ ụhaŋtụ ata o. Nazhɛ Agwatana njɛ maa go uvwugo vwunji na cɛnjɛ tu unyizo, nazhɛ meni mu kwuni tuhwaŋ, 2ɛmɛzhinjɛ a na ileji keeni a'ibwa azuba kepenji, nazhɛ eshilo na go ngbo dwa. 3Meni ma ata mu to tuhwulo ta tuhwaŋ pece pece tutu ukwunanga ijitɛ ɛtɛ dipi-tɛtu. 4Nazhɛ ụhaŋtụ kezhe waa patanɛ ni ihiŋhiŋ nshama ma Ararat, nụ ụjita umpwa-ni-bɛ-icenje nu upiana ata ucenje. 5Gabata meni ma ata ma ta tuhwulo ta tuhwaŋ tutu. Nụ ụjita uhiiŋ nu upiana ata u'umpwa, nazhɛ aa kwụbɛ ihiŋhiŋ nshama.

6Nu ukwunanga ụjita ata buhanda, ga Noa kepishinji ụgbahwụ ata baa ndanɛ ụhaŋtụ ata, 7baa tumwanɛ ugwaagwaa, ama u gwuri shi ya, waa uranjɛ tɛhiɛla boo rungo uuwa i ci aka na te meni mu hwɛŋ na cɛnjɛ tu unyizo hwɛɛ. 8Ti yaa namɛ fwalaa ga Noa tumwanɛ ikwucime, yee beni no olugwo ubwa, maa i kwubɛ okwo meni ma hwaŋ ba na cɛnjɛ. 9Ama ikwucime gwushiji shi ofwo na maa patana avwuna ubwa o, yee gwure no ofwo Noa nụ ụhaŋtụ, iwɛnɛ te meni mu ta namɛ na cɛnjɛ tu unyizo hwɛɛ. Ga Noa bɛcinjɛ u'ala ubwa bee shepi bu, bee tecinji nụ ụhaŋtụ pu bwa. 10Bee genji i ci ijitɛ icenje inyɛ, baa tumwanɛ sasana ikwucime, yee beni nụ ụhaŋtụ. 11Ikwucime ɛtɛ jajɛ ụmbɛ buta nu ugwugwa ubwa, yee gwure pu bwa nụ ụrụmɛ, ibɛ po ga Noa mepi maa meni mụ hwɛŋ na cɛnjɛ tu unyizo. 12Bee genji sasana i ci ijitɛ icenje inyɛ, nazhɛ baa tumwanɛ ikwucime, ama i gwuri shi ya pu bwa o.

13Aka na ga Noa ulwa shiywa akpakwụ-atatụ-nu-boo-ko (601), nụ ụjita uhiiŋ nu upiana uhiiŋ nu uywa ata, nazhɛ meni mụ hwɛŋ na cɛnjɛ tu unyizo. Ga Noa ushiji iyi nɛ bee ge urigeni la ụhaŋtụ, baa kwụbɛ ta cɛnjɛ tu hweteni. 14Tu upiana uyebi namɛ ijitɛ woshi-ni-bɛ-icenje, nazhɛ cɛnjɛ tu hweteni hwɛɛ.

15Nazhɛ Agwatana hiɛŋ Noa, 16Zhaga bana nụ ụhaŋtụ, te biyikwo bu, ta miaụŋ mụ bụ me eyi keeni atashɛ bụ. 17Bɛcinjɛ du iyi-uumwa ye elele nɛ ga namɛ na bụ, ta shanụnụ, ti isundɛ ehilo keeni iyi elele nɛ yo hombilo na cɛnjɛ iwɛ maa e meci duwa, maa ufwugwo wa aba keeni ugombo na cɛnjɛ tu unyizo.

18Ibɛ po ga Noa banɛ, ta miaụŋ mu bwa, te biyikwo bwa keeni atashɛ ubwa. 19Ibɛ po udenji usunda ehilo we elele, ni iyi elele nɛ yo hombilo, tụ ụnụnụ we elele keeni iyi elele nɛ yo rungo na cɛnjɛ tu unyizo, banɛ nụ ụhaŋtụ.

Ga Noa to Utukwu-ụrụpɛ

20Nazhɛ ga Noa teni AGWANGWAMA utukwu-ụrụpɛ, bee shepi usunda ehilo keeni ụnụnụ we elele na namɛ shɛshɛshɛ boo to ụrụpɛ tuhwoŋzhingo nu utukwu ata.

21Aka na ta AGWANGWAMA hwụjɛ ụhiụŋ ụlatụ ụrụpɛ ata, bɛɛ mɛmɛ hiɛŋ, N zha shɛ ma kalana ya cɛnjɛ unu kwukwuŋ iwɛ iyi nɛ butugwumwa njɛ, iwɛnɛ ti Ngee mepi maa ahaŋsa bụtụ gbazhɛgwa te kwune taa na cɛnɛnɛ tu bwa, N zha shɛ mo iricingo ya iyi-uumwa gana ga Ngaa njɛ bana kwukwuŋ. 22Te kwuni na aka ga, aka izɛgwu tibila, na aka iyimɛyɛ tudwa, na aka mpiala, na aka oholobwo, nu ushwo, tu ubwaza, tu uwaŋna keeni ụjita, zha shɛ ya ganga ya kwukwuŋ uuwa unyizo to huwowu.

المحددات الحالية:

UMOZHIGO 8: RBT

تمييز النص

نسخ