WƖAA DƖ-SUOMUŊ 2
2
1Ŋɩɩ nɛ ʋ ŋaa tinteeŋ arɩ wɩa-nyuŋ arɩ kɩalɩŋ kala sɩ hɛ ba lɛ dɛrɛ.
2Ŋɩɩ nɛ Wɩa dɛrɛ ʋ tɩntɩŋŋaa aŋ wiesi chɛ-pɛmɩŋ. 3Wɩa joŋ ʋ nɩsɩŋ daŋ tapʋl-pɛɩ-la lɛ a leŋ ʋ ŋaa tapʋl-zɔŋ, bɛɛ wɩaa tapʋlɩɩ-la nɛ ʋ tɩŋ ʋ tɩntɩŋŋaa dɛrɛ aŋ wiesi.
Adam arɩ Hawa
4Wɩa-nyuŋ arɩ tinteeŋ ŋaanɩŋ naasɩŋ nɛ ŋɩɩ.
La TƖƖNA Wɩa fa sɩ ŋaa wɩa-nyuŋ arɩ tinteeŋ, 5tɩɩsɩŋ, yaŋ arɩ kʋŋkala sɩɩ nyʋ tinteeŋ lɛ fa tuo, bɛɛ wɩaa La TƖƖNA Wɩa fa ha bɩ leŋe duonuŋ nɩɩ. Nʋʋ ma kala fa tuo dɩ ʋ pɛrɛ tintee-la lɛ, 6ama lɩɩŋ bulo lɩɩ tinteeŋ nɛ a su leriŋ kala. 7La TƖƖNA Wɩa lɔgɛ tɩɛrɩŋ nɛ a mɛ nuhuobiine aŋ wiese hɛ ʋ mɩɩ-boiŋ lɛ, ʋ kɛŋ mɩɩsɩŋ a wei.
8Bʋa-la lɛ La TƖƖNA Wɩa keri ŋmaŋkaaŋ nɛ a joŋ baal-la ʋ sɩ mɛ a hɛ nɩmɛ. Lee-la yɩrɩŋ nɛ Ɛdɩŋ, a hɛ wɩɩpɔsʋŋ dɩɩrɩŋ. 9Ŋɩɩ nɛ La TƖƖNA Wɩa leŋ tɩɩ-doho kala nyʋ a nɛŋ nɛnɛɛ sɩ zɔmɔ sɩɩŋ lɛ, a zɔŋ arɩ diiniŋ ma. Ŋmaŋkaa-la tʋtʋɔbaanɩŋ nɛ tɩa-la nɛnɛɛ sɩɩ pɩ mɩɩsɩŋ arɩ tɩa-la nɛnɛɛ ma sɩ jaŋ leŋ dɩ ŋ jɩŋ wʋzɔŋŋɔɔ arɩ wʋbɔŋŋɔɔ bʋa kala chɩŋ.
10Fuoŋ nɛ fa hɛ Ɛdɩŋ lɛ a pɛllɛ jʋjʋʋ ŋmaŋkaa-la tʋɔŋ, a mʋ kpaa fuonaasɩŋ banɛsɛ. 11Fuo-naasɩ-la dɔŋɔ yɩrɩŋ nɛ Pɩsɔŋ. Ʋ pɛllɛ golli Havɩla tinteeŋ kala nɛ, lee-la sɛlɩmɛ sɩ hɛ. 12(Nɩmɛ sɛlɩmɛ chaasa zɔŋ nɛ woruŋ, aŋ pɛ kɛŋ tabɩɩ-tʋlaa.) 13Fuonaa-kel-lɩa-la yɩrɩŋ nɛ Gɩhɔŋ. Ʋ nɛ golli Kus tinteeŋ kala. 14Fuonaa-kel torimuŋ nɛ Tɩgɩrɩs, ʋ nɛ pɛllɛ to Asiiria tinteeŋ wɩɩpɔsʋŋ. Fuonaa-kel nɛsɩmɩŋ nɛ ŋaa Yufireti.
15La TƖƖNA Wɩa joŋ baal-la hɛ ŋmaŋkaa-la tʋɔŋ nɛ Ɛdɩŋ tinteeŋ lɛ dɩ ʋ pɛrɛ aŋ bibeŋ ʋ nyuŋ. 16Ŋɩɩ nɛ La TƖƖNA Wɩa bʋla pɩ baal-la, “Ŋ jaŋ wuo didii tɩɩ-nɛŋ kala sɩ hɛ ŋmaŋkaa-la tʋɔŋ, 17ama ʋ bɩ maga dɩ ŋ dii tɩa-la nɛnɩŋ sɩ jaŋ leŋ dɩ ŋ jɩŋ wʋzɔmʋŋ arɩ wʋbɔmʋŋ bʋa, dɩ ŋ nɛ die, ŋ jaŋ sʋʋ.”
18La TƖƖNA Wɩa sɩ, “Ʋ bɩ zɔŋ dɩ baala dʋndʋŋa hɛ nɩmɛ. Mɩ jaŋ ŋaa nʋʋ sɩ jaŋ wuo pɩpɛ ʋ lɛ.”
19Bʋa-la lɛ dɩ La TƖƖNA Wɩa lɔgɛ tɩɛrɩŋ a mɛ bagɩlaa arɩ pʋsʋŋ arɩ fillee kala sɩ hɛ wɩa-nyuŋ. Ŋɩɩ nɛ Wɩa kɛmba kala kaa kɔ baal-la teeŋ dɩ ʋ hɛ ba yɩraa. Baal-la yɩrɩŋ nɛ Adam. Yɩrɩ na-kala Adam sɩ hɛ pɩ kʋŋkala, ʋ yɩrɩŋ nɛ ŋɩɩ arɩ jɩnɩŋ. 20Ŋɩɩ nɛ Adam hɛ yɩraa pɩ pʋsʋŋ arɩ bagɩlaa arɩ fillee kala.
Ama kɩaa deemba kʋŋkala bɩ baala lɛ wuo pɛ woruŋ. 21Ŋɩɩ nɛ La TƖƖNA Wɩa leŋ Adam pɩŋ doŋ a yuo naaŋ. Ʋ sɩ pɩŋ doŋ ŋɩɩ, Wɩa lɩɩsɛ ʋ sɛmpɛrɩ-biiŋ dɔŋɔ aŋ kɛŋ lee-la tɔ. 22Ŋɩɩ nɛ La TƖƖNA Wɩa kɛŋ sɛmpɛrɩ-bii-la ʋ sɩ lɩɩsa Adam lɛ a ŋaa haala a kaa kʋ pʋ.
23Ŋɩɩ nɛ Adam sɩ,
“Mɩ haŋgbeliŋ dɔŋɔ arɩ mɩ nammɩa sɛmɛ dɔŋɔ nɛ ŋ-la,
mɩ jaŋ yɩrʋ haala, bɛɛ wɩaa ʋ lɩɩ mɩ lɛ nɛ.”
24Ŋɩɩ nɛ tɩɩ baala yie leŋ ʋ naaŋ arɩ ʋ nyɩmma aŋ ka ʋ dɩ ʋ haala mɛrɛ dɔŋɔ lɛ a ŋaa kʋbala.
25Baal-la arɩ ʋ haal-la kala fa kɛŋ yarɩ-biree nɛ, ka hɩɩsɩŋ bɩ ba kɛnɛ.
المحددات الحالية:
WƖAA DƖ-SUOMUŊ 2: SIS
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©Ghana Institute of Linguistics Literacy and Bible Translation 1984, 2014
