ILUKU 23

IJisọsị Ị-ịlahị nya ỊPayịleti

(ịMatiyu 27:1-2,11-14; ịMakị 15:1-5; ịJọn 18:28-38)

1Ịnyị, alọjịra-jịra ịwẹ wuu a wuleji gbirim lẹ, ị kpa iJisọsị rụ kele kịlahị nya ịPayịleti kọ ka lọọ eje haa lẹlẹ. 2Ụ-ụwa ị-ịlahị nya ịPayịleti, angịwẹ juwa chị ala ba iJisọsị la ịnịịkịla yẹkẹẹ, “Ahị wo ká ọlẹng ọlẹ juwa bịrị alụpwọma nyahị ịmachị bwula ang ọmẹjẹ ọ-hụ angịnyị ahị nyamwụ. Ọ juwa duuhi ju yẹkẹẹ, ahị nyị nyẹ ẹpwa ha iSisa adịrahụ ọgbahị ọkpẹhị rịrịịhị kpong-kpong kaka. Ọ myịmyị juwa yẹkẹẹ, ọwa ayịdang nyaa ri ịKịrayịsị adịrahụ nyahị ahị ala iJuu wuu lẹlẹ.”

3ỊPayịleti tọ iJisọsị wo yẹkẹẹ, “Ahụ ayịdang a ri Adịrahụ nya ala iJuu ịnyịlẹhị lẹ?” IJisọsị wẹ byoo yẹkẹẹ, “Ịnyị, ahụ ayịdang a tị́ kpa ọnụ nya ịlọng wụrụm wẹ.”

4ỊPayịleti byi alegbeju nya angịkiliya nya Ohe Oluhye bala iru nya angị ihihi wuu yẹkẹẹ, “Anụ wo mẹ! Am jẹ́ ịngịngịhyẹ ọlẹ ká ọlẹng ọlẹ họ kpoye nya ehile, m ka jẹ́-ẹ ya eje wọọ hanụ myị́ kaka!”

5Ma, iru nya angịnyị ịịwa wuu juwa charịnya nya ịlẹhị-ịlẹhị, juwa byi ịPayịleti yẹkẹẹ, “Ọlẹng ọlẹ juwa kpa ang ọmẹjẹ ọ-hụ angịnyị ahị nyamwụ yi angịnyị yi bwuru-bwuru bwu iJudiya lalala kele ka ịGalili gbee kọ dọmwụ pwụ ẹgẹlẹ ịnyịnyị!”

IJisọsị Ị-ịlahị nya IHerọdụ

6Ịnyị, ụka ká ịPayịleti wo ẹla ọọwa lẹ, ọ taa wo yẹkẹẹ, ọlẹng ọlẹ nyị ri ala ịGalili? 7Ịnyị, ụka ká ịPayịleti jẹ́ yẹkẹẹ, iJisọsị nyị bwu ịGalili ọlẹ kịị nyị ji ekpeleji nya eji ogbegbe nya iHerọdụ lẹ, ọ tụụbwọ hi iJisọsị haa yẹkẹẹ, nyị kpọọ ka ẹga nya iHerọdụ mẹ. Chajị iHerọdụ ayịdang juwa i-iJerusalẹm ụka ọọwa ịnyịnyị. 8Ụka ká iHerọdụ chẹhị kaka yẹ iJisọsị lẹ, ọ kpọọ ịpyọ lụmẹ. Chajị jaabwọ kọ wo oja chajị nya iJisọsị lụka ọtata lẹlẹ, ọ mọọ ma nya ịlẹhị-ịlẹhị, kọ ka chụchụụ pwoku ụka ọlẹ kọọwa ayịdang ka kpẹhị nya ịlọmwụ yẹ ụkụrwọ ẹbyẹbyị ọhẹ ọlẹ ká iJisọsị ka họ. 9Ịnyị, iHerọdụ a juwa tọ iJisọsị ịtọ lụmẹ-lụmẹ lụka ọtata ụ-ụwa lẹlẹ. Ma, iJisọsị tị hwoo ujiji kpini-kpini, ọ́ wẹ ẹlẹlẹhẹ bwu ọnụ nyamwụ ka. 10Ụka ọọwa, alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ ịhyẹ godayị rịrị ụ-ụda, juwa chị ala ba iJisọsị hwọọhwọọ nya ịlẹhị-ịlẹhị ụ-ụwa. 11Ọọwa lẹ, iHerọdụ bala ịsọja nyamwụ wuu a juwa kpa iJisọsị họ, juwa jwoo ẹpẹpẹ, jaabwọ kọ háa lẹlẹ. Ịnyị, ị hu awụrụ ọnyịịla-ọnyịịla kụrụ iJisọsị lẹ, ị tụụbwọ hi iJisọsị du tịrẹkpẹ kele ka ẹga nya ịPayịleti lẹlẹ. 12Ịnọ, iHerọdụ bala ịPayịleti ọwẹ ri aluji nya awụlẹ gbalẹ-gbalẹ. Ma, eje nya iJisọsị tị kpaa kaka ri aligu nya awụlẹ ẹnụ ọọwa lẹ.

ỊPayịleti Ya Eje nya Igu Wu IJisọsị

(ịMatiyu 27:15-26; ịMakị 15:6-15; ịJọn 18:39—19:16)

13Ụka ọọwa, ịPayịleti wụrụ alegbeju nya angịkiliya nya Ohe Oluhye bala alegbeju ihihi nya ọjịra-jịra nya ala iJuu wuu kaka jịra ẹ-ẹga nyamwụ. 14Ọọwa lẹ, ọ byaa yẹkẹẹ, “Anụ wo mẹ! Ịnọ, anụ wụrụ ọlẹng ọlẹ eje wẹ ẹga nyam lala ọngọlẹ kọ juwa kpa ang ọmẹjẹ nyamwụ hụ angịnyị nyanụ ahị. Ma, ụka ọlẹ kam tị wụla ẹla ọọwa yẹ ị-ịlahị nyanụ wuu lẹ, anụ tị́ yẹ wẹ lẹ. Ḿ ye ẹchẹ nya ẹlẹlẹhẹ ọlẹ kọ họ tụ ehile pyịpyị u-uhye nya ala ịlẹ wuu kanụ chị bọọ kaka. 15Ụka ọlẹ kam tị yọọ du ka ẹga nya iHerọdụ lẹ, iHerọdụ á ya eje wọọ ene kọọ tụụbwọ hyọọ, du tịrẹkpẹ warị kaka ịnyịnyị. Ọọwa mẹjẹ yẹkẹẹ, ọlẹng ọlẹ á da ẹlẹlẹhẹ nya igu kpong-kpong kaka, ịnyịlẹhị. 16Lẹ, m ka kpa enyiri nya ugboji chọọ ega, kam ka tụụbwọ hyọọ rụ lẹ!” [17Ọ ri abwẹla ọhọhọ nya ala iJuu wuu ẹka myị́ ẹka, lụka nya Ang Oriri Ọchịpwụrụ nyaa, kị ka me ọlagba ọnyị myị ọnyị ọlẹ kọ háa ụchụ ya je ịgọvụnọ ịPayịleti chajị kọ ka tụụbwọ hi ọngọọwa haa ịwa aluche.]

18Ịnyị, ụka ká ịPayịleti taa wo ọngọlẹ kị tịtọ kọ ka tụụbwọ hi haa lẹ, iru nya angịnyị ịịwa wuu a juwa yẹkẹẹ, “Ahị tịtọ ká ka nwụ iJisọsị ọwẹ, ká ka tụụbwọ hi ịBarabasị hahị.” 19I wu ịBarabasị ọọwa kaka ju agba, chajị eje nya ọngịnyị ọnwụnwụ woo bala iru nya angịkịla ịhyẹ ịlẹ kị mwẹla e-epweji nyaa lụka kị juwa la egbeju-ọngịrị tụ adịrahụ nyaa pyịpyị. 20Ịnyị, ụka ká ịPayịleti juwa tịtọ kọ ka tụụbwọ hi iJisọsị lẹ, ọ myịmyị ya ẹla ta angịwẹ u-uhye nya ọọwa lẹlẹ. 21Ma, ịwa wuu juwa da ọna gboo yẹkẹẹ, “Ahị tịtọ ká ka gu iJisọsị iloo ba okoji hahị pyii lẹ! Ahị tịtọ ká ka gu iJisọsị iloo ba okoji hahị pyii lẹ!”

22ỊPayịleti myịmyị wẹ ụka ọhata byaa yẹkẹẹ, “Ịịyẹ a tị́ du kam ka gwoo iloo ba okoji hanụ? Ẹla ịyẹ nya igu, ọ tị́ da kpong-kpong? Aḿ yẹ ịngịngịhyẹ okpoye nya ehile ọlẹ kọ họ kpụ eje nya igu ka wọọ ka. Lẹ, m ka kpa enyiri nya ugboji chọọ ega, kam ka tụụbwọ hyọọ rụ lẹ!”

23Ma, iru nya angịnyị ịwẹ wuu juwa charịnya nya ịlẹhị-ịlẹhị, juwa da ọna, chaga la omyi o-gboo yẹkẹẹ, ịwa nyị tịtọ kịị nyị ka gu iJisọsị iloo ba okoji ha ịwa pyii lẹ! Ụka ká omyi nyaa juwa la ọngịrị lụmẹ lẹ, ịPayịleti a ji oye nyaa lẹlẹ. 24Ịnyị, ịPayịleti a ya eje nya igu wu iJisọsị ịnyịlẹhị, jaabwọ ká aluche ịịwa tịtọ lẹlẹ. 25Ịnyị, ịPayịleti a chị ịBarabasị ọlẹ kị wu kaka ju agba wẹ u-uhye nya egbeju ọnyọọngịrị ọlala tụ adịrahụ pyịpyị bala ọngịnyị ọnwụnwụ, da ha iru nya angịnyị ịịwa, jaabwọ kị tịtọ lẹlẹ. Ọọwa lẹ, ịPayịleti a tụụbwọ hi iJisọsị haa kị ka kpọọ kaka nwụ ha ala iJuu, jaabwọ kọ ri irya nyaa lẹlẹ.

Ị Kpa IJisọsị Rụ Kaka Gu Iloo Ba Okoji

(ịMatiyu 27:32-44; ịMakị 15:21-32; ịJọn 19:17-27)

26Ịnyị, ụka kị juwa kpa iJisọsị rụ kele kaka gu iloo ba okoji lẹ, ịsọja ịịwa a tọ ịSayịmọn ọla ịSayịrin ụ-ụgbẹyị kọ juwa kpehe bwu ẹgẹhẹ. Ọọwa lẹ, ị wu ịSayịmọn ọwẹ la agbụrụ lẹ, ị ya agurube nya iJisọsị chwọọ, nyị kpa olo nya agurube ọọwa dịrẹ iJisọsị ẹ-ẹkpẹ-ẹkpẹ mẹ, lẹlẹ.

27Ụka ọọwa, iru nya angịnyị lụmẹ-lụmẹ juwa dịrẹ iJisọsị anyị. Ọọwa lẹ, anyang ịlẹ kị juwa ẹ-ẹpwụ nyaa, a juwa jida nya ịlẹhị-ịlẹhị, juwa kpa ịlaa rị ịpyị biri-biri o-oluhye nya iJisọsị lẹlẹ. 28Ma, ụka ká iJisọsị ayịdang jahị nyamwụ kpata daa lẹ, ọ byaa yẹkẹẹ, “Anụ anyị anyang nya iJerusalẹm, anụ wo mẹ! Anụ jida chajị nyam kaka. Ọkọkọ nya ọọwa lẹ, anụ tụtụ jida chajị nya ịlọnụ bala anyị nyanụ mẹ. 29Chajị ẹnụtụrụ onyobyi juwa warị ị-ịlahị, ká angịnyị ehe ka juwa yẹkẹẹ, ahị ọwawa a juwa ha anyang ịtụma ịlẹ kị ma anyị ẹnẹnẹhẹ lẹka lee angịlẹ kị dọmwụ ya ẹmẹ nyaa ha anyị ịlabwọ nyẹ ẹnẹnẹhẹ lẹka! 30Ọọwa lẹ, angịnyị ehe a ka juwa rụnyẹ rụ kaka ba ịgbọdọ ịtụka ba, juwa byaa yẹkẹẹ, ‘Anụ ịgbọdọ, anụ chuchuu, kanụ kpụ baahị mẹ!’ Ị ka rụnyẹ kaka ba ikiti ba, ka juwa byaa yẹkẹẹ, ‘Anụ chuchuu, kanụ kpụhị ịbaa mẹ!’ ” 31Ụka ọọwa, iJisọsị kpa etu ọdada ọlẹ myịmyị ya ẹla taa yẹkẹẹ, “Jaabwọ ká ila lẹẹ rụ okoji olukpo lukpo lụmẹ ịịlẹ lẹ, anyanyị, anụ tị́ me irya ká ila ọọwa ka rụ okoji ọnwọnwụ ayịdang kaka ba?”

32Ụka ọọwa, ịsọja ịịwa kpa alẹng angị imiiye ịhyẹ ịlẹ kị da ẹla nya igu kele kị ka gwaa iloo ba okoji ẹ-ẹga nya iJisọsị ịnyịnyị. 33Ịnyị, ụka kị kpa iJisọsị jẹ pwụ ẹga ọlẹ kị wụrụ ịKalavarị ká etu nyamwụ ri “ogo nya egbeju” lẹ, ị gwoo iloo ba okoji ụ-ụwa lẹlẹ. I gu angị inyibyi ịwẹ iloo ba okoji ụ-ụwa ịkịka nya iJisọsị ịnyịnyị. Ọngọhẹ ji koye upwuriri nya iJisọsị. Ọngọkịla ji koye ụpụpịla nyamwụ. 34Ụka ọọwa, iJisọsị raabwọ ha Ohe Oluhye chajị nya angịlẹ kị nwọọ ụ-ụwa yẹkẹẹ, “Ohe Oluhye Adada, chuchuu, hịnyọhi ọhọbịrị nya angịwẹ haa, chajị ịwa ayịdang á jẹ́ ang ọlẹ kị wẹẹ họ datị kpong-kpong ka.” Ụka kị gwoo iloo kpá lẹ, ịsọja ịwẹ a go ịwụrụ nya iJisọsị gịla awụlẹ, juwa diwo jwaa ụ-ụwa lẹlẹ. 35Ụka ọọwa, iru nya angịnyị godayị rịrị ụ-ụwa, juwa mwụụrụ yẹ iJisọsị kele ka uhye nya okoji ọlẹ kị gwoo iloo ba. Ụka ọọwa, alegbeju nya ala iJuu godayị rịrị ụ-ụwa, juwa kpa iJisọsị họ yẹkẹẹ, “Ahaa! Ọwa kọ kaa chị angịkịla da lụmẹ, kọ rụ́ lẹ, ọ chị ịlọmwụ da ịnyịnyị mẹ! Ó-ri ọwa ayịdang kọ ri ịKịrayịsị ọlẹ ká Ohe Oluhye ya du warị bala ọngọlẹ ká Ohe Oluhye chụchụ ịnyịlẹhị lẹ aalẹ, kahị jẹ́ mẹ!”

36Ụka ọọwa, ịsọja ịlụwa juwa kpa iJisọsị họ ịnyịnyị, juwa ya ere ọ-chagbịlangịrị ha iJisọsị kọ ka nwa. Ị wụrụ ere ọọwa “Iviniga”. 37I juwa byoo yẹkẹẹ, “Ó-ri ahụ ayịdang ká ri Adịrahụ nya ala iJuu ịnyịlẹhị lẹ aalẹ, a chị ịlọng da wẹ kahị yẹ mẹ!”

38Ị da ịnaaba nya ẹla ọlẹ kị chị ba iJisọsị u-uhye nya agurube ọlẹ kị gwoo iloo ba yẹkẹẹ, “Ọlẹng ọlẹ a ri Adịrahụ nya ala iJuu lẹ.”

39Ụka ọọwa, ọngọhẹ ẹ-ẹpwụ nya angị inyibyi angị imiiye ịlẹ kị gu iloo ba agurube ju iJisọsị chwẹẹ, juwa ya achala ta iJisọsị ịnyịnyị yẹkẹẹ, “Ó-ri ahụ ayịdang ká ri ịKịrayịsị ọọwa ọlẹ ká Ohe Oluhye du warị lẹ aalẹ, a chị ịlọng da, ká tịtị chịhị da ịnyịnyị mẹ!”

40Ma, ọngọ oheeye nyamwụ yalibyi lọọ yẹkẹẹ, “Ahyu! Á juhi nya Ohe Oluhye kpong-kpong ka? Ọ ri á yẹ jaabwọ kaahị ayịdang jam ẹ-ẹpwụ nya eje owuwu nya igu ịnyịnyị lala ọwa-ọwa ka? 41Ịnyahị ahị tị dọmwụ chị ịlahị, chajị uri nya ang inyibyi ịlẹ kahị họ a lẹẹ kahị lẹẹ ye lẹ. Ma, ọnyị ọlẹng ọlẹ á tị họ ịngịngịhyẹ ọtịpyọ kpụ igu kpong-kpong ka.” 42Ụka kọ yalibyi la ọngọ oheeye nyamwụ kpá lẹ, ọ byi iJisọsị yẹkẹẹ, “Ayịbahị iJisọsị ee, Aa chuchuu, ká kpịtịya nyam ụka ọlẹ ká ka tịrẹkpẹ warị la ọngịrị nya adịrahụ oriri nyang chẹẹ mẹ, Adam!”

43IJisọsị wẹ byoo yẹkẹẹ, “Nya ịlẹhị-ịlẹhị, m bying yẹkẹẹ, alẹ oleeri ọlẹ, am bala ahụ ka bá hụhụ la awụlẹ ẹ-ẹpwụ nya okpunyi ọlẹ ká Ohe Oluhye nwụlanọ gbe angịlẹ kọ chịda ọlẹ kị wụrụ ‘ịParadayịsị.’ ”

Igu Ogbugbu nya IJisọsị

(ịMatiyu 27:45-46; ịMakị 15:33-41; ịJọn 19:28-30)

44Ụka ká oje iwo kụrụ imiiye nya ẹnụ họ lẹ, ukpowu ọtụka-ọtụka a chị kpem-kpem ụ-ụwa ọ-ọpyị nya ala iJuu wuu gbee ju ka ụka nya oje ịta nya obyi lẹlẹ. 45Ịnyị, apwụ ọtụka ọlẹ kị ya ke ẹ-ẹpwụ nya ube ọlịgọgọ ọgụgụ olube ịgọgọ ọtụka nya Ohe Oluhye nya ala iJuu, a gu ene imiiye bwu uhye-ọgba lalala kaka gu eji lụka ọọwa lẹlẹ. 46Ọọwa lẹ, iJisọsị a chị eko la omyi o-gboo yẹkẹẹ, “Ahụ Ohe Oluhye Adam ee, Ahụ, m lẹẹ, tụụbwọ hi olegu nyam ju ụ-ụbwọ lẹlẹ!” Ịnyị, ụka ká iJisọsị ya ịnyị kpá lẹ, ọ chị ẹjẹ lẹlẹ.

47Ọọwa lẹ, ụka ká olegbeju ọgbahị nya ịsọja ohu ịrụ ọlẹ kọ godayị rịrị ụ-ụwa, yẹ ịngịịwẹ wuu kị họ lẹ, ọ juwa gwogbo ha Ohe Oluhye, juwa yẹkẹẹ, “Nya ẹla nya ịlẹhị ịnyị! Ọlẹng ọlẹ a ri oku lẹ! Ọ́ da ẹlẹlẹhẹ onyobyi ka ịnyịlẹhị!”

48Ọọwa lẹ, ụka ká iru nya angịnyị ịlẹ wuu kị jịra ụ-ụwa, yẹ ang ịlẹ kị họ wẹ wuu ẹ-ẹga nya iJisọsị lẹ, ị juwa yụbwọ kpụ ịlaa ọ-ọkịlẹtụ nya ang o-ju ẹjẹẹ nya olujwo ọtọtọ ẹ-ẹpwụ ọkịlẹtụ nyaa, juwa rụ lẹlẹ. 49Ụka ọọwa, angịlẹ wuu kị ri aligu ịlam-ịlam nya iJisọsị bala anyang ịlẹ kị bọọ bwu ịGalili wuu, godayị rịrị hwẹẹẹ, juwa kpẹhị nyaa yẹ ang ịlẹ wuu kị juwa họ ẹ-ẹga nyamwụ ịnyịnyị.

Ị Ju Ogu nya IJisọsị Eji

(ịMatiyu 27:57-61; ịMakị 15:42-47; ịJọn 19:38-42)

50Ụka ọọwa, ọlẹng ọhẹ juwa ọlẹ ká ẹnyị nyamwụ ri iJosẹfụ. Ọ bwu epweji nya ala iJuu ọlẹ kị wụrụ Arịmatiya. Ọ ri ọngọhẹ ẹ-ẹpwụ nya alịkọtụ ọtụka ọgụgụ nya ala iJuu wuu. Ọ ri ọlabwẹla ọnyịịla ị-ịlahị nya Ohe Oluhye lụmẹ. 51Ọwa ayịdang á myị ju obyi omeme onyobyi nya alegbeju ịịwa ịlẹ kị me ju iJisọsị ka. Ọwa ayịdang juwa la ẹhị ọrịrịị-rịrị gbe ịpyị Adịrahụ nya Ohe Oluhye ịnyịnyị. 52IJosẹfụ ọwẹ kele ka ẹga nya ịPayịleti kaka bịlọọ ogu nya iJisọsị kọ ka hwoo kpa kaka ju eji. 53Ịnyị, ụka kị myị ọnụ họọ lẹ, ọ hiri ogu nya iJisọsị eji lẹlẹ. IJosẹfụ kpa apwụ onyoowuru o-ju ogu eji ba ịlọmwụ kele kaka rị ogu nya iJisọsị lẹ, ọ hwoo kpa kaka ju eji i-iworu ọhẹ ọlẹ kị bebe u-uhye nya ẹjwọ lẹlẹ. Iworu ọọwa ri onyeewe, í ju ọngọngọhẹ eji ụ-ụwa ẹnẹnẹhẹ ene lẹka. 54Ẹnụtụrụ ọọwa a ri ẹnụ nya ịFụrayịde ọlẹ kọ kaa ri ụka ọ-kpa nwụlanọ gbe Ẹnụtụrụ Ọhịnyọ Lụkụrwọ nya ala iJuu lẹ. Chajị, ụka ọọwa lẹ, Ẹnụtụrụ Ọhịnyọ Lụkụrwọ olijuju nyamwụ juwa ka dọmwụ lẹ.

55Ụka ọọwa, anyang ịlẹ kị ba iJisọsị bwu ịGalili ba iJosẹfụ kele kaka yẹ iworu ọlẹ kị hu iJisọsị ju eji bala jaabwọ kị jwoo eji ụ-ụwa ịnyịnyị. 56Ịnyị, ụka ká anyang ịwẹ rụ tịrẹkpẹ ka ẹpwa lẹ, ị kele kaka nwụla ida ichoru kwọkwọ la datị-datị ịlẹ kị juwa tịtọ kị ka kpa kaka wụ ogu nya iJisọsị ịnọ lẹlẹ. Ma, ị́ tị kele ka iworu ọọwa la Ẹnụtụrụ Ọhịnyọ Lụkụrwọ nya ala iJuu ka, chajị, ị mwụ ịnyọ ẹ-ẹpwa jaabwọ ká ehile ọlẹ ká Ohe Oluhye daa ya, nyị họ.

المحددات الحالية:

ILUKU 23: IBNO

تمييز النص

نسخ