ULÚKU 22

Ibīyājɛ nēé yá tū Ujísɔ̄si ā

(Umát 26.1-5; Umák 14.1-2; Ujɔ́n 11.45-53)

1 # Oyɛb 12.1-27 Ɛ̄cī ucɛ kú igbō nōó ī nū ŋ́, nēé gē hī ka ucɛ kú onyatá ā le bá ajaajɛ. 2Aótrɛ̄yí kú ācogwɛ́ɛya mɛ́mla aútíca kú íne bá yɔ̄ ī cēyītīkwū kéē lɛ ɔwɛ nēé géē lɛ Ujísɔ̄si ŋmó wɛɛlɛ ā jé, amáŋ é gē yúúfi ācɛ ā nɛ̄ɛ̄nɛ̄hi.

Ujúdasi cɛ̄ ka anúɔ í yíbīyājɛ tū Ujísɔ̄si

(Umát 26.14-16; Umák 14.10-11)

3Anɔ́ɔ ebilíi le tá ipú ɔtū kú Ujúdasi nēé hi ka Iskáriyɔ̄ti, nōo wɛ éyi kú ayíkpó ā á. 4Anɔ́ɔ Ujúdasi nyɛ̄ɛ̄ le yɛ tá ɛgiyí aótrɛ̄yí kú ācogwɛ́ɛya mɛ́mla ákú aídengéli kú Agblīihɔ-nɛ̄hi ā lɛyíkwu ɔwɛ nōó géē yíbīyājɛ tū Ujísɔ̄si cɛ́ɛ́ kóō kwú ɔ̄ ú tū uwā abɔ̄ á. 5Ɛlā nōó ka ā le he uwá ɔtū anɔ́ɔ é cɛ̄ ka aá géē gbā ije lɛ ɔ́ á. 6Ujúdasi cɛ̄ ɛlā nēé ka ā, anɔ́ɔ ó gbɔɔ́ ō dɔɔ̄kā ɛga olɔhi nōó géē yíbīyājɛ tū Ujísɔ̄si lɛ uwá wɛɛlɛ nɛ̄ ācɛ í gáā jɔ́ɔkwu nū ŋ́ mā á.

Ujísɔ̄si le tútū kóō lé ucɛ kú onyatá

(Umát 26.17-25; Umák 14.12-21; Ujɔ́n 13.21-30)

7Eyī kú ɛ̄cī ucɛ kú igbō nōó gē nū ŋ́ mā le nyā, ó kē wɛ eko nēe gē ŋmó ɔyí álá ā. 8Ujísɔ̄si le Upíta mɛ́mla Ujɔ́ni tɛ̄hɔ̄ nyɔ̄ í da uwá kahíníī, “Aá nyɔ̄ gaá lɛ ɔdōlé kú ucɛ kú onyatá ā tútū lɛ alɔ kú alɔ lé.” 9É da ɔ́ ɔ̄kā kahíníī, “Iní nɛ̄ a dɔɔ̄kā kú alɔ tá ɔ̄ tū ā?” 10Ó tá uwā ohi kahíníī, “Abɔ̄ aá yɔ̄ ī bēhé ga ipú igelī ā, ɔ̄cɛnyīlɔ éyi nōo bī ɔjá kú éŋkpɔ̄ géē jīla aá ɔwɛ. Aá tá ɔ̄ ɔkwu ga ipú inu nōó í bēhé nyɔ̄ ā. 11Cɛ́ɛ́ ká aá da óndú ɔlɛ́ ā kahíníī, ‘Utíca ā ka, ‘Iní nɛ̄ inu aúgbɔga nɛ̄ ami mɛ́mla ayíkpó kú um géē lé ucɛ kú onyatá ā yɔ̄ ā?’ 12Ó kē í ma inīīcō ogbādā éyi nēé le ɔ́ tútū ā fú lɛ aá. Aá lɛ ɔdōlé ā tútū abɔ́ɔ.” 13É le yɛ tá ipú igelī ā gaá lɛ ɔdā dóódu má ɛ́gɛ́nɛ̄ ó da uwá ā kpɛ́mm. Anɔ́ɔ é le ɔdōlé kú ɛ̄cī ucɛ kú onyatá ā tútū abɔ́ɔ á.

Ujísɔ̄si lé ɔdōlé ɔnɔ̄ɔ̄nɛ̄ ámōōmɛ mla ayíkpó kú nū

(Umát 26.26-30; Umák 14.22-26; 1 Ukɔ́r 11.23-25)

14Eko nɛ̄ eko nēé gáā lé ɔdōlé ā le yá ā, Ujísɔ̄si mɛ́mla ayíkpó ā gaá cīce kéē lé ɔdōlé. 15Ujísɔ̄si da uwá kahíníī, “N húmáyī ī tíne ká ami mɛ́mla aá kú ālɔ̄ lé ɔdōlé kú ɛ̄cī kú ucɛ kú onyatá nyā gbojī ɛɛ́, gbɔbū ɛ́ɛ́ kéē géē ŋmó um! 16Ka n̄ lɛ ɛnyā da aá. Ń gáā lé ɔdōlé kú ucɛ ká onyatá nyā igbɔhá gɛ ŋ́ jāā gbéeko nɛ̄ Ɔwɔicō wā í cɔcɛ́ dúúdú, nɛ̄ ɔdā nɛ̄ ɔdōlé kú ucɛ kú onyatá nyā kwɛyí nū ā le yá jīla. 17Anɔ́ɔ ó kwú íkókwū nɛ̄ ejé o mōōmu nū ú, lɛ ahínyá tá Ɔwɔicō ohígbū nū, anɔ́ɔ ó kahíníī, “Aá mīyɛ íkókwū nyā kú aá lɛ ɔ́ kɔ̄ mla iyī aá. 18N da aá ka igbīhi ɛ̄nyā, ń gáā gwá ejé īkpō ufáyin nyā gɛ ŋ́ jāā gbéeko nɛ̄ Ɔwɔicō wā í cɔcɛ́ dúúdú.” 19Anɔ́ɔ ó kwú igbō ā ú, ó lɛ ahínyá tá Ɔwɔicō, lɛ ɔ́ kpó cē nyɛŋɛnyɛŋɛ, anɔ́ɔ ó kwú lɛ uwá, yɔ̄ ī ka kahíníī, “Ɛ̄nyā wɛ ɔkpíyē kú um nēé je gwɛ́ɛya lɛ Ɔwɔicō kwɛyí aá ā á. Aá yá ɛ̄nyā ká aá bī le blakwu um.” 20#Ujer 31.31-34Eko nēé le ɔdōlé ɔ́nɔ̄ɔ̄nɛ̄ lé kwɛyí ā, ó kwú ikókwū kú ejé ā ú, yɔ̄ ī ka kahíníī, “Ikókwū nyā wɛ okónu ɛ̄yīpɛ̄ nɛ̄ Ɔwɔicō ce mla ācɛ ɔlɛ́ nū nēé bī ōyī kú um nōo géē cēbónū ohígbū aá. 21#Aíjē 41.9“Aá mɔ́ɔ̄, ɔ̄cɛ nōo gáā yíbīyājɛ tū um ā cīce amānyā pī um yɔ̄ ī lé ɔdōlé! 22Ami nōo wɛ Ɔyínɔ̄nyīlɔ kú Ɔ̄cɛ ā géē kwú ɛ́gɛ́nɛ̄ Ɔwɔicō miya ɔ́ lɛ ā, amáŋ ó géē bɔ̄bí lɛ ɔ̄cɛ nōo géē yíbīyājɛ tū um ā!” 23Anɔ́ɔ ayíkpó ā gbɔɔ́ ō da īyī uwā ɔ̄kā kéē jé ɔ̄nyɛ kú ipú uwā nōo gáā yá ɔdā nyā ā.

Ayíkpó ā táafu lɛyíkwu ɔ̄cɛ nōo fíyɛ́ ā

24 # Umát 18.1; Umák 9.34; Ulúk 9.46 Ayíkpó ā gbɔɔ́ ō táafu mla iyī uwā lɛyíkwu ɔ̄nyɛ kú ipú uwā nɛ̄ ācɛ cíkā o ka ká anú ɔ́ɔ cɛgbá fíyɛ́ dúú ā. 25Ujísɔ̄si da uwá kahíníī, “Aɔ́cɛ́ kú aílɔ́wá bī íkwu gē le gbō ācɛ ɔlɛ́ uwā, nááná é gē dɔɔ̄kā kéē hī uwā ka aóklóbīya kú ācɛ ā. 26#Umát 23.11; Umák 9.35#Umát 20.25-27; Umák 10.42-44Amáŋ ó wɛ ɛ́gɔ́ɔmā nōó gáā wɛ ɔtāhɛ̄ aá ā ŋ́. Ikɔkɔ ɔ́ɔmā ɔ̄cɛ nōo géē cɛgbá fíyɛ́ dúú ipú aá kóō le pīya bɛ̄ɛka ɔyípɛ̄ nɛ̄ŋcɛ́ fíyɛ́ dúú ā. Ɔ̄cɛ nōo géē wɛ otrɛ̄yī kú aá kóō kwú pīya bɛ̄ɛka ɔ̄cocɛ̄hɔ̄ kú aá ā. 27#Ujɔ́n 13.12-15Ɔ̄nyɛ cɛgbá fíyɛ́ ā? Ɔ̄cɛ nōo cīce kóō lé ɔdōlé ā kɛ̄ɛ ka ɔ̄cɛ nōo í cɛ̄ ɔ̄ ɛhɔ̄ ā? Ɔ̄cɛ nōo cīce kéē cē ɔ̄ ɛhɔ̄ ā nɛ̄. Amáŋ ami ā lɛbɛ̄ɛka ɔ̄cocɛ̄hɔ̄ ipú aá ā.

28“Aá wɛ ācɛ nēe bá mla um gaajɛ eko kú unwalu kú um á. 29Ɛ́gɛ́nɛ̄ Ádā um je íkwu gā um kú um gbō ācɛ ā, ɛ́gɔ́ɔmā nɛ̄ n je íkwu lɛ aá dúú á. 30#Umát 19.28Aá géē lé klla í gwá tɔ̄hā mla um ajɔ̄ɔ̄cɛ́ kú um, aá klla géē ce akpa kú ɔcɛ́ ká aá gbō ipɔ́ɔma igwɛ́ɛpa kú Ísrɛ̄lu ā.”

Ujísɔ̄si da Upíta ka ɔ́ɔ géē híhó anúɔ

(Umát 26.31-35; Umák 14.27-31; Ujɔ́n 13.36-38)

31Ujísɔ̄si kahíníī, “Usáyímɔ̄n! Usáyímɔ̄n! Jāhɔ̄! Ebilíi le ɛga mīyɛ kóō lɛ ɛjɛ̄ɛ̄jī aá jámá, kóō lɛ ɔdā olɔhi fō gɛcɛ ŋma obɔ̄bí, ɛ́gɛ́nɛ̄ ɔglɛ́ɛjí gē tá igbómgbō kú igwu owu ŋmá īkpō nū ā. 32Amáŋ n lɛ ɔkɔ gbā lɛ Ɔwɔicō ohígbū awɔ nōo wɛ Usáyímɔ̄n ā ɛ́ɛ́ kóō cɛ̄ lɛ ɔtū nɛ̄ a le ce ɔ́ ā kóō tɔ́ɔlá ŋ́. Ohígbū ɔ́ɔmā, eko nɛ̄ a kwúcē igbīhi wā í tá um kpɔ́, tá ayíkpó aɔ́mpa awɔ abɔ̄ kéē lɔtūce Ɔwɔicō.” 33Upíta tá ɔ̄ ohi kahíníī, “Óndú, n le tútū ká n̄ ga agbá mla awɔ, ká n̄ kē kwú mla awɔ!” 34Ujísɔ̄si tá ɔ̄ ohi kahíníī, “Upíta, n da uwɔ ka ɔbúgwū í gáā togwú ícɛ nyā dɛ̄ɛ̄ ɛ́ɛ́ nɛ̄ a géē híhó igbɛ ɛtá ka anúɔ í jé um jéjéē ɛ́ɛ́ ŋ́ mā ŋ́.”

Ujísɔ̄si pi ayíkpó kú nū ahɔ̄

35 # Umát 10.9,10; Umák 6.8,9; Ulúk 9.3; 10.4 Anɔ́ɔ Ujísɔ̄si da ayíkpó kú nū ā ɔ̄kā kahíníī, “Aá gbɛlá kwu eko nɛ̄ n tū aá ɛhɔ̄ gɛcɛ ā. N le ukɔ́ tū aá ka aá kóō híīī bī alítā, ɛkpa ámāŋ ka áblákpá ŋ́. Ɔdā dóódu ŋá aá ā?” É kahíníī, “Ɔdā dúúmā í ŋá alɔ ŋ́.” 36Ujísɔ̄si da uwá kahíníī, “Amáŋ abālɔbányā ɔ̄cɛ dúúmā nōo lɛ alítā ámāŋ ka ɛkpa kóō kwú ɔ̄ piíí. Ɔ̄cɛ dúúmā nōó lɛ okpacaŋgelī ŋ́ kóō kwu úwé kú nū ú kpó lá kóō lɛ éyi lá piíí. 37#Ayis 53.12É tá ipú ɔkpíihɔ ā lɛyíkwu um kahíníī, ‘Ɔdā nēé yá ācobīyíne ā nēé yá ɔ̄ dúú á.’ Ó kē yɔ̄ ī yá lɛ ā ɛɛ́. Ɛjɛ̄ɛ̄jī ɔdā nēé tá ipú ɔkpíihɔ lɛyíkwu um ā géē yájīla piíí.” 38Ayíkpó ā da ɔ́ kahíníī, “Mɔ́ɔ̄! Ɔkpacaŋgelī ɛpa bá yɔ̄ á, Óndú!” Ó tū uwā ohi ka ɔ́ɔmā jɛ̄ ɛɛ́.

Ujísɔ̄si gbɔ̄ɔkɔ ɛyí ɛfú kú ɔcí ólīifu

(Umát 26.36-46; Umák 14.32-42)

39Ujísɔ̄si mɛ́mla ayíkpó kú nū nyɛ̄ɛ̄ ŋmá igelī ā le tá ɛyí ɛfu kú ɔcí olīifu ɛ́gɛ́nɛ̄ ó tɛtɛ gē yá ā. 40Eko nōó le tá ajɛ abɔ́ɔ ā, ó da uwá kahíníī, “Aá gbɔ̄ɔkɔ lɛ Ɔwɔicō kóō cɛ̄ kéē yá ojámá ŋ́.” 41Anɔ́ɔ ó le tū gɛcɛ ŋmá ɛgiyí uwā ɔdā o lɛbɛ̄ɛka ikpó ofɛhɔ̄ ā, anɔ́ɔ ó kwú okwúukwu í kwajɛ le ɔkɔ gbā lɛ Ɔwɔicō á. 42Ó kahíníī, “Ádā, ɔ́dāŋ koó wɛ ɔdā nɛ̄ ā cɛ̄, kwú ikókwū kú ōwē nyā ú ŋmá ɛgiyí um. Amáŋ a híīī yá ɔdā nɛ̄ n dɔɔ̄kā ā ŋ́, amáŋ ɔdā nɛ̄ awɔ dɔɔ̄kā á kóō le yá.” 43Alelékwū-ōtɛ̄hɔ̄ éyi gā ɛgiyí nū ŋmá ɔkpáncō, anɔ́ɔ ó lɛ ɔfú tū ɔ̄ iyē á. 44Ó gbɔ̄ɔkɔ lɛ Ɔwɔicō lɔfúlɔfú nɛ̄hi, anɔ́ɔ ó yɔ̄ ipú ɔkpɔkplɔ nɛ̄hi nōo cɛ̄ lɛ ahɛ nōó yɔ̄ ī bū ā yɔ̄ ī hɛ́ wāajɛ bɛ̄ɛka ágbōyī ā. 45Ó nyāŋjɛ ŋmá ɛga nōó yɔ̄ ī gbɔ̄ɔkɔ lɛ Ɔwɔicō ā, anɔ́ɔ ó kwúcē le tá ɛgiyí ayíkpó ā, anɔ́ɔ ó má uwá bá gē gbiyɔ̄lā. Ɔtūnobí cɛ̄ lɛ uwá le gbagbafú. 46Ó da uwá kahíníī, “Ɔdíya nɛ̄ aá yɔ̄ ī gbiyɔ̄lā ā? Aá cāŋjɛ kú aá gbɔ̄ɔkɔ lɛ Ɔwɔicō cɛ́ɛ́ kóō cɛ̄ lɛ uwá já aá má ŋ́.”

É lɛ Ujísɔ̄si kwú

(Umát 26.47-56; Umák 14.43-50; Ujɔ́n 18.3-11)

47Ujísɔ̄si bī ɛlā okónu yɔ̄ ī ka lɛ ayíkpó kú nū ɛ́ɛ́ nɛ̄ ɛwa kú ācɛ pɛ́ wā á. Ujúdasi nōo wɛ éyi kú ayíkpó igwɛ́ɛpa ā kpó uwā tɔ̄ɔkwu wā á. Ó le tá ɛgiyí Ujísɔ̄si kóō lɛ ɔtū má ɔ̄ ɔtū. 48Amáŋ Ujísɔ̄si kahíníī, “Ujúdasi, a le ɔtū má um ɔtū o yá ɛ́ɛ́ kú ā kwú ami, Ɔyínɔ̄nyīlɔ kú Ɔ̄cɛ ú tū aólɛlā kú um abɔ̄ nɛɛ?” 49Eko nɛ̄ ayíkpó nēe bá abɔ́ɔ ā le ɔdā nōo gáā yá ā má ā, é dɔɔ̄kā kahíníī, “Óndú, alɔ gbɔɔ́ ō lɛ ɔkpacaŋgelī gɔ̄ ācɛ mɛ́ɛnɛ ɛɛ?” 50Anɔ́ɔ éyi kú uwā lɛ ɔkpacaŋ́gelī gɔ̄ ɔfiyɛ kú otrɛ̄yí kú ācogwɛ́ɛya ā lɛ ɔ́ ahɔ̄ abɔ̄lɔ́ná hɛ́ táajɛ á. 51Amáŋ Ujísɔ̄si kahíníī, “Ɛ̄nyā ka ō jɛ̄!” Ó le abɔ̄ kwu ɔnyīlɔ ā ahɔ̄ anɔ́ɔ ó le yá mɛ́ɛlɛ á. 52Anɔ́ɔ Ujísɔ̄si da aótrɛ̄yí kú ācogwɛ́ɛya mɛ́mla aótrɛ̄yí kú aídengéli kú Agblīihɔ-nɛ̄hi mɛ́mla anyākwɔ́cɛ nēe wā abɔ́ɔ kéē kwú ɔ̄ ā kahíníī, “Aá bī ɔkpacaŋgelī mɛ́mla ogló wā gaá kwú um bɔ̄ɔdā nɛ̄ n wɛ ɔ̄cɛ ohéjulúgwu ā nɛɛ? 53#Ulúk 19.47; 21.37N yɔ̄ mla aá ipú Agblīihɔ-nɛ̄hi ā ɛ̄cī dóódu, aá kē kwú um ŋ́. Amáŋ eko nyā wɛ eko kú aá, eko nɛ̄ ebilíi, ɔ̄cogbaajɛ kú ajodobū cɔcɛ́ ā.”

Upíta híhó igbɛ ɛtá ka anúɔ í jé Ujísɔ̄si ŋ́

(Umát 26.57,58,69-75; Umák 14.53,54,66-72; Ujɔ́n 18.12-18,25-27)

54É le Ujísɔ̄si kwú anɔ́ɔ é le ɔ́ bī ga ɔlɛ́ kú otrɛ̄yí kú ācogwɛ́ɛya ā á. Upíta le hɛ́ce igbīīgbīhi yɔ̄ gē yɛce uwá. 55Upíta le bēhé tá ipú ódúdɔ̄lɛ́ kú otrɛ̄yí kú ācogwɛ́ɛya ā. Ɔ̄cɛ éyi le ɔlá gwó odúdɔ̄lɛ́ ā, anɔ́ɔ Upíta nyɔ̄ gaá cīce mɛ́mla uwá á. 56Eko nɛ̄ éyi kú ayípɔ̄ncɛnyā ocɛ̄hɔ̄ ā le ɔ́ má cīce ɛgiyí ɔlá ā, ó leyīkwu ɔ́ glīglī anɔ́ɔ ó kahíníī, “Ɔnyīlɔ nyā yɔ̄ mla Ujísɔ̄si dúú!” 57Amáŋ Upíta le híhó, anɔ́ɔ ó da ɔ́ kahíníī, “Ɔnyā, ń kōō jé ɔ̄ ŋ́!” 58O yɔ̄ yɛɛ ā, ɔnyīlɔ éyi le Upíta má anɔ́ɔ ó kahíníī, “A wɛ éyi kú ācɛ ō yɛce Ujísɔ̄si dúú!” Amáŋ Upíta tóohi kahíníī, “N wɛ ŋ́!” 59Anɔ́ɔ eko le yɛ bɛ̄ɛka áwa éyi ā, ɔ̄cɛ ɔhá klla ka lɔfú lɔfú kahíníī, “Ɔkwɛ̄yi nɛ, ɔ̄cɛ ā yɔ̄ mla Ujísɔ̄si dúú gbóó, ohígbū koó ke wɛ ɔ̄cɛ kú Ugálīli dúú.” 60Amáŋ Upíta tóohi kahíníī, “Ɔnyīlɔ, ń jé ɔdā nɛ̄ a yɔ̄ ī kɛlā lɛyíkwu ɔ́ ā ŋ́!” Anɔ́ɔ ikpííkpó ɔ́ɔmā, abɔ̄ ó bī ɛlā okónu yɔ̄ ī ka ā, ɔbúgwū le ogwú tū. 61Eko ɔ́ɔmā Óndú ā leyī pīya anɔ́ɔ ó kwú eyī hɛ́kwu Upíta á. Anɔ́ɔ Upíta le blakwu ɔdā nɛ̄ Óndú ā ka lɛ ɔ̄ kahíníī, “Gbɔbū ɛ́ɛ́ kú ɔbúgwu kóō tōgwú otúmā, a géē híhó ka anúɔ í jé um igbɛ ɛtá.” 62Upíta le tá ɛcɛ gaá jikwū lɔfúlɔfú.

É yá Ujísɔ̄si ɛbɛ́ klla ŋmó ɔ̄ ijē

(Umát 26.67-68; Umák 14.65)

63Ācɛ nēe yɔ̄ ī leyīkwu Ujísɔ̄si ā yá ɔ̄ okónu, é klla ŋmó ɔ̄ ijē. 64É lɛ ɔ́ eyī gbō anɔ́ɔ é da ɔ́ ɔ̄kā kahíníī, “Hɛ́ce káá! Ɔ̄nyɛ fīyɛ̄ uwɔ odée ā?” 65É klla cá ɔ̄ ɛdɔ kú ɛcá dóódu.

É le Ujísɔ̄si bī wā iyɔ̄bu ojīla kú aótrɛ̄yí

(Umát 26.59-66; Umák 14.55-64; Ujɔ́n 18.19-24)

66Eko nɛ̄ eyī le nyā ā odúúdu anyākwɔ́cɛ, aótrɛ̄yí kú ācogwɛ́ɛya mɛ́mla aútíca kú íne ā le jīla tɔ̄hā, anɔ́ɔ é le Ujísɔ̄si bī wā iyɔ̄bū uwā á. 67É da ɔ́ kahíníī, “Da alɔ, awɔ wɛ Ohɔ́nyɛtá á nɛɛ?” Ó tá uwā ohi kahíníī, “Ɔ́dāŋ ka n le ka lɛ aá, aá gáā cɛ̄ɛ̄lā kú um ŋ́. 68Ɔ́dāŋ ka n kē lɛ ɔ̄kā da aá, aá kē gáā cīla ŋ́. 69Amáŋ oŋmá eko kpiíí ŋmá abālɔbányā gɔbū ā, é géē je ami, Ɔyínɔ̄nyīlɔ kú Ɔ̄cɛ cīce abɔ̄lɔ́ná kú Ɔwɔicō nōo lɔfú fíyɛ́ dúú ā.” 70Anɔ́ɔ ɛjɛ̄ɛ̄jī uwā kahíníī, “Ayíbɛ awɔ ā wɛ Ɔyínɔ̄nyīlɔ kú Ɔwɔicō á nɛɛ?” Ó tá uwā ohi kahíníī, “Aá ka ka ami á n.” 71Anɔ́ɔ é kahíníī, “Alɔ abɔ̄yī alɔ kē le ɔdā nōo ka ā pó ɛ́ɛ́! Alɔ í cɛgbá ijáalí dúúmā gɛ ŋ́.”

المحددات الحالية:

ULÚKU 22: IFBCL

تمييز النص

نسخ