UJƆ́NI 6
6
Ɔdōlé nōó je lɛ ācɛ úlā igwɛ́ɛpa cofigwó ā
(Umát 14.13-21; Umák 6.30-44; Ulúk 9.10-17)
1Igbīhi ɛ̄nyā Ujísɔ̄si le tá ísu kú Ugálīli nōo wɛ ísu kú Utibérīyasi ā. 2Ɛwa nɛ̄hi yɛce ɔ́, ohígbū kéē má ocābɔ̄ nōó ó yá iyē kú ācɛ odoōcē ā. 3Ujísɔ̄si le tá ɛyí ɛfu, anɔ́ɔ ayíkpó kú nū gaá cīice pī ɔ̄ biílí. 4Eko ucɛ kú onyatá ā, nōo wɛ ucɛ kú ācɛ Ujíyu ā, le bá ajaajɛ. 5Eko nɛ̄ Ujísɔ̄si jeyī gicō ā, anɔ́ɔ ó má ɛwa nɛ̄hi gē wā lɛyíkwu ɔ̄, ó da Ufílīpu ɔ̄kā kahíníī, “Iní nɛ̄ alɔ géē lá igbō ŋmá ká ācɛ nēe bá aá kéē lé ā?” 6Ó ka ɛ̄nyā kóō já ɔ̄ má, ohígbū ka anú abɔ̄yī nū jé ɔdā nɛ̄ ó gáā yá ā á. 7Ufílīpu tóohi kahíníī, “Igbō nōo fíyɛ́ ikpō égō ofigwó #Īkpēegō nɛ̄hɛ́: Īkpēegō éyi wɛ ulé ɛ̄cī kú ācɛ oyúkúlɔ́ kú eyīpɔ́lɛ́ á (má Umátiyu 20.2) lɔfú jɛ̄ ūwā glá, ɔ́dāŋ keé lé lígíílígíí.” 8Éyi kú ipú ayíkpó kú nū, Ándru ɔyínɛ́ nɔ̄nyīlɔ kú Usáyímɔ̄ni nēé hī ka Upíta, da ɔ́ ka, 9“Ɔyípɛ̄ éyi yɔ̄ amānyā nōo bī igbō eyē ɛhɔ̄ mla ɛbéenyi ɛpa. Ɛ̄nyā jɛ̄ ɔdí ipú ɛwa ɛ́gɛ́nyā glá?” 10Ujísɔ̄si da uwá kahíníī, “Aá yá ká ācɛ ā kéē má bá ajɛ.” Ohígbū ka ácí yɔ̄ abɔ́ɔ nɛ̄hi. Anɔ́ɔ ācɛ ā má bá ajɛ á. Áluka kú uwā ā lɛbɛ̄ɛka úlā igwɛ́ɛpa cofigwó ā (5,000). 11Anɔ́ɔ Ujísɔ̄si kwú igbō ā ú, lɛ ahínyá tá Ɔwɔicō. Anɔ́ɔ ó je ɔ́ lɛ ācɛ nēe bá ajɛ ā. Ó yá ɛ́gɔ́ɔmā mla ɛbéenyi ā dúú. Ó je ɔ́ lɛ uwá ɛ́gɛ́nɛ̄ é tíne lɛ ā. 12Eko nēé lɛ ipú nū ā, ó da ayíkpó kú nū kahíníī, “Aá lɛ iwili kú nū túbá ká ɔdā dúúmā kóō bónū ŋ́.” 13Anɔ́ɔ é lɛ ɛjɛ̄ɛ̄jī iwili kú igbō kú eyē ɛhɔ̄ nɛ̄ ācɛ lé hile ā túbá, anɔ́ɔ ó le kpó mu ómblí igwɛ́ɛpa. 14Eko nɛ̄ ācɛ le úklɔ́ ō hídáagó nɛ̄ Ujísɔ̄si yá ā má ā, é kahíníī, “Ɔkwɛ̄yi nɛ, ɔ̄cɛ ā wɛ ɔ̄comɛ́ɛbɛ ā á”
Ujísɔ̄si yāwu eyī ísu
(Umát 14.22-27; Umák 6.45-52)
15Eko nɛ̄ Ujísɔ̄si jé ka é gáā kwú ɔ̄ abɔ̄fú kéē je ɔ́ lé ɔ̄cɛ́ ā, ó nyɛ̄ɛ̄ lɛ tá ɛyí ɛfu, ōfōōfūnū.
Ujísɔ̄si yāwu eyī éŋkpɔ̄
(Umát 14.22-33; Umák 6.45-52)
16Eko nɛ̄ ɔ̄nɛ̄ gāa, anɔ́ɔ ayíkpó kú nū ā le tá okónu kú ókpoó ā. 17É le pɛ́ tá ipú ɔ́kɔ, anɔ́ɔ e gbɔɔ́ ō nyɔ̄ ogbeé ɔhá kú ísu ā lɛyíkwu Ukapánɔm. Amáŋ abɔ̄ obū le du ā, nááná Ujísɔ̄si í wā ɛgiyí uwā ŋ́. 18Anɔ́ɔ ísu hɛ́ lugwú lugwú gicō ohígbū owu nɛ̄hi nōo yɔ̄ ī tá ā. 19Eko nēé lɛ ɔ́kɔ pɛ́ bɛ̄ɛka ukilómīta ɛhɔ̄ ámāŋ ka ahāapa ā, igbeékpónú é má Ujísɔ̄si yɔ̄ ī yāwu eyī ísu lɛyíkwu ɔ́kɔ ā. Anɔ́ɔ é gbɔɔ́ ō yúufi. 20Amáŋ Ujísɔ̄si da uwá kahíníī, “Ami nɛ. Aá yúufi ŋ́.” 21Ɔtu he uwá nɛ̄hi abɔ̄ é kwú ɔ̄ ú ga ipú ɔ́kɔ ā, anɔ́ɔ ɔkwɔɔkwu ɔ́ɔmā ɔ́kɔ ā ga ajɛ ɛga nēé yɔ̄ ī nyɔ̄ ā.
É tíne ɔdōcābɔ̄ ŋmá ɛgiyí Ujísɔ̄si
22Oŋmɔ́cī nū ɛwa nēe háyi ogbeé ɔhá kú ísu ā, má ka ɔ́kɔ ékpó yɔ̄ abɔ́ɔ á, é kē le jé ka Ujísɔ̄si í ga ipú ɔ́kɔ ā mla ayíkpó kú nū ŋ́, amáŋ ayíkpó kú nū kē nyɛ̄ɛ̄ ōfōōfū uwā. 23Aɔ́kɔ ɔhá ŋmá Utibérīyasi wā í bá pī ɛga nēé lé igbō eko nɛ̄ Óndú ā le ahínyá tá Ɔwɔicō ohígbū nū gbɔbū ā. 24Eko nɛ̄ ācɛ ā í má Ujísɔ̄si gɛ ŋ́ mā, amáŋ ayíkpó kú nū ōfōōfū ūwā ā, uwá abɔ̄yīwā le pɛ́ tá ipú aɔ́kɔ ā, le tá Ukapánɔm kéē tíne Ujísɔ̄si.
Igbō kú oyēeyī
25Eko nēé lɛ ɔ́ pīyɛ ogbeé ɔhá kú ísu ā, é da ɔ́ kahíníī, “Itíca, eko nyá nāa wā amānyā ā?” 26Ujísɔ̄si tá uwā ōhī kahíníī, “Ɔkwɔ̄ɔ̄kwɛ̄yi, n̄ da aá ka, aá gē tíne um, ó wɛ ohígbū úklɔ́ ō hídáagó kú um nɛ̄ aá má ŋ́, amáŋ ohígbū ka aá le igbō lé lɛ ipú nū ā nɛ. 27Aá híī yúklɔ́ kú ɔdōlé nōo gē bīya ā ŋ́, amáŋ ohígbū ɔdōlé nōo gē je oyēeyī opiyóó, nɛ̄ Ɔyínɔ̄nyīlɔ kú Ɔ̄cɛ géē je lɛ aá ā. Ohígbū ɛnyā nɛ̄ Ɔwɔicō Ádā ā tū um ɛhɔ̄ wā ā.” 28Anɔ́ɔ é da ɔ́ kahíníī, “Ɔdí nɛ̄ alɔ géē yá piíí ɛ́ɛ́ ká ālɔ̄ yúklɔ́ kú Ɔwɔicō ā?” 29Ujísɔ̄si tóohi da uwá kahíníī, “Ɛ̄nyā wɛ úklɔ́ kú Ɔwɔicō á, aá lɔtūce ɔ̄cɛ nɛ̄ anú abɔ̄yī nū tɛ̄hɔ̄ ā.” 30Anɔ́ɔ é da ɔ́ kahíníī, “Ɔdā ō hídáagó nyá nāa géē yá cɛ́ɛ́ kú alɔ cɛ̄ɛ̄lā kú uwɔ ā? Ɔdí nāa géē yá ā? 31#Oyɛb 16.4,15; Aíjē 78.24Ádáádā alɔ lé umaná ipú ígbíli, ɛ́gɛ́nɛ̄ é tá ɔ̄ tū ipú ɔkpá kú ɛlɔ̄ɔwɔicō lɛ ā, ‘Ó je igbō lɛ uwá ŋmá ɔkpáncō kéē lé.’” 32Ujísɔ̄si da uwá kahíníī, “Ɔkwɔ̄ɔ̄kwɛ̄yi, n̄ da aá ka, ó wɛ Umósīsi ī je igbō nōo ŋmá #Ɔdā nɛ̄ Umósīsi je lɛ aá ā í wɛ ŋ́ i ámāŋ ó wɛ Umósīsi je lɛ aá ā ŋ́ ɔkpáncō lɛ aá ā ŋ́, amáŋ Ádā um je igbo ɔkwɛ̄yi ā lɛ aá ŋmá ɔkpáncō á. 33Ohígbū ka igbō kú Ɔwɔicō wɛ ɔ̄cɛ nōo ŋmá ɔkpáncō, nōo gē je oyēeyī lɛ ɛcɛ ā.” 34Anɔ́ɔ é da ɔ́ kahíníī, “Óndú, je igbō nyā lɛ alɔ eko dóódu.”
35Anɔ́ɔ Ujísɔ̄si da uwá kahíníī, “Ami wɛ igbō kú oyēeyī á. Ɔ̄cɛ nōo wā ɛgiyí um, ɛmiyɛ í gáā ŋmó ɔ̄ fúlufúlu ŋ́. Ɔ̄cɛ nōo kē lɔtūce um, ijēēnyi í kē gáā ŋmó ɔ̄ gbóógbóō gɛ ŋ́. 36Amáŋ n da aá ka, aá lɛ um má ɛɛ́, nááná aá kē cɛ̄ ŋ́. 37Ācɛ dóódu nɛ̄ Ádā ā je gā um ā géē wā ɛgiyí um. Ɔ̄cɛ dúúmā nōo wā ɛgiyí um, ń gáā nū ɔ̄ tɛ́ɛcɛ ŋ́. 38Ohígbū ka ń wā ajɛ ŋmá ɔkpáncō ká n̄ gaá yá ɔdā nōo he um ɔtū ā ŋ́, amáŋ ɔdā nōo tá ɔtū kú ɔ̄cɛ nōo tū um ɛhɔ̄ ā nɛ̄ n. 39Ɛ̄nyā wɛ ɔdā nōo tá ɔtū kú Ɔwɔicō nōo tū um ɛhɔ̄ ā á, ká n̄ híī cɛ̄ kú ɔ̄cɛ dúúmā nōó le tū um abɔ̄ kóō héyī bī ŋ́, amáŋ kā n̄ lɛ uwá héyī ɛ̄cī ámōōmɛ ā. 40Ohígbū ka ɔdā nɛ̄ Ádā um tíne á wɛ ka odúúdú ācɛ nēe lɛ Ɔyínɔ̄nyīlɔ ā má, nēe kē cɛ̄ɛ̄lā nū, géē lɛ oyēeyī opiyóó. Anɔ́ɔ n géē kpó uwā héyī ɛ̄cī ámōōmɛ á.”
41Anɔ́ɔ ācɛ Ujíyu le iŋini ka ce ɔ́ ohígbū ɛlā nōó ka kahíníī, “Ami ā wɛ igbō nōo ŋmá ɔkpáncō á.” 42Anɔ́ɔ é kahíníī, “Ó wɛ ɔ̄cɛ ā wɛ Ujísɔ̄si, ɔyí kú Ujósɛ̄fu ā ŋ́ nɛɛ, ɔ̄cɛ nɛ̄ alɔ jé ɛ́nɛ́ nū mɛ́mla ádā nū āā? Abɔ̄ ó yá lɛ ɛ́ɛ́ nōó ka, ‘N ŋmá ɔkpáncō wā ajɛ ā?’” 43Ujísɔ̄si tá uwā ohi kahíníī, “Aá híī ka iŋini ɔtāhɛ̄ iyī aá ŋ́. 44Ɔ̄cɛ dúúmā í wā ɛgiyí um glá ŋ́ ayíka Ádā nōo tū um ɛhɔ̄ ā lɛ ɔ́ pi wā nɛ, anɔ́ɔ n géē je ɔ́ héyī ɛ̄cī ámōōmɛ ā. 45#Ayis 54.13É lɛ ɔ́ tá ipú ɔkpá kú ācomɛ́ɛbɛ ka, ‘Ɔwɔicō gē nwū odúúdú uwā odée.’ Ɔ̄cɛ dúúmā nōo lɛ ɛlā kú Ádā ā pó nōo klla lɛ ɔ́ jé, géē wā ɛgiyí um. 46Ó wɛ ka ɔ̄cɛ dúúmā má Ádā ā jéjéē ɛ́ɛ́ ŋ́, ń táafú ŋ́ ɔ̄cɛ nōo yɔ̄ mla Ádā ā, anú má Ádā ā á. 47Ɔkwɔ̄ɔ̄kwɛ̄yi, n̄ da aá ka, ɔ̄cɛ nōo cɛ̄ géē lɛ oyēeyī opiyóó. 48Ami wɛ igbō kú oyēeyī á. 49Ádáádā aá lé umaná ipú ígbíli, anɔ́ɔ é le pɛ́ gekwú á. 50Ɛ̄nyā wɛ ɛdɔ kú igbō nōo ŋmá ɔkpáncō, nɛ̄ ɔ̄cɛ dúúmā lɛ lé, í lɛ oyēeyī opiyóó. 51Ami wɛ igbō kú oyēeyī nōo ŋmá ɔkpáncō á. Ɔ́dāŋ́ ka ɔ̄cɛ dúúmā lɛ igbō nyā lé, ó géē yēeyī piyóó. Igbō nɛ̄ n géē je ohígbū oyēeyī kú ɛcɛ ā wɛ ɔkpíyē kú um ā.”
52Ohígbū ɛlā nɛ̄ ó ka nyā, ācɛ Ujíyu gbɔɔ́ ō táafú mla iyī uwā kahíníī, “Abɔ̄ ó yá lɛ ɛ́ɛ́ nɛ̄ ɔ̄cɛ ā ka anúɔ géē je ɔkpíyē kú nū lɛ alɔ ká ālɔ̄ lé glá ā?” 53Anɔ́ɔ Ujísɔ̄si da uwá kahíníī, “Ɔkwɔ̄ɔ̄kwɛ̄yi, n̄ da aá ka, ń táafú ŋ́ aá lɛ ɔkpíyē kú Ɔyínɔ̄nyīlɔ kú Ɔ̄cɛ ā lé, klla lɛ oyī kú nū gwá, ámāŋ aá lɛ oyēeyī dúúmā ipú aá ŋ́. 54Ɔ̄cɛ nōo lɛ ɔkpíyē kú um lé, klla lɛ oyī kú um gwá, lɛ oyēeyī opiyó, anɔ́ɔ n géē je ɔ́ héyī ɛ̄cī ámōōmɛ á. 55Ohígbū ka ɔkpíyē kú um wɛ ɔdōlé ɔkwɛ̄yi. Oyī kú um kē wɛ ɔdōgwá ɔkwɛ̄yi á. 56Ɔ̄cɛ nōo lɛ ɔkpíyē kú um lé, klla lɛ oyī kú um gwá, lā ipú um, n kē lā ipú nū. 57Ádā oyēeyī tū um ɛhɔ̄ á, ohígbū koó yēeyī ā n kē yēeyī dúú. Ɔwɛ ékpó ā ɔ̄cɛ nōo lɛ ɔkpíyē kú um lé géē yēeyī ohígbū um. 58Ɛ̄nyā wɛ igbō nōo ŋmá ɔkpáncō á. Ó lɛbɛ̄ɛka igbō nɛ̄ aádáádā aá lé, nēé pɛ́ gekwú ā ŋ́. Ɔ̄cɛ nōo lɛ igbō nyā lé géē yēeyī piyóó.” 59Ó kɛlā nēe bá ā ipú ɛgogbɔ̄ɔkɔ, eko nōó yɔ̄ gē nwū ācɛ ɛlā Ukapánɔm ā.
Ācɛ o yɛce Ujísɔ̄si nēé cɛ̄ ŋ́ mā
60Ācɛ alɛwa nēe gē yɛ ce ɔ́ ā, lɛ ɛlā nyā pó, anɔ́ɔ é kahíníī, “Ɔdā nēé nwū nyā lɔnɔ kú ɔ̄cɛ kóō jɛ́yí nū. Ɔ̄nyɛ pó glá ā?” 61Amáŋ Ujísɔ̄si jé abɔ̄yī nū ka ayíkpó kú nū bá ī ka iŋini ohígbū ɛ̄nyā, anɔ́ɔ ó da uwá kahíníī, “Ɛ̄nyā yá kú aá le cɔ̄nū nɛɛ? 62Ɔdí géē yá ɔ́dāŋ ka aá má Ɔyínɔ̄nyīlɔ kú Ɔ̄cɛ kwúcē ga ɛga nōo tɛtɛ yɔ̄ ā? 63Alelékwū kú Ɔwɔicō gē je oyēeyī á, ɔfú kú ɔ̄cɛ í yá ɔdā dúúmā glá ŋ́. Ɛlā nɛ̄ N ka lɛ aá ā wɛ alelékwū mla oyēeyī. 64Amáŋ ācɛ ohī bá ɔtāhɛ̄ kú aá, nēé cɛ̄ ŋ́. Ujísɔ̄si jé ācɛ nēé cɛ̄ ŋ́ mā mla ɔ̄cɛ nōo géē je ɔ́ lá ā ŋmá eko aflɛ́yí ā. 65Anɔ́ɔ ó kahíníī, “Ohígbū ɛ̄nyā n̄ da aá ka, ɔ̄cɛ dúúmā í wā ɛgiyí um glá ŋ́, ń táafú ŋ́ Ádā ā lɔfú je lɛ ɔ́.”
Upíta cɛ̄ klla le ka tɛ́ɛcɛ
66Ohígbū ɛ̄nyā ayíkpó kú nū alɛwa kwúcē igbīhi í klla yɛ mla anú gɛ ŋ́. 67Anɔ́ɔ Ujísɔ̄si da ayíkpó igwɛ́ɛpa ā kahíníī, “Aá gē tíne kú aá nyɛ̄ɛ̄ dúú nɛɛ?” 68#Umát 16.16; Umák 8.29; Ulúk 9.20Usáyímɔ̄ni tóohi kahíníī, “Óndú, egiyí ɔ̄nyɛ nɛ̄ alɔ géē nyɔ̄ gɛ? Awɔ lɛ ɛlā nōo gē je oyēeyī opiyóó á. 69Alɔ cɛ̄, klla jé ka a wɛ Ɔ̄cɛ otīihɔ̄ kú Ɔwɔicō.” 70Anɔ́ɔ Ujísɔ̄si tá uwā ohi kahíníī, “Ń fu aá igwɛ́ɛpa ɛ́ɛ́ nɛɛ ɔ̄cɛ éyi kú aá í wɛ ebilíi ā ŋ́ nɛɛ?” 71Ó kɛlā kú Ujúdasi ɔyínɔ̄nyīlɔ kú Usáyímɔ̄n Iskárīyɔ̄tu, éyi kú ipú ayíkpó igwɛ́ɛpa ā, nōo géē je ɔ́ lá.
المحددات الحالية:
UJƆ́NI 6: IFBCL
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
