UJƆ́NI 1

Ɛlā kú Ɔwɔicō

1Anú nēé hī ka ɛlā ā yɔ̄ gbɔbū ɛ́ɛ́ nɛ̄ Ɔwɔicō yá ɛcɛ á. Ó húmáyī ī yɔ̄ mla Ɔwɔicō, anɔ́ɔ ɛlā ā kē wɛ Ɔwɔicō ɔkwɔ̄ɔ̄kwɛ̄yi á. 2Ɛlā ā yɔ̄ mla Ɔwɔicō, ɛ́ɛ́ nēé yá ɔdā dóódu á. 3Ɛlā nɛ̄ Ɔwɔicō bī le yá ɔdā dóódu á. Ó le ɔdā dóódu nɛ̄ Ɔwɔicō yá nɛ̄ ó wɛ ɛlā ā yá ɔ̄ ā ŋ́ nɛɛ ŋ́. 4Ɛgiyí nū ā nɛ̄ oyēeyī yɔ̄ á, oyēeyī ā kē wɛ ofíyajɛ kú ɛcɛ á. Ɛgiyí ɛlā ā nɛ̄ oyēeyī ŋmá á, ámāŋ ɔdā nēé yá ā, lɛ oyēeyī ŋmá opīyatɔ̄há mla ɛlā ā. 5Anɔ́ɔ ɔlá ā kē fíyaajɛ ipú obū, obū ā í kē nyí ɔ̄ ŋ́.

6 # Umát 3.1; Umák 1.4; Ulúk 3.1,2 É tū ɔ̄cɛ éyi ɛhɔ̄ wā ŋmá ɛgiyí Ɔwɔicō, iyē nū wɛ Ujɔ́ni. 7Ó wā gaá da ɛjɛ̄ɛ̄jī ācɛ ɛlā lɛyíkwu ɔ̄cɛ nōo lɛbɛ̄ɛka ɔlá-ofíyajɛ ā, o yá ɛ́ɛ́ kéē lɛ olɛhɔ̄ ā pó, cɛ́ɛ́ kéē cɛ̄. 8Anú abɔ̄yī nū í wɛ ofíyajɛ ā ŋ́, amáŋ ó wā gaá cɛ̄ ijáalí lɛ ofíyajɛ ā. 9Ɛ̄nyā wɛ ofíyajɛ ɔkwɛ̄yi, ɛ̄nɛ̄ o géē wā ipú ɛcɛ gaá fíyaajɛ klá ācɛ dóódu ā. 10Amáŋ nááná nɛ̄ Ɔwɔicō yá ɛcɛ ŋmá iyē nū ā, ācɛ í kē jé ɔ̄ éjúuma eko nɛ̄ ó wā ā ŋ́. 11Ó wā ɔlɛ́ nū, amáŋ ācɛ ɔlɛ́ nū í mīyɛ anú ŋ́. 12Áluka kú ācɛ nēe mīyɛ anú, nēe cɛ̄ɛ̄lā nū ā, ó le ɔfú je lɛ uwá kéē le pīya ayí kú Ɔwɔicō. 13É le uwá ma igbɔhá! Ɛ̄nyā í ŋmá ɛ́gɛ́nɛ̄ ádā kú ɛcɛ nyā gē ma ɔyí ā ŋ́, amáŋ Ɔwɔicō abɔ̄yī nū je uwá pīya ayí nū á.

14Anɔ́ɔ ɛlā ā le pīya ɔlɛɛcɛ, ó kē gā gaá lā mla alɔ. Ó yíihɔtū klla gbonɛnɛ nɛ̄hi. Anú kē ma Ɔwɔicō fú ɔkwɔ̄ɔ̄kwɛ̄yi á. Alɔ má ojīlīmā nɛ̄hi nɛ̄ ó lɛ ā. Ádā je ojīlīmā nɛ̄hi nyā lɛ ɔ́ ohígbū ka anú wɛ ɔyínɔ̄nyīlɔ ékpónú kú nū á. 15Ujɔ́ni cē ijáalí lɛ ɔ́. Anɔ́ɔ ó lɔkɔcɛyí kɛlā lɛyíkwu ɔ́ kahíníī, “Ɛ̄nyā wɛ ɔ̄cɛ nɛ̄ n kɛlā lɛyíkwu ɔ́ ka, ‘Ɔ̄cɛ nōo gē wā igbīhi um ā fíyɛ́ um á, ohígbū ka anú yɔ̄ gbɔbū gā um á!’” 16Abɔ̄ nɛ̄ alɔ le he ɔ́ ɔtū nɛ̄hi, ó kē yɔ̄ ī kpó aɔ́dā olɔhi alɛwa lɛ alɔ eko dóódu. 17Ɔwɔicō le íne tū Umósīsi ɛhɔ̄, amáŋ Ɔwɔicō tū Ujísɔ̄si nōó fu kóō wɛ ohɔ́nyɛtá ā ɛhɔ̄ kóō mafú ihɔtū mɛ́mla ogbonɛnɛ kú Ɔwɔicō mɛ́mla ɔkwɔ̄ɔ̄kwɛ̄yi lɛyíkwu ɔ́. 18Ɔ̄cɛ dúú í má Ɔwɔicō jéjéē ɛ́ɛ́ ŋ́. Amáŋ ɔyínɔ̄nyīlɔ ā ofōōfūnū nōo kwu ádā ā ajaajɛ ā, ma ɔdā nɛ̄ ádā ā wɛ ā fú á.

Ujɔ́ni oyubatísim mɛ́mla ɛhɔ̄ nōó cɛ̄ ā

(Umát 3.1-12; Umák 1.1-8; Ulúk 3.1-18)

19Ɛ̄nyā wɛ ijáalí nɛ̄ Ujɔ́ni cɛ̄ eko nɛ̄ ācɛ Ujíyu tū ācogwɛ́ɛya mɛ́mla ācɛ Ulífāyi ɛhɔ̄ fu ɔ́ ŋmá Ujerúsālɛm, gaá da ɔ́ ɔ̄kā kahíníī, “A wɛ ɔ̄nyɛ nɛ?” 20Ujɔ́ni í kílokónu tū ɔ̄ ŋ́. Anɔ́ɔ ó ka tɛ́ɛcɛ péee kahíníī, “Ó wɛ ami Ohɔ́nyɛtá ā ŋ́.” 21#Umál 4.5; Obla 18.15,18Anɔ́ɔ é da ɔ́ kahíníī, “Ɔ̄nyɛ nɛ̄ a kē wɛ ā, a wɛ Ɛláyíja nɛɛ?” Anɔ́ɔ ó tóohi kahíníī, “Ń wɛ Ɛláyíja nóó.” “A wɛ ɔ̄comɛ́ɛbɛ #ɛbɛ: Ɔ̄cɛ nēe leyī táajɛ ō wā kú nū, kóō wā í ka kú ohɔ́nyɛtá tɛ́ɛcɛ ā ā nɛɛ?” Anɔ́ɔ ó tóohi kahíníī, “Ehéee.” 22“O lɛ ā, da alɔ, ɔ̄cɛ nɛ̄ a wɛ ā ká ālɔ̄ lɛ ohi nɛ̄ alɔ géē bī gé lɛ ācɛ nēe tū alɔ ɛhɔ̄ ā lɛ. Ɔdí nāa ka lɛyíkwu iyī uwɔ ā?” 23#Ayis 40.3Anɔ́ɔ ó kahíníī, “N wɛ ɔkɔ kú ɔ̄cɛ éyi yɔ̄ ī tɔ́ɔna ipú ígbíli. ‘Aá lɛ ɔwɛ kú Óndú ā gllágwó’, ɛ́gɛ́nɛ̄ Ayisáya, ɔ̄comɛ́ɛbɛ ka ā.’”

24Anɔ́ɔ ācɛ nēé tɛ̄hɔ̄ ŋmá ɛgiyí ācɛ Ufárisīi ā, 25da ɔ́ ɔ̄kā igbɔhá kpɔ́ kahíníī, “Ohígbū ɔdí nāa gē yá ācɛ ubatísim ā, ɔ́dāŋ ka á wɛ Ohɔ́nyɛtá ā ŋ́, ámāŋ Ɛláyíja, ámāŋ ɔ̄comɛ́ɛbɛ ā ŋ́?” #Ācotɛ̄hɔ̄ nɛ̄ ācɛ Ufárisīsi tɛ̄hɔ̄ ā, ámāŋ ācɛ nēé tɛ̄hɔ̄ ā wɛ ācɛ Ufárisīsi. 26Ujɔ́ni tá uwā ohi kahíníī, “Ami ā bī éŋkpɔ̄ gē yá ācɛ ubatísim, amáŋ ɔ̄cɛ éyi háyi ɔtāhɛ̄ kú aá, nɛ̄ aá jé ɔ̄ ŋ́, 27ɔ̄cɛ nōo gē wā igbīhi um ā, nɛ̄ ń yá lɔhi jɛ̄ ō cíkā ō wī ɔ́ŋgbá kú áblákpá kú nū ŋ́.” 28Ɔdā nēe bá ā yá ajɛ kú Ubɛ́tāni, ogbeé kú Ujɔ́dan, ɛga nɛ̄ Ujɔ́ni yɔ̄ gē yá ācɛ ubatísim ā.

29Oŋmɔ́ɔ̄cī nū Ujɔ́ni má Ujísɔ̄si yɔ̄ ī wā ɛgiyí nū, anɔ́ɔ ó kahíníī, “Aá má Ɔyálá kú Ɔwɔicō, nōo gē kpó íne nɛ̄ ācɛ kú ɛcɛ bīya nyɔ̄ ā! 30Ɛ̄nyā wɛ ɔ̄cɛ nɛ̄ n kɛlā kú nū ka, ‘Ɔ̄cɛ éyi gē wā igbīhi um, nōo fíyɛ́ um kɔ́ɔ́, ohígbū koó yɔ̄ gbɔbū gā um.’ 31Ami ā ń jé ɔ̄cɛ nɛ̄ ó wɛ ā nóo. Amáŋ ɛ́gɛ́nɛ̄ é tíne ká n̄ lɛ ɔ́ mafú lɛ Ísrɛ̄lu ā, ohígbū ɔ́ɔmā yá nɛ̄ n wā gē bī éŋkpɔ̄ yá ācɛ ubatísim á.” 32Anɔ́ɔ Ujɔ́ni cījáalí kahíníī, “N má Alelékwū Ihɔ nōo lɛbɛ̄ɛka okóohō ā ŋmá ɔkpáncō, anɔ́ɔ ó gaá cɛ ɔ́. 33Ami ā ń jé koó wɛ anú ŋ́ kpɔ́, amáŋ Ɔwɔicō nōo tū um ɛhɔ̄ ká n̄ bī éŋkpɔ̄ yá ācɛ ubatísim ā, da um kahíníī, ‘Ɔ̄cɛ nāa géē má Alelékwū Ihɔ wā gaá ce ɔ́ ā, anú wɛ ɔ̄cɛ nōo géē bī Alelékwū Ihɔ yá ācɛ ubatísim á.’ 34N le ɔ́ má. N ke cɛ̄ ijáalí ka anú wɛ Ɔyínɔ̄nyīlɔ kú Ɔwɔicō ā á.”

Ayíkpó kú aflɛ́yí

35Oŋmɔ́ɔ̄cī nū, Ujɔ́ni háyi mla ayíkpó kú nū ɛpa. 36Ó má Ujísɔ̄si abɔ̄ ó gaá yɛ, anɔ́ɔ ó kahíníī, “Aá má Ɔyálá kú Ɔwɔicō ā.” 37Eko nɛ̄ ayíkpó ɛpa le ɛlā nōó ka ā pó ā, anɔ́ɔ é le yɛce Ujísɔ̄si á. 38Ujísɔ̄si pīyeyī le uwā má bá gē yɛce ɔ́, anɔ́ɔ ó da uwá kahíníī, “Ɔdí nɛ̄ aá gē tíne ā?” Anɔ́ɔ é da ɔ́ kahíníī, “Iní nāa lā ā? Urábāyi?” (ɛ̄nɛ̄ ɛyí nū wɛ Itíca). 39Anɔ́ɔ ó da uwá kahíníī, “Aá wā gaá má ɔ̄.” Ohígbū ɔ́ɔmā é le yɛ gaá le ɛga nōó lā ā má, anɔ́ɔ é bá mla anú ɛ̄cī ɔ́ɔmā ohígbū ka ó lɛbɛ̄ɛka ɛplá oje ɛnɛ kú ɔlɛ́ɛnɔ ā. 40Ándru, ɔyínɛ́ kú Usáyímɔ̄ni Upíta, wɛ ɔ̄cɛ éyi ipú ācɛ ɛpa nēe pó ɛlā kú Ujɔ́ni klla yɛce ɔ́ ā. 41Ó tíne ɔyínɛ́ nū Usáyímɔ̄ni aflɛ́yí. Anɔ́ɔ ó da ɔ́ kahíníī, “Alɔ lɛ Umɛsáyíya ā má ɛɛ́ (ɛ̄nɛ̄ ɛyí nū wɛ Ohɔ́nyɛtá ā).” 42Ó le ɔ́ bī gé lɛ Ujísɔ̄si. Eko nɛ̄ Ujísɔ̄si lɛ ɔ́ má, ó kahíníī, “A wɛ Usáyímɔ̄ni ɔyí kú Ujɔ́ni, é géē hī uwɔ ka Ukífāsi.” #Ɛyí Upíta wɛ ɛcɔ̄.

43Oŋmɔ́ɔ̄cī nū Ujísɔ̄si le tútū kóō nyɔ̄ Ugálīli. Ó lɛ Ufílīpu má, anɔ́ɔ ó da ɔ́ kahíníī, “Yɛce um.” 44Ufílīpu ŋmá Ubɛtsayída, nōo wɛ igelī nɛ̄ŋcɛ́ kú Ándru mɛ́mla Upíta ā. 45Ufílīpu lɛ Unatánīyɛ̄lu má. Anɔ́ɔ ó da ɔ́ kahíníī, “Alɔ le ɔ̄cɛ nɛ̄ Umósīsi tá ɔkpá ohígbū nū ipú ɔkpá kú íne mɛ́mla ācomɛ́ɛbɛ ā má ɛɛ́, Ujísɔ̄si ɔ̄cɛ kú Unásārēti, ɔyí kú Ujósɛ̄fu ā.” 46Anɔ́ɔ Unatánīyɛ̄lu da ɔ́ kahíníī, “Ɔdā olɔhi dóódu ŋmá Unásārēti wɛ̄ɛcɛ glá āā?” Anɔ́ɔ Ufílīpu da ɔ́ kahíníī, “Wā gaá má ɔ̄.” 47Ujísɔ̄si le Unatánīyɛ̄lu má lɛyíkwu ɔ́ gē wā, anɔ́ɔ ó kɛlā lɛyíkwu nū kahíníī, “Aá má ɔ̄cɛ Ísrɛ̄lu ɔkwɛ̄yi, nōó gē plá ɔ̄cɛ ŋ́.” 48Unatánīyɛ̄lu da ɔ́ kahíníī, “Iní nāa jé um ŋmá ā?” Ujísɔ̄si tá ɔ̄ ohi kahíníī, “Ofíílí kú Ufílīpu kóō hī uwɔ igwú, eko nāa yɔ̄ útū ɔcí Ufígi ā, n le uwɔ má.” 49Unatánīyɛlu tá ɔ̄ ohi kahíníī, “Itíca, awɔ ā wɛ Ɔyínɔ̄nyīlɔ kú Ɔwɔicō á. Awɔ ā wɛ Ɔcɛ́ kú Ísrɛ̄lu á.” 50Ujísɔ̄si tóohi da ɔ́ kahíníī, “A cɛ̄ ohígbū ka, n da wɔ ka, ‘N má uwɔ útū ɔcí ufígi ā kɛ̄ɛ?’ A géē má ɔdā nōo nwuné fíyɛ́ aɔ́dā nēe bá ā.’” 51#Ohút 28.12Anɔ́ɔ ó da ɔ́ kahíníī, “N̄ lɛ ɛlā ɔ̄kwɛ̄yi da aá, aá géē má ɔkpáncō abɔ̄ ó le nwūla, cɛ́ɛ́ aálelékwū otɛ̄hɔ̄ kú Ɔwɔicō bá yɔ̄ ī gicō klla yɔ̄ ī wā ajɛ ɛyí Ɔyínɔ̄nyīlɔ kú Ɔ̄cɛ ā.”

المحددات الحالية:

UJƆ́NI 1: IFBCL

تمييز النص

نسخ