LUCAS 24
24
Jicha chaꞌkux tal te Jesuse
1Te primero kꞌaal yuꞌun te semanae, te antstike ben sab a laj bajtik te ba chꞌene. Yichꞌojik kꞌael te pox te xchapojike. Sok ay yan antstik te sjoyinejik kꞌale. 2Tselbilix lokꞌel a kꞌo staik te ton te makbil a te tiꞌil chꞌene. 3Ochik bael, pero ma stabeyik te stiꞌbalul te Kajwaltik Jesuse. 4Ben xlaj xiꞌ yuꞌun, ni ma snaꞌ tut ya spasik. Toj nax la yilik teꞌa cheb winketik te tekꞌajtik ta stsꞌeelike. Te skꞌuꞌ-spakꞌe xlemlajet nax. 5Te antstike la skejan sbaik ta lum yuꞌun xiꞌel. Pero te winketike altalanbot yuꞌun:
—¿Tuꞌun ya aleik te ba animaetik te machꞌa kuxulixe? 6Ma liꞌiyukix to, yuꞌun chaꞌkuxix bael. Naꞌaik me te tuti yalbeyex te kꞌalal ajoyinejik to ta Galilea ae, 7te la yal: “Te Nichꞌanile puersa me ya xꞌakꞌot entregal ta skꞌab te jmulawiletike, ya me sjojkꞌanik ta krus y ta yoxebal kꞌaal ya xchaꞌkux tal”, xchi me —xchiik.
8Jich te antstike la snaꞌik te tut altalanbil yuꞌun te Jesuse. 9Sujtik bael te ba chꞌene, kꞌo yalbeyik te tuti yilik te buluchtul apostoletike y sok spisil te yane. 10Te antstik te machꞌa ba yalbeyik te apostoletike jaꞌ te xMaria Magdalenae, sok te xJuanae, sok te xMaria te smeꞌ te Jacoboe, y sok te yan xan antstike. 11Pero te apostoletike la skuyik te jowil kꞌop te ya yalike, y ma skꞌan xchꞌuunik.
12Pero te jPedroe jajch xyalet bael te ba ay te chꞌene, y kꞌalal kꞌo yilbe te yutile, jaꞌ xanix a yil te sakil pakꞌ te potsbil ae. Jicha sujt bael ta na. Toj yajtal yoꞌtan kꞌael yuꞌun te tut kꞌoemix ta pasele.
Ta sbelel jtejklum Emaus
13Jaꞌ mismo kꞌaal a, cheb jnopojeletik yipalik kꞌael ta beel ta sbelel jun jtejklum Emaus sbiil, te ay wan cheb lewa yiloj sba sok te Jerusalene. 14Yipalik kꞌael ta yalel spisil te tut kꞌoemix ta pasele. 15Te tutꞌil yipalik kꞌael ta yaꞌbiyanel ae, te Jesuse tijilaj tal y lijk sjoyinik bael ta beel. 16Pero manchuk me ya yilik, ni ma snaꞌbeyik sba machꞌa a. 17Te Jesuse la sjojkꞌolambe:
—¿Tut a te ya awalik kꞌael ta bee? ¿Tuꞌun te lom tristeexe? —xchi.
18La sjakꞌ te jtul te jCleofas sbiile:
—¿Me yuꞌun jakal talemat ta Jerusalen te ma anaꞌojuk te tuti kꞌot ta pasel te ayix cheꞌoxeꞌ kꞌaale? —xchi.
19Te Jesuse la sjojkꞌolambe:
—¿Tut a te kꞌoem ta pasele? —xchi.
La yalik:
—Jaꞌ te tuti kꞌot ta pasel ta stojol te Jesus Nazarete. Jaꞌ jtul jꞌalwanej yuꞌun Dios te spisil tut ya xjuꞌ yuꞌun spasel, sok ay spoder te skꞌop ta stojol Dios sok ta stojol spisil te jtejklume. 20Te stataletik yuꞌun te saserdoteetike y sok te kaj-juꞌeltike la yakꞌik entregal ta milel. Jaꞌ yuꞌun la yichꞌ jojkꞌanel ta krus. 21Te joꞌotike la jkuytik te jaꞌ ya yaꞌbotik ta libre te jlumaltik Israele. Pero ayix yoxebal kꞌaal te jicha akꞌot ta milele. 22Pero ay chaꞌoxtul antstik te joy jbatik soke te la yakꞌ aꞌabiyanuk koꞌtantik, yuꞌun ben sab xkꞌotikuk te ba xchꞌenale, 23y ma kꞌo stabeyik te stiꞌbalule. Sujt bael ta na, y la yalbotik te ay chꞌul angeletik a yilik te jicha altalanbot te chaꞌkuxemix te Jesuse. 24Ay chaꞌoxtul te joꞌtaktik te ora laj bajt te ba xchꞌenale, y jich a kꞌo staik te tutꞌil la yal te antstike, pero ma staik ta ilel te Jesuse —xchiik.
25Jicha altalanbot yuꞌun te Jesuse:
—Wokol ya xkꞌot ta awoꞌtanik te jaꞌexe. ¿Tut to ora ya xchꞌuun awoꞌtanik spisil te tut yaloj jilel te jꞌalwanejetik yuꞌun te Diose? 26¿Me ma wan puersauk nail ya xkꞌax swokol te Cristoe, antes te ya xꞌoch te ba lekilale? —xchi.
27Te nax a lijk yalbe sluwar spisil te tut tsꞌibabil jilel te Sjun te Diose te tutꞌ ay skꞌoplal te Cristoe. Lijk kꞌalal ta sjun jMoises jaꞌ to kꞌalal ta sjun spisil te jꞌalwanejetik yuꞌun te Diose.
28Laj kꞌot te ba jtejklum ba ya xbajtike. Te Jesuse jich yilel te kꞌan soluk bale. 29Pero la yalbeyik ta puersa te yauk xkome. Jich a yalik:
—Joyinaotik. Porke malix kꞌaal yuꞌun ya xꞌochix ajkꞌubal —xchiik.
Te Jesuse och bael ba sjoyinlan. 30Te kꞌalal ayikix ta mexa ae la stsak ta skꞌab te waje y la yalbe kola yal Dios yuꞌun. La xetꞌ y la yaꞌbe. 31Mismo tiempo a, laj jam sitik y la snaꞌbeyik sba te Jesuse. Te nax a te Jesuse chꞌay bael ta sitik. 32Jaꞌ yuꞌun lijk yalbe sbaik:
—Jaꞌ mejtik sluwar ben tsꞌaam a kaꞌitik ta koꞌtantik te kꞌalal yipalotik tal ta aꞌabiyej ta bee, sok te ya yalbotik tal sluwaril te skꞌop Diose —xchiik.
33Ma jalajikix a, sujtik bael ta ora nax ta Jerusalen. Teꞌ kꞌo staik a te buluchtul apostoletik sok te sjoꞌtake te ba stsob sbaike. 34Y ora altalanbot:
—Batsꞌi jich te chaꞌkuxix te Kajwaltike, la yilix euk te Simone —xꞌutalanot. 35Jich lijk yalik euk te chaꞌtule te tuti kꞌot ta pasel ta bee, sok te tutꞌil la snaꞌbeyik sba te Jesuse te kꞌalal la xetꞌ te waje.
Te Jesuse la yakꞌ sba ta ilel ta stojol te jnopojeletike
36Yipalik to ta yaꞌbiyanel a te tuti kꞌot ta pasele, te Jesuse xtekꞌloj kꞌoel ta yolilik, y la spatalanbe yoꞌtan:
—Bujtsꞌanuk me kꞌinal ya awaꞌiyik —xchi.
37Toj cham a yaꞌiyik yuꞌun. La skuyik te chꞌulelal te la yilike. 38Pero te Jesuse la yaltalanbe:
—¿Tuꞌun te ya xiꞌexe? ¿Tuꞌun te wokol ya xchꞌuun awoꞌtanike? 39Ilawilik te jkꞌabe sok te koke. Joꞌon mismo. Pikaikon y ila awilik. Te jtul chꞌulelale maꞌyuk stiꞌbalul ni sbakel jich te tutꞌil ya awilikone —xchi.
40Laj yaltalanbe tsꞌin to, la yakꞌtalanbe yil te skꞌabe sok te yoke. 41Pero te to nax ma xchꞌuunik lek a ta skaj te ben bayal sbujts yoꞌtanik yuꞌune sok te yipal ta aꞌabiyej te yoꞌtanike. Jaꞌ yuꞌun te Jesuse la sjojkꞌolanbe:
—¿Me ay tut ya aweꞌik chꞌinuk liye? —xchi.
42La yaꞌbeyik xejtꞌ wobil chay sok sejt chab. 43La stsak te Jesuse, la sweꞌ ta sitil komon. 44Te nax a la yaltalanbe:
—Te tuti kꞌot ta pasel ta jkuentae, jaꞌ te la kalbeyex ta kꞌalal joyinejex to ae. Te puersa jich ya xkꞌot ta pasel spisil te tut tsꞌibabil jilel ta mantaliletik yuꞌun te jMoisese sok ta sjun te jꞌalwanejetik yuꞌun te Diose sok ta salmoetik —xchi.
45Jich la yaꞌbey snaꞌ sluwar te tut tsꞌibabil jilel ta Sjun te Diose. 46Y la yaltalanbe:
—Jich tsꞌibabil jilel te puersa ya xkꞌax jwokol joꞌon te Cristoone, y ya xchaꞌkuxon tal ta yoxebal kꞌaal. 47Sok te joꞌon ta jkuenta te ya xlijk ta alel kꞌalal ta Jerusalen sok ta spisil nasionetik te ya sujtes yoꞌtanik ta stojol Diose, yuꞌun jich me ya spasbot perdon yuꞌun a te smulike. 48Te jaꞌexe jaꞌ testigoex yuꞌun te tuti kꞌotix ta pasele. 49Joꞌon ya jtikonbeyex tal te tut yaloj te Jtate. Pero te jaꞌexe liꞌ nax anex to liꞌ ba Jerusalene jaꞌ to teme jul ta atojolik te spoder Dios te ya xtal ta chꞌulchane —xchi te Jesuse.
Te Jesuse mo bael ta chꞌulchan
50Te nax a te Jesuse la yikꞌ bael te jnopojeletik yuꞌune, lokꞌik bael te ba jtejklume. Bajtik ta nopol Betania. Y la stoy moel te skꞌabe y la yakꞌtalanbe jil bendision. 51Yipal to ta yaꞌbeyel bendision a la sjileslan. Ikꞌot moel ta chꞌulchan. 52Patil te kꞌalal laj yoꞌtanik ta yalbeyel kola yale, ben kontentoik a la sujt bael ta Jerusalen. 53Jujun kꞌaal ayik ta templo ta yalbeyel kola yal te Diose. Jichuk.
المحددات الحالية:
LUCAS 24: AMANNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento Tzeltal de Amatenango © Sociedad Bíblica de México, 2006.
