LUCAS 21
21
Te smajtan Dios a yakꞌ te meꞌbaꞌ antse
1Te Jesuse yipal ta yilel te jkꞌulejetik te yipalik ta yakꞌel ochel smajtan Dios te ba yawile. 2Sok la yil jtul meꞌbaꞌ ants te maꞌyuk tut ay yuꞌune te la yakꞌ ochel cheb beinte sentabo. 3Jich a yal te Jesuse:
—Jich ya kalbeyex: Te meꞌbaꞌ ants to te maꞌyuk tut ay yuꞌune, mas a yakꞌ ke te yane. 4Yuꞌun spisilik ya yakꞌ ta yofrendaik te tut sobrailixe. Yan te meꞌbaꞌ antse, manchuk me maꞌyuk tut ay yuꞌun, pero jaꞌ a yakꞌ ochel spisil te tut jaꞌ xanix ya smakꞌlin sba aye —xchi te Jesuse.
Jesus la yal te ya xjimot te temploe
5Ay machꞌatik yipalik ta yaꞌbiyanel te temploe te ben tsaꞌamik ton yichꞌoje, sok te tut chapbil a, sok te majtaniletik te yakꞌojbeyik Dios te gentee. Te Jesuse la yal:
6—Te tutik ya awilike ya me sta skꞌaalel te maꞌyuk jpꞌejuk ton te kajal ya xjil ta sba te jpꞌej xan tone —xchi te Jesuse.
Señailetik te nopol slajibal kꞌaale
7Jich a sjojkꞌobeyik:
—Maestro, ¿Tut ora ya xkꞌot ta pasel te tut la awale? ¿Tut a te seña te ya xchiknaj te kꞌalal xnopetix ya xkꞌot ta pasel ae? —xchiik.
8Te Jesuse la sjakꞌ:
—Ila me abaik, ma me machꞌa sloꞌlayex. Porke ay me ya xtal bayal te ya xloꞌlawanik ta jbiile. Ya yalik: “Joꞌon Cristoon”, y “Jaꞌix me stiempoil.” Pero te jaꞌexe ma me atsꞌakliyik. 9Teme ya awaꞌibeyik skꞌoplal te guerra sok te lijkemix kꞌope, ma me xiꞌanik yuꞌun. Yuꞌun puersa me nail ya xkꞌot ta pasel. Pero ma to me jaꞌuk a te slajibal kꞌaale —xchi te Jesuse.
10Sok la yaltalanbe xan:
—Te jun nasione ya spas pleto sok te jun xan nasione. Te gobierno ya skontrain sbaik ta guerra sok te jtul xan gobiernoe. 11Ay me ya xtal tulan jikichab, sok wiꞌnal, sok chamel ta yanetik luwar. Y ta chꞌulchan ya me xchiknaj te tutik xiꞌbentik sbae sok mukꞌ señailetik.
12“Pero te kꞌalal ma to xkꞌot ta pasel a te tuti kale, te jaꞌexe ya me yakꞌelex ta kꞌabal y ya me yilbajinex. Ya me yikꞌelex bael ta ichꞌel ta kꞌop ta sinagogaetik. Sok ya me yotseselex ta prexo y ya me yikꞌelex bael ta stojol reyetik sok gobiernoetik ta joꞌon ta jkaj. 13Te tutꞌil jich ya spasbelexe, jich me testigo ya xkꞌoex kuꞌun. 14Ma me nailuk ya anopilan ta awoꞌtanik te tut ya xkꞌo awalik yuꞌun ya akoltay abaik ae. 15Porke joꞌon me ya kaꞌbeyex spꞌijil awoꞌtanik ta kꞌop. Te ni jtuluk ya xjuꞌ sujtesel te akontraike, sok te ma xjuꞌ ya skontra-kꞌoptayat yuꞌunike. 16Pero te jaꞌexe ay me ya yakꞌex entregal te atatike, sok te abankiltake, sok awijtsꞌinab, sok abersinatak, sok awamigotak. Y ay me ya smilelex, 17y spisil genteetik ya me spꞌajex ta joꞌon ta jkaj. 18Pero ma xchꞌay lijkuk te stsotsil ajolike. 19Junuk me awoꞌtanik; yuꞌun jich me ya xkolex.
20Te kꞌalal ya awilik te Jerusalen te joybilix ta soltaroe, naꞌaik me te tey ya yichꞌ jimel ae. 21Jich te machꞌatik ayik ta Judeae a me anikuk bael ta witstikil. Te machꞌatik ayik ta Jerusalene a me lokꞌikuk bael te ba jtejklume. Sok te machꞌatik ayik ta kꞌaltik ae ma me wakꞌ ochuk xan bael te ba jtejklume. 22Porke jaꞌix me skꞌaalel te kastigo ta stojolike. Teꞌ me ya xkꞌot ta pasel a spisil te tut tsꞌibabil jilel skꞌoplal ta Sjun Diose. 23Oꞌol me sbaik te antstik te ay tut staoj ae o teme ay xchꞌin yal te ya to xchuꞌun ae. Porke ya me xtal bayal wokol ta balmilal sok tulan kastigo ta stojol te jtejklum to. 24Ay me machꞌatik ya xchamik ta milel ta puñal, sok ay me ya xchuktalanot bael ta spisil nasionetik. Y te jyanlumetike ya me xpuchꞌilan ta tekꞌel te Jerusalene, jaꞌ to teme tsꞌakay te jayeꞌ kꞌaal yichꞌojik permisoe.
Te tutꞌil ya xchaꞌ sujt tal te Nichꞌanile
25Ay me señailetik ya xchiknaj ta kꞌajkꞌal, sok ta u, sok ta ekꞌetik; y te genteetik ta balmilale ya me xlijkik ta wokol yuꞌun xiꞌel. Ya me xiꞌik yuꞌun te ya xkꞌopoj tulan te mare y te xwilawete. 26Te genteetike ya me xchojp spuersaik yuꞌun te xiꞌele ta smaliyel te tut ya xkꞌot ta pasel ta balmilale. Yuꞌun ya me yichꞌ nikel te tutik ay yipik ta chꞌulchane. 27Jich me ya xchiknaj ta ilel te Nichꞌanile, te ya xtalix ta tokale sok jpoder sok xojobil te stsaꞌamule. 28Te kꞌalal ya xlijk kꞌotuk ta pasel te tutik to, ma me xiꞌanik. Jacha me ajolik, yuꞌun nopolix te akolelike —xchi te Jesuse.
29Sok ay tuti yaltalanbe ta seña-kꞌop:
—Kꞌeluya awilik te ikuxe sok te yanetik teꞌetike. 30Kꞌalal ya awilik te ya xlujpix te yaꞌnimale, jaꞌ me xꞌanaꞌik te nopolix yorail te jaꞌleltike. 31Sok jich mismo ekꞌa te kꞌalal ya awilik te ya xkꞌotix ta pasel spisil to, naꞌaik me te nopolix ya xlijk ta mantal te Diose.
32“Jamal ya kalbeyex: Ma to xlajik a te genteetik te kuxajtik te ora to te ya xkꞌot ta pasel spisil te tuti kalbeyexe. 33Te chꞌulchan sok te balmilale ya xlaj. Pero te jkꞌope makꞌ xlaj skꞌoplal stukel.
34“Ila me abaik, ma me xꞌawakꞌ te ya yalulanbeyex ta awoꞌtanik te tut ya skꞌupin awoꞌtanike sok te yakubele, sok te tutik yajtal awoꞌtanik ta jujun kꞌaal sok te akuxlejalike. Yuꞌun ma me chꞌayemuk awoꞌtanik a te tut ora ya sta skꞌaalele. 35Ma me jichukex te tutꞌil machꞌa chꞌayem yoꞌtan ya xko ta strampae. Porke ya me xkꞌot ta skuenta spisil genteetik ta balmilal. 36Chapalukex me te jaꞌexe. Kꞌoponaik me Dios ta sil tiempo. Yuꞌun jich me ya xkolex lokꞌel a ta spisil te tutik ya xkꞌot ta pasele, y yuꞌun jich me ya xjuꞌ ya atejkꞌan abaik ta sit te Nichꞌanile —xchi te Jesuse.
37Te Jesuse nojpeswan jujun kꞌaal ta templo, y ta ajkꞌubal xba wayuk ta wits te Olivailtik sbiile. 38Spisil te genteetike jujun xpajtaj ya xtalik ta templo yuꞌun yaꞌiybelik skꞌop te Jesuse.
المحددات الحالية:
LUCAS 21: AMANNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento Tzeltal de Amatenango © Sociedad Bíblica de México, 2006.
