JUAN 2
2
Nujpunel ta jtejklum Cana
1Yoxebalix kꞌaal a, aya juꞌ jnujpunel ta jun jtejklum yuꞌun Galilea, Cana sbiil. Teꞌey ekꞌa te smeꞌ te Jesuse. 2Y te Jesuse sok te jnopojeletik yuꞌune ikꞌtalanot bal ekꞌa te ba jnujpunele. 3Pero laj te binoe, y te Jesuse ba albek yuꞌun te smeꞌe:
—Maꞌyukix sbinoik —xchi.
4Te Jesuse la sjakꞌbe:
—Jmeꞌ, ¿tuꞌun te jicha tal awalbone? Yuꞌun ma to sta stiempoal kuꞌun —xchi.
5Pero te smeꞌ te Jesuse la yaltalanbe te aj-aꞌteliletike:
—Pasaik me spisil te tut ya yalbeyexe —xchi.
6Ay wakeb tenchaetik tey a pasbil ta ton yuꞌun yawil yaꞌal, yuꞌun ya xtuun yuꞌun te juriyoetike te ya spokilan skꞌabik te ya sakutes sba ta skꞌopik ae. Te juju-pꞌej tenchae ay wan cheb o oxeb kꞌib sbaal. 7Te Jesuse la yalbe te aj-aꞌteliletike:
—Nojesbeyaik yaꞌlel te tenchaetik to —xchi.
La snojesik, xmalmun a yakꞌik. 8Te Jesuse la yaltalanbe:
—Lupaik lokꞌel chꞌinuk, y ichꞌbeyaik bael te statal yuꞌun te kꞌine —xyut.
Jich a yichꞌbeyik bael. 9Te statal yuꞌun te kꞌine la spas prewa te jaꞌ te kꞌajtajemix ta binoe. Ni ma snaꞌ ba lijk tal; jaꞌ nax snaꞌojik te aj-aꞌteletike, yuꞌun jaꞌ la slupik tal lokꞌel te jaꞌe. Te statal yuꞌun kine la yikꞌ tal te jnupunele, 10y la yalbe:
—Spisil genteetik kꞌayemik a te jaꞌ nail ya yuchꞌik te ben tsaꞌam binoe. Y kꞌalal la yuchꞌikix bayal a te machꞌatik ikꞌtalanbile, jich me ya xlijk tuunuk yuꞌunik te bino te mas chopole. Pero te jaꞌate akꞌejoj te lekil binoe, y jaꞌ to nax ya awakꞌ ta ilel te ora to —xyut.
11Jaꞌ to jaꞌ primero seña smilagro te la spas te Jesuse te la yakꞌ ta ilel slekilal, te baꞌ jtejklum Cana te ay ta estado yuꞌun Galileae. Y te jnopojeletik yuꞌune la xchꞌuunik te jaꞌ mismo Cristo a te Jesuse.
12Patil koel a bajt ta Capernaum te Jesuse. Joyinot bael yuꞌun te smeꞌe sok te yijtsꞌinabe y sok te jnopojeletik yuꞌune. Teꞌeyik cheꞌ oxeꞌ kꞌaal a.
Te Jesuse la xjojchotes te mukꞌul temploe
13Nopolix yorail a te skꞌin Pascua yuꞌun te juriyoetike, te Jesuse bajt ta Jerusalen. 14Teꞌ kꞌo stajtalan ta mukꞌul templo te jchon-wakaxetik sok te jchon-karneraetik, sok te jchon-palomaetik, sok te machꞌatik nakajtik ta sjelbeyel stakꞌin te genteetike. 15Kꞌalal la yil, te Jesuse la yichꞌ jun chꞌajan, la spas ta aresial, y la stentalan lokꞌel spisil te ba mukꞌul templo te skarneraike sok te xwakaxike. Sok la sbuskꞌinbe ta lum stakꞌinik te machꞌatik ya sjelik takꞌine, y la xbalchꞌunbe te xmexaike. 16La yaltalanbe te machꞌatik yipalik ta chon-palomae:
—¡Lokꞌesaik bael te apalomaik liye! ¡Maꞌ kꞌajtatesik ta merkado te sna te Jtate! —xchi.
17Jich te jnopojeletik yuꞌune la snaꞌik te jich tsꞌibabil jilele: “Ben tulan skꞌoplal ta koꞌtan te anae”, xchi me. 18Te juriyoetike la sjojkꞌobeyik te Jesuse:
—¿Tut seña ya awaꞌbotik kiltik te ay awaꞌtel ta spasel to? —xchiik kꞌoel.
19Te Jesuse la sjakꞌtalanbe:
—Jimaik te mukꞌul templo to y ta oxeꞌ nax kꞌaal ya jpas xan ta achꞌ —xchi.
20Te juriyoetike la yalbeyik:
—Kuarenta y seis jaꞌbil a yichꞌ pasel te mukꞌul templo to. Y te jaꞌate, ¿tutꞌil ya apas xan ta oxeꞌ nax kꞌaal? —xchiik.
21Pero te mukꞌul templo la yal te Jesuse jaꞌ skꞌoplal te stiꞌbalule. 22Jaꞌ yuꞌun te kꞌalal chaꞌkux tal te ba animaetike, te jnopojeletik yuꞌune la snaꞌik te jich yaloje. Jich a xchꞌuunik te tut tsꞌibabil ta Sjun te Diose sok te tuti yal te Jesuse.
Te Jesuse snaꞌojbe yoꞌtan spisil te genteetike
23Te kꞌalal ay ta Jerusalen a te Jesuse te stiempoil te kꞌin Pascuae, bayal machꞌa xchꞌuunik te Jesuse yuꞌun la yilbeyik seña smilagro te ya spase. 24Pero te Jesuse maꞌ yipin yoꞌtan yuꞌun, porke snaꞌojlanbe yoꞌtan spisil te genteetike. 25Ma puersauk te ay machꞌa ya xꞌalbot yuꞌun te tut ay yoꞌtan te genteetike, yuꞌun stukel mismo snaꞌojbe yoꞌtan te juju-tul gentee.
المحددات الحالية:
JUAN 2: AMANNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento Tzeltal de Amatenango © Sociedad Bíblica de México, 2006.
