GENESIS 2
2
1Huan lei leh vante leh asung a om tengteng siam zoh ahita hi. 2Pathian in ani sagih ni in anasep azou a; huchi in ani sagih ni in anasep tengteng akhawlsanta hi. 3Huai ni a Pathian in asiam leh abawl, anasep tengteng akhawlsan tak ziak in, Pathian in ani sagih ni vualzawl in, atangta hi.
Eden Huan
4 Toupa Pathian in lei leh vante asiam ni a, lei leh vante siam ahih ua akisuansawndan uh hiai bang ahi. 5Leitung ah gamlak loupa himhim a-om nai kei a, sing-le-louhing leng apou nai kei hi. Toupa Pathian in leitung ah vuah azusak nai kei a, lei let ding in mihing leng a-om nai kei hi. 6Himahleh lei a pan tuihu ahong pawttou a, leitung tengteng anomsak hi.
7 Toupa Pathian in lei a leivui in mi abawl a, anakvangte ah hinna hu ahalut a; huai mi, hinna nei mihing ahong hita hi.
8 Toupa Pathian in suahlam a Eden ah huan abawl a; huai ah abawl pasal a-omsak hi. 9Toupa Pathian in lei a kipan sing mit hiptak leh nek tuak chiteng apousak hi. Hinna sing leh asia leh apha theihna sing leng huan laizang ah apousak hi.
10Eden a pan huan nomsak ding in lui aluang paisuak a; huai a kipan akazak a, ka li ahong hita hi. 11Akhatna min Pishon ahi a, hiai Havilah gam tengteng kualkhum lui ahi a; huai dangka-eng omna ahi. 12Huai gam a dangka-eng hoihtak ahi a, huai ah bedeli leh onik suang leng a-om hi. 13Lui nihna min Gihon ahi a; huai lui in Kush gam tengteng akualkhum hi.
14Lui thumna min Hiddekel ahi a; hiai Assuria gam suahlam a luang ahi. Lui lina bel Euphrates ahi.
15 Toupa Pathian in pasal api a, Eden huan ah akem ding leh aveng ding in akoihta hi. 16Toupa Pathian in pasal kiang ah, “Huan a singgah chiteng na ut-ut na ne thei hi. 17Asia leh apha theihna singgah bel na ne ding ahi kei. Na nekleh na nek ni mah in na si ngeingei ding hi,” chi in thu apia hi.
18 Toupa Pathian in, “Pasal amah kia a-om ahoih kei. Amah panpihtu dia kilawm ka bawlsak ding,” achi hi. 19Toupa Pathian in leitung a kipan gamsa chiteng leh tung a leng vasa chiteng abawl hi. Amin ding ua bang sak ding ahia chih theihna ding in Adam kiang ah apikhawm hi. Ganhing chiteng amin uh Adam in ana phuah, huai amin uh ahi denta hi. 20Adam in ganhing tengteng, tung a leng vasa tengteng leh gamsa chiteng min aphuak chiat hi. Himahleh Adam panpihtu ding muh in a-om kei hi.
21 Toupa Pathian in nuamtak in Adam a-ihmusak a, huchi in a-ihmuta a; anakguh khat alakhia a, alakkhiakna mun sa in adimsak hi. 22Toupa Pathian in Adam a pan alak nakguh a kipan in numei abawl a, Adam kiang ah apita hi. 23Adam in,
“Hiai pen zaw ka guh a kipan guh,
ka sa a kipan sa ahi.
Pasal a kipan lakkhiak
ahih ziak in,
Numei, chih ding ahi,” achi hi.
24Huaiziak in pasal in anu leh apa apaisan ding a, azi ah abelh ding. Huchi in sa khat ahong hita ding uh. 25Adam leh azi vuaktang ahi tuak ua, azum tuan kei uhi.
المحددات الحالية:
GENESIS 2: PAITBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
