Luka 24
24
Yesu afufuka.
1-12.
1Miya mhitu wa bosi wa sabato, makelokelo kabisa wazahita kwe mbila, waiinule ija miti yehumpuntika vilana, waliγanyeyo. 2Wazabwila jiya iwe, jiishindikwe haja he mbila, 3wazaingila, miya kimba cha Yesu nkawachiene. 4Wakiaγilwa ni inu mbuli wazaona waγoshi waili, waiγoloke haja, waliho, waizwikile shuke zenamanika, viya ni lumuli; 5wakishentuka, wazaoleza vyeni na shi; waja wazawati: Nini mkimlonda yuja mwe moyo kwa wafilewo? 6Nkaho aha, azafufuka. Fukilai, amilongilevyo ake Galileya, 7akimiti: Ṅwanangwa ywa muntu shuti ainkilwe mwe mikono ya wantu wahuza, akontelwe mwe muti; vikibinda mushi wa ntatu afufuke! 8Wazafukila ziya mbuli zakwe. 9Wazahauka haja he mbila, wazaukwila waja kumi na muṅwe na woshe watuhu izo mbuli zoshe. 10Ni Maliya Magadalene na Yohane na Maliya, nine ja Yakobo, na waja watuhu we haṅwe nawo; wazaukwila ntuṅwa izi mbuli. 11Waja wakiiva izi mbuli wazafanyanya kuti: Ni ulongo, nkawazitozeshe. 12Miya Petelo azainuka, azaγuluka kwe mbila, azainama, ashungile na muja, miya azaona ziya shuke du; azahita na kaya azavimaka viya viγosholekevyo.
Wahina 2 wahita Emao.
13-35.
13Mushi uja weyae wawe waili wazahita kwe muzi tanga, ni luγendo lwa saa mbili, muntu akilawa Yelusalemu, zina jakwe ndiho Emawo. 14Wazaγenda wakishimwelana, ziya mbuli zoshe ziγendilevyo. 15Wakishimwelana ivyoho na kuuzanya, Yesu ṅwenye azawalawila, azaγesanya nawo. 16Miya mesho yawe yaitoziγwe, washemtaile. 17Azawati: Ni mbuli ani izo, mzoγenda mkizitambikilana? Wazaγoloka na kununa. 18Muṅwe mweitangwa Kiliyofa azamuti: Iwe u mγeni ike muja Yelusalemu, ukishetaila viya viγosholekevyo muja mishi inu? Azawati: Vihi? 19Angwe ndiwo: Viya vya Yesu ywa Nazaleti; yuja ne ai mteγanyingwa, miγoshwele na milongele yakwe ne iina nguvu kwa Mulungu na kwa wantu. 20Yuja azainkilwa ni wavikizi wakulu na wafuṅwa wetu, alahwe masa ya kukoṅwa, azakontelwa mwe muti. 21Miya ishwi ne tikimwalila kuti: Ne ndiye nezeavunile Waisilayeli. Kushima ivi vyoshe lelo ni mushi wa ntatu kuandiila uja mushi, viya vibontokeho. 22Miya kuna wavyele weanga na ishwi, wazatishentusha, hambu wazahita makelokelo kwe mbila, nkawaene kimba chakwe, 23miya wazaiza, wazatiγambila, kuti wazaona walau wawalawilewo na kuwati: A moyo. 24Hata weshu kuṅwe, tiwoanga nawo, wazahita kwe mbila, wazaona sa viyaho, waja wavyele walongilevyo, miya ṅwenye nkawamwene. 25Lushe ṅwenye azawati: Inywi mushinawo viyuγo, myoyo yenyu yazuzulika kutozesha viya vyoshe, wateγanyingwa walongilevyo! 26Viya vyoshe nkavimtazile Kilisito, avilumiziγwe adaheingila mwe utana wakwe? 27Azaandusha kwa Mose na kwa wateγanyingwa wosheni kuwafumbwila mbuli zoshe, agondelwezo mwe baluwangwa zoshe. 28Wakibula kwe kaja kazizi, wakohita, ṅwenye azakionyaonya, viya atahita sila yakwe. 29Wazamkungumiza angwe: Ikala kwetu! Hambu kuzashwa, zuwa jizabinda kugongoloka. Azaingila, agone nawo. 30Akiikala haṅwe nawo, wakija nkande, azaγuwa mgate, azalavya ntogolo, azaubendula, azawainka. 31Ne mesho yawe yahoγubulwa, wazamtaila. Ṅwenye nkaoniγwe lushe haja, waliho. 32Wazaγambilana: Myoyo yetu uko ndai nkaifanane, viya iteashiγwa moto, akilonga na ishwi kuja silai na kutifumbwila baluwangwa? 33Ija minga wazainuka, wazauya Yelusalemu; waja kumi na muṅwe na weyae wawe weanga nawo wazawabwila, 34waiunganane wakilonga: Zumbe azafufuka kweli, azamlawila Simoni. 35Wohena wazashimwela viya vya silai na viya, avyotailwa ndiwo akiwabendwila mgate.
Yesu alawila wahina woshe.
36-49.
36Wakilonga izi mbuli, ṅwenye azaγoloka gatigati kwawe, azawati: Mpeho na inywi! 37Miya wazashentuka, wazaingilwa ni woγa. Wazaγamba, wateona mzimu. 38Azawati: Nini mkishentuka? Nini ntongonyezi ze ivyoho zikimuka mwe myoyo yenyu? 39Olelai mikono yangu na milundi yangu, kuti ni miyo ṅwenye! Nihahashai! Olelai! Hambu mzimu nkana nyama na mavuha, sa muvyoniona, kuti nina nayo. 40Akilonga ivyoho azawaonyesha mikono na milundi yakwe. 41Miya waja wakekizilwe ni kutozesha kwa nyemi na kumaka, ne ahowati: Muna vya kuja aha? 42Waja wazamunka kabendo ka kapala kaokiγweko. 43Azaγuwa, azaja, waiolele. 44Azawati: Izi ne ziya mbuli, nimilongilezo nike kwenyu kuti: Shuti zibontoke mbuli zoshe zigondiγwezo za imi mwe mulomongwa wa Mose na mwe baluwa za wateγanyingwa na mwe mazumongwa. 45Haja ne awafumbwileho mitailile ya kutaila ugondengwa, 46azawati: Ivyoho ne vigondiγwevyo, kangi ivyoho vizamtala Kilisito kulumiziγwa na kufufuka mushi wa ntatu kwa wafilewo, 47kuunga mwe zina jakwe mbali zoshe zibilikilwe, wahitule ntongonyezi zawe, kangwe masa yawe yadaheushiγwa; inu ndima iandiilwe Yelusalemu! 48Inywi mu waona wa izi mbuli. 49Olelai: Msuhi wa tate ywangu naumitumila inywi! Inywi humulai umu kaya, mpaka ndiho mgelwe nguvu yelawa uko ulanga!
Yesu ainulwa na mwe lwingu.
50-53.
50Azawalavya, azawaiγala Betaniya, azainula mikono yakwe, azawaṅaza mesho. 51Aho akiwaṅaza mesho, azaushiγwa haja, waliho, azainulwa na mwe lwingu. 52Waja wazagwa na shi na kumvika, wakibinda wazauya Yelusalemu na nyemi nkulu. 53Wazaikala vikiloi mishi yoshe na kumtogola Mulungu.
المحددات الحالية:
Luka 24: KISHNT05
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
New Testament in Kishambala © Bible Society of Tanzania, 2005.
