Luka 22
22
Yuda aivana na wavikizi.
1-2.
1Mviko wa migate ishigezilweyo shimbi weitangwa Pasa uzabula hehi. 2Wavikizi wakulu na watabaluwangwa wazapisha, ndivyo wamkome; hambu wazaogoha wantu.
3Satani azamwingila Yuda mweitangwa Isikaliyota, waja kumi na waili ni ṅwiyae ywawe. 4Azahita, azalonga na wavikizi wakulu na wafuṅwa wa washilikali, ndivyo amwinkile na kwawe. 5Wazatamilwa, wazamwikila msuhi wa kumunka feza. 6Azaivana nawo, akibinda azalonda lwinkilile lushinalo vuzo.
Ngoto ya Pasa.
7-23.
7Mushi wa migate ishigezilweyo shimbi uzabula, ni uja weagiza kukoma ngoto ya Pasa. 8Azamtuma Petelo na Yohana angwe: Hitai, mtiliγanyize ngolo ya Pasa, tiije! 9Wazamuti: Ukunda, tiliγanyize hi? 10Azawati: Olelai! Mkiingila mwe uja muzi nemkintane na muntu ainuleye iγa ja mazi; mtongelei na mwe iyo nyumba, ndiyo aingile! 11Mulongei ṅwenye nyumba kuti: Kangwe ni mfuzi: Fikilo ni jihi, ndijo nijiile ngoto ya Pasa haṅwe na wahina wangu? 12Lushe yuja atamionyesha chumba kikulu chibindilecho kutandikwa; ne ndicho mtiliγanyize! 13Wakihita wazaona sa viyaho, awaγambilevyo, wazaliγanya ngoto ya Pasa. 14Ha jiila hakibula, azaikala haṅwe na ziya ntuṅwa kumi na mbili. 15Azawati: Nizaheheleziγwa ni kihelehele cha kuja inu ngoto ya Pasa haṅwe na inywi, nishizati nilumiziγwe.
Nkande ya ṅwiyaγulo.
16Hambu namiti: Sezenikeija, mpaka vihozatimiza mwe uzumbe wa Mulungu. 17Azaγuwa kinywelo, azalavya ntogolo, angwe: Chiγuwei, mupangilane! 18Hambu namiti: Kuandiila ivi lushe sezeninywe lute lwa mazabibu, mpaka uzumbe wa lwingu uhozaizila. 19Vikibinda azaγuwa mgate, azalavya ntogolo, azaubendula, azawainka angwe: Unu ni ṅwili wangu weinkilwa kwa mbuli ya inywi, γosholai ivyoho, kangwe mkenifukila! 20Wakibinda kuja azawainka kinywelo chohe vivyoho, angwe: Ichi kinywelo ni kilaγa kihya che mwe mpome yangu yeitilwa kwa mbuli ya inywi. 21Miya olelai! Mkono wa yuja mweniinkila u haṅwe na imi aha he meza. 22Kweli ṅwanangwa ywa muntu ahita sila yakwe, sa afanyanyiziγwevyo, miya yuja muntu mwemwinkila nezeaone ukiwa. 23Waja wazaandiila kuuzanya wenye na wenye, ati yuja mweunga kuγoshola viya ni ṅwiyae ywawe yuhi.
Ukulu.
24-26.
24Kuzaoneka nkumbizi kwawe kuγamba: Mkulu ywawe ni yuhi? 25Azawati: Wazumbe wa mbali za wantu wawatoza kinguvu, kangi waja wewatoza na nguvu wainkwa mazina ya shima. 26Miya inywi, mshekaγoshola ivyoho! Miya mkulu ywenyu aγaluke, viya ni mdodo, kangi kilongolezi chenyu aγaluke, viya ni mutakutumikila. Hambu mkulu ni yuhi? 27Mweikala he meza, hambu mweγoshola ndima? So yuja mweikala he meza? Kangi kwenyu imi nifanana, viya ni muntu ywa ndima. 28Miya inywi, ndiwo mwihumule kwangu, 29nikiγezwa, nami neniminke uzumbe, sa Tate aninkilevyo uzumbe. 30Kangwe muje, munywe he meza yangu mwe uzumbe wangu, kangwe mwikale mwe viti, mulahe ziya mbali kumi na mbili za wana Isilayeli.
Yesu amhaza Petelo.
31-34.
31Zumbe azalonga: Simoni! Simoni! Olela: Satani azamikunda, amihete, viya mu ngano. 32Miya imi nizakuhembelezeza, mitozesheze yako isheaγe; kangi iwe aho, ndiho nezeuhitukile, ugele wanduγu wako nguvu! 33Yuja azamuti: Zumbe, niikiteγile kuhita na iwe, ati ni mwe chumba, ati ni kwa fa. 34Angwe: Nakuti Petelo: Lelo soγolo nkeikeme, uishikezile nkani katatu, kuti nkunitaila.
Wahina.
35Azawati: Nihokamituma, mwishina misipi na mabene na vilatu, muna mukosizevyo? Angwe: Nkatina. 36Azawati: Miva ivi lushe mwena msipi auinule! Vivyoho mwena bene! Kangi ashinaye ataγe nkazu yakwe, akiγulile shime! 37Hambu namiti: Viya vigondiγwevyo shuti vinibontokele, viya vya kuγamba: Azatalwa mwe wahambanyi; hambu mbuli yenitala yabontoka. 38Angwe ndiwo: Zumbe, olela: Shime mbili zi haha! Azawati: Vyabesha.
Yesu he mlima wa miziyaγembe.
39-46.
39Azamlawa, azahita, sa avyozwela, kwe mulima wa miziyaγembe; wahina wakwe wazamtongela. 40Akibula haja hantu azawati: Vikal, kangwe msheingile mwe miγezo! Ṅwenye azauka 41haja, waliho, azahita na mazu, sa muntu ahodaha kutambika kawe, azaginta mazwi, azavika angwe: Tate, ati wakunda, leka, ichi kinywelo 42chinizinke! Ntoγo vishebontoke nivyokunda imi, miya iwe uvyokunda vibontoke! 43Kuna mlau alawileye mwe lwingu, azamlawila, azamgela nguvu. 44Aho akigomba iyo nkondo azakihimisha kuvika, suγuti zakwe zizaγaluka, viya ni madodwe ya mpome yegwa na shi. 45Akibinda kuvika azainuka, azahita kwa wahina wakwe, azawabwila, waisisile kwa ukiwa, 46azawati: Musisilai? Inukai, muvike, kangwe msheγeziγwe!
Yuda amwinkila Yesu.
47-53.
47Akelonga, akiolela, azaona wantu; kangi yuja mweitangwa Yuda, ṅwiyae ja waja kumi na waili, aiwalongwele, azamubasha Yesu, afyosane naye milomo. 48Yesu azamuti: Yuda, umwinkila ṅwanangwa ywa muntu na kufyosana naye? 49Waja, awona nawo, wakiona, mbuli ndivyo iγende, wazamγamba: Zumbe, wakunda, tiwashenge na shime? 50Ṅwiyae ywawe muṅwe azatowa mupuna ywa mvikizi mkulu, azamshenga shikilo ja kulume, jizadwika. 51Miya Yesu azamlandula angwe: Lekai du! 52Azadowa jiya shikilo, azajihonya. Miya waja wamubashizewo, wavikizi wakulu na wafuṅwa wa vikilongwa na waγolokezi, Yesu azawati: Mulawile mwitozize shime na vigongo, viya mtabasha mumpoko, munigwile imi. 53Mishi yoshe nizaikala kwenyu vikiloi, miya nkamkusule mikono, mkinigwila; miya ivi lushe aha ne saa yenyu, ne lwiza luhotoza uzumbe.
Petelo amtowa Yesu hulu.
54-62.
54Wazamgwila, wazamwiγala, wazamwingiza mwe nyumba ya mvikizi mkulu; miya Petelo azatongela hale hale. 55Wakiasha moto gatigati mwe chengo, wakiikala haṅwe, Petelo yohena azaikala gatigati kwawe. 56Kuna mndelengwa, akimwona, aiikale he moto, azamdulila, azaγamba: Hata uyu ne akianga naye. 57Miya yuja azakela nkani angwe: Simtaila, mlala. 58Kafunda kadodo kakizinka, kuna mtuhu, azamwolela angwe: Iwe nawe u ṅwiyae ywawe. Angwe ni Petelo: Ṅwiyangu, si miyo. 59Saa ṅwenga ikizinka, mtuhu azalongesha angwe: Kweli uyu yohena ne akianga naye, hambu ni Mgalileya. 60Angwe ni Petelo: Ṅwiyangu, sitaila uvyolonga. Akelonga, viya du lushe soγolo izakema. 61Zumbe azahituka, azamwolela Petelo; ne Petelo ahofukila ija mbuli ya Zumbe amlongileyo kuti: Soγolo nkeikeme lelo, uishikezile nkani katatu, kuii nku ywangu. 62Azalawa na se, azalilisha.
Yesu afyulilwa alutwa.
63-65.
63Waja wantu wamtozizewo Yesu wazamfyulila haṅwe na kumluta; 64wazaγubika cheni chakwe, wazamwuza angwe: Teγanya! Akutowileye aha ni ndai? 65Hata mbuli nyingi ntuhu za kumkanka wazamlonga.
Yesu alahiγwa ha wavikizi wakulu.
66-71.
66Kukicha waγolokezi wa mbalingwa wazaunganana na wavikizi wakulu na watabaluwangwa, wazamwiγala na muja, wamokalongela masa. Wazamuti: 67Tiγambile, ati iwe u Kilisito! Azawati: Ati namiγambila, kangi nkamtozesha; 68ati namiuza, kangi nkamunilandula. 69Miya kuandiila ivi lushe ṅwanangwa ywa muntu neaikale kulume kwe nguvu ya Mulungu. 70Woshe wazamwuza: Lushe iwe u ṅwana Mulungu? 71Azawati: Mzalonga, hambu imi ndiye. Waja wazalonga: Tishindalondelai uwona? Wenye tizaiva na mashikilo yetu, avyolonga.
المحددات الحالية:
Luka 22: KISHNT05
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
New Testament in Kishambala © Bible Society of Tanzania, 2005.
