Yohana 3
3
Nikodemo.
1Ne kwina muntu, ni ywa Mafaliseyo, zina jakwe ndiye Nikodemo, ni mfuṅwa ywa Wayuda. 2Uyu azahita kwa Yesu na kilo, azamuti: Mfuzi, tataila kuti: Iwe u mfuzi ulawileye kwa Mulungu; hambu nkakuna mwedaha kuγoshola ziya ntangilo, uzoγoshola iwe, ati nkaanga na Mulungu. 3Yesu azamhitula, azamuti: Kweli nakuti: Muntu akishevyalwa ka mbili nkadaha kuona uzumbe wa Mulungu. 4Nikodemo azamuti: Muntu adaha zeze kuvyalwa ai mdala? Atadaha kuingila vituhu mwe ifu ja nine, avyalwe? 5Angwe ni Yesu: Kweli nakuti: Muntu akishevyalwa mwe mazi na mpehongwa, nkadaha kuingila mwe uzumbe wa Mulungu. 6Vivyelwevyo ni muntu, ni muntu vivyoho; vivyelwevyo ni mpehongwa, ni mpeho vivyoho. 7Ushemake, nikikuti: Shuti muvyalwe ka mbili! 8Mpeho ikunta ihokunda; waiva kuvumila kwakwe, miya nkutaila, ikoanduka ao ikohita kwa helela; ne kila avyelweye ni mpehongwa alivyo. 9Nikodemo azamhitula, angwe: Ivi vidahikana zeze? 10Yesu azamhitula, azamuti: Iwe u mfuzi ywa Kiisilayeli, kangi ivi nkuvitaila? 11Kweli nakuti: Tibilikila tivyotaila; tienevyo tavilongela uwona, miya uwona wetu nkamwuhokela. 12Vya inu shi nikivimiγambila, mkishevitozesha, mtozesha zeze, nikimiγambila viya vya lwingu? 13Nkakuna akwezileye mwe lwingu kushima yuja asheeleye mwe lwingu, ni ṅwanangwa ywa muntu. 14Sa Mose akwezizevyo nyoka mwe nyika, ṅwanangwa ywa muntu yohe nezeakweziγwe sa viyaho, 15kangwe kila mwemtozesha ainkwe nkalamo ya kale na kale. 16Hambu Mulungu azaikundisha inu shi, akimwinkila ṅwanae mwe ike, kangwe ndiye amtozeshe ashezaaγa, miya nezeainkwe nkaiamo ya kale na kale. 17Hambu Mulungu nkamtumile ṅwanae mwe inu shi, ailahe inu shi, miya inu shi ivunilwe ndiye. 18Mwemtozesha nkalahwa, ashitozeshaye aibindile kulahwa, kwa kuti nkatozeshe zina ja ṅwanangwa ywa Mulungu mwe ike. 19Mlaho ni unu kuti: Langaila jizaingila mwe inu shi, miya wantu wazakundisha lwiza kuzinka langaila, hambu miγoshwele yawe ni mibada. 20Hambu kila mweγoshola vibada aihilwa ni langaila kangi nkabula he langaila, kangwe ndima zakwe zishebunkuke. 21Miya mweγoshola vye kweli ahita kwe langaila, kangwe ndima zakwe zimanyike, kuti ziγosholwe na Mulungu.
Yohana.
22Vikibinda Yesu na wahina wazahita mwe shi ya Yudeya, azanyamala nawo uko, akibatiza. 23Yohana yohe azaikala na kubatiza kuja Enoni hehi na Salemu, hambu kuja mazi ni mangi, hata wantu wazaiza, wazabatizwa ndiye. 24Hambu Yohana ne ashizati agelwe mwe chumba. 25Wahina wa Yohana ne waina mkanano na Muyuda kwa mbuli ya kukihaka. 26Wazahita kwa Yohana, wazamuti: Mfuzi, aizileye kwako kuja sheja ja Yolodani, umlongeleye uwona, yuja abatiza, kangi wantu woshe wahita kwakwe. 27Yohana azawalandula, azawati: Muntu nkana achodaha kuhaγuwa, ati nkachiinkiγwe mwe lwingu. 28Inywi wenye mwanilongela uwona, kuti nizalonga: Imi si Kilisito, miya nitumiγwe, nimlongwele yuja. 29Mwena kilumbu ni ṅwenye nteγuzi; miya mbuyae ja ṅwenye nteγuzi aikala nkandai, amteγeleza, atamilwa ni kanwa cha yuja ṅwenye nteγuzi. Inu nyemi yangu izabontoka lushe. 30Yuja shuti akule, imi shuti nipunguke. 31Mwelawa uko mwe lwingu ni mkulu kuzinka woshe; yuja ywa kiinushi aanduka mwe inu shi, alonga viya vya inu shi. Mwelawa mwe Iwingu ni mkulu kuzinka wosheni. 32Aenevyo na aivilevyo, avilongela uwona, kangi uwona wakwe nkakuna mweuhokela. 33Mwehokela uwona wakwe, avilongela uwona, kuti Mulungu ni mkweli. 34Hambu yuja, Mulungu amtumileye, alonga mbuli za Mulungu, hambu nkainkila mpehongwa na kuihima. 35Tate amkundisha ṅwanae, azainkila vyoshe mwe mkono wakwe. 36Mwemtozesha ṅwanangwa ana nkalamo ya kale na kale; mwemupapalika ṅwanangwa nkeaone nkalamo, miya maya ya Mulungu yatamwikaila.
المحددات الحالية:
Yohana 3: KISHNT05
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
New Testament in Kishambala © Bible Society of Tanzania, 2005.
