Ruka 7

Wasai garenggac wanacngic

Mat 8:5-13

1Yesungo yoac imoc sasawa ngicngac edeyunudaru negenggec wisickeu Kafanaung taonnu kenec. 2Kemma ihai wasai gareng monggac wanacngic ye homebesonga amma feec. Amma ye ngic gombungango mingina yeac ewea heimiande.#7:2 Wasai gareng yomoc yeac bageau wasaingic 100 isoc kecgec. Wasaingic garengnginagoc yeni israengic kpac, yeni bangec monnunac.

3-4Nga wasai garengngo Yesuac siduc negemma yudangic enarafocngina goa Yesuaru sueyunuu kemma ngombonggema degec, “Ge wasai garenggac wanacngic mong mengerenadeac hana. Wasai gareng ye ngic gombunga, ye naric meficgena. 5Ye israengic nenanggac songea negengande nga yeng kiwa amma kpekpeturang amanina meec.”

6-7Edegec Yesungo yenigoc kemma ama mewegenemanu wasai garengngo ogofora goa sueyunuu yofi edegecdeac kenggec, “Kunenna, nasoga homac mi wana. Ge noc gombunnaac amawarocnau erenade, ni ifiango gearu naric mi habade, imocac ge ihai namma yoac dena medacna ngereeu. 8Imoc yofi, ni ifingoc ngic kucnginagoc yeneac bageu kecbadeac fainugec. Amma neac bageu wasaifocna kecandae. Nga monggac kenna deba kenude nga monggac hana deba haude. Amma wanacngicnaac yomoc mena deba meudenoc.” 9Ifi deu Yesungo imoc negemma kerectegec amma dzigenema habu modacgec, yeni yofi edeyunuec, “Ni wiac mong edengunuba negenggec, Isracel bangecfu negen negensingngina kuhagoc yofia mong mi henai.” 10Nga ngic sueyunuyunuya, yeni garenggac amau dzigenema kemma henggec wanacngiha ye hafeia kpac anec.

Ngachotsecac medac

11Anu Yesungo taong mong kpara Naing, ihai kenu medacfora nga ngicngac homacngo ye modacgec. 12Kemma taongodaac nagutoayau kensikemanu ngic yeni medac mong homeec, yeac farenga tofohoma magec. Medac imoc ye ngachotsec mong ewea homemea yeac medac mocgusac anu ngicngac habu homacngo ye modacma taonnunac magec. 13Ifi magec Kebungo ngac imoc hemma ubea manganeu deec, “Ge mi kiacna.” 14Ifi dema kemma katapa imoc kpesereu ngic tofohogec, yeni wama nanggec Yesungo deec, “Medac, ni edeguduae, ge yacna.” 15#1Ngt 17:23; 2Ngt 4:36Ifi deu homemeango yacma yoac deec. Nga Yesungo medac imoc nonggea monggoc miec. 16#Ruk 1:68Nga ngicngac yeneng imoc hemma kpidohoma homac kengecyunuu Anutu dengerema degec, “Profete kuneng mongngo nenannu fingecma kecde nga Anutungo ngicngacfora nenang yugucnunuma kecde.” 17Siduc imocngo Yudaia bangecfu nga bangec goa nobohau tacdae, ihai kenu sasawango yoac imoc negenggec.

Yohaneac kpesi kpesi

Mat 11:2-19

18-19 # Myeg 40:7; Mkai 3:1; Yhkp 1:8 Yohaneac medacfora yeneng kemma siduc imoc ammigec Yohanengo medachora yohockang kpacyuruu haec yeri Kebuaru kemma yofi dema kpesimiecdeac sueyuruec, “Hanemmeudeac dedea, imoc ge me neni ngic monggac tomai kecbisina?” 20Ifi dema sueyuruu yeri Yesuaru kensikema yofi dema kpesimioc, “Hanemmeudeac dedea, imoc ge me neni ngic monggac tomai kecbisina? Yohane dokunadzicngo imoc kpesigendedeac suenurude.” 21Sueyuruec, naso imohaingoc Yesungo ngicngac homac hafeinginagoc nga kucmama amma asu manganagoc mengereyunuec amma kicpisic homac mengereyunuu kicfifi anggec. 22#Yes 35:5-6; 61:1; Ruk 4:18Nga ngihoc yereng ifi edeec Yesungo deec, “Ngeri kemma wiac hennegeng andaoc, imocac siduc Yohane ammibesera. Ngic kicpisic yeni kicfifi andae nga hanimangang yeni sing kendae amma kukuseringinagoc yeni sebingina ngereede. Nga kedzacfong yeni yoac negendae amma homemea, yeneng gboridae nga ngicngac makpekpea yeneng siduc gombung negendae. 23Nga mongngo neac amma negemmangang mi angande, ye kenehagoc.”

Yohaneac hania dekperagiec

24Anu Yohaneac medachora kemmaec Yesungo yeac yofi dema habu edeyunuec, “Ngeni bangeckisiu noc wiac henggecdeac kenggec? Komba mong firangngo kpeu kockpac anu, imoc henggecdeac kenggec me? 25Imoc kpac anu noc wiac hembesonga kenggec? Ngic mong wambaya kibiagoc me? Negenggec, ngic wambangina kibia gombunga gombunga heiandae nga bangecac songotoagoc kecandae, yeni ngictau amau kecandae. 26#Ruk 1:76Ngeni profete mong hembesonga kenggec me? Yeng profete goa sasawa feracyunude, ifinoc deduae. 27Yeacnoc yofi oho ohoya fede,

‘Negenggec, ni enacdedena sueba yeng waraigemma singga memengere anudeac habesande.’ (Mkai 3:1)

28Ni yofi deba negenggec, ngic ngacfunac fingecgec, yenearunac mongngo Yohane naric mi ferahaec. Anu Anutuac eucererenggac manau mamea,#7:28 Yesungo yengena negemma Anutuac eucererenggac manau mamea deec. yeng ine Yohaneac engena.”

29 # Ruk 3:12 Ngicngac sasawa nga takesimemengic momoc, yeni imoc negemma yofi negenggec, Anutu ye yoac fora nga dindingacac mingina, ifi dema Yohanearu kemma mitidoku nadzicgec. 30#Mat 21:32Nga Farisaio amma dedeseriyoacac negen negengngic yeni ine Anutungo sing deyemmeec, imoc ngadehema Yohanearu mitidoku mong mi nadzicgec.

31Anu Yesungo yofi deec, “Ngicngac yofinenggac kecdae, ngeneac fakangina yofi. 32Ngeni nambarac sobenu takecdae isoc. Yeni tacma yenaocngoc yofi dema kpacemeandae, ‘Neni kungac fifini ngeni nocac yegec mi fededau nga ubahodung yegec heini nocac mi kiacdau?’ 33Yohane dokunadzicngo hama ic sogong nga waing mong mi neec, imohai ngeni yofi degec, ‘Ye yafingagoc.’ 34#Ruk 15:2Nga Ngicac Medac ye hama nenedoku neande, imohai yofi deandae, ‘Henggec, ye nenedoku efea mi nekecde nga takesimeme nga manganameme yeneac tosongina.’ 35Nga Anutuac negen negentegec imoc gombunga ande imocac nambaracfora yeneac fakanginau ireckeude.”

Yesuac hani dzuarec

36Farisaio mong kpara Simong ye Yesugoc yaka neudeac ameau heitaiu yeac amau emma taroc. 37#Mat 26:7; Mrk 14:3; Yoh 12:3Tarec manganamemengac mongngo taong imohai kefec, ye yoac yofi degec negenec, “Yesungo Simonggac amau tacde.” ifi degec negemma kirung mong arabastro hocngo memea kerecdokuyagoc homuna gombunga, imoc mekenec. 38Mekemma Yesuac ngadeaugeng haniau namma kiaru kickumiango mama Yesuac hani heiu urucsusiango imoc mekerenggema hania titikokoc ammima kerecdoku homuna gombunga imocngo hania nadzicmiec. 39Nadzicmiu farisaio Yesu heitaiec, yeng imoc hemma yengenaocngoc yofi negenec, “Ngac hadac ye manganamemengac. Nga ngic yomocngo profete fora ambac dede ye dafiugeng kpeserema faka yomoc ande, imoc negemmibac.”

40Ifi negenu Yesungo yofi edeec, “Simong, ni yoac mong edegubeso negenduae.” ifi deu deec, “Oc, kpoukpou dena.” 41Ifi deu yofi edeec, “Ngic yohockang yeri dzogareng mong yearunac turung anoc, mongngo 500 denari nga mongngo 50. 42Amma yeri turung imoc kpoumiecdeac osima kefecac turungngira waec. Wau yerearunac damocngo dzogarenggac songo homac negenude?” 43Kpesimiu Simongngo merenec, “Dzo homac wamiec yeng, ifi negenduae.” deu Yesungo deec, “Negengising amma yoac dindingac denec.”

44Anu yeng ngac yearu dzigenema Simong yofi edeec, “Ge ngac yomoc henna. Ni amagau ereba ge haninaac doku mong mi nendang, yeng ine kickumiango hanina dzuacma yengena orucsusiango hanina mekerenggedac. 45Nga amagau haba geng ubangerecac titikokoc mong mi anendang nga yeng hadua, imohacnacngoc haninau titikokoc anendac. 46Nga geng orucna kerecdokungo mong mi nadzicnendang nga yeng hanina kerecdoku homunagocngo nadzicnendac. 47Imocac edeguba negenna, ye heresongoya hafoangoc edzacnudacac kopocsiha hafoangoc ifingoc wamiba kpac andacde. Mong ye kopocsiha kapianec wawaya, ye ine songo kapianecsac femide.” 48Ifi dema ngac yofi edeec, “Kopocsicga imoc bic wawaya.” 49Ifi deu ngicngac goa tatacfu tacgec, yeni yenaocngoc denegeng amma degec, “Yomoc merac ngic? Ye kopocsic ifingoc wayemmede.”

50 # Ruk 8:48; 18:42 Nga Yesungo ngacac yofi deec, “Ge ruaegoc kenna. Negen negensinggango ebicfunac mesigudac.”

المحددات الحالية:

Ruka 7: Ded

تمييز النص

نسخ