Fingec fingec 26
26
Anutungo Itsakgoc yoac dzegeec
1 #
Fing 12:10; 20:1-2 Anu kecma bangec imohai boditoa monggoc fingerec. Warac Awraham kecmanu mong fingecma feec. Imocac amma Itsak ye pelistingic yeneac ngictaungina Awimelec yearu Gerar taonnu kenec. 2Kemmanu Kebungo Itsak fingecmima yofi dema edeec, “Ge Aigita bangecfu mi kembesena. Neng bangec edegubade imohai ine kemma kecbesena. 3#Fing 12:7; 22:16-18; 28:15; 31:3Bangec yomoc sasawa ge nga bangecfocga ngemmebesanduaeac ge bangec yomohai kecna ni gegoc kecma kenecgubade. Imoc mangga Awraham deserimiai imocac fora fingerudeac ambade. 4#Fing 12:3; 15:5; 22:17-18; Gar 3:8Nga bangecfocga yeni negengyemmeba fingecsahe homac amma sawau asomeng tackendae ifi isoc ambesandae. Nga ni bangec yomoc sasawa bangecfocga yeni yemmebade. Anu bangecgaac arennu ngicngac bangeha bangeha kenecyunudacbesandua. 5Imoc yofiac, Awraham ye dederecgeyoacna negemma modackefec nga nonoyoacna nga singyoacna amma dedeseriyoacna sasawa negemma tofohodarecac ifi ambade.”
Itsak nga Awimelec
6Ifi deu Itsak ye Gerar taunnungoc kefec. 7#Fing 12:11, 13; 20:1-2, 12Nga bangec imocac ngic yeni enemaac dekpesi homac ammigec yofi dema edeyunuec, “Imoc nainna.” Ye enenna, ifi deudeac kengec kpeu negen negengango yofi negemma ifi deec. Riweka ye kicsiriha gombunga yombong. Imocac amma deficgebade isoc bangec mingina yeni yeac amma kecma kpebucnubauac. 8Anu imohai kecma naso monnu enema Riweka tofohoma titikokoc ammiec. Ammiu ngictau Awimelec ye firangnaguusing yerenec. 9Yeremma Itsak deu hau yofi deec, “Negennec, ye fora enengga. Nga ge hania nocac ye nainna denec?” Ifi deu Itsakngo deec, “Imoc yofiac, ni yeac amma homebaiac ifi deai.” 10Ifi deu Awimelecngo deec, “Ge wiac kuneng yombong anemmedang. Arengfocna yenearunac mongngo enenggagoc fefea efea fingecbacacsoc anu neni geac amma kopocsicninagoc ambing.” 11#Myeg 105:15Ifi dema ngicngacfora yofi dema edeyunuec, “Mong ye ngic yomoc enemagoc faka me wiac mong ayecmeudeu ye homecac areng anude.”
Bangec usuma doku meficgegec
12Anu Itsak ye bangec imohai kecma ua heihomec anu Kebungo keneheu kifa imohai semengtoagoc yombong anu witgbomea mocguarunac handred fingerec. 13Ye ngic kpac kunenggoc yombong anec. Anu dzofinaha monggoc monggoc amma ngic dzofinactoayagoc yombong anec. 14Anu ye ramaburumaka habuya habuya mekefecac amma enac tofoc tofohofora homacngoc meyunuma kefec. Imocac amma pelistingic yeni hemma keracmangang ammima 15#Fing 21:25dokuteng sasawa mamaac enac tofoc tofohongic yeneng mama Awrahamgoc kecma usugec imoc pelistingic yeni bangec figec kemeu semedacgec. 16Ifi anggec Awimelecngo Itsak yofi dema edeec, “Ge kucgagoc amma neni feracnununecac bangec monnu kemma kecna.”
Itsak ye bangec usuma doku meficgeec
17Ifi deu Itsak ye amabangec imoc wama kemma Gerar tumiau kporucamangina kpedziu imohai tacyac angkefec. 18Amma dokuteng mama Awraham kecmanu uangicfora yeneng usugec nga pelistingic yeneng mama homeu monggoc semedacgec imoc Itsakngo monggoc medzuacma usugecdeac uangicfora edeyunuec. Amma dokuteng imocac kpara mamango kparec imocngoc kpacdarec. 19Anu Itsak enac tofoc tofohongicfora yeneng tumiau teng mong tarec imohai usuma dokukiwa mong meficgegec. 20Meficgegec Gerar ramaburumakagareng yeni ine Itsakac ramaburumakagareng yenigoc enacenac amma yofi degec, “Doku imoc neneac.” Ifi degec imocac amma doku kpara Esek#26:20 Esek imocac titiha enacenac. kparec. 21Amma imocac ngadeau dokuteng mong monggoc usugec imocac ifingoc yoac deemegec. Ifi anggec doku imocac kpara Sitena#26:21 Sitena imocac titiha heihefac. kparec. 22Ifi anggec ye bangec imoc wama monnu kemma dokuteng mong usuec nga doku imohai ine yoac mong mi degec yofi deec, “Kebungo yaguc bangectitinga meficgenemmeu ihai seregurutoa annide.” Ifi dema kpara Rehobot#26:22 Rehobot imocac titiha bangec soha fede. kparec.
23Anu ye imohacnac Becer Sewa kenec. 24#Fing 12:2; 15:1; 17:7; Mke 3:6Kenu tofocnac imohaingoc Kebungo Itsak fingecmima yofi deec, “Ni gegoc kecduaeac ge kengec mi guu. Ni mangga Awrahamgac Anutu nga ni ge kenecguma bangecfocga yeni enac tofoc tofohongicna Awrahamgac amma mesaheyunubesandua.” 25Ifi edeu Itsak ye imohai arata mong mema Kebuac kpara kpacma dengerema eweheihei ammiec. Amma kporucamaya imohai kpedzima tacyac anec. Ammanu enac tofoc tofohongicfora yeni imohai dokuteng mong usugec.
Awimelec ye Itsakgoc dzadzahac anoc
26 #
Fing 21:22
Anu naso monnu Awimelec nga ogea Ahudzat nga yeac wasaingic yeneac kapten yerigoc Gerar bangecfunac kengsikegec. 27Hasikegec Itsakngo yofi dema kpesiyemmeec, “Ngeni ngaba anemma kisannugec hayai anu ngeni yaguc nocac nearu hadae?” 28Ifi deu yeni yoac turunga yofi meremmigec, “Kebungo gegoc kecde imoc neni hentegecma yofi negending. Nenang botucninau demeseriyoac deni feu gegoc dzadzahac yofi ambisina. 29Neni ge faka mangana mong mi anggening i. Faka gombunga anggemma ruaeu faiguni hanec ifi isocngoc ge faka mangana mong mi anemmebesena. Ge Kebungo yofinenggac kenecguyombonggeu kecnec.” 30Ifi degec Itsakngo yakatoa ohoma nenedoku yemmeu negec. 31Anu ama wereckenu asoac yacma ogo ogoac fakau demeseriyoac dema dzadzahac anggec. Ifi amma Itsakngo ruaegoc faiyunuu kenggec. 32#Fing 21:31Kemmagec uameme imohaingoc Itsak enac tofoc tofohongicfora yeni hama dokuteng mong usugec imocac yoacsiduc amma yofi dema edegec, “Neni doku meficgeding.” 33Ifi degec doku imocac kpara Siwca#26:33 Siwca imocac titiha “yoac deserima dede” isoc. kparec. Imocac yaguc bangec imocac kpara Becer Sewa#26:33 Becer sewaac titiha mong imoc “Yoac deserima dedeac dokuteng.” kpacandaengoc.
Esaw ye hitingac meyuruec
34 #
Fing 28:8-9; 36:2 Nga Esaw ye kifaya 40 ammanu hitingic Becer yeac naroanga kpara Yehudit meu enema anec amma hitingicngoc mong kpara Elon yeac naroanga Basemat ye momoc meec. 35Anu erangihocngira imoc yeri Itsak nga Riweka ubamangang homac meficgeyemeroc.
المحددات الحالية:
Fingec fingec 26: Ded
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© (Active), Wycliffe Bible Translators, Inc. All rights reserved.
