Matayo 7
7
Kwihīga kwa kūlamula banhū
(Luk 6:37-38,41-42)
1“Mutabalamulage a biching'wi, hū mutūlamulwa na a bing'we. 2Nguno ūmo mukūbalamulīlaga banhū bangī, na a bing'we h'ūmo mukūlamulīlwa. Nīyo ī ngelekelo īyo mukūbagelekelaga bangī, h'īyo mukūgelekelwa na a bing'we. 3Nibūlī ūkūnojaga ng'wiyo kasasala ka kapalala ako kalī mu liso lyakwe, alīyo ū bebe ū mu liso lyako gūlīmo ngamba, ūyo ūtūgūlonjaga? 4Ī gīsī, ūlū gūlīmo ngamba ū mu liso lyako ū bebe, ūkūdūla ginehe ū kūng'wīla ū ndūgūyo gīkī, ‘Lembeelaga nakwīngīje kasasala ka kapalala, kalīmo ū mu liso lyako’? 5Bebe ng'wibeeleja, gwīnjage tame ū ngamba ūyo gūlīmo ū mu liso lyako, hū ūkūdūla ū kūbona chiza, ūng'wīngīje nū ng'wiyo a kasasala ka kapalala ako kalīmo ū mu liso lyakwe! 6Ī shikolo ī shawiza mutajinhage mva, nī shikolo shing'we ī sha mpango ntaale#7:6 shikolo sha mpango ntaale galīhayiwa mawe malebe ga mpango ntaale, gakasīmbagwa kūfuma ha sī. yaya ū kūshiponeja ngulubī, nguno jikūshipandagīla dūhū shisosohale, hama jimugalūkīle jimugulaje!”
Kūlomba na kūkooba
(Luk 11:9-13)
7“Lombagi mukwinhwa, koobagi mukūpandīka, tūlagi hoodi ha nyango mukūlugūlīlwa. 8Nguno būlī ng'wene ūyo akalombaga akinhagwa, nū yūyo akakoobaga akapandīkaga, hama nū yūyo akatūlaga hoodi ha nyango akalugūlīlagwa. 9Ī gīsī alīho munhū kī ū mu bing'we ūyo ashikile kūlomva nūmbū#7:9 nūmbū nūūlū: ngatī. na ng'wana wakwe, nanghwe ūng'winha iwe? 10Nūūlū hamo ūlomva ndīlo, nani ūyo adūgije kūng'winha nzoka? 11Na lūūlū manīlagi henaho; a bing'we nūūlū īkī mulī babūbi, nahene mumanile ū kūbinha a baana bing'we shikolo shawiza, īlī kūtinda no ū kūlī Sīng'we ūyo alī ng'wigūlū. Ū ng'wene akūbinha shakwinha shawiza no pye abo bakūnombaga. 12Kwike shing'wigeleelilwe kūbīītīla a banhū gīt'ūmo mutogilwe bang'wītīle a bing'we, nguno h'ūmo shihayīlile ī shilagīlo na a bahangi.”
Nzīla ibīlī
(Luk 13:24)
13“Bītīlagi mu nzīla mhine, nguno ī likūūwa ī ligalī nū mita ū ngalī shijile mu kūyagala; na balī bingī abo bakabītīlaga mo. 14Alīyo ī nzīla īyo ījile mu būpanga, ī yene ngololoku; kwike mhine, pyī nū nyango mpine. Hama balī bagehu abo bakībonaga!”
Kūgūmana ntī ūmo gūlī
(Luk 6:43-44)
15“Bilanghanagi a bahangi a balemba-lembi, abo bakūng'wizīīlaga gītī shiinū ng'wikūnza lya ngholo, alīyo ū mu gatī balī mhūge ndaku. 16A benabo mukūbamanīla kū matwajo gabo. Angū, a banhū badūgije kūyoba mizabibu kwīngīīla mu magwata, nūūlū shisuumo sha ntini kwīngīīla mu malūla? 17H'ūmo ījīlile, ū ntī gwawiza gūkatwajaga matwajo gawiza, nū ntī ū gwabūbi nago gūkatwajaga matwajo mabi. 18Ū ntī ū gwawiza gūtūdūla kūtwaja matwajo mabi, nū ntī ū gwabūbi nago gūtūdūla kūtwaja matwajo gawiza. 19Būlī ntī ūyo gūtatwajaga matwajo gawiza gūkabbutagwa gwaponyiwa mu moto. 20Hūna lūūlū, mukūbamanīla kū matwajo gabo.”
Kūleng'wa na Seeba
(Luk 13:25-27)
21“Ītī gīkī pye abo bakanitanaga Seeba, Seeba, bakwingīla ū mu būtemi bo ng'wigūlū, alīyo dūhū ūyo akīītaga īyo yīnyegije Baba ūyo alī ng'wigūlū. 22Ū mu lūshikū lwenūlo bingī bakūnidayīīla, balīhaya gīkī, ‘Seeba, Seeba, twalī tūtahangaga mu lina lyako? Na hangī twalī tūtapeejaga masamva, na kūbeeja milīmo mitaale mu lina lyako?’ 23Nane nakūbashokeja nalībawīla hape gīkī, ‘Natamumanile nūūlū hado a bing'we bīīti ba shibi, nīngīlagi aha!’ ”
Bazengi babīlī
(Luk 6:47-49)
24“Ali lūūlū, būlī ng'wene ūyo ūyigwa ī mihayo yane hūna wīdīlīla na kwīshikīlīja, akwikolanījiwa na ngosha wa masala, ūyo akazenga numba yakwe ya madafaali h'itale. 25Hūna yūtūla mbula ya kūseja mihūūmo, kūnū na miyaga īkūhembaga; pyī ī shose shenīsho shūyikīīla ī numba yenīyo, alīyo ītagwile; nguno ū nsingi gwayo gwalī h'itale. 26Kwike būlī ng'wene ūyo ūyigwa ī mihayo yane alīyo ūleka ū kwīdīlīla, nūūlū kwīshikīlīja, ū ng'wene akwikolanījiwa na munhū mbūūlī, ūyo akazenga numba yakwe ha maseni. 27Yahayūtūla mbula ya kūseja mihūūmo, kūnū na miyaga īkūhembaga; aho pyī ī shose shenīsho shayikīīla ī numba yenīyo, īkagwa na kagwīle ka kūkamaaja no!”
28Ū Yesu aho wamala ū kūsomboola ī mihayo ī yose īyī, pye a mabità ga banhū abo bandegelekaga bakabūkumya na kakumīje kataale no ū būlangi bokwe. 29Nguno wabalangaga na būdūla, walī atabalangaga gīt'ūmo bīītīlaga a balangi babo ba shilagīlo.
المحددات الحالية:
Matayo 7: SNT00
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Sukuma New Testament © Bible Society of Tanzania, 2000.
