Génesis 20
20
Pa Abraham shi' pa Abimelec
1Pa Abraham tay'e yiey pan yie' pa yichey pa cotsjaat Nêguev, pa lhech mônlhee ti yie' pa yitsaat Gerar, lhcaavjueshi pa Cades shi' pa Shur. 2Ti yiey pa lhech'e pa yit'esha lhpa lhjaya Sara ca lhch'injô'a.*xf* Lhechesh pa Abimelec, lhcaanvacleesh'e pa Gerar, tayôjijanesh ca chinanchajey lhpa Sara ca lhjayaeesh. 3Lhechesh pa lhech tulh pa Abimelec caaj pa lhtsamaat ti yit'esha pa Dios: “Lhavaf jayu, lhayaash lha nivacche lhan'avcop apis ti tjayaay.”
4Taj ti lhavaatsha jôjjeclay ampa ca lhfanisheesh; pa lhechesh pa yicuulh: “Yinvacle, ¿lhaychavalhey ca aclôn jayu papi ampa ca nasnatesh ca sasach'e? 5Ja Abraham lhavaatsha yit'eshyam ca lhch'injô'a lha nivacche, lhavaatsha shta lha lhech ti yit'esha ca lhcheclaa. Pa nôque lhjunash nôque jasnatesh ti lhacôm'a ti tsivo'yeshch'e, jalheclôjesh ca ama pa ca yisnatesh ca sasach'e.”
6Lhechesh pa Dios pa yit'esha ti lhtsamat'esh: “Yivaatsha tsitô'ya jô na lhasnatesh ti ninatô'ya. Lhe'naa ti niyit'esh ca nicaaj pa ca afanisheesh, ca jaspa ya aj ca asnatesh pa sasch'e ca ajuyeshyijulh. 7Vooy nôqueesh achajey lha nivacche ja lhjaya, lhayaash lhavaatsha chiytôyjata pava vaclan pa t'alh'am jayu ca jaspa amônlhaa. Taj ti ca niachajtajeey, avaatsha shi' napi natsôt'ajesh yijô' ti lhavafelh jayu.”
8Peelh nalhu ti nich'a nalhu, pa Abimelec nitshaam pa tôney lhacôm'a papi lhcavos pa nifaclem lhacôm'a pava nijujôm. Ti yipe'ya papi lhech pa caaj pa uj t'ajovayi. 9Lhechesh pa Abimelec pa tôney pa Abraham pa yit'esha:
—¡A'va, na lhasnatshelhyam! ¿She pa ca c'asuyinatesh pa nôqueesh lhanchaajyi na uj sasch'e ti caajyam shi' napi yicavos? Lhasnateshyam na nintajulhtajey ca chinasnatesh. 10¿She pa lhaychavalhey ti lhasnatesh côque?
Nôque yit'eshaan pa Abimelec pa Abraham, 11vooy pa Abraham pa yicuulh:
—Yivaatsha jaychavalhey ca ameelh'am pa'na ca asclaneshelhshi pa Dios yiey nôque, pa lhech lhôn ca asclôneelh ca nitôlh'ejop lha yijaya. 12Taj ti yijô' lha lhech ti yich'injô; lhôse ca tata taj ti tavujuya lhca lhamimi, lhe'naa ti isjop ti yijayaesh lha lhech. 13Jan t'aplhuqu'e pa Dios ti tsayjat'e ja lhajpôyich ca tata pa ninôôclhaa pa ca yie' pa jayôjiesha lha lhech yiey pa ca jamtajelh'e ca niteeshyi yivaatsha ca lhcheclaayish.
14Lhechesh pa Abimelec pa yachajey pa Abraham lhpa lhjaya Sara. Tisesh shta pava tashinshas, pava vôcôc, papi lhcavos shi' papi lhcavoque, 15pa yit'esha:
—Ovalhey, nôque yicootsjat. Ovalhey pa ca vee' pa yaash ti lhen.
16Yit'esha shta lhpa Sara:
—Nava jajutey na achecla' tajulhsham pa mil peso tashaay, navôque t'ajuya ca navantaj lhacôm'a papi yi'ajop, pa ampapu jayu ca nasinôquiesh pa niysa'.
17Lhechesh pa Abraham t'a'lhey pa Dios. Pa Dios yivatsjanchat pa Abimelec shi' lhpa lhjaya. Yivatsjanchat shta papi lhcavoque pa jaspa caaj jayu papi lhcles. 18Lhayaash ti tôlh'ejop lhpa Sara lhechesh pa Lhcaanvacle pa yisnatshem ti ôctsôtacheyesh papi yiey pa lhajpôyich pa Abimelec.
المحددات الحالية:
Génesis 20: NIVA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nivacle Bible © Sociedades Bíblicas Unidas, 1994.
