Génesis 16
16
Lhpa Agar shi' pa lhaôs Ismael
1Lhpa Sarai ampa lhô'seelh pa lhjaya Abram, taj ti caaj lhpa ve'lha lhcavoque Egipto lhavoque lhey Agar. 2Lhechesh pa yit'esha pa Abram:
—A'va, pa Lhcaanvacle ninvashanyam ca nicaaj papi catsicles, taj ti jayôjeesh'a ajo'jop lha yicavoque Agar, secl'esh ca nicaaj pa yô'seesh jayu ca nicaajyam.
Pa Abram pa yuesha pava yit'esha lhpa Sarai. 3Nôque lhjunash lhpa Sarai, lhpa lhjaya pa Abram, t'acum'e lhpa Agar Egipto lhavoque pa yijutey ca lhjayaeesh pa lhjaya Abram. Lhechesh ti napunôjesh pava lhnincôpes ti yie' pa cotsjaat Canaán. 4Pa Abram pa yi'jop lhpa Agar lhechesh pa yituma. Lhpa Agar ti nichavayeshlhatay ti yituma, lhechesh pa yiclôvalh lhpa lhanvacche pa ninancôtsitayesh. 5Lhechesh pa yit'esha lhpa Sarai pa Abram:
—¡Avaatsha tôlh'e'ajop pa ninancôtsitayish lha Agar! Yivaatsha tôlhyi' ti jajut'am ti ajaya'esh; taj ti nôqueesh ti yitô'ya ti caaj jayu pa lhaôs pa vatlheclôôj ca naashyic'oya. Taj ti vooy pa Lhcaanvacle yit'esha jayu papi tôlha'jop, avaatsha ja't'ajesha yivaatsha.
6Pa Abram pa yicuulh:
—A'va, lha acavoque lhatvujuuysha; asnatshem pa lhjunash ti lheclôjesh ti tajulhey'am.
Pa lhechesh lhpa Sarai, lhech tôlhesh'e ti uj ti ninasclaneshi pa jaalhpa yiclotsjat lhpa Agar. 7Taj ti caaj pa ve'lha lh'ángel pa Lhcaanvacle yivan'e yiey pa nintôlh'e pa, yiey pa yinôôt yi'shi' pa lhnôyish tôlhey pa Shur, 8pa niy'ôs:
-Agar, Sarai lhcavoque, ¿ta lhtôôlhshi, pa ta lhôcji'?
Pa yicuulh lhpa Agar:
—Jaclôtc'oya lhja yinvacche Sarai.
9Lhechesh pa lh'ángel pa Lhcaanvacle pa yit'esha:
—Mapecley ca vi'jop lhja anvacche, pa anc'ashamshem lhacôm'a.
10Yit'esh shta pa lh'ángel pa Lhcaanvacle:
“Janôyoj'e'am japu papi tôlh'a,
pa ampapu jayu ca isa'emjop ca natsjuulh.
11Natuma pa caaj jayu pa aôs,
pa eyiyanesh jayu Ismael,
lhayaash ja Lhcaanvacle yipe'ya na
atacshinjayash.
12Niysa'esh jayu nan lhjunash pa
cuvôyutaj tôyi.
Pa nivatclônjayu'a jayu lhacôm'a,
pa lhacôm'a jayu ti chit'ajuyjulh
pa lhech;
taj ti lhavaatsha vaniyitesh jayu
pa lhajpôyich
lhama papi lhch'injavot ca ninutajeshem.
13Nan lhjunash ti yasinôquiem lhpa Agar pa Lhcaanvacle, pa lhqueyesh “Yivan pa Dios”, lhayaash ti yit'esha: “Pa Dios tsivan ti jôjjeclay ya mônlha.” 14Pa lhe'naa shta pa t'itsech ti lheyesh: “Lhqu'itsech pan mônlha pan tsivan shta.” Pa lhech t'itsech yi'shi' lhcaavju pa Cades shi' pa Bered.
15Lhpa Agar yijutem pa lhaôs pa Abram,*xt* pa lhavaatsha yeyiyanesh Ismael. 16Pa Abram ochenta y seis pava lhnincôpes ti nivat'aj pa Ismael.
المحددات الحالية:
Génesis 16: NIVA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nivacle Bible © Sociedades Bíblicas Unidas, 1994.
