Génesis 13
13
Pa Abram shi' pa Lot ti vacôtsônelh
1Pa Abram ti tay'e pa Egipto shi' lhpa lhjaya shi' lhacôm'a pava caajem, pa vapecley pa cotsjaat yiey pa Nêguev. Pa lhfacl'a Lot tanaôycheelh. 2Pa Abram uj ti acôjiin, caajem shta pa clesanilh cojiyaj shi' pa nôcshi' clesanilh pa acloj shta pava lhclôy. 3Tôlh'e' pa Nêguev pa tac'uy'in pa jaalhpa yamey pa yitsaat Betel. Pa lhech tôlh'e' ti yichey yiey pan yie'in ti nich'a, lhcachivatshi yiey pa Betel shi' pa Hai. 4Lhech'e ti yisnatesh lhapesh pa lhcufayjavatjop lhavitôvat. Lhech'e ti t'a'lhey pa lhey pa Lhcaanvacle.
5Pa Lot pan tanaôycheelh pa Abram, caajem shta pava lhatsha'nuvos. 6Taj ti yiey pan yie' nintajulhsham pa lhôc pava lhclôy. Pa sasjop ca ninachifan. 7Vooy papi yiclôvalhem pava lhclôy pa Abram yajatesh ti yishanelh'apee papin yiclôvalhem pava lhclôy pa Lot. Caaj shta papi cananeos shi' papi ferezeos jôjjeclay lhech yie'. 8Pa lhechesh pa yit'esha pa Abram pa Lot: “Avaatsha ya chi' shta castatvelhavot, tavijatay casvaatsha pa shi' napi acavos shi' napi tsitsôt'ajesh. 9Nôque lhacôm'a na cotsjaat istaa ca ovalhey'atam. Jatants'aclan'a ca ac'uyyic'oya. Ca ajuytajey na fchenajjulh pa jayjuyey jayu na fiyatjulh. Ca ajuytajey na fiyatjulh pa jayjuyey jayu na fchenajjulh.”
10Pa Lot yovalh'apee lhacôm'a pa tavashay yiey pa tovôc Jordán. Pa yi'vaney pa yitsaat yiey pa Zoar. Pa tavashay caaj pa uj yinôôt lhjunashjulh pa uj vatcôvjiyanjavat.*xl* Lhjunashjulh pa cotsjaat Egipto. Ti jôjjeclay ninvômjat pa Lhcaanvacle pava yitsates pa Sodoma shi' pa Gomorra. 11Pa lhechesh pa Lot pa t'apayalhatam lhacôm'a pa tavashay yiey pa Jordán, pa yichey pa lhum'ôcjinucjulh yiey pa yie'. Nôque lhjunash pa Abram shi' pa Lot ti vacôtsônvatc'oya. 12Pa Abram pa mônlhee pa cotsjaat Canaán. Vooy pa Lot yichey pa yi'shi' lhcaavju pava yitsates yiey pa tavashay, shalheema pa yitsaat Sodoma, 13pan yie' papi nivacle lhacôm'a ti uj ti ojiyis, yisnatesh pa uj sasch'e ti t'ajuyeshjulh pa Lhcaanvacle.
14Vooy ti tojqu'e pa Lot, pa yit'esha pa Lhcaanvacle pa Abram: “Yiey na lhôv'e', istaa ca isa' ca ovalhch'e yiey na fchenajjulh shi' na fiyatjulh, ovalhch'e shta na lhum'ôcjinucjulh shi' na nuutch'e. 15Yivaatsha jajut'am jayu lhacôm'a na cotsjaat nan lhavan. Pa yinjôt ti natsôt'ajesh jayu, shi' papi tôlh'a' jayu.*xm* 16Pa jasnatesh jayu ca acloja nan lhjunash na josôj yiey na cotsjaat. Nan lhjunash ti sasjop ca chinatsjuulh nava t'iyas na josôj, pa lhech lhjunash sasjop jayu shta ca chinatsjuulh papi tôlh'a' jayu. 17¡Aneetsham ca ajôchich'e na cotsjaat na lhavôôj shi' na lhjuc'ach'e, lhayaash ti jajut'am jayu!”*xm*
18Pa lhechesh pa Abram pa tay'e pan yie' pa yichey ti yie' lhpa is aacjiyuc pa lhey Mamre, shalheema pa yitsaat Hebrón. Lhech'e pa yisnatesh pa lhcufayjavatjop lhavitôvat pa Lhcaanvacle.
المحددات الحالية:
Génesis 13: NIVA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nivacle Bible © Sociedades Bíblicas Unidas, 1994.
