KO SĒNESI 22
22
Ko e Fekau ‘e he ‘Otuá ‘a ‘Epalahame ke ne Feilaulau‘i ‘a ‘Aisake
1PEA hili ‘a e ngaahi me‘a ko ia na‘e sivi ‘a ‘Epalahame ‘e he ‘Otua; ko ia na‘a ne folofola mai, ‘E ‘Epalahame:#Hep 11.17-19
2pea tali ‘e ia, Ko au. Pea ne folofola mai, ‘Ē, ke ke ‘ave ho foha, ‘a ho‘o me‘a pē taha, ho ‘ofa‘anga, ‘a ‘Aisake, pea ‘alu mo koe ki he fonua ko Molaia; pea fai‘aki ia ha feilaulau tutu ‘i ha funga mo‘unga te u toki fakahā atu.#2 Kal 3.1
3Pea pongipongi leva pea tu‘u hengihengi hake ‘a ‘Epalahame, ‘o ne teuteu ‘ene ‘asi; ‘o ‘alu mo ia ha toko ua ‘i he‘ene kau tama mo hono foha ko ‘Aisake; na‘a ne fahi foki ha fefie ki he feilaulau, ‘o ne tu‘u ‘o ‘alu ki he potu ne fakahā kiate ia ‘e he ‘Otua. 4Pea ‘i hono ‘aho tolu na‘e tāngaki hake ‘a ‘Epalahame, ‘o ne vakai mei he mama‘o ki he potu. 5Pea lea ‘a ‘Epalahame ki he‘ene ongo tama, Mo nofo ā ‘i heni mo e ‘asi, ka ko au mo e tama te ma ‘alu ki hē; pea te ma fai ‘ema lotu ‘o foki mai kiate kimoua.
6Pea to‘o ‘e ‘Epalahame ‘a e fefie ki he feilaulau, ‘o ne hilifaki ki hono foha ko ‘Aisake; pea ne to‘o ‘e ia ‘a e afi mo e hele, pea na laka atu fakataha. 7Pea lea ‘a ‘Aisake ki he‘ene tamai ko ‘Epalahame, ‘o pehē, ‘Alā tamai: pea ne tali, Ko au, tama. Pea ne pehē, Ko e afi ē mo e fefie, ka ko e fē ‘a e lami ki he feilaulau?
8Pea pehē ‘e ‘Epalahame, Tama, ko e ‘Otua te ne tokonaki ‘e ia ha‘ane lami ki he feilaulau: pea na laka atu fakataha.
9Pea faifai pea na a‘u ki he potu kuo fakahā ‘e he ‘Otua kiate ia; pea hanga ai ‘a ‘Epalahame ‘o ne fokotu‘u ai ‘a e ‘ōlita, ‘o ne fakatoka ‘a e fefie, ‘o ne kafai ‘a hono foha ko ‘Aisake, ‘o ne hilifaki ‘i he ‘ōlita ki he makafefie.#Sēm 2.21 10Pea ala atu ‘a ‘Epalahame, ‘o to‘o ‘a e hele ke tāmate‘i ‘aki hono foha. 11Ka ka ui mai ‘a e ‘Āngelo ‘a Sihova mei langi ‘o pehē, ‘Epalahame! ‘Epalahame! pea ne pehē, Ko au.
12Pea ne folofola mai, ‘Oua te ke ala ki he tama, pea ‘oua te ke fai ha me‘a ki ai: he ‘oku ou ‘ilo eni ko e tokotaha koe ‘oku ke ‘apasia ki he ‘Otua, koe‘uhi na‘e ‘ikai te ke mamae‘i meiate au ho foha, ‘a ho‘o me‘a pē taha.
13Pea tāngaki hake ‘e ‘Epalahame ‘o vakai, tā na‘e ‘i hono tu‘a ha sipi tangata kuo fihia hono nifo ‘i he vao: pea ‘alu ‘a ‘Epalahame, ‘o puke ‘a e sipi tangata, ‘o ne fai‘aki ‘a e feilaulau tutu ko e fetongi ‘o hono foha. 14Pea na‘e fakahingoa ‘e ‘Epalahame ‘a e potu ko ia ko Sihova-siaila [ko Tokonaki-pē-‘e-Sihova]#22.14 tokonaki; pe ‘Oku-‘afio-mai-‘a-Sihova. –‘o hangē ko e lea ‘oku fakatokotokanaki ‘aki ‘i onopooni “‘I he mo‘unga ‘o Sihova ‘e hā.”#22.14 ‘I he… Sihová ‘e hā; pe ‘I he mo‘unga ‘o Sihová ‘e ai ha tokonaki.
15Pea ui mai mei langi kia ‘Epalahame ‘a e ‘Āngelo ‘a Sihova ko hono tu‘o ua, 16‘ō pehē, Ko e folofola eni ‘a Sihova, Kuo u fuakava ‘iate au, ko e me‘a ‘i ho‘o fai pehē, ‘o ‘ikai te ke mamae‘i ho foha, ‘a ho‘o me‘a pē taha;#Hep 6.13-14 17ko ia te u mātu‘aki tāpuaki‘i koe, pea te u mātu‘aki fakatokolahi ho hako ke tatau mo e ngaahi fetu‘u ‘o e langi, pe ko e ‘one‘one ‘i he matātahi; pea ‘e ma‘u ‘e ho hako ‘a e ngaahi matanikolo ‘o honau ngaahi fili;#Hep 11.12 18pea ko ho hako ‘e monū‘ia ai ‘a e ngaahi pule‘anga ‘o māmani; koe‘uhi ā kuo ke tuitala ki he‘eku lea.#Ngā 3.25 19Pea foki ‘a ‘Epalahame ki he‘ene ongo tama; pea na tu‘u hake, ‘o nau ‘alu fakataha ki Peasipa; pea na‘e nofo ‘a ‘Epalahame ‘i Peasipa.
Ko e Hako ‘o Nēhoa
20Pea hili ia na‘e fakahā kia ‘Epalahame, ‘o pehē, Tā ko Milika foki kuo ne fanau‘i ha fānau ki ho tokoua ko Nēhoa; 21ko ‘Usa ko e ta‘okete pea ko Pusa hono tehina, mo Kemiueli ‘a ia ko e tamai ‘a ‘Ālame; 22mo Kēseti, mo Haso, mo Pilitasi, mo Sitilafi, mo Petueli. 23Pea ko Petueli ko e tamai ia ‘a Lepeka. Ko e toko valu ni na‘e fanau‘i ‘e Milika kia Nēhoa ko e tokoua ‘o ‘Epalahame. 24Pea ko ‘ene sinifu, ‘a ia ko hono hingoa ko Leuma, na‘e fanau‘i ‘e ia ‘a Tepa‘a, mo Kāhami, mo Tāhasi, mo Maaka.
المحددات الحالية:
KO SĒNESI 22: TMB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tongan Moulton Bible © Bible Society of the South Pacific, 2011.
