KO SĒNESI 21
21
Ko e Fā‘ele‘i ‘o ‘Aisaké
1PEA ‘a‘ahi ‘a Sihova kia Sela ‘o hangē ko ‘ene folofola, pea na‘e fai ‘e Sihova kia Sela ‘o hangē ko ‘ene tala. 2Pea feitama ‘a Sela, pea ‘i he hokosia ‘a e taimi ne tala kiate ia ‘e he ‘Otua na‘a ne fanau kia ‘Epalahame ha tama, neongo kuo ne motu‘a.#Hep 11.11 3Pea fakahingoa ‘e ‘Epalahame ‘a e foha ne fanau‘i kiate ia, ‘io, ‘a e foha ne fanau‘i kiate ia ‘e Sela, ko ‘Aisake. 4Pea na‘e kamu ‘e ‘Epalahame hono foha ko ‘Aisake ‘i he‘ene a‘u ki hono ‘aho valu, ‘o hangē ko e tu‘utu‘uni ‘a e ‘Otua kiate ia.#Sēn 17.12; Ngā 7.8 5Pea na‘e fe‘unga ‘a ‘Epalahame mo hono ta‘u teau ‘i he fanau‘i kiate ia hono foha ko ‘Aisake. 6Pea pehē ‘e Sela,
Kuo fakatupu ‘e he ‘Otua ha kata ma‘aku;
‘Ilonga ha fanongo te ne kata mo au.#21.6 Ko e ‘uhinga ‘o e ‘Aisaké ‘i he faka-Hepeluú ko e “‘okú ne kata” (vakai ai pē ki he 17.17-19). 7Na‘a ne pehē foki,
Ko hai ne mei lea kia ‘Epalahame, ‘o lau,
Ko Sela te ne fakahuhu ha fānau?
He kuo te fanau‘i hano foha kuo ne a‘ua‘u.
8Pea lahi ‘a e tama, ‘o mavae, pea na‘e fai ‘e ‘Epalahame ha fu‘u kātoanga ‘i he ‘aho na‘e fakamavae ai ‘a ‘Aisake.
Ko Hono Tuli ‘o Heka‘ā mo ‘Isime‘eli
9Pea mamata ‘e Sela ki he tama ‘a Heka‘ā, ko e fefine ‘Isipite na‘a ne fanau‘i kia ‘Epalahame, ‘oku ne manuki.#21.9 ‘okú ne manuki; pe fakavā. ‘Oku ‘asi ‘i he ngaahi hiki fuoloa ‘e ni‘ihi ‘a e: mo e tama ‘a Selá, ‘a ‘Aisake; ka ‘oku ‘ikai ke ‘asi ia ‘i he faka-Hepeluú. 10Pea ne pehē kia ‘Epalahame, Kapusi ‘a e kaunanga ko ia mo ‘ene tama: he tala‘ehai ‘e kaunga-‘ea ‘a e tama ‘a e kaunanga na pea mo ‘eku tama, ‘a ‘Aisake.#Kal 4.29-30 11Pea kovi‘ia ‘aupito ‘a ‘Epalahame ‘i he me‘a ko ia koe‘uhi ko si‘ono foha. 12Ka ka folofola ‘a e ‘Otua kia ‘Epalahame, ‘Oua na‘a ke kovi‘ia ai koe‘uhi ko ho foha, pea koe‘uhi ko ho‘o kaunanga; pea ko e me‘a ki he ngaahi lau ‘a Sela ‘oku fai atu, tuitala pē ki he‘ene lea; koe‘uhi ‘e ngata ‘ia ‘Aisake ‘a e lau ko ho hako.#Lom 9.7; Hep 11.18 13Pea ko e me‘a foki ki he tama ‘a e kaunanga, te u fokotu‘u foki ia ko e pule‘anga koe‘uhi ko ho hako ia.
14Pea ‘i he‘ene ‘aho leva na‘e tu‘u hengihengi ‘a ‘Epalahame, ‘o ne to‘o ha mā mo ha ‘angavai, ‘o ne ‘atu kia Heka‘ā, ‘o ‘ai ki hono uma; ‘o ne ‘ange kiate ia mo e tama, ‘o ne tuku atu; pea ‘alu atu ia ‘o he fano ‘i he toafa ‘o Peasipa. 15Pea faifai pea maha ‘a e vai ‘i he ‘angavai, pea tuku ‘e he fefine ‘a e tama ‘i ha lolo ‘akau; 16ka ka ‘alu pē ia ‘o nofo mai mei he mama‘o, ‘o fe‘unga mo e fakamama‘o ‘a e tu‘u ‘a e lautele; he na‘a ne pehē, Ke ‘oua mai na‘a ku sio ki he pekia ‘a e tama: ko ia na‘a ne nofo mai mei he mama‘o, ‘o ne#21.16 ne; ‘Oku pehē ‘i he hiki fuoloa ‘e taha ‘a e tamasi‘i. ‘ai atu hono le‘o ‘o tangi.
17Pea ongo ki he ‘Otua ‘a e le‘o ‘o e tama; pea ui mai mei langi ‘a e ‘Āngelo ‘a e ‘Otua kia Heka‘ā, ‘o ne me‘a mai, Ko e hā ‘oku ke pehē ai, Heka‘ā! ‘Oua te ke manavahē, he kuo ongo ki he ‘Otua ‘a e le‘o ‘o e tama mei he potu ‘oku ne ‘i ai. 18Tu‘u ‘o langa‘i hake ‘a e tama, ‘o taki nima ia; he te u fokotu‘u ‘iate ia ha pule‘anga lahi. 19Pea faka‘ā ‘e he ‘Otua ‘a e mata ‘o e fefine, pea ne ‘ilo ha vaikeli; pea ne ‘alu ki ai ‘o ‘utu ‘ene ‘angavai ‘i he vai, ‘o ne fakainu ‘a e tama. 20Pea na‘e kau ‘a e ‘Otua mo e tama; pea faifai pea ne tangata, pea ne nofo ai pē ‘i he toafa, ‘o ne hoko ko e tangata poto ‘i he fana. 21Pea ne nofo fonua ‘i he Toafa ‘o Pēlana: pea kumi ‘e he‘ene fa‘ē ha uaifi mo‘ona mei ‘Isipite.
Ko e Aleapau ‘a ‘Epalahame mo ‘Apimeleki
22Tokua ‘i he kuonga ko ia na‘e me‘a ‘a ‘Apimeleki kia ‘Epalahame, ‘o kau ai ‘a Fīkoli ko e ‘eiki ‘o ‘ene tau; pea ne pehē, Tā ‘oku kau ‘a e ‘Otua ma‘au ‘i he me‘a kotoa pē ‘oku ke fai:#Sēn 26.26 23pea ko eni ke ke fuakava mai heni kiate au ‘i he ‘Otua, ‘ilo ‘e koe ‘o kapau te ke fai kākā kiate au, pe ki hoku pikilau, pe ki hoku hako! kae hangē ko ‘eku ‘ofa kiate koe, ke pehē ho‘o fai ‘ofa kiate au, pea mo e fonua kuo ke ‘āunofo ki ai.
24Pea pehē ‘e ‘Epalahame, Te u fuakava pē.
25Pea valoki ‘e ‘Epalahame ‘a ‘Apimeleki ko e me‘a ‘i he vaikeli ne fa‘ao ‘e he kau tamaio‘eiki ‘a ‘Apimeleki. 26Pea tali ‘a ‘Apimeleki, ‘Oku ‘ikai te u ‘ilo pe ko hai ne fai ‘a e me‘a ko ia: ‘io, pea tala‘ehai na‘a ke tala mai ‘e koe, pea tala‘ehai na‘a ku fanongo ki ai, ko e ‘aho ni pē. 27Pea to‘o mai ‘e ‘Epalahame ha fanga sipi mo ha fanga pulu, ‘o ne ‘ange kia ‘Apimeleki; pea na fai ha fuakava ‘e kinaua. 28Pea hanga ‘a ‘Epalahame ‘o tukukehe ha fitu‘i lami fefine. 29Pea me‘a ‘a ‘Apimeleki kia ‘Epalahame, Ko e hā ē, ‘a e fitu‘i lami fefine ko ia kuo ke tukukehe?
30Pea ne pehē, Te ke to‘o meiate au ‘a e fitu‘i lami fefine ma‘aku fakamo‘oni ko au na‘a ku keli ‘a e vaikeli ni. 31Ko hono ‘uhinga ia na‘e ui ai ‘a e potu ko ia ko Peasipa [ko Vai-fuakava, pe ko Vai-fitu]#21.31 Peasipa; Vakai ai pē ki he 26.33. koe‘uhi ko e potu ia na‘a na fuakava ai ‘e kinaua.
32Pea kuo fai ‘ena fuakava ‘i Peasipa, pea tu‘u ‘a ‘Apimeleki mo Fīkoli ko e ‘eiki ‘o ‘ene tau, ‘o na foki ki he fonua ‘o e kau Filisitia. 33Ka ka tō ‘akau ia ‘i Peasipa, ‘o ne fai ai ‘ene lotu ‘i he huafa ‘o Sihova ko e ‘OTUA-LAUI-‘ĪTĀNITI. 34Pea na‘e nofo ‘āunofo ‘a ‘Epalahame ‘i he fonua ‘o e kau Filisitia ‘o ‘aho lahi.
المحددات الحالية:
KO SĒNESI 21: TMB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tongan Moulton Bible © Bible Society of the South Pacific, 2011.
