‘Apositoló 5
5
Ko e Fakamāu‘i ‘e Pita ‘a ‘Ānanaia mo Sāfaila
1KA na‘e ai ha tangata, tokua, na‘e hingoa ko ‘Ānanaia, na‘a ne fakatau ha ‘api, pea kau ai ‘a Sāfaila ko hono uaifi: 2pea na‘a ne tuku ma‘ana ha me‘a mei he totongi, ‘o ‘ilo foki ki ai ‘e hono uaifi, ‘o ne ‘omi hano konga pē, ‘o tuku atu ki he va‘e ‘o e kau ‘Aposetolo. 3Pea pehē ‘e Pita, ‘E ‘Ānanaia, ko e hā kuo ke tuku ai ke fā‘ofale ‘a Sētane ‘i ho loto, ke ke lohiaki‘i ‘a e Laumālie Mā‘oni‘oni, mo ke tuku ha me‘a mei he totongi ‘o e konga kelekele? 4‘I he te‘eki ke fakatau, ‘ikai na‘e ‘o‘ou pē? Pea hili hono fakatau, ‘ikai na‘e ‘a‘au ke fa‘iteliha ki hono pa‘anga? Ko e hā na‘a ke tali ‘ai ai ‘i ho loto ‘a e me‘a ni? Tala‘ehai ko ho‘o lohiaki‘i ha tangata, ka ko e ‘Otua. 5Pea ‘i he fanongo ‘e ‘Ānanaia ki he lea ko ia, na‘a ne mape‘e ki lalo ‘o hokotaki: pea na‘e tō ha fu‘u ilifia ki he kakai kotoa pē na‘e fanongo ki ai. 6Pea tutu‘u ‘a e kau talavou ‘o teu ia, pea nau fata atu kitua‘ā, ‘o tanu.
7Pea kuo mahili nai ha houa ‘e tolu, ‘iloange na‘e hū mai ‘a hono uaifi, ‘oku ‘ikai te ne ‘ilo ‘a e me‘a kuo hoko. 8Pea tali ‘e Pita kiate ia, Fakahā mai pe na‘a mo fakatau ‘a e ‘api ‘aki ‘a e totongi ko ē pē?
Pea pehē ‘e ia, ‘Io, ko ia pē.
9Pea me‘a ‘e Pita ki he fefine, Ko e hā kuo mo fa‘ufa‘ufono ai ke hūhūmama ki he Laumālie ‘o e ‘Eiki? Ko ena ‘oku ‘i he matapā ‘a e va‘e ‘o e kakai na‘e tanu ho husepāniti, pea te nau fata atu koe. 10Pea hinga atu leva ia ki he va‘e ‘o Pita, ‘o ne hokotaki: pea ‘i he hū mai ‘a e kau tama, tā kuo pekia ‘a e fefine; pea nau fata ia kitua‘ā, ‘o tanu mo hono husepāniti. 11Pea tō ha fu‘u ilifia ki he siasi kātoa, mo e kakai kotoa pē na‘e fanongo ki he me‘a ko ia.
Ko e Mafai Makehe ‘o Pita
12Pea na‘e fa‘a hoko ‘i he ngāue ‘a e kau ‘Aposetolo ‘a e ngaahi me‘a mana mo fakaofo ‘i he lotolotonga ‘o e kakai; pea na‘e fa‘a fakataha ‘a kinautolu kotoa pē ‘i he falehala ‘o Solomone: 13ka ko e me‘a ki hono toe, tala‘ehai na‘e ai ha taha na‘e fakato‘oto‘a ke fafale mo kinautolu; kaekehe na‘a mo e kakai na‘a nau faka‘apa‘apa kiate kinautolu. 14Pea fakautuutu ai ‘a e ului mai ki he ‘Eiki ‘a ha kakai na‘e tui, ko e fu‘u tokolahi ‘o e kau tangata mo e kau fefine foki. 15Pea faifai ai pea nau ‘omi kitu‘a ‘a e kau mahaki, ‘o tuku fakaholo ‘i he hala ‘i he fanga ki‘i mohenga mo e fala, hei‘ilo ‘e lave ‘i hanau toko taha ‘a e ‘ata ‘o Pita ‘i ha‘ane me‘a ange. 16Na‘e fa‘a ha‘u foki ‘a e kakai mei he ngaahi kolo vāofi mo Selusalema, ko e ‘omi ‘enau ngaahi mahaki, mo kinautolu na‘e ‘āvea ‘e he ngaahi fa‘ahikehe; he na‘e fa‘a fakamo‘ui ‘a e fa‘ahinga ko ia kotoa pē.
Ko e Fakafili ‘a e Kau Taki ‘o e Kakai Siú ki he Kau ‘Apōsetoló
17Pea tutu‘u hake ai ‘a e Taula‘eiki Lahi, mo kinautolu kotoa pē na‘e kau mo ia, (‘a ia ko e fa‘ahi Sātusi kātoa) kuo vevele ‘enau meheka. 18Pea nau puke ‘a e kau ‘Aposetolo, ‘o lī ki he pilīsone fakakolo. 19Ka na‘e fakaava po‘uli ‘a e ngaahi matapā ‘o e fale fakapōpula ‘e ha ‘āngelo ‘a e ‘Eiki; na‘a ne taki atu foki kinautolu kitu‘a, ‘o ne pehē, 20Mou ‘alu ‘o tu‘u ‘i he Temipale, ‘o malanga‘aki ki he kakai ‘a e ngaahi folofola kotoa pē ‘o e mo‘ui ko ia. 21Pea ‘i he‘enau fanongo ki ai, na‘a nau uhu ki he Temipale, ‘o faiako. Faifai pea a‘u ange ‘a e Taula‘eiki Lahi mo hono fa‘ahi, ‘o nau ui ange ‘a e Sanetalimi, pea ke kātoa mai ‘a e Fakataha fakamātu‘a ‘o ha‘a ‘Isileli; pea nau fekau atu ki he pilīsone ke taki mai kinautolu.
22Ka ko e kau ‘ōfisa na‘e ‘alu ange na‘e ‘ikai te nau ‘ilo kinautolu ‘i he fale fakapōpula. 23Pea nau foki mai ‘o fakahā, ‘o pehē, Ko e me‘a ki he pilīsone, na‘a mau ‘ilo ia kuo tāpuni, ‘o malu ‘aupito, pea ko e kau le‘o ‘oku nau tutu‘u pē ki he ngaahi matapā; ka ‘i he‘emau to‘o, na‘e ‘ikai te mau ‘ilo ha momo‘i toko taha ‘i loto fale. 24Pea ‘i he‘enau fanongo ki he fakamatala ko ia, ‘a e ‘eikitau ‘o e Temipale mo e hou‘eiki taula‘eiki, na‘a nau toumoua ‘i he kau ‘Aposetolo pe ‘e iku ki he hā ‘a e me‘a ni. 25Pea ‘alu ange ha toko taha, ‘o ne fakahā kiate kinautolu, Ko e kau tangata na‘a mou ‘ai pilīsone, ko eni ‘oku nau tutu‘u ‘i he Temipale, ‘o faiako ki he kakai. 26Pea ‘alu atu ai ‘a e ‘eikitau mo e kau ‘ōfisa, ‘o ne taki mai kinautolu: ka na‘e ‘ikai ‘omi fakamālohi, he na‘a nau manavahē ki he kakai, na‘a tolongi kinautolu.
27Pea nau taki mai kinautolu, ‘o fokotu‘u ‘i he lotolotonga ‘o e Sanetalimi: pea fakafehu‘i kiate kinautolu ‘e he Taula‘eiki Lahi, 28‘o pehē, Na‘a mau mātu‘aki fekau kiate kimoutolu ke ‘oua te mou ako‘aki ‘a e hingoa ni, pea ko eni kuo mou fakafonu ‘a Selusalema ‘aki ho‘omou akonaki, pea ‘oku mou fai ke fakahinga mai kiate kimautolu ‘a e mate ‘a e tangata ko ia.#Māt 27.25
29Pea tali ‘a Pita mo e kau ‘Aposetolo, ‘o nau pehē, ‘Oku totonu pē ke fai ki he pule ‘a e ‘Otua ‘i he pule ‘a e tangata. 30Ko e ‘Otua ‘o ‘etau ngaahi kui na‘a ne fokotu‘u ‘a Sīsū, ‘a ia na‘a mou feia ‘i hono tautau he ‘akau. 31Ko e toko taha ko ia, ne fakato‘omata‘u ‘e he ‘Otua hono hākeaki‘i ke ne ‘Eiki mo Fakamo‘ui, ke ‘ange mo‘o ‘Isileli ‘a e fakatomala mo e fakamolemole angahala. 32Pea ko kimautolu ko e kau fakamo‘oni ‘o e ngaahi fakamatala ko ia; pehē foki ‘a e Laumālie Mā‘oni‘oni, ‘a ia kuo foaki ‘e he ‘Otua kiate kinautolu ‘oku talangofua kiate ia.
33Pea ‘i he‘enau fanongo ki ai, na‘e hangē kuo kilisi ua honau loto, pea nau kamata alea‘i honau tāmate‘i. 34Pea tu‘u hake ‘i he Sanetalimi ha matāpule Fālesi na‘e hingoa ko Kāmelieli, ko e faiako ‘i he Lao ia, pea ko e toko taha na‘e tokangaekina ‘e he kakai kotoa pē; pea ne fekau ke tuku si‘i ki tu‘a ‘a e kau tangata. 35Pea toki lea ‘e ia kiate kinautolu, ‘A Matāpule ‘Isileli, Mou me‘eme‘a lelei ki he me‘a ‘oku mou pehē ke fai ki he kau tangata ni. 36He na‘e ‘i ai ha toko taha na‘e tu‘u ‘i mu‘a, ko Teutasi, ‘o ne pōlepole ia ‘oku taha ‘ana; pea na‘e hinga ki ai ha kau tangata ‘e toko fāngeau nai: na‘e mate tāmate‘i ia, pea ‘ilonga ‘a kinautolu na‘e tuitala ki ai, na‘e movete ‘o ‘osi‘osingamālie. 37Hili ‘a e siana ko ia, na‘e tu‘u hake ‘a Siutasi mei Kāleli ‘i he taimi ‘o e tohi kakai, pea tohoaki ‘e ia ha kakai ke angatu‘u: pea na‘e mole mo e tangata ko ia, pea fakamovete ‘a kinautolu na‘e tuitala ki ai. 38Pea ‘i he me‘a ko eni ‘oku ou lēlea atu, Tu‘u ‘atā mo e kau tangata ni, pea tuku ai pē ā kinautolu: he kapau ‘oku mei he tangata ‘a e fakakaukau ko eni mo e ngāue ni, ‘e ngata: 39ka ‘o kapau ‘oku mei he ‘Otua, ‘e ‘ikai te mou lava ke fakangata kinautolu: kae‘uma‘ā foki na‘a ‘iloange ‘oku mou tau‘i ‘a e ‘Otua.
40Pea nau tui kiate ia: pea nau ui ange ‘a e kau ‘Aposetolo ‘o haha, ‘o nau fekau ke ‘oua te nau toe malanga‘aki ‘a e huafa ‘o Sīsū, ‘o nau toki tuku ange. 41Pea ‘alu ai kinautolu mei he ha‘oha‘onga ‘o e Sanetalimi, ‘oku nau fiefia koe‘uhi kuo lau kinautolu ‘oku nau taau ke ngaohikovi‘i koe‘uhi ko e huafa. 42Pea ko e ‘aho kotoa pē, ‘i he Temipale pea ‘i ‘api, na‘e ‘ikai tuku ‘enau ako mo malanga‘aki ‘a Sīsū, ko e Mīsaia ia.
المحددات الحالية:
‘Apositoló 5: TMB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tongan Moulton Bible © Bible Society of the South Pacific, 2011.
