Mpiin 18

Uwumbɔr aah nan puu ke u ga tii Abraham ubijabo pu na aabɔr

1Uwumbɔr nan dan Abraham chee Mamre aasui sakpiin na taab. Nwiin aah nan tɔŋ sisik ni ki ton na, le Abraham nan ka waadiik aabisamɔb, 2le ki yaar lik, ki kan bijab bitaa bibaa si nima chee. Waah ti yaar kan bi na, le u san buen bi chee, ki nan ti gbaan binimbiin ni, le ki di unimbil kpaa kitiŋ, 3le ki bui bi ke, “Ndindatiib, taa jer ndo man, kal ki fuur man; m bi do ke m chann nimi tichann la. 4Cha m ban ni nnyun nan tii nimi, aan ni finn nitaa man; kal busub bue taab, ki fuur man. 5M ga ti joo ni tijikaar, ni ji ki kan mpɔɔn nimi aasachuln ni. Naah dan ndo pu na, ni nyuŋ mi pam, nima pu na, cha m chann nimi tichann.”

Bi nan giin bui ke, “Aa ni lituln; ti kii kina.”

6Le Abraham nan san buen waadiik ni, upuu Sara chee, ki ti bui u ke, “Ŋa mala, ki ban n‑yon mu ŋan na, ki ŋa tijikaar,” 7le ki san buen waanaa ponn ni, ki ti chuu unaa u laa diin ki filk na, le ki cha waanaagbiija kɔr u, ki toor u mala. 8Upuu aah ŋa tijikaar ngbaan doo na, le Abraham di ti ni nnaabiin, ni tinann ngbaan ti siin bi. Abraham ubaa le nan chann bi tichann, busub ngbaan taab, le bi jin.

9Le bi baa Abraham ke, “Aapuu Sara bi la chee?”

U nan bui bi ke u bi kidiik ni.

10Le bi ponn ni ubaa bui ke, “Iŋmal iwae yaa jer kan, m ga ki gir ni do, le aapuu Sara ga maa ubijabo.”

Sara nan bi upuwɔb, ki si pek kidiik aabisamɔb, ki pel waah len pu na.#18.10: Lik Rom Yaab 9.9. 11Abraham ni upuu Sara nan por pam, le Sara aa nan ki fu tipiir. 12Nima pu na, Sara nan laa usui ni, le ki bui ke, “M ni nchal aah por pu na, m ga ki ŋmaa kan kina aapopiin aa?”

13Le Uwumbɔr baa Abraham ke, “Ba ŋa Sara laa ki dak ke, ‘Maah por pu na, m ga ki ŋmaa maa ubo oo?’ 14Nibaa pɔɔ min Uwumbɔr chee ee? Maah len pu na, m ga ki gir ni iŋmal iwae aapuwɔb, le Sara ga maa ubijabo.”#18.14: Lik Luk 1.37.

15Nima pu na, Sara nan san ijawaan, le ki nee, ki bui ke, “Maa laa.”

Uwumbɔr nan bui ke, “Ni ye mbamɔn ke aa sil laa.”

Abraham aah gaŋ Uwumbɔr pu na

16Bijab ngbaan nan siir nima chee ke bi buen nin chee bi ga li waa Sodom aatiŋ na, le Abraham nan cheen bi lii nsan ni. 17Le Uwumbɔr dakl usui ni ke, “Maah ban m ŋa pu na, maan di tibɔr ngbaan bɔr Abraham. 18Uyaabitiib ga li kpa mpɔɔn ki ŋa litimbokpaan, u pu le m ga ŋa tinyoor ŋa ŋinibol mɔmɔk pu. 19M lee u ke u di maakaal mɔk waabim, ni uyaabitiib, aan bi kii tii mi ki li ŋani ni ŋan na mbamɔm. Bi yaa kii kina kan, m ga ŋa tinyoor ŋa bi pu ke maah nan puu pu tii Abraham na.”

20Le Uwumbɔr bui Abraham ke, “M ŋun Sodom ni Gomora aatim aanib aah tun titunwanbir sakpen pu na, 21see m buen ntim ngbaan ni, ki ti lik ke ti gbii aan taa gbii?”

22Bijab bilee ngbaan nan siir cha Sodom wɔb, le Uwumbɔr bee Abraham chee. 23Abraham nan baa Uwumbɔr ke, “Aa ga sil kpaan bii bininyaam ni titunwanbirdam mɔmɔk aa? 24Bininyaam yaa pii piiŋmu kan, aa ga bii kitiŋ ngbaan mɔmɔk aa? Saan di cha ki taa bii kitiŋ ngbaan, binib piiŋmu ngbaan pu uu? 25Mbamɔn, saan kpaan ki ku bininyaam ni titunwanbirdam kina. Sin Uwumbɔr aa kee ŋa kina, kaan kii ŋa kina mu. Aa yaa ŋa kina kan, bininyaam mu ga ji falaa titunwanbirdam chee. Saan kii ki ŋa kina. Sin Uwumbɔr u ye dulnyaa wee mɔmɔk aabɔjir na ga sil ŋa tiwan mɔmɔk ibamɔn ponn ni.”

26Le Uwumbɔr giin bui Abraham ke, “M yaa ti kan bininyaam bi pii piiŋmu Sodom aatiŋ ni kan, bininyaam ngbaan pu na, maan ki bii ki.”

27Abraham nan ki mee Uwumbɔr ki bui u ke: “M gaŋ si, cha pinn mi, maah beenin kpa lipobil ki bi len tibɔr aa chee na. Ndindaan, m ye unibɔn la, le kaa kpa nsan m kpak si tibɔr. 28Nibaakan, bininyaam ngbaan ga li ye imonko ilee ni biŋmu la, aa ga bii kitiŋ ngbaan mɔmɔk, binib biŋmu na aah bar pu na aa?”

Uwumbɔr giin bui u ke, “M yaa kan ke bininyaam ngbaan pii imonko ilee ni biŋmu kan, maan bii kitiŋ ngbaan.”

29Abraham nan ki bui ke, “M gaŋ si, nibaakan bi ga li ye bininyaam imonko ilee baanja la.”

Uwumbɔr bui u ke, “Bi yaa ye imonko ilee kan, maan bii ki.”

30Abraham nan ki bui ke, “Ndindaan, m gaŋ si, taa gee liŋuul m pu, cha m ki len tibɔr aa chee. Nibaakan ni yaa ye bininyaam piitaa kan, aa ga bii ki ii?”

Le u bui u ke, “Bi yaa fuu piitaa baanja kan, maan bii kitiŋ ngbaan.”

31Abraham nan ki bui ke, “Ndindaan, m gaŋ si, cha pinn mi, maah beenin kpa lipobil ki bi len tibɔr aa chee pu na. Dakl ki lik, bininyaam ngbaan yaa ye moninko baanja kan.”

Uwumbɔr nan ki bui u ke, “Bi yaa pii moninko kan, maan bii kitiŋ ngbaan.”

32Abraham nan ki bui ke, “Ndindaan, m gaŋ si, taa gee liŋuul m pu, ki cha m len kookoo aabɔr tee aa chee. Nibaakan bi yaa pii binib kipiik baanja kan.”

Uwumbɔr nan ki bui u ke, “Bi yaa pii kipiik kan, maan bii kitiŋ ngbaan.” 33Uwumbɔr aah ti len Abraham chee tibɔr doo na, le u siir buen, le Abraham mu gir kun.

المحددات الحالية:

Mpiin 18: xonB

تمييز النص

نسخ