Mpiin 17

Lichakpangeei li ye tipuur aamɔkl na aabɔr

1Buyoonn Abram nan ti saa ŋibin imonko inaa ni kipiik ni ŋiwae na, le Uwumbɔr nan dan u chee ki nan bui u ke, “Min le ye Uwumbɔr Mpɔɔnsakpiindaan. Tii mi naadii, ki li ŋani ni ŋan na n‑yoonn mɔmɔk. 2M ga puu tipuur tii si ke aa ga li kpa yaabitiib pam.” 3Le Abram gbaan Uwumbɔr aanimbiin ni, le unimbil kpaa kitiŋ. Le Uwumbɔr bui u ke, 4“M puu tipuur tii si ke aa ga li ye ŋitimbol pam aate. 5Baan ki li yin si ke Abram, bi ga li gur yin si ke Abraham la, ba pu? m ban m ŋa si ŋitimbol pam aate la.#17.5: Abraham aatataa le ye ke “ŋitimbol pam aate.” Lik Rom Yaab 4.17. 6M ga tii si yaabitiib pam, le ngem ga li ye bibɔrb. Aa ga li kpa yaabitiib sakpen, le bi ga ŋa ŋitimbol pam.

7“Maah puu pu tii si na, m ga li joo tipuur ngbaan ki tii si, ni aayaabitiib bimɔk ga paan ni aa pu na, aan ti li ye tipuur ti kaa kpa ndoon na. M ga li ye Saawumbɔr, ni aayaabitiib Aawumbɔr. 8M ga di kitiŋ ki aa ye uwɔwɔnja ki pu na tii si ni aayaabitiib. Kanaann aatiŋ kee mɔmɔk ga li ye aa ni aayaabitiib yaan, le ki cha n‑yoonn mu kaa kpa ndoon na, le m ga li ye Baawumbɔr.”

9Uwumbɔr nan ki bui Abraham ke, “Aa mu kii tii mi ke aa ga li joo tipuur ngbaan mbamɔm; saabim ni aayaabitiib bi ga paan ni aa pu na mu kii tii mi ke bi ga li joo ti mbamɔm. 10Aa ni aayaabitiib mɔmɔk kii ke ni ga li geei mbijabim bi mɔmɔk ni ga maa na aachakpan.#17.10: Lik Lituln 7.8; Rom Yaab 4.11. 11-12N‑yoonn mue ki joo cha, ni yaa ma ubijabo u ti saa iwiin iniin daal kan, see ni gii uchakpaln, ki mu gii nimi aanaagbiib, ni baabijabim, ni naah daa binib bi na mɔmɔk aachakpan. Nimina le ga mɔk ke tipuur bi tikaasisik ni. 13See ni mɔmɔk gii ŋichakpan, aan ni li ye limɔkl ke maah puu tipuur ti tii si na aa kpa ndoon. 14Uja yaa kaa gii uchakpaln kan, m ga yakr u maanib chee, ba pu? ni mɔk ke u bii taah nan ŋa kimɔbaan ki na.”

15Uwumbɔr nan ki bui Abraham ke, “Aa taa ki yin aapuu ke Sarai, n‑yoonn mue ki joo cha, aa li gur yin u ke Sara.#17.15: Sara aatataa le ye ke “ubɔrkpaan aabisal.” 16M ga ŋa tinyoor ŋa u pu, le ki cha u maa ubijabo tii si. M ga ŋa tinyoor ŋa u pu, le u ga li ye ŋitimbol pam aana, le bibɔrb ga nyan ni uyaabitiib ponn ni.”

17Abraham nan gbaan Uwumbɔr aanimbiin ni, le unimbil kpaa kitiŋ, tɔ, u nan piin ki laa usui ni, ki dakl ke, “Uja yaa ti saa ŋibin nkub kan, u ga ŋmaa maa ubo oo? Sara aah ti saa ŋibin imonko inaa ni kipiik na, u ga ŋmaa maa ubo oo?” 18Le u baa Uwumbɔr ke, “Saan cha Ismael li ye maafaajir aa?”

19Le Uwumbɔr nan bui u ke, “Ayii. Aapuu Sara le ga maa ubijabo tii si, le aa ga yin u ke Aisak. M ga cha tipuur ngbaan li bi m ni uma ni uyaabitiib mu aakaasisik ni, ki joo cha n‑yoonn mu kaa kpa ndoon na. Ti ye tipuur ti ga li bi cha, kaa kpa ndoon na la. 20M ŋun saah ban m ŋa pu tii Ismael na, nima pu na, m ga ŋa tinyoor ŋa u pu, ki tii u mbim, ni yaabitiib pam. U ga li ye bibɔrb kipiik ni bilee aate la, le m ga cha uyaabitiib ŋa litimbokpaan. 21Tɔ, m ga cha maah puu tipuur na li bi aajapɔɔn Aisak, u Sara ga nan maa u libiln li choo na pu la, kinakokoona aayoonn le u ga nan maa.” 22Uwumbɔr aah len Abraham chee ki doo na le u siir buen.

23Nwiin ngbaan daal, le Abraham nan gaa Uwumbɔr ki kii waamɔboln pu, le ki gii ujapɔɔn Ismael, ni bijab bimɔk nan bi udo lichiln ni na aachakpan. Bijab ngbaan le ye waah nan daa binaagbiib bi na, ni baabijabim mɔmɔk. 24Abraham nan ti saa ŋibin imonko inaa ni kipiik ni ŋiwae, le ki gii uchakpaln, 25le ujapɔɔn Ismael nan ye ŋibin kipiik ni ŋitaa. 26-27Abraham, ni ujapɔɔn Ismael, ni waanaagbiib mɔmɔk nan kpaan nwiin mubaa, le ki gii ŋichakpan.

المحددات الحالية:

Mpiin 17: xonB

تمييز النص

نسخ