Mr 3
3
Kiᵽitaka baikõkotaeka imaekakite Jesúre jieka
(Mt 12.9-14; Lc 6.6-11)
1Iꞌsia beꞌerõꞌõ narẽrĩriwiꞌiarã Jesúre kãkaeka ate. Torã ĩꞌrĩka kiᵽitaka baikõkotaekakire imaeka. 2Jesúre torã kãkaeka ĩatirã ikuᵽaka fariseokaka ᵽuᵽajoairãre ᵽuᵽajoaeka: “Jẽrĩtarirĩmi baꞌirabebeyurã maima imakoꞌomakaja, ¿kiᵽitaka baikõkotaekakire Jesúre jierãñu ruku?”, narĩᵽuᵽajoaeka. “Iꞌrĩmi iꞌsuᵽaka kibaarãkareka, kire mokabaarãñu. ‘Tuᵽarãre Moisére oꞌorũjeka yiꞌriberiwaꞌri baꞌiaja kibaayu’, marĩrãñu”, narĩᵽuᵽajoaeka. 3Jesús ᵽuri ikuᵽaka ãrĩkaki kiᵽitaka baikõkotaekakire:
—Ᵽoꞌimaja wãjitãji mimiꞌmirĩkabe.==
4Iꞌsuᵽaka kire ãrĩweatirã, ikuᵽaka Jesúre ãrĩka torã imaekarãre:
—¿Marãkãꞌã jẽrĩtarirĩmi nimarijarirũ ãrĩwaꞌri Tuᵽarãre iꞌsirĩmi maroꞌsi ᵽoꞌijiaeka jeꞌe? ¿Jía baaokoroꞌsi, baꞌia baaokoroꞌsi, suᵽabaatirã ᵽoꞌimajare tããrika, nare jããrika, dibaꞌi jiibaji mijaroꞌsi ima jeꞌe?== nare kẽrĩka.
Iꞌsuᵽaka nare kẽᵽakãꞌã okamarĩaja kire naꞌmitirika. 5Suᵽabaatirã boebakaᵽi nare ĩabaraka, baꞌiaja kiᵽuᵽarika kiᵽitaka baikõkotaekakire nawayuĩabeᵽakãꞌã. Suᵽa imarĩ ikuᵽaka kire kẽrĩka:
—Miᵽitaka mitĩᵽatabe.==
Iꞌsuᵽaka kire kẽrĩka ᵽoto kiᵽitaka tĩᵽatatirã jia kijarika mae. 6Iꞌsuᵽaka kibaamaka ĩatirã fariseokaka ᵽuᵽajoairãre ᵽoriwaꞌrika Herodes ᵽoꞌimajaka jaiokaroꞌsi. “¿Marãkãꞌã baatirã Jesúre majããjĩñu?”, ãrĩwaꞌri najaibuꞌaeka.
Rĩkimarãja ᵽaꞌwarijerã Jesúre imaekarõꞌõrã ᵽoꞌimajare kiᵽõꞌirã etaeka
7Kimaekarõꞌõᵽi ᵽoriwaꞌritirã Galilea ᵽaꞌwarijerã Jesúre aꞌrika kika wãrũrimajaᵽitiyika. Torã keꞌrika ᵽoto tokarã ᵽariji rĩkimarãja ᵽoꞌimajare kika aꞌrika. 8Torãjĩrã mae, “Jiitaka Jesúre baabearijayu”, ᵽoꞌimajare ãᵽakãꞌã ãꞌmitiriwaꞌri, rĩkimarãja ᵽoꞌimajare kiᵽõꞌirã etaeka. Judea, Jerusalén, Idumea, Jordánria iꞌsiᵽẽꞌrõtorã, Tiro suᵽabaatirã Sidónkarã nimaeka. Iꞌsiaraka wejekarã ñoakurirã imarã imakoꞌomakaja kire ĩarĩ netaeka. 9-10Nikimarã netaeka imarĩ, rĩkimarãja jĩñurãre tããrijayuka kimamaka, “Kire yija rabejĩkareka, jia yija jarijĩñu”, ãrĩᵽuᵽajoawaꞌri kire naraberiyaᵽaeka. Iꞌsuᵽaka simamaka kika wãrũrimajare ikuᵽaka kẽrĩka: “Kũmua mija moꞌabe, ᵽoꞌimajare rĩkimarãja yire rabewãꞌimarĩrijitoika simamaka. Yire natẽrĩtajĩkareka kũmuarã yijãijĩñu”, nare kẽrĩka.
11Suᵽabaatirã Jesúre ĩatirã Satanárika ima ñaꞌrĩjãikarã ĩꞌrĩka uᵽakaja kiwãjitãji ñukuruᵽatirã ikuᵽaka nakasereka:
—Tuᵽarã Maki mime,== narĩka.
12Iꞌsuᵽaka naᵽakãꞌã,
—Ᵽoꞌimajare samija bojaᵽibaꞌsi,== jãjirokaᵽi nare kẽrĩka.
Ĩꞌᵽoũꞌᵽuarãeꞌearirakamarã kika wãrũbaraka imarũkirãte Jesúre wãꞌmaeka
(Mt 10.1-4; Lc 6.12-16)
13-15Iꞌsia beꞌerõꞌõ ĩmimaᵽemarã mirĩwaꞌrirã kibaaeka ᵽoto, kiyaᵽaeka uᵽatire kiakaeka. Ĩmimaᵽemarã kika neyaeka ᵽoto ĩꞌᵽoũꞌᵽuarãeꞌearirakamarãre kiwãꞌmaeka kijeyomarãroꞌsi. Suᵽabaatirã, “Yirika ᵽoꞌimajare wãrõtaᵽarĩ mijare yiᵽũatarãñu. Suᵽabaatirã Satanárika ima ñaꞌrĩjãikarãre ᵽoꞌimajareka ‘Mija ᵽoᵽe’, mija ãrĩrãka uᵽakaja naᵽorirãñu”, nare kẽrĩka. 16Ĩꞌᵽoũꞌᵽuarãeꞌearirakamarãre kiwãꞌmaeka. Ikuᵽaka simaeka nawãmea: Simón wãmeikireje ĩꞌᵽaroka wãmeiki kimarika yaᵽawaꞌri, Ᵽedro Jesúre kire wãmejĩꞌaeka. 17Aᵽerã kijeyomarã imaekarã: Santiago, kibeꞌerõꞌõkaki Juanᵽitiyika, Zebedeo makarã nimaeka. Ĩꞌrã ĩꞌᵽarãre Boanerges#3.17 En griego, Boanerges quiere decir “hijos de trueno”. Jesúre wãmeyeeka. Nokaᵽi samarĩjĩkareka, “Wĩᵽo makarã”, ãrĩrika simaeka. 18Aᵽerã imaekarã: Andrés, Feliᵽe, Bartolomé, Mateo, Tomás, Alfeo maki Santiago, Tadeo, suᵽabaatirã imaekaki, Simón, Celotekaka ᵽuᵽajoaekaki mirãki. 19Suᵽabaatirã Judas Iscariote. Iki kimaeka Jesúre bojajããrũkika.
“Satanárikaᵽi Jesúre baꞌirabeyu”, ãrĩwaꞌri kire nokabaaeka
(Mt 12.22-32; Lc 11.14-23)
20Nare wãꞌmaweatirã, wiꞌiarã ate Jesúre naka ᵽeꞌrika. Torã neyaeka ᵽoto rĩkimarãja ᵽoꞌimajare naᵽõꞌirã rẽrĩka ate. Suᵽa imarĩ noꞌojĩteoka mabaꞌawãrũberijĩka simaeka naroꞌsi. 21Iꞌsuᵽaka kire nabaaika ãꞌmitiriwaꞌri, “Jiamarĩa ᵽuᵽajoaiki kime jeꞌe mae”, kirĩrãre ãrĩka. Suᵽa imarĩ kire akarĩ netaeka nawiꞌiarã kire eꞌewaꞌyaokoroꞌsi.
22Moisére jãꞌmeka wãrõrimaja ᵽuri Jerusalénᵽi etatirã ikuᵽaka Jesúreka jaikarã:
—Satanárika ima ĩᵽamaki Beelzebú kiᵽuᵽakarã ñaꞌrĩjãikaki kime. Suᵽa imarĩ Beelzeburikaᵽi, baꞌiaja baaika ᵽoꞌimajareka ñaꞌrĩjãikare kiᵽoatayu,== ãrĩwaꞌri baꞌiaja kireka najaika.
23Iꞌsuᵽaka naᵽakãꞌã ãꞌmitiritirã, “Iꞌsuᵽakamarĩa sime”, ãrĩwaꞌri bojaokaroꞌsi Jesúre nare akaeka:
—¿Yaje kiuᵽaka ima Satanáre ᵽoatajĩñu ruku? “Ᵽoꞌimajire baꞌiaja jũaerã kiᵽoꞌiarã miñaꞌrĩjãibe”, ãrĩkoꞌomakaja ¿marãkãꞌã baatirã, “Kireka miᵽoᵽe”, kirikaja kẽrĩjĩñu ruku? Iꞌsuᵽakamarĩa sime. 24Aᵽea: Ĩꞌrãtataja najĩrĩjĩkareka, ñojimarĩji naᵽurirãñu. 25Iꞌsuᵽakajaoka simajĩñu ĩꞌrãwiꞌirãja imarãroꞌsi. 26Suᵽabaatirã Satanároꞌsioka. Kirikaka kijĩrĩjĩka jãjimarĩa jariwaꞌri marãkãꞌã kibaawãrũberijĩñu,== Jesúre nare ãrĩka.
27Ikuᵽaka aᵽeroka nare kibojaeka:
—Ĩꞌrĩka oꞌyiokaki wiꞌiarã kibaꞌirĩjia ẽꞌmarĩ eyajĩkire, “Ãjaꞌa, miroꞌsi simarũ”, kẽrĩberijĩñu. Suᵽa imarĩ oꞌyiokakire ᵽiꞌᵽetirã kibaꞌirĩjia kẽꞌmajĩñu. Iꞌsuᵽakajaoka sime yiroꞌsi. Satanáre tẽrĩwaꞌribaji ñimamaka, Satanárika ima ñaꞌrĩjãikarãre yiᵽoatarijayu. Kijãꞌmekoᵽeirãreoka kiroꞌsi yikũmuriarijayu. Suᵽa imarĩ yire jeyobaabeyuka kime Satanás,== Jesúre nare ãrĩka.
28Ikuᵽaka nare kibojañujuka ruᵽu:
—Rita mijare ñañu. Ritaja ᵽoꞌimajare baꞌiaja baaika, suᵽabaatirã baꞌiaja Tuᵽarãreka najaika iꞌyoᵽiꞌriwaꞌri kire sanayeꞌkariarũjemaka, yeꞌkariawãrũiki kime Tuᵽarã. 29Imakoꞌomakaja Esᵽíritu Santorikaᵽi Satanárika ima ñaꞌrĩjãikarãre yijiemaka ĩatirã, “Beelzeburikaᵽi nare kijieyu”, ãñurãre, baꞌiaja nabaaikareka yeꞌkariaberijĩki Tuᵽarã,== Jesúre nare ãrĩka.
30“Beelzebú kiᵽuᵽakarã ñaꞌrĩjãikaki imarĩ, iꞌsuᵽaka Jesúre baawãrũyu”, ĩꞌrãrimakire kireka ãrĩka ãꞌmitiritirã, iꞌsuᵽaka Jesúre nare ãrĩka.
“Ikuᵽaka imarã nime yibeꞌerõꞌõkarã, suᵽabaatirã yiᵽakoarã”, Jesúre ãrĩka
(Mt 12.46-50; Lc 8.19-21)
31Ᵽoꞌimajaka jaibaraka torã Jesúre imaeka ᵽoto kiᵽakore etaeka, kibeꞌerõꞌõkarãᵽitiyika. Torã etatirã ᵽẽterãja natuika. Ᵽẽteᵽi imatirã kire nakarũjeka. 32Kire nakarũjemaka Jesús wãꞌtarã ruᵽataekarã ikuᵽaka kire narĩka:
—Miᵽako, mibeꞌerõꞌõkarãᵽitiyika ᵽẽterã nime. Mire niariyaᵽayu,== kire narĩka.
33Suᵽa imarĩ ikuᵽaka nare kẽrĩka:
—¿Mako koime yiᵽako? ¿Nirã nime yibeꞌerõꞌõkarã? Mae mijare yibojaerã baayu.==
34Ãrĩokaika, kiwãtarã ruᵽaekarãre yoibaraka ikuᵽaka kẽrĩka:
—Mija yika imarãja mija ime yiᵽako, suᵽabaatirã yibeꞌerõꞌõkarã. 35Mia, ikuᵽaka sime: Tuᵽarãre yaᵽaika uᵽaka yiꞌyurã nime yibeꞌerõꞌõkarã, suᵽabaatirã yiᵽakoarã,== nare kẽrĩka.
المحددات الحالية:
Mr 3: TNC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2019, Wycliffe Bible Translators, Inc. All rights reserved.
