San Mateo 9

Jesuu woun ãb khapá jʉser khitʉm monaautarr

(Mr. 2:1-12; Lc. 5:17-26)

1Mag õor mor eem mepeen jʉrkhʉʉiwi, deeu ich khapeen dʉi jap ee pawi dʉrbabaadeeu, deeu thoom igar ich sĩerr phobor ee sĩeimajim aajem, Capernaum phobor ee. 2Mag i barbaichem khaug athaawai woun ãb sĩi khapá jʉser khitʉmta pa bʉʉrkham gaai i aig aibeejierram aajem. Mag ich aig aaunaan wai barbaichem oowia, chi wounaan o akhaar ãba iruata amach aaunaan monaaupʉiju khaphʉ sĩerr aawai, chi khapá jʉser khitʉmʉgta, —Onee abá, pʉ pekau ya thum chugpaa sĩsimgui ajim anʉm.

3Pari Jesuu mag iekhabarm ũrwia, Moiseeu ley phã pʉarr jawaag chi machnaanjã aig thʉnarr aawai, amach odegpai, “Mʉg woun maachjopai sĩewai mag iekhaju khaba simta ichta Ẽwandamjo mag iekha sim” a khĩirju naajim anaabá.

4Mamʉ amau mag khĩirju nʉmjã Jesuu khaphʉ sĩerr aawai magbaawai amag magjim anʉm:

—¿Khantheeta pãar jãg thãar khaigbata khĩirju sĩsid aajẽma? 5¿Wa mag pekau chugpaabarmjã dau daau ooba naawai pãrau khĩirjuawai chadcha phithurg chukhu thumaam khʉʉnau mag iekhaju aai nʉm a nʉwa? Chadcha thumaam khʉʉnau mag iekhaju aaima. Mamʉ mua irig “Phiidʉwi dʉrdʉr abá” akhiin, õrau amach daúacha ooju, i monaau sĩsi wa monaauba khãijã ich mag sĩsim. Magua pãrau cha mua jawaagpamjo chan abaju. 6Mamʉ mʉch chi Emkhooi Iewaata chadcha Ẽwandamau juapá deetarrau mʉig eegar õor pekau chugpaagjã jua theeg chirʉm khap amkhĩir, pãrag oopikhimgui ajim anʉm.

Magnaa chi khapá jʉser khitʉmʉgta, —Phiidʉbaad, maimua pʉch put juurwia pʉch diig petá ajim anʉm.

7Jesuu ichig magbaa chadcha chi khapá jʉser khitarrau i ipierr nem moná phiidʉbaadewi ich diig petajim anaabá. 8Magbarm oowia aig narr khʉʉn dauderraa nʉisijim anʉm. Mag nʉm iekhau warag Ẽwandamagta, “Ʉuhcha jãgbarm, Ẽwandam. Jãan pʉch jua theegauta mʉg wounag jãgpibarm” ajierram aajem.

Jesuu Leví ich dʉi eeurrtarr

(Mr. 2:13-17; Lc. 5:27-32)

9Mag ãb khapá jʉser khitarr monaaupʉiwi beeuta, õrau gobiernoog debpaar phagaan beejem mes gaai mʉ oo chirʉm oochejim ich Jesuu, mag gobiernoog õrau debpaar paraa nʉm jeeu nʉm phidagta phidkha chirarr aawai. Maig mʉ oobaicheewaita ich Jesuu mʉ thʉ̃rcha thʉ̃rnaa, —Mateo, mʉ dʉi marrau ajim.

Magbaa chadcha mʉ i dʉi mawia ich mag i bʉ ogdʉba chirsijim.

10Ag khur maach ich dʉi ogdʉba wenʉrraajerr khʉʉn thum ãba ich Jesús dʉi mʉ di aig thach kho naajim. Mag maar thach kho nʉm aig ĩchab õor khapan mʉ khapeen mʉ phidkhaajerrjo Romaam gobierno athee debpaar jeeujem khʉʉn dʉi sĩi õor amach khaigba nʉm gaaimua agjo thʉ̃rphoo aajem khʉʉnpa beewi maar aig ãbam mes gaai ohood aichejim. 11Mag oobaawai, Moiseeu phã pʉatarr wajapcha ʉʉrkhaajem khʉʉnjã aig narr aawai, jũrr mag maach chi Jesús dʉicha wenʉrraajerr khʉʉnagta, —¿Jãga jãg pãar maestro sĩi debpaar jeeumien dʉi pekau pom sĩsidʉm khʉʉnpata ãba thach kho sĩ? a jeeujierram.

12Pari amau mag jeeubaichem ich Jesuujã ũr sĩerr aawai amag magjim:

—Chi kha monakha nʉm khʉʉnau chan doctor igba aajem; mor masi nʉm khʉʉnauta doctor iigjem ajim amag.

13Maimua magjim ĩchab:

—Wajapha khĩirjunaa Ẽwandam iek phã sim gaaim mua jawaagpam khap abat. Chi phã sim iek gaai Ẽwandamau mag sim: “Muan pãragan sĩi nemchaainta khechnaa mʉrʉg jeeu nʉʉ aju khãai, pãach khapeenta ʉ̃rcha dau aug khaug paraa apim khõsi chirʉm” a simgui ajim Jesuu. Maguata muajã am pekau pom nʉmjã igba, am dʉi thach kho chirʉmgui ajim. Mʉ chan bʉ̃ʉrjã pekau chukhu wajapha khitheem aajem khʉʉn jʉraanjã beeba, mʉʉn õor pekau pooma khitheem khʉʉn peerdʉ awaanta beejimgui ajim, khĩirjug iiur aumkhĩir. Maguata mag õor pekau pom nʉmjã igba, am dʉi thach kho chirabahab ajim, amjã Ẽwandam denkha awaag.

¿Khanthee thach khoba sʉrkhaju aai nʉ?

(Mr. 2:18-22; Lc. 5:33-39)

14Maimua ya ober phobaadem ee, Juan chi õor por choomie dʉi wenʉrraajerr khʉʉn beewia Jesuug jeeuchejierram:

—¿Jãgwi maar maimua fariseonaanjã agjo Ẽwandamag jeeu khewaag ʉ̃iba sʉrkhaajemta, pʉ khapeenta sʉrkhaba aajemma? aichejierram irig.

15Magbaa Jesuu amag magjim:

—¿Pãrau khĩirjuawai jua pʉr nʉm aig õor thʉ̃rkhʉʉitarr okhĩirjuu thach khoba naaju aai nʉ chi jua pʉr sim woun am dʉi sim aig? ajim amag. Magnaa ichdeupai, Ich agjota nʉmgui ajim mʉ khapeenjã. Am okhĩirjuu ajuun, mʉ am jaaijo am dʉi chitʉm pʉr atham ed gayan chadau amach khĩrauta sʉrkhawia ĩchab am thachjã khoba nʉisip aju, gaai machgau. Mamʉ mʉʉgwaiwe chan am sʉrkhaju khaba nʉmgui ajim, agtha mʉ am dʉi chiraawai.

16’Pãade khĩirjubat. Pãran chadcha pãach jooinau jaaujerrjo thach khoba sʉrkha nʉm. Mamʉ pãrau jãg mua iek iiur jaau chirʉmjã khõsinaa agjo warrgarm khĩirjug chi jooijã agtha khõsi wenʉrrʉmʉn, magan mag khĩirjugan sĩi put iiur auwia jũrr khajũa jooi gaai phẽekhabarmjota sĩsimgui ajim. Ãbmua khãijã put iiur khajũa jooi gaai phẽekhakhiin, mag put iiur i pächdʉbaademua chi kha sim ee thʉrrdʉbaadeeu, warag ich warr sĩerr khãaijã nem wäg sĩsijugui ajim amag. Magua chi mʉ iek ʉkha simua chan mʉg iek iiur mua jaau chitʉmjã ʉkhanaa pod amach jooin ijã agjo ʉʉrkhaju khaba simgui ajim, chi Jesús garmua. 17Mʉg mʉ iek ʉkha nʉmʉn vino nemheu iiur ee pʉajemjota simgui ajim. Pãrau khaphʉ nʉm, vino õrr pod nemheu jooi ya chi pʉajem ee pʉju khaba sim. Mag pʉkhiin, chi vino õrr achpabaadeewai, chi nemheu jooiraa sĩewai, ãwatba jẽgdʉbaadee, chi vinojã ãrbaadem dʉi chi nemheujã ya tag serbiiba sĩsijugui ajim. Maguata vino õrran agjo nemheu iiur eeta pʉajem; maagwai nemheujã jẽgdʉba, chi vinojã ãrbamgui ajim, mag ichig jeeuchetarr khʉʉnag.

Jairo kha, maimua ʉʉi ãbmua Jesús khajũa gaaipai pʉrtarr

(Mr. 5:21-43; Lc. 8:40-56)

18Mag Jesús agtha Juan por choomieu õor pʉitarr dʉi iyʉʉ dʉnʉm ee, maach meeun eem judío ãb chi porkha sim beewi sĩi i khĩirphee kanieu phõbkhabaichejim. Mag phõbkhachewi irig chaigpamamua, —Chaigpai mʉ khadam chugpajimgui ajim. Pari pua mʉ di aar manaa i gaai pʉrimakhiin, mua khaphʉ chirʉmgui ajim, pua deeu i iiu auju.

19Magbaawai Jesús phiidʉwi petaawai maach chi khapeenjã i dʉi wetjim. 20-21Pari mag wetum ee, ʉʉi ãb phõmieu bar sim beewi meraa eugarmua i khajũa i gaai pʉrchejim, ich odegpai “Nau i khajũa gaai pʉrbarmuapai mʉ monaauju” a khĩirjuwia. Ich mag ʉʉi doce años mag phõmie dʉi sĩejim, bʉ̃ʉrjã chugpaa khaugba. 22Pari mag ich gaai pʉrbaichemjã khaphʉ sĩerr aawai ich chi Jesuu irig ewag phʉʉrba oonaa, —Oob chigaa am; mua pʉch monaauju khaphʉ mʉ gaai pʉrchetarr gaaimua, ʉu pʉ monaauwi peerdʉjã peerdʉ ʉisibahab ajim chi ʉʉirag.

Mag, chadcha Jesuu magbarm bʉrre mag ʉʉi monaau sĩsijim.

23Maimuan chad warag ereubaadewi, chi binaandam wai narr di aar barwi ooimaawai, okhĩirjuu nʉm iekhau sĩi ʉrrsirpa jẽb thʉnʉm dʉi gaai machgau bĩep sereu thʉnʉmta ooimajim, amach i arr aawai. 24Magbaawai amag, —¿Khantheeta jãg thʉnʉ́ma? Chaai meeba sĩita khãi sĩebahab ajim. Magnaa, Jopcha dawag ereubaadet ajim amag.

Pari irua mag iekha sim ũrwia aig thʉnarr khʉʉnau warag i wau iekha naajim. 25Maimua õor thum dawag obeerkhapʉiwia, chi binaandam aar dubwi, i juadam gaai pʉrbaimaawai warag dʉi pʉr phiidʉbaadejim. 26Mag irua chaai phiriu autarran ich ag durr ee warpham magweta bĩi joisijim.

Dau khĩsu khithee arr khʉʉn numí Jesuu dau monaautarr

27Mag Jairo kha deeu iiu auwia petaau, dau khĩsu khitheem khʉʉnta numí i ẽudee ähäag wetjim. Mag ähäakhamua, —Jesús, pʉʉta rey David khachitarr ag chaain ewagam khʉʉn Iewaa marau nʉ narr; maar apdurrum maar dau aug khaugbahur aajeejim, amach dau monaaupäain beemkhĩir.

28Pari Jesús warag ich jẽer sĩerr diig majim. Pari magʉmjã pʉaba i ẽudee wetwi, ich aar bardʉtkhabaimaawaita, amag, —¿Pãrau khĩirjuawai mua chadcha pãar dau monaaupʉiju chirʉ́? a jeeujim.

Magbaawai amachdeu, —Eera, marau khaphʉ nʉmgui ajierram, chadcha pua maar dau monaauju.

29Magbaawai Jesuu am dau eu aaithʉ aaithʉnaa, —Mua pãach dau monaaupʉijuuta pãachdeu khĩirju narr aawai chadcha pãar dau monaaupʉikhimgui ajim amag.

30Mag chadcha irua magbarm bʉrre amach numwe sĩi daujã wajappha aphobaadejim. Maimua Jesuu amag bʉ̃ʉrjã bithurgam khʉʉnag jaaupibajim mag amach dau monaaubarm. 31Pari magtarrta, sĩi aigmua ober phobaadewi ich mag durr eepain amach wenʉrrʉmpierr jaaumajierram anaabá, jãga Jesuu am dau monaaujĩ.

Woun ãb pod iekhaba khitarrta Jesuu iekhapitarr

32Mag dau khĩsu khithee arr khʉʉn Jesús aig naawi daau paaukhabaadem ee, jũrr woun ãb pod iekhaba khitʉmta i aig aibeejierram. Ma por benmie paraa sĩejim, dosãt ben. 33Mag ich aig waipierrwai mag benjã Jesuu jẽu werbajim. Magbaa mag meu meraa sĩerrta nem meu opherg ich mʉg iekha sĩsijim. Magbarm oowi õor dauderraa nʉm iekhau, “Keena, mʉig Israel durr chan maach ee ag na maadeu mʉg ooba aajerr ĩsta chadcha maadeu mʉg oo nʉmwai” aajeejim jũrram khʉʉnau.

34Pari bithurgam khʉʉnau sĩi mag durrum ee, jũrr fariseonaanau warag am ichaaur, “Jã sĩi dosãtnaan por dʉi khapeerkha sĩewaita ag juapaauta irua jãg õor mor eem mepeenjã dau daau jʉrkhʉʉi sĩebahab” aajeejim.

Ẽwandam iin jaauju pooma thʉnʉm; mamʉ chi jaauju khʉʉnta chukhum

35Jesús phoborpierr nʉrrʉmua didam khapan khaba khekhedʉm eem magwe phʉʉrdʉ nʉrraajeejim. Mag nʉrrʉmua Ẽwandam iek jaaujem deg dubwi maach peerdʉajem iek jaaumamua, “Ẽwandamta maach thumaam khʉʉn Porkhaimʉʉ sim; magua irigta ideu pãach thãar ajaug paapibat” a jaaujeejim. Mag nʉm dʉi ĩchab õor khamor machagjã khĩirpierr monaaumaajeejim, kha mamachdogpa. 36Mag nʉrrʉmua sĩi õor pooma oveja chaaindamta chi thʉajã chukhu sĩi dau aphʉʉ parhoob aaidʉ thʉnʉmjo oobaawai, am dau aug khaugwi, 37maar ich khapeenagta, —Chadcha Ẽwandam i jaau nʉmʉn, arrozdo pom phur wejomjota phidag pooma simgui ajim. Mag simta chi jaau wenʉrraju khʉʉn chan khapan khábata durrum. 38Magua muan pãragan Ẽwandamag jeeubat a chirʉmgui ajim, warag ich i jaauju khʉʉn khapan jopheecha ich i jawaan pʉimkhĩir.

المحددات الحالية:

San Mateo 9: noaA

تمييز النص

نسخ