San Mateo 12

Jesús khapeenau jua ʉ̃ʉijem ed trigo phierrtarr

(Mr. 2:23-28; Lc. 6:1-5)

1Ich mag jaar biek ãb jua ʉ̃i nʉm edcha maach i dʉi wenʉrraajerr khʉʉn thum i iek jaauthurwia deeu i dʉi narr aawai, ich Jesuu trigo phur wejom ee maar phe wai dichjim. Magbaawai maar ee ãaur khʉʉnau chi bich thʉrreunaa, jua eepai sigthʉnaa kho wenʉrrajim. 2Maig ĩchab fariseonaanjã dʉi narr aawai mag oowi ich Jesuugta, —Pʉde oobá, jua ʉ̃i nʉm ed aawai bʉ̃ʉrjã phidkhaju khaba nʉmta, pʉ khapeenau jãg trigo phierrnaa kho wenʉrrʉm. ¿Pua chan khaugba ab, jãgpai phierr nʉmjã nem pom eeu nʉm dʉi ãba sim? ajierram irig.

3Magbaawaita jũrr Jesuu amag, —Mamʉ ¿khani mʉ khapeenau khaigba abar? ajim. ¿Magan pãrau chan Ẽwandam iek phã sim gaai thʉ̃ʉrwai ooba aajeeb, Davidau ich dʉi wenʉrrarr khʉʉn dʉimua amach jãsoo phobaadeewai Ẽwandam atheem pan khotarr? 4Mag pan parhoobam khʉʉnau khoju khaba, ãba phadnaanaupaita khoju aai naajim. Mamʉ pãrau khaphʉ nʉm, jãga irua Ẽwandamag jeeujem deg dubwi Ẽwandam atheem pan nasãd gaai phe sĩerr auwi khojĩ. Mamʉ mag khotarr paarjã Ẽwandamau i chig abajim. 5¿Wa pãrau Moiseeu ley phã pʉatarr gaai thʉ̃ʉrwai ooba aajẽwa? Jua ʉ̃ʉijem ed awiajã phadnaan Aai i jeeujem deg phidkhaawai pekau khabam a sim. 6Mag Aai i jeeujem deg phidkhaju aai sim khai, ¿jãgwi mʉ mag Aai i jeeujem di khãaijã ich Jooiraucha pʉitarrauta sabarhed awi mʉch khapeenag trigo phierr khopi jaauju khaba chirʉ́? 7Wajapcharan jãg Ẽwandam iek phã sim gaai jaau sim pãrau khaugbata naabahab, Ẽwandamau ich iek gaai “Nemchaain thõonaa mʉrʉg jeeuwai ʉu sĩeb mamʉ, muan pãach khapeenta ʉ̃rcha dau aug khaug paraa apim khõsi chirʉm” a sim. Pãrau irua mag sim wajapha khaphʉ naakhiin, jãg õor iekkhõr chukhum khʉʉndampa pãrau khaigba nʉm a jaaubajugui ajim.

8Maimua am jʉ̃gdaar mag iekhapʉiwia deeu ichdeupai, —Mʉʉn Ẽwandam Iewaa Emkhooirau. Muata thumaam khʉʉnag khan nemta wauju aai nʉ wa wauju khaba nʉ a jaauju aai chirʉmgui ajim, jua ʉ̃ʉijem ed awiajã.

Woun ãb jua jʉser khitarr Jesuu monaaupʉitarr

(Mr. 3:1-6; Lc. 6:6-11)

9Mag trigodo ee fariseonaan dʉi ijẽjẽb sĩewi petaau, aigmua dakha maach meeun Ẽwandam iek jaaujem di sĩerr ee dubimajim. 10Mag Aai i jaaujem deg woun ãb jua jʉser khitʉmjã sĩejim. Amach chi fariseonaanau Jesús ipeerdʉwi nem agcha khaba jaaubarm gaaimua i imeraa pʉr auju ẽkhaajerr aawai, juau ogthom irig, —¿Jua ʉ̃ʉijem ed awiajã, õor mor masim khʉʉn monaauju aai sĩ? a jeeujierram.

11Magbaawai ichdeu amag magjim:

—Pãar mʉg nʉm aig pãar ovejadam dau ãb khãijã jẽbdeg buudimaawai, ¿khaíuta jua ʉ̃ʉijem ed awia jẽu awaan maba aajẽ? Mag sim, ¿pãrau oowai maach wounaanta nemchaain khãaijã ʉ̃rcha balee naabá? ajim. 12Mag sim aawai jua ʉ̃ʉijem ed awiajã ichiita muan õor dau aug khaugju aai nʉm a chirʉm ajim amag.

13Magnaa ich Jesuupai chi woun mag jua jʉser khitarragta, —Dayag jua ʉabá ajim.

Magbaa chadcha jua ʉabaa jua monakkha warm chi wajapha sĩerr dʉi ãba sĩsijim. 14Mamʉ jua ʉ̃ʉijem edta magbarm oobaawai, aigmua oberaau, chi fariseonaanau Jesús thõopʉyaag jãga akhiina a khĩirju nʉisijim anaabá.

Jesús igwia warrgarwe jaautarr

15Mag ich thõopʉiju khĩirju phobaadem ich Jesuu khaug athaawai ichta warag aigmua petajim. Mag i petaawai õor pom dʉi i ẽudee wetjim. Jesuu mor masim khʉʉn thum ich aig waibee nʉm monaaupʉi maajeejim. 16Mamʉ ichdeu mag õor monaau simjã sĩi khapanag ee parhooba ich jaaupiba aajeejim. 17Pari magtarran, Ẽwandam i jaaumie jooi Isaías khararrau ich Jesús igwia jaautarrjo amkhĩir ajim. Chi Ẽwandam iek gaai i igwia mag sim:

18“Achá sim mʉ chog” a sim Ẽwandamau, “mʉchdeu jʉr autarr mʉchdeu khõsim.

I gaaimuata mʉ onee chirʉm.

I gaai, mua mʉch Akhaarta phẽs deeju.

Magbaawai irua jaauju, jãga õor mʉ dʉi wenʉrraju aai nʉ.

19Í chan õor dʉijã meeurraunaa khĩesir ijẽjẽbjã aba, ni kaaijã ee õor dʉi meeukharrjã chukhu aju.

20Mag i pʉibarm chan õor dau aphʉʉ khitheem khʉʉn warag dau aug waupiegjã khaba, ni ich iek gaai ubʉ khaba khitheem khʉʉn okhoopiegjã khaba,

warag ich meebarm gaaimua õor ʉu peerdʉju ayaa apiegta pʉiju.

21Magbaawai durrpierram khʉʉnau i igwia, ‘Jãguata chadcha ʉu maach peerdʉ auju khabahab’ ajurau” a sim Ẽwandamau ich iek gaai. (Is. 42:1-4)

Fariseonaan iek meperauta Jesuug juapá dee sĩejim aajem

(Mr. 3:20-30; Lc. 11:14-23; 12:10)

22Biek ãb woun ãb dosãt beneu sim Jesús aig aibeejierram. Mag woun ich ag beneu meu meraanaa daujã khĩsu khitajim. Mag ich aig aipierrwai Jesuu i dau monaaupʉiwia mag meu meraa sĩerrjã wajapha iekhapijim. 23Mag oowi õor dauderraa nʉm iekhau amach wir aigpai, “¿Keena, mʉg woun jooi David khararr chaain ewagam khʉʉn eem maach peerdʉ aumkhĩir pʉiju aajerr khabam khai?” aajeejim, Jesús igwia.

24Pari õordamau sĩi mag nʉm ũrbaawai fariseonaanau jũrr am ichaaur, —Dosãtnaan por Beelzebú dʉi ben dotarr aawaita ag juapaauta jãg õor mor eem mepeenjã dau daau jʉrkhʉʉi nʉrrʉm aajeejim.

25Pari amau amach eepai mag nʉmjã Jesuu khaphʉ sĩerr aawai jũrr ich garmua amag magjim:

—Pãrau oowai, gobiernoou ich igar nʉm khʉʉn jãrrcha thoonaa amach wir aigpai werbʉpikhiin, ¿mag gobierno warre khʉt mabaju khai? Wa ãbmua khãijã ich chaain dʉipai meeukhawi amach wir aigpai werbʉkhiin, ¿warag aaidʉbaju khai? 26Pãar iek mag mʉjã dosãt dʉita chirʉm anaawai, dosãtauta wir aig dosãtpai jʉr werpkhiin, pod ich mag jua theeg sĩerrabajugui ajim. 27Chadcha mag dosãtnaan por Beelzebuuta mʉrʉg ich jua theeg dee sim khai, magan ar pãach igar thʉnʉm khʉʉnaujã agjo i juapaauta mepeen jʉr werp nʉm. Mag nʉmta ¿jãgwi pãrau makhʉʉnag chan bʉ̃ʉrjã magʉm aba nʉ? ¿Chadcha ich Ẽwandamauta amag magamkhĩir ich juapá dee sim pãachdeu khaphʉ naawai khabá? Pãar iek mag chi dosãtaupaita wir aig ich khaibag waaujem anʉpí, magan jãg chi mʉ denjo dau daau mepeen jʉr werp nʉm khʉʉnagchata jeeu oobat, daau amau chadcha dosãt juapaauta jãg jʉr werp nʉm abarju. Pãach chi mʉrʉg mag iekha nʉm khʉʉnta ag eyaajã khaba iekha naabahab. 28Muan chadcha Ẽwandam jua theegauta mepeenjã jãg jʉr werp chitʉmgui ajim. Mag mepeen mua jʉr werp chirʉm gaaimua pãrau khaphʉ aju aai nʉm, ya ich Ẽwandam chi jua thierrta mʉig pãar ee sĩeichem. Mamʉ magʉmjã pãrau khaugba nʉmgui ajim.

29’Pãade khĩirjubat. Ni ãbmuajã mʉg nʉm aig sĩi ãb jierrnem wajapham dʉi ich di thʉa sim aig dubwi i nem jĩgkhabaju. Sĩi khapanaam khʉʉnau wa i khãai ʉ̃rʉʉcharamua i ibʉʉr auwi khabam chan, pod i nem jĩgkhabamgui ajim. Ich agjota simgui ajim mepeerjã. Mʉ i khãai jua theeg ʉ̃r khaba chirakhiin, muajã pod õor mor eem mepeen jãg dau daau jʉr werpbaju. Mamʉ mua chadcha Ẽwandam juapaauta mʉg nem wau chitaawai meperaujã mʉ jua jʉmba aajem. 30Magua, mua mag chirʉm: Ar chi mʉ igar khaba sim wounan ichta dosãt igar sim; maimua Ẽwandam iek ʉkhapi awaag mʉ ipierr õor ãbamʉg jʉr pheba simuan waragta jʉr werp simjo simgui ajim.

31’Magua, mua mag chirabma ajim ich Jesuupai: Ẽwandamaun chadcha õor khaibag thumaa chugpaaju, am parhoob iekhamatarrpa thum. Mamʉ pekau ãb sim, maan mua Ẽwandam Akhaar jua theegau nem wau chitʉm oo nʉmta warag mepeer gaai thʉ nʉmʉu. Mag pekau chan Ẽwandamau bʉ̃ʉrjã khĩir okhoobamgui ajim. 32Mʉch chi Emkhooi Iewaa igwiata khaigba khãijã iekha nʉm pekaun ʉu chugpaaju; mamʉ chaig pãrau mua mag Ẽwandam Akhaar juapaau khaba Beelzebú jua theegauta mepeenjã jʉr werp chitʉm anarr chan mʉig eegarjã chugpaaba, ni mʉg atag Ẽwandamau deeu jẽb iiur ompaabarm gaaijã chugpaaba ich mag sĩsijugui ajim, Ẽwandam Akhaar igwiata mag iekha naawai.

Jãga õor wajaug khaphʉ aajẽ

(Lc. 6:43-45)

33Mag iekhakhagmamua ĩchab amag magjim Jesuu: —Pãade mʉ seu awia nemjĩir jĩirwaijã wajap jarba sĩi ich jãg bãaupibat. Mag nemjĩir wajap chebajugui ajim. Mamʉ wajaphata phãichichagau bʉ khuanaa jar bãaumʉn, mag nemjõ wajapha cheju. Wajapcharan ich che sim gaaimuata khaphʉ aajemgui ajim, jãga sĩ mag nemjõ. Ich jãgta naabahab ajim pãarjã agjo. Pãach nem wau nʉm gaaimuata pãachdeupai pãach jaau naabahab, õor wäjäauná wa õor khaigbam khʉʉná. 34Khĩirjug chuknaan, jãg pãar o khaibag sĩsidʉm khʉʉnau, ¿jãga pãrau nem wajapham ig iyʉʉ abarju? Nem dich khĩirjug ee khĩirju ahaukhamta dich iiu jaauba aajeeb. 35Õor khĩirjug wajapham khʉʉnau nem wajapham nemta iekha nʉm, amau nem wajaphamta wauju khĩirju naawai. Mamʉ o khaigbam khʉʉnaun, iekhaawaijã khaigbata iekha nʉm, am odi sĩi nem khaigbamta wauju khĩirju sĩsid aawai. 36Pari mʉ cha iekha chirʉm iekhau, Ẽwandamau õor i agkham edan, mʉig eegar aawai pãach iek khaigbam iekhaajerr thumaa pãach idamaucha irig jaaujugui ajim, khan jãgwia mag iekhaajeejĩ. 37Wajapcharan mʉig eegar aawai pãach iekhamaajerr iekhaupaita wir aig pãach iekkhõr chukhu nʉm a jaaupiju, wa warag pãach khaibag khãijã waupi jaaujugui a jaaumajim chi fariseonaanag.

Fariseonaanau amachdeu nem ooba aajem waupi jaautarr

(Mr. 8:12; Lc. 11:29-32)

38Biek ãb fariseonaan eem khʉʉnau maestronaan eem khʉʉn dʉimua Jesuug, —Maestro, maraun maach dakhĩirta pʉrʉg ag na bʉ̃ʉrjã maadeu ooba aajem nemta waupim khõsi nʉmgui ajierram.

39Magbaawai ich Jesuu amag magjim:

—Pãran pãachdeu Ẽwandam iseg nʉm gaaimua warag chi ajaugjã chukhu thʉnaawaita warag pãachdeu nem ooba aajem nempata pãach dakhĩir waupi nʉm. Mamʉ mua waubamgui ajim. Mag khãai warrgar jooi Jonás aajerr nemmeeurrkhan buch ee khãai thãrjup sĩerr gaaimua Nínivepienau Ẽwandamau i pʉitarr khaug autarrjota, ĩchab mʉchjã Ẽwandamau pʉitarr pãrag khap apijugui ajim, mʉch iiu phiidʉbarm gaaimua. 40Ich jãg Jonás nemmeeurrkhan bi ee ãsdawam khãai thãrjupnaa edaramjã khãai thãrjup sĩerrjo, ich agjo mʉch chi Emkhooi Iewaajã ĩchab ãsdawam khãai thãrjupnaa edaramjã khãai thãrjup chirajugui ajim, jẽb ee. Mamʉ mag oobarmjã pãrau ʉkhabajugui ajim amachigcha. 41Magua, Ẽwandamau õor ich aar phe auju wa phe auba khãijã aju jaau nʉm ed, Nínivepien phiidʉtkhawi amach ipaarmua pãar khaibagta warag Ẽwandamag ĩgkha thʉnʉʉuju, warag pãar khaibag waumkhĩir. ¿Khan jãgwi? Jonaau Ẽwandam iek amach aar jaaubaimaawai amau magʉmjã aba ʉkhatarr aawaima. Mamʉ ĩs mʉ Jonás khãaijã ʉ̃rʉʉcha chirʉmuata Ẽwandam iek jaau chitʉmjã pãrau bʉ̃ʉrjã ʉkhamapha nʉmgui ajim. 42Mag Ẽwandamau am phiriutkha auwia chachbarm jaar ĩchab Sabá durrmua rey Salomón oon beetarr ʉʉiraujã ich ipaarmua ĩchab pãar khaibagta Ẽwandamag ĩgkha thʉnʉʉujugui ajim, í pãar khãaijã warpmuata Ẽwandamau Salomonag khĩirjug deetarr iekha sim ũraan beetarr aawai. Mag khãai mʉ Salomón khãai ʉ̃rpai chirʉmuata mʉig pãach nʉm aig Ẽwandam iek jaau chirʉmjã pãrau ũrmapha nʉmgui ajim, mag amachdeu nem ooba aajemta amach dakhĩir waupi narr khʉʉnag.

Ben ãkhãar deeu õor mor ee sĩeicheewai jãga aajẽ a jaautarr

(Lc. 11:24-26)

43Mag iekhakhagmamua, —Ĩs mʉg mʉ iek ũrbarmjã ʉkhaba abarm gaaimua warram khãaijã warag Ẽwandam dʉi iekkhõr pom nʉisim khap amkhĩir, pãrag mʉg ejemplo jaaukhimgui ajim. Magnaa ichdeupai, Ben khaigbam õor mor eemua jʉrpäaiwain warp õor chukag ee phʉreu nʉrraajem. Mamʉ pod ich sĩeimaju baauba abaawai khĩirju sĩi awia, 44“Deeu mʉch chiraajerr deg chiraimaag majugui” awia, deeu ich ag woun jʉrmaajemgui ajim. Mag mawia ooimaawai, chadcha di chaarta wajap thũapwi ãbamʉg nem jokhanaa au sĩsidʉmjo dijã parii ooimaajem. 45Mag oobaimaawai, deeu mawia, ich daumaai ich khapeen ich khãaijã khaigbacharam khʉʉn siete jʉr phe auwia, deeu mag woun mor ee naaicheejemgui ajim. Magbarm aigmua chi wounjã warr ich sĩerr khãai warag athuuchata khaibag sĩsiejem. Ĩsim khʉʉn jãg khaibag sĩsidʉm khʉʉnjã ich magta ajugui ajim meperau am dʉi, Ẽwandam iek ũrtarrta ʉkhaba arr gaaimua.

Jesús eeugpeenau amach ãd dʉimua i dʉi iekham ig narr

(Mr. 3:31-35; Lc. 8:19-21)

46Agtha Jesuu õrag iekha sim ee, i ãd i eeugpeen dʉi bardʉtkhachewia i dʉi iekham ig naajim. Mamʉ i sim aar dubba daaugajãrpai naaichetarr aawai 47ãbmua chi Jesuug, —Pʉ ãd pʉ eeugpeen dʉi daaugajãr nʉmwai; am iek pʉ dʉi iekham khõsi nʉm aajem a jaaujim.

48Magbaa jũrr ichdeu, —¿Chijã agá mag mʉ ãd, maimua chijã khʉʉn agá mag mʉ eeugpeen? ajim.

49Magnaa maach ich dʉi ogdʉba wenʉrraajerr khʉʉnagta jua ʉanaa, —Chamʉ khʉʉnta mʉ ãd anaa mʉ eeugpeenauwai ajim. 50Mʉrʉgan mʉ Aai ʉ̃gthar chiraajemua khõsimjo nem wau nʉm khʉʉnta mʉ ãd anaa mʉ ʉ̃phʉʉinau, maimua ĩchab makhʉʉnta mʉ khodnaanaugui ajim, ich Jesuu.

المحددات الحالية:

San Mateo 12: noaA

تمييز النص

نسخ