THRÜNTAN 35
35
Bethel ching Jakob Müngühjihkhi
1Judüki Thrünpuhnü Jakob ki tha, “Asürang, Bethel lim wutuang tüsho ju ching laang; tüsho nü khiung Esau kheaknü nü tsochoki nü ki akhiukbuh Thrünpuh kilim kingaün sadam khülang thsang.” 2Jakobnü api yamkhün tüsho api lung larü alala ki tha, “Nüsa bolung lakhi khiungkerü thrünpuhbo bahbah nüsa tsangkhitang, tüsho nüsa khimmihbo müthriang. 3Jushu isanü tsahmusuanü tüsho Bethel lim wutuanü; tüsho inü ju ching I lümthsünü nimung I ki alojihbuh tüsho I yükhi limro ching I lung lakhi Thrünpuh kilim kingaün sadam khülang thsübah.” 4Jumonü arünü arü khah ching lakhi khiungkerü thrünpuhbo alala tüsho arü nuku ching lakhi nüpübo alala Jakob kilim jih; tüsho Jakobnü jurü Shekem ching thülamdung khüp ramabah.
5Judüki arünü tsahmusu, tüsho arü miki kiutobo alala kheak Thrünpuh mihtrebe lakheah, tüsho arünü Jakob tsührübo yande mümüsham. 6Jumonü Jakob tüsho api lung mihtsürü alala Kanan lomi ching lakhi Luz (ju Bethel) ching arü. 7Apinü ju ching kingaün sadam khülang thsü tüsho ju dangpung ki El Bethel#Bethel Thrünpuh de ji, tümütüsho api akhiung kheaknü atsochoki ju ching Thrünpuh api ki akhiuk. 8Kheakü Rebeka mütrübe Debora sheabah, tüsho Bethel bukkhüp thülamdung khüp kiuyukabah. Jumonü ju mung Allon Bakuth#Mitrip thülamdung de ji.
9Kheakü api Paddan-aram chingnü arüchoki Thrünpuhnü Jakob ki akhiuk tüsho api müngühjih. 10Tüsho Thrünpuhnü tha, “Nü mung Jakob ah; kheaküa nü mung Jakob de müji, tüshe nü mung Israel labah.” Jumonü apinü anihbuh mung Israel de ji. 11Kheaküshe Thrünpuhnü api ki tha: “I Wuto Thrünpuh. Aso asoang tüsho wüh buang; trükshihbo nü kheaknü akhiukbah tüsho nü pang chingnü kiulongthsürübo arübah. 12Inü Abraham tüsho Isak jihkhi lo nü kilim jihchoh; tüsho nü dunglim nü tsühsoniusobo kilim inü ha lo jihchoh.” 13Judüki apinü anihbuh ki asukachihkhi dangpung chingnü Thrünpuh ju yükihabah. 14Jumonü apinü anihbuh ki asukachihkhi dangpung ching Jakobnü mümihlung khülang khima zo; tüsho apinü ju kheak ayungbe kingaün le müdangke bukkih. 15Tüsho Jakobnü api ki Thrünpuhnü asukachihkhi dangpung mung ju Bethel de ji.
Rachel Shekhi
16Judüki arünü Bethel chingnü hantsahmusu. Tüsho arübo Ephra khiungpü adükeak anükhüh lachoki Rachel khungarü zübepü khiung tüsho thsünü ato ching lakheah. 17Küyimki alibe thsünü ato ching lakheanü, zübe-mütrürünü anihbe ki tha, “Dütre; nü tsührü kheaküshe lah.” 18Tüsho anihbe me chamachihde alachoki (tümüde alibe sheabah), alibenü api mung Ben-oni#I mulong rozhak tsührü. de ji; tüshe abuhnü api ki Benjamin#Kuhi lakhi tsührü. de ji. 19Junangde Rachel sheabah tüsho Ephra (ju Bethlehem) limro kheak kiuyukabah. 20Tüsho Jakobnü anihbe kiuyuk kheak mümih-lung khima zo; ju khihni khiungde Rachel kiuyuk mümih-lung lah.
21Jushu Israelnü hantsahmusu tüsho Eder rünchang hobah api khimyam thsü. 22Tüsho küyimki ju lomi ching Israel lakheanü, Reubennü abuh hanniube Bilha kilim yü tüsho müyam; tüsho ju dünkheak Israelnü so.
Jakob Tsührübo
(1 Kiuthsü 2.1-2)
Jakob tsührü 12 lakheah: 23Lea tsührübo Reuben (Jakob tsührü adüjibuh), Simeon, Levi, Juda, Issakar, tüsho Zebulun; 24Rachel tsührübo Josep tüsho Benjamin; 25Rachel yamlabe Bilha tsührübo Dan tüsho Naphtali; 26tüsho Lea yamlabe Zilpa tsührübo Gad tüsho Asher. Harü ha Paddan-aram ching Jakob kilim zübejihkhi tsührübo lakheah.
Isak Shekhi
27Judüki Jakob ju Abram tüsho Isak lacholapung Mamre yungsho Kiriath-arba (ju Hebron) ching abuh Isak kilim arü. 28Kheakü Isak kam 180 lakheah. 29Junangde shinde tüsho nimung khiungde labah she tüsho api mihtsürü kilim yü; tüsho api tsührübo Esau le Jakob bünenü api kiuyukabah.
المحددات الحالية:
THRÜNTAN 35: YIMCBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
