Woo bɛ ŋa 20

Pɔlu í bɔ Masedɔni do Gɛrɛsi

1Iyi hoya hoyau í leekĩ ŋɔi Pɔlu í tɔtɔɔ inɛ ŋa iyi à waa too kpãai Jesu ŋau í mu nŋa gbugbã nɔ í tɔɔ ŋa sukudɔ̃ í bɛi í nɛ ilɛi Masedɔni. 2Í dabii si ilɛu fei í mua inɛ ŋa iyi à waa too kpãai Jesu ŋa gbugbã ntɔ ntɔ, í bɛi í to ilɛi Gɛrɛsi 3í ce bɛ cukpa mɛɛta. Waati iyi wa bi akɔi inyi ku lɔ ku bɔ ilɛi Siri ŋɔi í gbɔ iyi Zuifu ŋa à waa dɛ nŋu ku kpa. Na nŋu, í dasi idɔ nŋu ku too do ikpa Masedɔni má. 4Inɛ ŋa iyi à suu si isɛɛnɛɛu wee. Sopatɛɛ amai Pirusi inɛi Beree, do Aritaaki do Sikundusi inɛi Tɛsalonika ŋa, do Gayusi inɛi Dɛɛbu, do Tisiki do Torofimu inɛi ilɛi Azii ŋa do Timɔtee. 5Aŋai à cua à koo à degbe wa Torasi. 6Iyi awa taka nwa à jɛ jingaui Pɛ̃ɛ hai nɛ levɛ̃ɛu à tã, ŋɔi à koo à lɔ akɔi inyi Filipi. Nɔ si isɛɛnɛ nwau si ajɔ miiusia à koo à ba ŋa Torasi. Ŋɔi à ce ajɔ mɛɛje bɛ.

Pɔlu í ce waazo Torasi

7Ŋɔi ajɔ sintei azuma alɛu awa à tɔtɔɔ à waa jɛ ijɛi Lafɛ̃ɛ, ŋɔi Pɔlu í wasi ku cea inɛ ŋau waazo. Bii iju í mái Pɔlu á nɛ. Ŋɔi í jɔ̀ waazoɛu í sɔ hee í to idũ laja. 8Wee fitila í kpɔ lelei ile kukpɛkɛ bii à tɔtɔɔu. 9Ŋɔi awaasũ gɔ wa buba si fɛrɛnti bɛ à ya kpoo Etiki. Si bɛi waazoi Pɔlu í sɔ ŋɔi í siiko hee í na í sĩ njoo nɔ í cuku wa ilɛ hai lelei ile kukpɛkɛ mɛɛtasiau. Iyi à koo à dedeɛ à ba wee í ku. 10Ŋɔi Pɔlu í kita wa nɔ í bate í soo í ni, i maà ce njo ŋa, hundeɛ í wɛɛ. 11Iyi Pɔlu í gũ lelei ileu má í so pɛ̃ɛ í bububuɛ nɔ aŋaò ŋa à jɛ, nɔ í lɔsi ku waazo má hee iju í koo í má í bɛi í nɛ. 12Nɔ à bɔò Etiki iyi í nya í cuku wau kpasɛ̃ baani nɔ inɔi aŋa fei í dɔ̃ jiida jiida.

Hai Torasi Pɔlu í bɔ Milee

13Awa à koo à lɔ akɔi inyi à cua à bɔ Asosi. Tengi bɛi Pɔlu á na ku ba wa nɔ ka soo. Bɛɛbɛi í bi si na iyi í jɔ̀ wa bi ku koo do isɛ. 14Iyi í naa í ba wa Asosi, hai bɛi í lɔ akɔi inyi awaò ŋa à bɔ Mitilɛni. 15Ŋɔi à nɛ hai bɛ nɔ iju kumáɛ à to gũngũm gɔ iyi à ya kpe Kio. Iju kumá mmuɛ nɔ à to gũngũm mmu gɔ iyi à ya kpe Samɔsi, ŋɔi ajɔ mɛɛtasiaɛ à to Milee. 16Wee Pɔlu í dasi idɔ nŋu ku maà leekĩ Efɛɛzu ku ba waati ku maà lɔ nŋu si ilɛi Azii. Wa ce kookaai fei ku ba nŋu ku to Zeruzalɛmu na jingaui Pantekotu.

Pɔlu wa tɔɔ inɛ ngboi Efɛɛzu ŋau sukudɔ̃

17Ŋɔi hai Milee Pɔlu í bɛ ama Efɛɛzu í ni a kpe inɛ ngboi igbɛi inɛi Jesu ŋau wa a naa a ba nŋu bɛ. 18Iyi inɛ ŋau à to wa bi tɛɛ ŋɔi í sɔ̃ ŋa í ni, iŋɛ taka nŋɛ ì mà ŋa bɛi ǹ jɛ kuwɛɛm waati iyi ǹ wa si anini nŋɛ hai ajɔ sinte iyi ǹ naa si ilɛi Azii. 19Ǹ ce icɛi Lafɛ̃ɛ Jesu do ara ku kaye do cikãaju ajɔ, ǹ nɔ ǹ yɛ wahala si na iyi í jɔ̀ Zuifu ŋau à leekĩ si aŋa a kpam. 20Iŋɛ taka nŋɛ ì mà mii iyi á ce nŋɛ aranfãani fei, n kù singa nŋɛ kãmaɛ. Amma ǹ sɔ̃ ŋɛ ntɔ fei nɔ ǹ kɔ ŋɛ si cio si bantuma do si kpasɛ̃ nŋɛ ŋa. 21Ǹ sɔ̃ Zuifu ŋa do hai jɛ Zuifu ŋa ǹ ni a kpaasi idɔ nŋa a sinda si Ilaaɔ̃ a dasi Lafɛ̃ɛ nwa Jesu naanɛ. 22Nɔ wee bɛbɛi má, Hundei Ilaaɔ̃ wa tilasim n bɔ Zeruzalɛmu, nɔ n kù mà mii iyi á koo bam bɛ. 23Amu de ǹ mà si ilu fei Hundei Ilaaɔ̃ wa sɔ̃m iyi piisɔ̃ɔ ku ce do ijuukpã wa degbem. 24Amma kuwɛɛm kù jɛ ngɔgɔ bi tom, n kù nɔ n kù wa n saaluɛ, amu de n ba n tambɔ icɛm iyi Jesu Lafɛ̃ɛ í dasim n ce. Icɛu nŋui í jɛ n sisi laabaau jiidai didɔ̃ iyi Ilaaɔ̃ í ce nwa.

25Iŋɛ iyi ǹ dabii ǹ wa n waazo idei bommai Ilaaɔ̃ si aninii nŋɛu fei, nsɛi ǹ mà iyi i kaa yɛm má ŋa. 26Na ŋɔi í ce ǹ wa n sɔ̃ ŋɛ si bantuma hai nnyi, bii inɛ gɔ nŋɛ í na í ce nfe kù jɛ idei irim, 27domi ǹ sisi nŋɛ ide iyi Ilaaɔ̃ í jilɛ fei n kù singa nŋɛ gɔgɔɛ. 28I mu ara nŋɛ ku sĩa, nɔ i ya maa degbe inɛ ŋa iyi Hundei Ilaaɔ̃ í da nŋɛ si awɔ fei, aŋa iyi à jɛ igbɛi inɛi Ilaaɔ̃ ŋa iyi nŋu takaɛ í ya do njɛi Amaɛ. 29Ǹ mà do anyim amanɛ ŋa aa naa si anini nŋɛ bɛi mɛɛmui sako í ya naa si angudã ŋa, a kaa nɔ a jɔ̀ ŋɛ. 30Nɔ baa hai si inɔ nŋɛ inɛ gɔ ŋa aa kpaasi ntɔu ku ba ku jɛ ibo nɔ aa wa inyii itĩi woo dasi Jesu naanɛ ŋau a jɛò mɔcɔ nŋa. 31Na nŋu, i wɔ njoo ŋa. I ye gigi ŋa bɛi amu takam ǹ ce adɔ̃ mɛɛta bi tu ŋɛ Efɛɛzu bɛ wo nɔ ǹ kɔ iŋɛ baa yooma fei alɛò daakɔ do cikãaju ŋa.

32Nsɛi ǹ so ŋɛ ǹ wa n daa Ilaaɔ̃ si awɔ nɔ ǹ wa n da nŋɛ idei didɔ̃ɛ si awɔ. Nŋui á yɔkɔ ku mu nŋɛ gbugbã nɔ ku mu nŋɛ tubu iyi í jilɛa inɛ ŋa iyi í cica a jɛ tɛɛ fei. 33Waati iyi ǹ wa bi tu ŋɛ, iŋɛ taka nŋɛ ì mà ŋa iyi n kù nɛ kɔdɛɛi isɔ fũfũi inɛ gɔ hee má jɛ wura walakɔ ibɔɛ. 34Ì nɔ ì mà ŋa iyi ǹ ya n ce icɛi do awɔm n bɛi n ba bukaatai mii ŋa iyi ǹ bi fei, amu do inɛ ŋa iyi à waa toom. 35Ǹ nyisi ŋɛ si mii fei iyi á sĩa i ce icɛ bɛɛbɛ ŋa i ya sobiò hai nɛ gbugbã ŋa nɔ i ye gigii idei Jesu Lafɛ̃ɛ iyi í ni, woo ce amua í nɛ inɔ didɔ̃ í re inɛ iyi wa gba amuau.

36Iyi Pɔlu í fɔ bɛɛbɛ í tã ŋɔi í gulɛ aŋaò ŋa fei nɔ à ce kutɔɔ. 37Ŋɔi aŋa fei à kpata nɔ à yáa à tɔɔɛ sukudɔ̃ do kubi 38à bɛi à suu hee bi akɔi inyiu. Aŋa fei à wɛɛò inɔ kufɔi si na iyi í jɔ̀ í ni a kaa na a yɛ nŋu má.

المحددات الحالية:

Woo bɛ ŋa 20: MKL

تمييز النص

نسخ